الاثنين، مايو 29، 2006

ايه اللى بيخلينى احس بالسعادة؟؟

اجابة لسؤال منار عن ايه اللى بيخلينى احس بالسعادة؟ وايه اللى بيفرحنى؟

انى اعمل حاجة احس انى رضيت بيها ربى
انى اعمل حاجة تفرح اهلى
اللى بيفرحنى انى اسمع منير على روقان او احضرله حفلة بفرح اوى
انى اشوف فيلم حلو فى السينما و فى السينما احسن عشان بحبها
انى اقرا رواية جميلة وعجبتنى
انى اقعد مع اصحابى قعدة حلوة فى اى مكان حتى لو قهوة
انى الاقى حد كاتب تعليق فى البلوج اللى انا بتكلم فى مع نفسى ده (طبعا فى ناس بترد اشكرها)و المهم انه يعجبه فعلا اللى انا بكتبه
انى اقرا او اسمع شعر جميل احس بيه فعلا
لماالاقى مشروع التصميم بتاعى عجب الدكتور وخدوه فى الكلية
لما امشى فى شوارع احبها واشوف بيوت و عمارات جميلة زى وسط البلد كده
لما اروح اسكندرية والاقى البحر جنبى طول الوقت
لما الدنيا تمطر وامشى تحت المطر
لما افتكر ايام عدت عليا وكانت جميلة (زى ايام اسكندرية وزى يوم حفلة فتحى سلامة فى رمضان)اى ذكرى حلوة
كفاية كده


دلوقتى اى حد يقرا يرد على السؤال برضه يا هنا يا فى بلوجره

الأحد، مايو 28، 2006

حكايات الغريب

اعشق فيلم حكايات الغريب و لم اكن اعرف انه قصة من مجموعة قصصية لجمال الغيطانى و عندما اشتريتها ووقرأتها وجدتها جميلة ومن اكثر الكتب التى اعجبتنى و معظم القصص داخلها بنفس روح حكايات الغريب ولكن تبقى هى الافضل بينهم

الأربعاء، مايو 24، 2006

فلت العيار


فلت العيار
من البندقيه وانطلق
وسط الحصار
والدم طرطش علي الورق
كان الكلام مكتوب رصاص
كان الكلام مكتوب رصاص
مقتول بيطالب يوم قصاص
الدم غالي
بس احنا ليه رخاص
فلت العياروالحادثه
كانت انتحار


محمود سراج

الاثنين، مايو 22، 2006

وطن الاوبئة المزمنة

وطن الاوبئة المزمنة هذا الوطن يحتاج الى ابادة كاملة حكام وشعب وانتاج بشر اخرين يعيشون فى هذا الوطن وطن يأتى بعكس كل ما هو موجود فى هذا الوطن بداية من الحكام والشعب كنظام دولة و بالشعب نفسه الذى يمتلئ بالكثيير والكثيير من الاوبئة ومنها ما ساحول ذكره واعتقد ان هناك اكثر فنحن لا نكف
الوباء الاول ديانة اخرى قادمة ليست بديانة ولكنها بدعة و خرافة تسمى البهائية و هم جاءوا لاثارة الفتن والمشاكل تزداد فى الوطن وهم بالطبع كفرة و اولهم جاء بانهم ارتدوا عن الاسلام فهم يحل دمهم وابنائهم الذى ولدوا كذلك حلهم ان يطردوا من هذا الوطن و عدم الاعتراف بهم نهائيا او ان يظلوا كما هو عليه بانهم يكتبوا مسلمين فى الاوراق الرسمية فذلك يجعلهم عندما يتعبدون الناس يعرفوا انهم مسلمون لكن بافعال اخرى اما ان نعترف بهم فستكون مصيبة حيث تجد الديانة انتشرت و عندما يصلى احدهم ويقول لمسلم انى بهائى ويتسائل المسلم عن معنى البهائية هكذا قد يجتذب اخرون لهذه البدعة وهذا الكفر الديانات معروفة الاسلام والمسيح واليهودية هذه الديانات السماوية فقط اى شئ اخر هو بدعة.
الوباء الثانى لم اكن اتخيل انه بهذا الوطن هكذا لكننى للاسف بدأت اعى بوجوده هو الشذوذ من النوعين رجالا ونسائا و لا اعرف كيف جاء هذا و كيف اصبحنا كذلك .
الوباء الثالث الجنس عموما و تجد فى هذا الوطن كثيرا من فاعليه والزنا وغير ذلك تجد ما هو اكثر حيث يخدع بنات من شباب وذلك نتيجة لاشياء كثيرة مثل ان تكون تحبه وضعفها امامه.
الوباء الرابع شرب الحشيش والمشروبات الكحولية والبيرة كل هذه الاشياء التى انتشرت وكثيرا ما يتداولوها دون وعى الاهالى او اى احد غير الاصدقاء المشاركين.
الوباء الخامس القتلة الذين يقتلوا بابشع الطرق ويقومون بقطع الاعضاء التناسلية و غيره.
الوباء السادس هو اعتبره وباء عام عند كل الشعب بلا استثناء وهو المرض النفسى فكلنا مرضى نفسيا.

