الأربعاء، أغسطس 30، 2006

عم الكتكوت

مش ترحمنا وتهدى بقى يا عم الكتكوت محمد سعد انت!!
دخلت فيلم محمد سعد و احب ان اوضح غرض دخولى اولا وهو انى عامة احب دخول السينما نفسها حتى انى احيانا ادخلها ليس للفيلم الذى اريده فهذا اليوم ما وجدته كتكوت فدخلته مع بعض الاصدقاء المهم نعود لسعد انا مقتنع انه ممثل جيد ويستطيع عمل اشياء كثيرة لكن يجب عليه التغيير و يكفى تكرارا
الفيلم بدايته حوالى ربع ساعة عم الكتكوت عمال يتنطط ويرقص ويعمل حاجاته الغريبة دى لحد ما تمل و طول بقى ما انت شايف الفيلم مش هتشوف غير كتكوت اما الباقى مش مهم و شوية تلاقيه قاعد مع واحد عمال يصفر وينغم ببقه و شويه مرة تانية تلاقيه عمال يخبط
برجله على الارض و يمشى الفيلم كله تقريبا فى استعراضات مللنا منها صحيح هتضحك شويه فى الفيلم عشان بس محدش يقول انى مقلتش ان فى ضحك و على نهاية الفيلم بقى هتلاقى عم الكتكوت بقى وطنى وهيحمى المترو انه ينفجر وياخد القنابل ويرمى نفسه بيها فى النيل بعدها يطلع هو زى الجن و يخلص الفيلم على كده
ايه فى حاجة
اه باقى الممثلين اه هو كان فى غيره ممثلين اه ده هو كان عامل دور تانى والحمد لله كان يمكن يثبت برضه انه يقدر يعمل ادوار بعيد عن اللى بيكرره بس مفيش فايدة
اما بقى حسن حسنى فتقريبا كان ليه كلمتين هما اللى قالهم فى الفيلم غير كده مفيش اما هبة السيسى فالكلمتين حتى وفرتهم ومقالتش حاجة اعتبرها طيف عابر محستش بيه اصلا اما ادوار الاشرار فى الفيلم فمش فاكرهم اساسا بصراحة

ومع ذلك اعلى ايرادات طبعا محمد سعد و ما زال ينطلق!!!!!!!!!!!!!

السبت، أغسطس 26، 2006

واحد من الناس وبلال فضل

على الرغم من انى دخلت الفيلم ده من فترة ومن ساعتها عايز اكتب عنه بس الظروف بقى المهم ادينى جيت
الفيلم كقصة واحد على قد حاله و حظه وقع مع الكبار وبقى فى موضوع انتقام منهم القصة تقريبا عادية ومش جديدة لكن السيناريو كان حلو و مشى من غير اخطاء و المهم ان القصة بتكلم عن زمنا ده واللى بيحصل فيه حتى لو كان مكرر بس جاى بطريقة حلوة و بالنسبة للممثلين فأنا شايف ان كريم يعتبر احسن ممثل حاليا فى مصر وكل مرة دوره حلو و منة شلبى بتتقدم فى ادوارها و محمود الجندى كنت مبسوط انه رجع يمثل تانى الراجل ده جميل و من خلال الفيلم بقى بما ان اللى كاتبه بلال فضل هتكلم عنه هو بقى الفيلم ده كان من افلامه الحلوة واللى هحبها ليه زى ما حبيت ابو على والباشا تلميذ و حرامية فى كى جى تو و مش فاكر بقى لكن فى افلام لبلال زى مثلا فيلم صايع بحر شوفته الفيلم ده كان عايز يقول فيه حاجة بس طلع ممل و معجبنيش الفيلم ده وفى افلام تانية غريبة بقى متعرفش بلال عملها ليه اصلا زى فيلم على سبايسى و حاحا وتفاحة وسيد العاطفى اللى ملقتش فيه قصة اساسا خالص وعلى الرغم من كتابته فى السينما اللى ساعات وساعات الا انه فى الدستور بقى حكاية كل كتباته جميلة و صفحته اكتر صفحة بحبها واقراها كلها و ربنا يوفقه فيها و بالنسبة لكتابه بنى بجم برضه كان عاجبنى معظمه اللى لسه مش عارف ليه بلال معملوش بقى انه زى ما بيكتب فى الدستور يكتب افلام جريئة كده و يبين اراء الشباب وحالتهم و يبين موقفه السياسى ويعمل افلام ليها قصة ومواضيع كده و يمشى برضه فى اللى بيمشى فيه فى افلامه ده و افلامه يمكن بيبقى فيها تلميح من بعيد زى واحد من الناس ناحية السياسة لكن انا اعرف انه مش خواف فيا ريت افلام واضحة بقى و موجهة

