الأربعاء، أكتوبر 25، 2006

السن و الزواج

دايما بيحيرنى الموضوع ده علاقة السن بالجواز يا ترى فعلا فى علاقة وحدود فى السن عشان احب؟؟
زمان وانا صغير لما كنت لسه مش عارف سن بابا ولا ماما و كنت بسألهم كانوا بيقولولى غلط و يقولوا الفرق بينهم عشر سنين!!!!دايما كان كده لحد ما كبرت وعرفت سنهم بجد عرفت من بابا لانه بيقول عادى اما امى فتحب تخفى سنها ومتقولوش ابدا لكن مرة عرفت بالصدفة من غير ما تعرف وكان الفرق اربع سنين باين !!! طيب مهو فرق حلو اهو امال ليه كانت بتقول عشرة و دايما بقى بما انى كبرت وهى عايزة ترسى فيا موضوع انى اللى احبها لازم يكون فى فرق كده و لما اكلمها ممكن تنزلها لخمس سنين فرق مثلا و لما كلمتها فى انها لو كانت فى عمرى مثلا اللى حبيتها تقولى لا كده مش حلو و ساعات بيعمل مشاكل ايه بقى متقولش ولا اقتنع و اقولها بقى لو البنت اكبر سنة او اتنين تقولى لا مش حلو خالص و بابا كمان وافقها فى كده
المهم بقى انى عرفت انى جدتى الله يرحمها كانت اكبر من جدى بسنتين تلاتة مش عارف بالظبط و الموضوع ده كان مخفى تماما ولا حد يقدر يجيب سيرته او يتكلم بس اهو وصلنى و جوازهم ده كان ناجح و الا مكنش عاش
فى نفس الوقت كمان بقى عرفت ان عمى لما حب و اتقدم عشان يتجوز (من سنيين طبعا يعنى) بعدما اتقدم عرف ان اللى هيتجوزها دى اكبر بسنتين و مع ذلك اتجوزها ومحدش عارض ولا حد اتكلم ولا جاب سيرة برضه الا انى عرفت موضوع سنهم ده من امى و قلتلها طيب اهو جواز وناجح برضه بس هى بتقولى لا بس فى خلافات ممكن مش بتبان

يعنى انا شايف الموضوع بيمشى والجواز بينجح وكل حاجة لكن الزوجة بتهرب من السن عشان متقولش انها اكبر والراجل كمان بيهرب عشان ميقولش انه اصغر مع انى شايفها عادى يعنى مفيهاش مشاكل و طبعا الناس والاهل كل دول بيكتموا برضه خااالص!!!!!

السبت، أكتوبر 21، 2006

فطار المدونين اللى فات

هو محدش اتكلم عن الفطار ليه انا شوفت ملاقيتش حد ااتكلم و بعدين كان فى كمان صور فين ده كله؟؟

اتكلم انا بقى انا رحت متأخر عن الفطار يعنى وصلت ستة ومشيت قبل 8 للاسف عشان ظروف كده حصلت

المهم اول ما رحت وكنت انا ومايسة( مدونة برضه) و داخلين واحنا مقلقين منعرفش اى حد وشايفين كله قاعد حول طرابيزة كبيرة و احنا لسه على الباب وبنقول (قومى بينا نمشى) و بعدين وصلنا عندهم وبقول سلام عليكم و بدور على اى حد يمكن اقدر اعرفه فشفت مالك وانا عارفه من الصور رحت رايحله ومسلم عليه رحب بيه وقاللى روح الحق بقى الاكل وهما كانوا خلاص خلصوا فرحنا خدنا الاكل
و بعدين وزعوا ورق كل واحد يكتب اسم مدونته واسمه والايميل والتليفون كتبتهم واعتقد هيبقى فى تواصل بينا دايما بقى
و بعدين خلصنا رحنا سايبين الطرابيزة ولافين دايرة بالكراسى و الاول خلينا مجموعة عمل سوق الاسرة المكان اللى استضافنا يتكلموا عن تجربتهم وكان كلامهم حلو فعلا وسمعت فى الاخر سيرة ابراهيم ابو العيش وقريته و كنت هفتح فى الموضوع ده واسأل لكن كنت ماشى بقى خلاص لما جابوا سيرته بس مسيرى هسأل برضه نورا يونس بما انها بتشتغل فى السوق ده و بعدين قعدنا نتكلم شوية برضه ومالك كان دمه خفيف و ضحكنى

مبسوط انى عرفت الناس خصوصا اللى اتكلمت معاهم ولو كلمات بسيطة زى مالك و شرقاوى ورامى( ايوب المصرى) و صاحب مدونة صوت
و اللى متكلمتش معاهم نورا يونس و صاحب مدونة اى كلام و عمرو عزت وهكذا رضوى و ضاع عقلى ومش فاكر الباقى بقى الصراحة

اوحش حاجة انى ملحقتش اقعد فعلا ومشيت ملحقتش اكلم الناس وهما كمان كانوا بيقولولى عايزين نقعد معاك بس ظروف فعلا
معلش يا رامى ومالك وشرقاوى وكلكم تتعوض باذن الله

ااه كنا حوالى حاجة و 30 بمجموعة العمل اللى فى السوق كنت متصور العدد هيكون اكتر من كده !!