لابد ان هناك الكثير والكثير من هؤلاء لكنى ربما نسيتهم وربما لا اعرف اوبئة اخرى لكنى كتبت ما اراه اهم الاوبئة الوطنية
-----------------------
2011
برضه اتغير تفكيري عن الموضوع ده تماما لان الوعى زاد اكيد و مش همسحه برضه عشان اكون شايف اني كنت مخطئ
الحرية من اهم مطالب الحياه
الموضوع اصبح مختلف تماما

الجمعة، مايو 19، 2006

مشكلة مين فينا

نفسى اعرف هى مشكلة مين يمكن المشكلة دى بتحصل مع ناس كتير زى ما بتحصلى المشكلة هى الاباء والابناءوبالتحديد فى الدراسة
مع انى الحمد لله شايف نفسى ماشى فيها كويس وبنجح كل سنة تقدير جيد وربنا معانا ونحافظ على التقدير ده الا انهم مبيرضوش بحاجة زى دى وعلى طول عتاب ويا ابنى ذاكر ومش عارف شوف جارنا اللى فى تجارة واتخرج منها شفت بقى معيد ذاكر بقى وشد حيلك عشان تبقى معيد و كتير بقى الكلام ده وعلى طول وعشان كده مش بقعد معاهم اصلا يا فى اوضتى يا على الكمبيوتر ومليش دعوة بيهم وطبعا يقعدوا يتكلموا ويقولوا يا قاعد على الكمبيوتر بتلعب اصل الكمبيوتر عندهم كل اللى بعمله فيه انى بلعب اى حاجة تتعمل عليه اسمها بلعب يا اما قاعد فى اوضتك بتقرا فى كتب وروايات ملهاش لازمة طب امسكلك كتاب هيقتلونى والله .
اكيد كل واحد بيتمنى يكون احسن واحد فى دراسته واكيد انا ماشى نفسى اجيب اعلى تقديرات بس هى عمرها ما بتيجى زى ما هما فاهمين يا اما انا غلط يعنى انا بحاول اعمل اللى عليا وغيرى برضه بنفس المنطق بس بتفرق بين واحد والتانى لظروف معينة مش حكاية ذكاء ولا مذاكرة اكتر لا فى حاجات كتير بتأثر فى الموضوع دهوفى دراستى اصلا احنا عددنا قليل جدا و كلنا بنبقى فى الشغل الواحد او المذاكرة مع بعض وامى اللى مبترحمنيش تقولى طب ازاى ما دام انتو بتذاكروا مع بعض ومحدش بيقعد يذاكر اكتر من التانى امال بتفرق تقديرات ليه ؟ طب اقولها ايه دى يا ستى حسب اعمال السنة والدرجات اللى بتفرق ما بينا والامتحان يعنى كلنا مذاكرين بس مش كلنا هيحل نفس الحل فى الامتحان مش حل جماعى هو كل واحد زى ما دماغه بتجيب هنعترض.
انا شايف ان ربنا مقسمها وكل واحد يرضى ويحاول يجتهد زيادة شويه وليه نكره ان حد متفوق علينا و هو يستحق و لو بمحاولتنا قدرنا نعديه يبقى الحمد لله ولو مقدرناش وده طبيعى لان مستواه من الاول عالى
والواحد لما يكون عالى صعب يقل الا بظروف فهيفضل دايما عالى اما لما يكون متوسط بيحاول لحد ما يعلى ويمكن مرات يعلى فعلا عن الاول ومرات تانية يرجع تانى .
هو ربنا مقسمها وكل واحد ونصيبه
ارحموووونى بقى
يا رب

