الأربعاء، يناير 25، 2006

منييييييييييير

نفسى اتكلم عن حاجة لسه حلوة فى حياتى دى بقى حاجة مقعدش انقد فيها واحرق فى نفسى ومن اكتر الحاجات اللى بعشها بقى وتفرحنى جدا لما احب اغير مود الحزن اللى تقريبا بيبقى معظم الوقت فى حياتى اقعد اسمع منير وارقص واتنطط ساعات زى الاهبل كمان بس ببقى لوحدى ادام الناس عمرى ما كنت كده الا قليل حصلت

منير يا مطرب حياتى يا كلامك احلى كلام احب اسمعه واقوله مع اجمل موسيقى و طرب يا نوبى يا رمز لاجمل واعز مكان فى مصر كلها يا مظلومين

منير يا اللى مش عارف كلامى يبدأ ازاى او يخلص بيك

يا اللى اتكلمت عن كل حاجة يا اللى غنيت للحبيبة فى اجمل رومانسية
(عنيكى تحت القمر – حرية –فى عنيكى غربة وكتير اوى ميتعدوش واخاف انساهم ) يا اللى غنيت للابنة (المريلة الكحلى) يالللى غنيت للجد عن انه الوطن وغنيت للجد مع احفاده (مقدرش –جدو) يا لللى غنيت للوطن اجمل اغانى الوطن يا الللى اكتر واحد غنيت للوطن ( غصب عنى –شمس المغيب – اتكلمى- قلب الوطن مجروح –ايه يا بلاد يا غريبة- الليلة يا سمرا- مساكن شعبية - بلاد طيبة - نلضم اسامينا وغيرها برضه كتير وكتير)
يا للى غنيت لحال الناس (الناس نامت - ساح يا بداح – وغيرها كتير)
يا للى قلت للغرييب بلدك هنا حضنك هنا (قول للغريب)
يا للى اتكلمت عن مضيعة الوقت فى (يا بنت يا لللى) وكنت بتقول يا بنت يا للى بتغزلى قفطانه غزل الصبح ليه على الليل تحلى خيطانه
يا للى اتكلمت عن الحياه عموما فى( سر الحياه – بحر الحياه وغيرها كتييير)
يا للى غنيت للطير وللبحر ولكل شئ فى الطبيعة (امانة يا بحر- يا طير - يا طير يا طاير-برج حمام- يا نورس- شجر الليمون- عنقود عنب وغيرها كتير)
يا لللى غنيت للموت اللى مفيش مفر منه حتى لو عملت حاجة فى دنيتك او معملتش اخرتك الموت(شتا)
يا للى غنيت لفلسطين(القدس – العمارة وغيرها)
يا للى اتكلمت عن الامل وخليتنا نعيش بيه(على صوتك – ربك لما يريد- هون يا ليل وغيرها )
مخلص الكلام بس كتير اوى وعمره ما هيخلص يا منير يا مجموعة من ال(حواديت) يا اكبر (حدوتة مصرية) يا للى (علمونى عنيك ) اسافر واسامح واحب الناس واحبك يا صاحب اجمل عيون ببرائتها يا صاحب اجمل بسمة يا (اسمرانى اللون) حبيبي يا اسمرانى

الثلاثاء، يناير 24، 2006

الشعب الاهبل

نعم نحن شعب اهبل هذا رأيي ولى مطلق الحرية فيه واقوله شاملا علينا جميعا ولكننا ربما بنسب متفاوتة
ان نكون نصفنا جاهل امى لا يقرأ او يكتب فهى ازمة تريد الكثير
اما ان يكون نصفنا الاخر المفروض انه متعلم نجده (بالعافية) يقرأ ويكتب وهناك من ليس له بشئ سوى قراءة ومذاكرة دراسته فحسب اما الباقى او قراءة اى شئ اخر فهو هبل ونصف المتعلمون واكثر هذا رأيهم فقراءة شئ غير دراستك لهو لهو وعبث وضياع وقت فارغ
وهذا ما يثير غيظى كثيرا جدا ولكنى احاول اخفاء غيظى وكبته امام هؤلاء الجاهلون فهم فى رأيي اكثر جهلا ممن لم يتعلموا من الاصل
ان يظن فرد ان قراءة او كتابة اى شئ مجرد لغو لهو غباء بالتأكيد غباء يشمل بلدنا كثيرا
لربما بعد ذلك اجد ان القراءة ضارة جدا بالصحة ومضيعة للوقت واخطر من ان تشرب سيجارتك او ان تكون اخطر من كلماتك التى ربما تكون فارغة بما انك فارغ
وبعد انتشار الانترنت الذى يستخدمه اكثر من نصف مستخدميه ايضا للشات والحديث فقط وكأن ليس له اى فوائد اخرى وبالطبع التى ستجد اساسها قراءة قراءة اى شئ سواء سياسة اخبار قصص روايات اشعار اقتصاد علوم اى شئ فكل ذلك متجاهل بالطبع لاننا نفس الشعب الاهبل الذى لا يقرأ من الاصل اى كتاب فى يده ولو يحاول فى صفحة الكتاب الاولى حتى يعرف هو جذبته ام لا ؟ او يحاول قراءته كله ليرى هل قبل ان يقرأوه مثلما بعد قراءته ؟
ان كان كل كلامى هذا عبثا يا من قرأت هذا وضيعت وقتك الثمين فلتعرف انى انا الاهبل وحدى فقط او ربما يشاركنى الهبل قلة قليلة جدا وعندها تعرف انى اخرف عندما اقول اننا جميعا شعب اهبل

