الثلاثاء، سبتمبر 12، 2006

كل يوم بيعدى عيد!!

و انا راجع انهاردة بعد خروجة طبعا وراكب ميكروباص لقيت السواق كان بيكلم واحد من الركاب كان معترض على تعديل الميدان اللى بيحصل فيه دلوقتى و بيقول كمان داخلين فى رمضان ودراسة وعيد
فراح السواق قايله يعنى يعملو ايه و انهى عيد ده
فالراكب رد عليه قاله هو مفيش غير عيدين الكبير والصغير
السواق قاله ده الاعياد كتير
الراكب قال مبعترفش بيهم غير الاتنين دول
السواق قاله ازاى ده كل يوم بيعدى عيد
الراكب قاله ازاى ده فى ايام بتعدى فيها مشاكل وحاجات كتير
السواق قاله لا بس برضه كل يوم بيعدى عيد

هنا يجى استغرابى بقى وتفكير عميق السواق بيتكلم جد وانا شايفه ادامى مش بيتريأ و قعدت افكر هو كل يوم بيعدى عليا عيد و كان جنبى واحد صاحبى وكان ساكت برضه رحت سأله فجأة هو كل يوم بيعدى عليك عيد؟؟
قاللى زفت
وقلتله طيب سمعت السواق ده
قاللى اه
قلتله طب ازاى كل يوم بيعدى عيد عنده
قاللى مش عارف
ورجعت تانى افكر طول اليوم بفكر الراجل ده كان قصده ايه وازاى كل يوم عيد وكان نفسى اسأله بس كنت قاعد ورا ومكنش ينفع لو كنت جنبه او جنب اللى وراه على طول اللى كان بيكلمو كنت يمكن ادخلت لكن محصلش ففضلت لحد دلوقتى محتار وفى الاخر بسأل هو يعنى ايه عيد اصلا عموما ويعنى ايه بالنسبة ليه هو برضه

هناك 3 تعليقات:

nadeen يقول...

ana t2reban 3arfa asd elsawa2 dh eh , wa7ed zy el sawa2 dh kol yom 3ed 3ndo 3shan howa lessa 3ayesh w la2y el lo2ma elly m3yeshah w mastora w el7amd lelah , el2nsan elbset dh 3ando no3 mn el reda bel2lel my3rfosh nas kter 3ndhom kteeeeeeeeeeeeeeeer

محمد ياسر يقول...

نادين اشكرك على ردك و فعلا ده احتمال وارد ان الراجل ده يكون فى حالة رضا عن حاله و هو مش واعى لانه ليه حقوق كتير فى البلد دى

saso يقول...

بيفكرني بواحدة اعرفها - اللي هي انا بس بقيت باتخفي علشان صحابي مش طايقينني لاني متفائلة- هي مش حكاية عيد بس فعلا انك تصحي من النوم تلقي نفسك قادر تقف واللي بتحبهم كلهم كويسين
it's a bless
خلية يفرح مش كفاية الناس الباقية كلهم مكتئبين