الجمعة، أغسطس 11، 2006

علاقات جنسية

مش عارف دلوقتى بقى الكلام على العلاقات الجنسية بدرجة مستفزة و حاجات ليها العجب يعنى الاول الكليبات و ما فيها خصوصا واحدة كده بتغنى اسمها دانا اللى هى مش طالعة عشان تغنى اصلا لا سمح الله و لو بصينا مثلا على قناه زووم تلاقى اعلانها عبارة عن واحدة ماشية عريانة من اى حتة كل مرة يعروا حتة ويجيبوها و يعملوا على الحتة دى زووم لحد ما يوصلوا لسلسلة دهبية ومكتوب عليها زووم و اذا هربنا من قنوات الاغانى
و جبت قناه ميلودى افلام تلاقيهم عاملين اعلان و واحد يطلع يقولك اتضح ان مشاهدة القناه دى بتؤدى لفتور فى العلاقات الزوجية و يجيبلك زوج قاعد يتفرج على قناه وتيجى واحدة على انها مراته لابسه اقل شئ عندها وبينت اكبر جزء من فوق و تقريبا رجليها كلها وتقعد ادامه على اساس انها تثيره بقى وهو طبعا ميلودى افلام ثارته اكتر و معرفش الهدف من الاعلان اكتر من انه عايز يثير المشاهد نفسه
اما اذا قفلت التلفزيون بكل ما فيه و قلت تفتح الراديو على محطة نجوم اف ام هتلاقى اعلان بيشتغل طول اليوم عن الضعف الجنسى واننا كتير مننا بنعانى منه ولازم نتعالج ونكلم الدكتور و نقوله وهتكون فى سرية تامة و بصوت الرومانسى صاحب برنامج الحب اسامة منير يقول فى اخر الاعلان ان الدوا بيستمر تأثيره لمدة ستة وتلاتييييين ساعة و لازم يتقل كده وهو بيقولها عشان يهول من الموضوع برضه و يقول ان الدوا جامد يعنى

احنا ممكن نكون عندنا جهل شوية بالمواضيع دى كعرب و ناس كتير بتخاف متكلمش فيها واكيد احنا محتاجين توعية انا متأكد من كده لكن طبعا كل الوسائل دى للاثارة فقط مش للوعى

هناك 15 تعليقًا:

soosa el-mafroosa يقول...

الناس اللي انت بتتكلم عنها هدفها في الأساس ..ان انت تتكلم عنها
يعني الست العريانة بتاع زووم دي لو مش عريانه ماحدش هيتكلم عنها ..و الإعلان بتاع ميلودي أفلام اللي بقى حديث المدينة..نفس الموضوع ..زي الأخت الفاضلة هالة سرحان ..بيعتبروها شطارة انهم بيتكلموا في حاجات الناس بتتكسف انها تتكلم فيها ..برضه الكلام ده ينطبق الى حد ما على المدونات..فاسهل طريقه للشهرة هو الكلام في الجنس و خصوصا بدون حدود..الإثارة للإثارة و الشهرة للشهرة ..مافيش أي هدف تاني

محمد ياسر يقول...

يعنى انا هدفى الاثارة والشهرة يعنى ولا انتى عايزة ايه؟

adhm يقول...

اللى انا فهمتة من البوست اللذيذ للاستاذ صاحب المطرح دة انة بيستغرب من التكثيف فى ادخال الجنس فى مفردات حياتنا اليومية بداعى مرة وبدون داعى مليون مرة
تقريبا دى الرسالة اللى وصلتنى منة بعد ما كملت قراءة البوست
واحب اضيف كمان ان الموضوع بقى الهدف منة مش نشر الوعى لامؤاخذة الجنسى مثلا ولا محاربة العادات السيئة والخرافات المحيطة بالموضوع دة وانما تحول الكلام فى الاتجاة دة الى وسيلة لتغييب الوعى والهاء الناس فى مناطق اخرى بعيدة تماما عن همومها الحقيقية ومشاكلها الانية
وبرضة وسيلة استرزاق تبع نظرية رزق الهبل على المجانين
وهى ايضا وسيلة لاستنزاف جيوب الناس الغلابة وتأسيس
وتعميق قيم المجتمع الاستهلاكى بعبط
يعنى مثلا شوية ملاحظات غريبة كدة
لية قناة بتدعى ان هى شاشة تأخذك للجنةالمفروض الهدف منها نشر الثقافة الدينية والوعى بين البسطاء نص برامجها اعلانات بيع عن طريق التليفون
مجرد نموذج مستنسخ اخر لقنوات الهدف منها البيع والبيع فقط حتى اخر قرش فى جيب الزبون العبيط غالبا والذى لا يخرج من مشاهدة برامج القناة سوى بشوية حاجات مالهاش دعوة بالاسلام اساسا
الكلام اللى بيبث فيها ينفع يقولة واحد مسيحى او بوذى مع تغيير شوية مفردات وتمشى الليلة
والمسخرة الحقيقة تلاقيها فى الاعلانات اللى عندهم
دة تليفون اسلامى علشان بيأذن وتمنة تسعة وتسعين جنية غير مصاريف الشحن وهو عند طلعت فى العتبة بحوالى خمسة وسبعين جنية قطاعى مش جملة كمان ولا هو تلزيق فى اى حاجة وانها اسلامية وخلاص وادفع يا زبون يا اهبل
طبع انا اخذت قناة الناس بس عبرة مش اى قناة عبيطة اخرى لان دى قنا المشاهد بيتجة ليها علشان شوية ثقافة دينية يلاقى الموضوع بيزنس واطى
طيب هو الادخار دة برضة مش فضيلة دينية ولا بقى عيب وكخة مع عصر البيع والشراء لكل شىء من اول عمر افندى لغاية الذمم والضمائر
يا عمم
طبعا واضح من الدش اللى
فوق دة ان الموضوع مش مجرد اثارة ومحاولة للشهرة من جانب صاحب المطرح الباشا لو كان عايز يتشهر فية حاجات اسهل من كدة بكتير وكمان كان ممكن يحط شوية مناظر

سلامز

محمد ياسر يقول...