الاثنين، يناير 23، 2006

النشر الغير منشور

لم اكن يوما كاتبا ولا مؤلفا وربما لن اكون لست قيمة كبيرة حتى لاحزن على عدم نشر شئ لى لكن ما حدث
كانت هناك مسابقة واشتركت بها لعل وعسى ونجحت وقيل لى انه سينشر لى العمل فى العدد الثانى وانتظرت و اخذت اتخيل ولم اصدق كأن شئ سيعوق ذلك ونزل العدد الثانى بالفعل وكانت المفاجأة المحسوسة انا لست موجودا.. اعرف انه عمل ربما لايستحق ان ينشر .. لا يستحق ان يكون له قراء .. ولكنه كان اتفاق وواقع بانه سينشر .. لكى لا اكثر فيصيبنى الملل قبل من ربما يقرأ هذا انه سينشر فى العدد الثالث وهو ما وعدت به ومن جديد انتظر لربما حلم صغير ضئيل لى يتحقق فى حياه بائسة
لا انكر حق دار ليلى انها كانت متعاونة كثيرا ولها افضال كثيرة ويكفى انها فكرتها هى ودون مقابل مادى ولن تجد ربحا كثيرا من نشرها هذا عموما لذا فلها الشكر مهما كان و محمد سامى رجل كثيرا احبه واحترمه واعرف انها غفلة منه وقد تأسف وسيحقق نشرى فى العدد الثالث من بدايات

الأحد، يناير 22، 2006

موتة

قالوا عيشة
قلت موتة
قالوا حلوة
قلت موتة
عيشة حلوة
موتة ..موتة

عمر ماشى بس ميت
سنين تفوت
قلب يموت
حسيتوا بيه؟
حد لاقيه؟

ابدا حد مخبيه؟؟

شفتوا تبقى موتة
توتة توتة
كانت حدوتة
حلوة ملتوتة
رااحت..
كان شئ فينا
راح مننا
مبقاش لاقينا
ضاعت..
كنا بيها حياه
دلوقتى موتة
موتة

ملازمى الذى لم اراه

كثير من الاصدقاء نعرفهم فى هذه الحياه، كثير من تحافظ على صداقته وتحبه وتعرفه اكثر
ها هو صديق جديد يبدو عليه الطيبة والغرابة ..
طيب هو .. خدوم يحب الاخرين هادئ كثيرا صامتا فى اوقات كثيرة حتى انه ممل بعض الاحيان حتى تحس انه يسبب الملل لنفسه احيانا .. يخاف كلامه يخاف تصرفه.. هو مراهق متناقض احيانا.. حائر فى كثير من الاشياء حائر فى حيرته حتى .. يكره الكثير من الاشياء ويحب الكثير والكثير .. عنيد هو واحيانا عصبي ..
لقد عشت معه وقت طويل حقا كى اعرف كل هذا حتى انى نسيت مدة معرفتى به لكنها قديمة جداا ولكن كيف لم اكن اراه!!!
لكم احب فيه هدفه السامى النبيل هدفه الصعب المنال جدا .. بائس هو دون ان يعرف لما .. وحيدا رغم وجود عائلته واصدقاءه ..
كثيرون يرونه يتكلم ويظهر كالنائم بصوته الخامل وهو لا يشعر بذلك ابدا
هو ذو وجه اسمر عيناه سوداوين كثيرا الدموع دون سبب ولسبب .. ذو شعيرات على انفه (قليلون من هم كذلك) و هو نحيف كشكل عام..