الاثنين، أكتوبر 16، 2006

لازم اكون احسن منها!!! لييه؟؟

فى البوستات القادمة سيكون عن موضوعات و احداث اراها بعينى وهناك ما اعلق عليه وهناك ما اتمنى معرفة اراء بها طبعا ساتحدث بتعميم فلن اذكر اشخاصا
----------------------------------------

دايما بشوف المشكلة دى اذا حصلت لان فى كتير بيهربوا منها اصلا وفى ناس متجرؤش تفكر فى الموضوع اصلا المشكلة هى لو واحد بيحب واحدة وهى فى كلية احسن منه قمة يعنى
مثلا لما يكون واحد تجارة او خدمة اجتماعية و يحب واحدة دخلت طب او هندسة او حاسبات حتى (بتحصل وشفتها محدش يقولى ان محدش بيفكر فى واحدة اعلى منه صحيح فيه مبيفكروش بس كمان فى بيفكروا) تلاقى الدنيا كلها وقفت ادامهم و لو اتقدم اهلها طبعا يرفضوا ويقولوا ازاى و لا يمكن حتى لو البنت موافقة برضه لا و الناس كمان هتلاقيها تتكلم ازاى هى توافق على واحد فى كلية اقل و هو نفسه ممكن يعيش طول حياته وهو بيقول دى احسن منى

بس فى حاجات تانية بقى زى لو الواد كان غنى فخلاص بقى ممكن يقبلوه و ممكن لا برضه اذا كانت الشهادة عندهم اهم من كل شئ
و فى لو الولد اشتغل اى شغلانة سواء ليها علاقةة بدراسته دى ولا لا و كانت معيشاه كويس فده ممكن برضه يخلي اهلها يوافقوا بس لو فى منافس تانى مثلا ومهندس ولا حاجة فهو اكيد احسن و اولى ليهم

لاحظوا انى لما اتكلمت قلت على الاتنين كليات انما بقى لو خدنا التفكير مثلا لواحد صنايع نجار مثلا او كهربائى ولو فكر فى واحدة خريجة تجارة او تربية او اى شئ شوفوا هيتعامل ازاى

يا ترى بقى الموضوع ايه اللى فيه صح و ايه اللى ممكن وايه اللى مش ممكن ؟؟ ولو واحد حب واحدة كانت فى كلية احسن وهى كمان بتحبوا بس فى معارضة من اهلها مثلا يبقى مين عنده حق والواد و البنت يعملوا ايه؟؟

------------------
ملحوظة انا مش فى المشكلة محدش يفتكر ان عندى انا المشكلة دى انا بتكلم عن غيرى

الثلاثاء، أكتوبر 10، 2006

كل سنة وانت طيب يا منييييير

انهاردة لازم الواحد يحتفل بعيد ميلاد محمد منير ال52 و قاعد اسمعه طبعا
يا سلام عليك يا منير 30 سنة غنى جميل
اه يا اسمرانى اللون حبيبى يا اسمرانى
يا ريت ان شاء الله اقدر اروح حفلته بعد بكرة (الخميس) فى الاوبرا هتبقى جامدة جدا و الناس هتحتفل بمنير
ناويها انى اروح باذن الله
كل سنة وانت طيب يا منييييييييير

الأربعاء، أكتوبر 04، 2006

كلمات فى اغانى

بحلم وحلمى بسيط مش كتر مال ولا سيط بحلم اكون نفسى

محمد فؤاد اغنية بحلم ويحلالى

عدى على الاحلام معايا ولاجل بكرة اتبسمى رحلتنا ملهاش نهاية اضحكى واتكلمى

محمد منير اغنية يا اميرة

لما بنام بحلم وبعيش لما بفوق مابفوقش بمووت

وجيه عزيز اغنية فنان فقير

لو موصوفلك تسكت جوه الهيصة وعيش
لو موصوفلك تضحك اضحك على احزانك
لو موصوفلك تحلم قضى الليل بردان واعمل روحك ناسى انك انسان

وجيه عزيز اغنية لو موصوفلك

و ان سألوك الناس عن ضى جوه عيونك ما بيلمعشى متخبيش قلهم العيب مش فيا ده العيب فى الضى وانا مش عاشق ضلمة ولا زعلت الضى مسير الضى لوحده هيلمع ومسير الضحك لوحده هيرجع ما بيجرحش ولا يأذيش

وجيه عزيز اغنية ان ما قدرتش

شوية هموم بتوع كل يوم يلفوا فى راسى افر يطولونى و لما يطولونى اقلع مداسى و العن دماغ اللى نائى وناسى
...... تعدى عليا الليالى تقولى بتضحك يا طيب طيييييب

وجيه عزيز اغنية شوية هموم