هايل بصراحة وانتو شايفين وجهة نظرى انى خلاص يعنى كأنى بشجع اعلانات الجنس مثلا و يا ريت كمان لو يعملو اعلانات على شقق مفروشة مثلا بالمرة و يبينوا كل حاجة كمان بقى
انا معرفش انتو مالكو انا شجعت الاعلانات دى ولا قلت انى مبسوط منها وازاى قصدى اغيب الناس عن همومها ومشاكلها الحقيقية يا سلام هغيبهم بقى انا اللى هغيبهم بالكلمتين دول ولا يعنى هما مثلا مش عايشين فيها اصلا و لو عملت ايه هتفضل همومهم وهما فى عز فرحتهم حتى
وانا مش هدفى لا وعى ولا زفت جنسى انا بتكلم على نجوم اف ام اللى المفروض ان هدفها كده وان حتى لو كان ده قصدهم جد انا بغلطهم فى الطريقة برضه لانه مش بالاعلان و فى قناه وعلى كل الناس كده
انتو بتفهمو ازاى ايه الناس دى؟

محمد ياسر يقول...

على فكرة سيبهالك الحاجات الاسهل دى يمكن تشهرك انت و تفرح بالشهرة اللى بتكلم عنها دى انا واحد بكتب لنفسى وبس

adhm يقول...

واضح ان فية سوء تفاهم
اقرأ كلامى تانى وافتح الايميل بتاعك على الهوتميل انا باعتلك الصبح الساعة واحدة
يمكن تغير رايك
انا مش قصدى اللى انت فهمتة ابدا
ومعلش انا ما وضحتش انى بارد على الرد اللى قبلى

محمد ياسر يقول...

يظهر فعلا انى فهمتك غلط يا ادهم وانا شفت الميل فعلا ولاقيتك فيه وضحت انك بترد على المفروسة بس هنا طبعا لما قريت فهمت ان الكلام موجه ليا مش ليها غير ان الباشا والاستاذ والبوست اللذيذ الكلام ده جالى بالعكس او كأنه استهزاء
اعذرنى لفهمى الخاطئ وانت متقصدنيش

adhm يقول...

عادى ولا يهمك
اصحاب برضة

adhm يقول...

وكمان حاجة مهمة التعليقات اللى هنا
http://arch-man.blogspot.com/
فية خاصية موديريت كومنت علشان كدة التعليقات ما بتظهرش

محمد ياسر يقول...

ااه طيب ماشى يا باشا
شكرا

Namlaaa يقول...

اعجبنى كلامك وللاسف الجميع يعلم هذا ولكن هل يمكنك الهروب من هذا الفخ نعم يمكننا بالهروب الى الكهف والانعزال لان ساعه القيامه قادمه لا محال

Namlaaa يقول...

نعم سيدى لقد اصبحت معظم الافلام الكومديه مكرره بنفس الاسلوب والافيشات ولكنها اعلى ايرادات والسبب فى ذالك الحكومه التى ساعدت جعلت الشعب يحاول الهروب من مشاكله باى نكته تضحكه حتى لو كانت بايخه او مكرره
اعجبنى كلامك

Namlaaa يقول...

نعم سيدى لقد اصبحت معظم الافلام الكومديه مكرره بنفس الاسلوب والافيشات ولكنها اعلى ايرادات والسبب فى ذالك الحكومه التى ساعدت جعلت الشعب يحاول الهروب من مشاكله باى نكته تضحكه حتى لو كانت بايخه او مكرره
اعجبنى كلامك

محمد ياسر يقول...

اشكرك يا نملة على تعليقاتك ومفيش حد يقدر على الانعزال عن الدنيا للاسف

غير معرف يقول...

يا جماعة بالهداوة. واضح ان الهدف هو تجاري بحت أولا اثارة اهتمام عام يزيد المشاهدة ولو مؤقتا ثم وضع كمية اكبر من اعلانات الحلل واطقم الكوبايات وعسل الجبال (اخيرا اضافوا جامعة صوفيا لاضافة شئ من المصداقية العلمية - وجامعة صوفيا مش دريانة) واخيرا اعلان الحبوب الرجالي والحريمي اللي بتزود الحيوانات المنوية وتقويها - يا سلام غابت عن شركات الدواءالعالمية ازاي دي - وعموما مش قناة ميلودي ولا أي قناة اخري هتهدم هيبة المدرس الغير موجودة أصلا ولن تحطم اللغة العربية الضعيفة فعل سوء عملية التعليم ولن تنشر الرذيلة في بلد مكبوت لدرجة حدوث تحرش جنسي جماعي مؤخرا