الاثنين، يناير 16، 2006

زهرة بحر

فى زرقة سماء صافية..
فى جو ذات نسيم عطر..
تهيج أمواج بحر..
أمواج بحر قلبي..
لتصطدم..
لتصطدم بصخورك..
فتعود خائبة..
قلبك الحجر حائلا..
يقف مانعا..
ليصد أمواجى..
لتزيد دموعى فى بحري..
لتثير اكثر أمواجي..
لتغيب الشمس بداخلي..
تصير بلونها البرتقالي..
فيسيطر على السماء..
وتزداد الأمواج ..
وتتوالى ..
تندفع الى صخورك..
تحاول تحطيمها..
لتصل لك..
تستمر ..
وتعود كل يوم ..
الى أن أجدك ..
ذات يوم..
زهرة..
تملأ بحري..
تنضر بداخله..

الكبير يحدث نفسه

نفس الكلام السابق ولاخر مرة اكتبه شئ ادعى به على نفسى انى شاعرا


كنت بقول على نفسى زمان
عندى احساس حب وحنان
كنت انسان
كنت ماشى ورا ضميرى
كنت بملا الناس بخيري
كنت بعيش زيي زى غيرى
بشجع واحمى كل جبان
اجمد قلبه يكون فيه امان
كنت بعلى من الفنان
رسم موسيقى ايا كان
كنت فاكر دايما ربى
كان بيزيد له حبى

فات ده كله
كان زمان
حتى كان فى غير المكان
دلوقتى اتغير مصيرى
بعد ما لبست الميرى
وعليت بيها عن كبيرى
وصلت وكله بقى فى ايدى
اعياد مصر بقت عيدى
الشعب عايش ولو انه جعان
عقولهم خليتها جنان
عشان المركز بقيت سجان
ظالم مظلوم قافل بيبان
لو حد عارضنى يبقى خان
صاحب الحق يكون غرقان
سارق قاتل يبقى انسان

كنا فى حال
دلوقتى فى حال
ما بقاش فاضل اى مجال
اى حق يبقى خيال
لو تطلب عدل يبقى محال

ورجعت اكتب غصب عنى

شئ اخر مما ادعى على نفسى به انى كاتبا شاعرا

كتبت هذه عندما قررت العودة للكتابة بعدما كنت اريد التوقف و لكن لم استطع ولم اجد مانعا من ان اكمل حتى لو كنت سيئا و الحالة السابقة كانت بعد قرار العودة


ورجعت اكتب غصب عنى
بعد الكلمة ما هربت منى
جتلى كتير وكتير
خلتنى ارجع تانى لقلمى

خلتنى اقول واتكلم عنى
غرقان وحزين فى بحر دموع
ابعد عنها والاقى رجوع
غصب عنى

ورجعت اكتب واكتب
والسبب انى مليش صاحب
غير قلمى اكلمه واداعب
يقبل منى كل كلامى
يقف حبره لو غلطان
لكن عمره ما حبس انسان
خلانى حر كاتب فنان

بكتب كلمة واقول دى لمين
كلمة اخرها على فين
بكتب كلمة عشان نفسى
كلمة تفكرنى بامسى
يمكن تعجب حد سمعنى
يمكن يشتم ولا هاممنى

حالة

ساكتب شئ مما ادعى انه من كتاباتى الشخصية مما يجعلنى ادعى على نفسى بأنى كاتب

حالة

عشت شبابى
وجاتلى الحالة
حالة محالة
بدون حلالة

شاب ونفسه فى بنت جميلة
يسهر فيها ليلة وراليلة
يحكيلها حياته بالتفصيلة

شاب وشايف احتلال
فلسطين عراق
مفيش حلال
شايف حاسس بس عاجز
طيب فى دى عاجز جايز
لكن حتى فى بلدى حياه
عيشه زى موته ونقول حياه
حاكم ظالم ماسك غانم
يقولوا انتخبوا بالتزوير
يحرق ناس يبقى وزير
يسرق ينهب عنده ضمير
مرتاح ونايم بغنايم

يقولوا شباب حر فى سجون
يطلب عدل يكون ملعون
لو اقول الحزب الوطنى
يملو جيوبى يعلو مراتبى
لو قلت عليه وثنى
يقولوا عليا بلطجى واطى

مجتمع مكبوت
عايش فى سكوت
فى مزاج ممنوح
حشيش وغيره مسموح
ظابط طالب كله يعيش
كله رخيص موجود زى عيش

كان زمان كلامى حلالى
دلوقتى لسانى جلادى
كنت زمان شايف اعمالى
دلوقتى فى بيتى مكانى
كنت بقول واشيل عن غيرى
دلوقتى بقول خلينى فى حالى
قلت شوية ابرر بيهم
بس كتير غيرهم تلاقيهم