الأحد، أغسطس 13، 2006

اسئلة عن المدونة

هل انت راض عن مدونتك شكلا وموضوعا؟
اه الحمد لله راضى عنها شكلا وموضوعا ولو محبتش حاجة كنت شيلتها
هل تعلم اسرتك الصغيرة بأمر مدونتك؟
لا ميعرفوش وكده احسن عشان ما يبقاش فى مشاكل
هل تجد حرجا فى ان تخبر صديقا عن مدونتك؟
هل تعتبرها امرا خاصا بك؟
لا مفيش مشكلة انى اقول لصديق واللى يحب يشوفها يشوفها
هل تسببت المدونات بتغيير ايجابى لافكارك؟
اعطنى مثال فى حالة الاجابة نعم
نعم خلتنى اشوف اراء غيرى وتجاربهم و حاجات تانية كتير مش عارف اقولها
هل تكتفى بفتح صفحات من يعقبون بردود على مدونتك ام تسعى لا كتشاف المزيد؟
لا بدور وبلف واكتشف كل مرة مدونات
ماذا يعنى لك عداد الزوار .. هل تهتم بوضعه فى مدونتك؟
اه هو بيبينلى ان فى ناس بتدخل عندى و انا مهتم بوضعه لانه محطوط عندى فعلا
هل حاولت تخيل شكل اصدقائك المدونين؟ اعترف
لا محاولتش الا يعنى مرات قليلة جدا
هل ترى فائدة حقيقية للتدوين؟
بالنسبة ليا انا يمكن مجرد ذكريات تفكرنى و بالنسبة للعموم فهى بشوف منها تجارب وخبرات ناس واخبار الدنيا زى ما يكون جرايد يمكن هما احسن كمان
هل تشعر ان مجتمع المدونين مجتمع منفصل عن العالم المحيط بك ام متفاعل مع احداثه؟
لا متفاعل معاه طبعا و بيرصد من العالم ده احداثه

هل يزعجك وجود نقد بمدونتك؟ ام تشعر انه ظاهرة صحية؟
لا ميزعجنيش المهم يكون بينقد لسبب و نقد بناء مش عشان يدخل يغلس وخلاص

هل تخاف من بعض المدونات السياسية و تتحاشاها؟ هل صدمك اعتقال بعض المدونين؟
لا بدخلها عادى و صدمنى اعتقالهم فعلا



هل فكرت فى مصير مدونتك حال وفاتك؟
هتموت معايا وتكون الحدوتة خلصت


اخر حاجة احب اسمع اغنية ايه اللى احطها على المدونة
احط اغنية على الحجار يا مصرى ليه دنياك لخابيط والغلب محيط


اى حد عايز بقى يكتب مش لازم اختار خمسة يقولوا


انا تعبت وزهقت

الجمعة، أغسطس 11، 2006

علاقات جنسية

مش عارف دلوقتى بقى الكلام على العلاقات الجنسية بدرجة مستفزة و حاجات ليها العجب يعنى الاول الكليبات و ما فيها خصوصا واحدة كده بتغنى اسمها دانا اللى هى مش طالعة عشان تغنى اصلا لا سمح الله و لو بصينا مثلا على قناه زووم تلاقى اعلانها عبارة عن واحدة ماشية عريانة من اى حتة كل مرة يعروا حتة ويجيبوها و يعملوا على الحتة دى زووم لحد ما يوصلوا لسلسلة دهبية ومكتوب عليها زووم و اذا هربنا من قنوات الاغانى
و جبت قناه ميلودى افلام تلاقيهم عاملين اعلان و واحد يطلع يقولك اتضح ان مشاهدة القناه دى بتؤدى لفتور فى العلاقات الزوجية و يجيبلك زوج قاعد يتفرج على قناه وتيجى واحدة على انها مراته لابسه اقل شئ عندها وبينت اكبر جزء من فوق و تقريبا رجليها كلها وتقعد ادامه على اساس انها تثيره بقى وهو طبعا ميلودى افلام ثارته اكتر و معرفش الهدف من الاعلان اكتر من انه عايز يثير المشاهد نفسه
اما اذا قفلت التلفزيون بكل ما فيه و قلت تفتح الراديو على محطة نجوم اف ام هتلاقى اعلان بيشتغل طول اليوم عن الضعف الجنسى واننا كتير مننا بنعانى منه ولازم نتعالج ونكلم الدكتور و نقوله وهتكون فى سرية تامة و بصوت الرومانسى صاحب برنامج الحب اسامة منير يقول فى اخر الاعلان ان الدوا بيستمر تأثيره لمدة ستة وتلاتييييين ساعة و لازم يتقل كده وهو بيقولها عشان يهول من الموضوع برضه و يقول ان الدوا جامد يعنى

احنا ممكن نكون عندنا جهل شوية بالمواضيع دى كعرب و ناس كتير بتخاف متكلمش فيها واكيد احنا محتاجين توعية انا متأكد من كده لكن طبعا كل الوسائل دى للاثارة فقط مش للوعى