معلش هى مشكلتى بس بطلع اللى فى نفسى عشان متكتمش وانفجر
دوشتكو

الجمعة، مايو 12، 2006

شاغلوونى

مش عايز اتكلم فى سياسة اى حاجة
مش عايز امشى فى الشوارع اشوف الناس عيونها حزينة
مش عايز افتح التلفزيون اسمع اخبار
مش عايز الاقى حد بيقولى قبضوا على حد
مش عايز اعرف ان كفاية بتعمل حاجة
مش عايز اعرف ان الامن المركزى بيضرب ناس
مش عايز اعرف ان فى مظاهرات
مش عايز اعرف ان فى اعتصام للقضاه
مش عايز اقرا كل اربع احداث جديدة من جريدة الدستور
مش عايز اقرا الجرايد الوطنية والاقيها اخبار عن الرئيس راح وجه
مش عايز اعرف اى حاجة


اعمونى واطرشونى وبجهلى اخرسونى
عن دنيتكم خبونى
دارونى
ابعدونى عن الشوارع والبيوت والناس


شاغلونى بكل طريقة تافهة
خلونى اعيش دنيا مزيفة
خلونى اشوف حياه وفرحة ولو كانت مؤقتة
خلونى طيب اشوف حاجة حلوة احبها
خلونى حتى احب
حد يدينى امل

شاغلووونى

حقوق المرأة

دلوقتى عمالين يقولوا ان اسم الست لازم يكون فى البطاقة ويكون الاسم بالست مش بالراجل بس يعنى مثلا انت اسمك محمد احمد لا تبقى محمد فوزية يا سلام شفتوا العبقرية وده لان الست مش واخدة حقها برضه و كمان الاقى عضو فى فى جمعية للمرأة وبيناشد بالموضوع ده ونفسه اوى يبقى اسم امه ورا اسمه عشان ده حقها والكاتبة منى حلمى اللى يا سلام على عقلها حبت تعمل حاجة لامها فى عيد الام اللى ملوش لازمة اصلا فقالت انها تطالب باسمها يكون مكتوب فى البطاقة و يكون ورا اسم الابن طيب انا مع ان المرأة لسه مخدتش حقوقها كاملة وان لسه تعليم البنات مانعينه فى قرى كتير وانها لسه مظلومة لكن حاجة زى دى بقى لا حقوق مرأة و لا حقوق حاجة خالص و دول اكيد ندعيلهم ربنا يشفيهم ويشفينا من الفذلكة المصرية اللى ملهاش لازمة واعتقد ان معظم الستات والبنات مش مع الاراء الغريبة دى

الخميس، مايو 04، 2006

الملك هو الملك

اخيرا حققت اللى عايزه ورحت المسرحية وطلعت طبعا زى ما متوقع لها انها جامدة جدا ومهما حكيت عنها مش هيبقى زى ما تدخلها المسرحية سياسية كوميدية ومحمد منير اكتر من رائع وهايل وصلاح السعدنى رهيب و موتنى من الضحك كتير وكان له كلام هايل ميتنسيش وباقى الممثلين كلهم كويسين
كان يوم جميل فعلا جدا وكنت فرحان فرحتين فرحة انى اشوف منير وفرحة المسرحية الهايلة نفسها
مش عايز اتكلم عن القصة والاحداث للمسرحية الكلام مش هيكون زى ما تشوفها

الاثنين، مايو 01، 2006

احمد فؤاد نجم يبدع

عليا الحرنكش ياريس مبارك
فى عصر مزركش ملون بنارك
لابايعك وابايع حكومة حمارك
ملعون ابو اللى يقدر يقاطع قرارك
نهاره مقندل وليله مبارك
فهمبك وهجص وطلع فى ديننا
اكيد هو طالع يشاهد جمالك
جمالك مبارك سوزانك سوزاننا
يامحلا حصارك لمصر اللى جالنا
نسيمها فى عصرك بيشوى فى بدننا
اؤيد وابايع فخامة جلالتك
وايد اى واحد بيمسح ريالتك
ولانك سر باتع هاننسى هبالتك
فاقعد ياريس ودلدل حمامتك
حمامة السلام حمامتك ياريس
سلامة الحمامة وسلامتك ياريس
على تل مصر ياريتك تهيص
خرابه فسيحة عليها تمتيس
واامر تطاع فشعبك مفيص


احمد فؤاد نجم