الجمعة، يناير 13، 2006

بلاد الرعب

عزيزى دكتور احمد خالد توفيق
ياما كتير حبيت رواياتك و حبيت ادب الرعب عموما لكن دلوقتى رغم انى هفضل اقرالك وهفضل احب رواياتك بقى صعب اوى انى الاقى منك الرعب اللى احس بيه
ويكون حقيقى لان خلاص الرعب توافر كتير فى بلاد الرعب
فعلينا ان نشكر الامن المركزى اللى رعب الكل باللى عمله فى المواطنين واللى حصل فى السودانيين وكمان نشكر بلطجية الحزب الوطنى اللى عملوا اكتر رعب تشوفه وانتشار السفاحين زى اللى دخل تلات بيوت وقطعهم حتت فى رعب اكتر من كده
وزى الميكروباصات اللى سواقين ولا هامهم وداخلين فى اى حاجة والناس بتموت
حقيقة البلد توافر فيها كل شئ حتى الرعب فى كل مكان فى بلدنا
اشكر كل من ساهموا فى سعادتى بوجود الرعب وعلى ارض الواقع ولك يا دكتور احمد ان تلعنهم فقد صعبوا مهمتك فى ايجاد اكثر رعبا من هذا الذى فعلوه

دكتور احمد هذا لا يقلل من قدراتك الرائعة فى الكتابة ولكنى اقول فقط ان هناك منافسة وان كنت انت اديبا ونافع للقراء فهناك من هم ليسوا روائيين بل فاعلون حقيقيون

الأربعاء، يناير 11، 2006

معهد هندسة الصرف الصحى للتدريب على الطيران فى امبابة

اول موضوع اتكلم فيه بقى ولانه عاملى عقدة وهو برضه متعلق طبعا ببلدنا اللى محدش يفهم لها حاجة
المشكلة انى دخلت كلية محدش يعرفها وكمان التخصص زودها تعقييد

المعهد هو هندسة طيران وهو بيطلع مهندسين طيران وده الوحيد غير جامعة القاهرة اللى الهندسة فيها القسم ده وبيطلع اقل من المعهدالمهم بقى ايه ان المعهد فيه اقسام تانية اتصالات ومدنى وعمارة
طيب اتصالات واهو بيتقال عشان اتصالات الطيران
لكن بقى لما نقول عمارة يفتكروها عمارة مطارات وبس مع انى مليش علاقة بالطيران وكل المشاريع اللى بندرسها معمارية عادية وانى هكون معمارى عادى زى اى معمارى يمكن زايد خبرتى اللى هتكون فى بنى المطارات واحنا كمان اول دفعة عمارة هناك
الكلية فى امبابة مكان مطار امبابة القديم
الدكاترة هما دكاترة جامعة القاهرة الهندسة نفسهم و المعهد تابع لهندسة القاهرة من حيث تحضير ماجستير او دكتوراه
من المشاكل فيها كمان انهم بيفتكروها خاصة لكنها حكومة وتبع وزارة الطيران وتبع وزارة التعليم العالى كمان وموجودة فى التنسيق وفى المرحلة التانية وبتاخد علمى رياضة ومجموعها من 82 ل84 حسب كل سنة
صحيح هى بفلوس تمن الاف لكنها حكومية
يعنى المعهد بياخد الاف فى السنة مع انها حكومة وكمان بمجموع طيب مش سرقة دى ؟ وكمان المعهد فى اسوأ حال فعلا يعنى مهزلة انه يبقى وزارة الطيران بالمنظر ده و فلوسها فى جيب وزيرها طبعا و كمان مش عارفين هيشغلنا ولا هيضحك علينا بعد ده كله و كلها وعود بس

اتمنى الاعلان عن الكلية عشان القصة دى بتتحكى لكل اللى لسه بيعرفنى فيا ريت تبقى زى اى كلية وتتعرف
انتظروا قريبا هتكون
اكاديمية مصر لعلوم الطيران لان فى غير معهدنا تلات معاهد وهما معهد الطيران ومعهد المراقبة الجوية ومعهد حاسبات ومعلومات وعلوم فضاء
و كلهم بفلوس و البطالة مستمرة 

الثلاثاء، يناير 10، 2006

ليه بلوجر؟؟؟

اكتب ولا مكتبش
اكتب ولا مكتبش
كان زمان المنتديات هى اللى بحب اكتب فيها دلوقتى مليت منها ومبقتش مشارك اوى غير ان فى حاجات كتير ممكن اكون عايز اقولها وملاقيش مناسبة فى المنتديات غير انى بحب الكتابة ومفيش فرص كتير
بكتب عشان لو حد حب يقرأ يقرأ ولو محدش قرا انا هقراه هرجع بعد فترات اشوف ايه اللى كنت بقوله وهستفيد منه
البلوجر محدش هيقيدنى هشوف اراء الناس طبعا يمكن يقنعونى ويمكن افضل برأيي