الأربعاء، أكتوبر 25، 2006

السن و الزواج

دايما بيحيرنى الموضوع ده علاقة السن بالجواز يا ترى فعلا فى علاقة وحدود فى السن عشان احب؟؟
زمان وانا صغير لما كنت لسه مش عارف سن بابا ولا ماما و كنت بسألهم كانوا بيقولولى غلط و يقولوا الفرق بينهم عشر سنين!!!!دايما كان كده لحد ما كبرت وعرفت سنهم بجد عرفت من بابا لانه بيقول عادى اما امى فتحب تخفى سنها ومتقولوش ابدا لكن مرة عرفت بالصدفة من غير ما تعرف وكان الفرق اربع سنين باين !!! طيب مهو فرق حلو اهو امال ليه كانت بتقول عشرة و دايما بقى بما انى كبرت وهى عايزة ترسى فيا موضوع انى اللى احبها لازم يكون فى فرق كده و لما اكلمها ممكن تنزلها لخمس سنين فرق مثلا و لما كلمتها فى انها لو كانت فى عمرى مثلا اللى حبيتها تقولى لا كده مش حلو و ساعات بيعمل مشاكل ايه بقى متقولش ولا اقتنع و اقولها بقى لو البنت اكبر سنة او اتنين تقولى لا مش حلو خالص و بابا كمان وافقها فى كده
المهم بقى انى عرفت انى جدتى الله يرحمها كانت اكبر من جدى بسنتين تلاتة مش عارف بالظبط و الموضوع ده كان مخفى تماما ولا حد يقدر يجيب سيرته او يتكلم بس اهو وصلنى و جوازهم ده كان ناجح و الا مكنش عاش
فى نفس الوقت كمان بقى عرفت ان عمى لما حب و اتقدم عشان يتجوز (من سنيين طبعا يعنى) بعدما اتقدم عرف ان اللى هيتجوزها دى اكبر بسنتين و مع ذلك اتجوزها ومحدش عارض ولا حد اتكلم ولا جاب سيرة برضه الا انى عرفت موضوع سنهم ده من امى و قلتلها طيب اهو جواز وناجح برضه بس هى بتقولى لا بس فى خلافات ممكن مش بتبان

يعنى انا شايف الموضوع بيمشى والجواز بينجح وكل حاجة لكن الزوجة بتهرب من السن عشان متقولش انها اكبر والراجل كمان بيهرب عشان ميقولش انه اصغر مع انى شايفها عادى يعنى مفيهاش مشاكل و طبعا الناس والاهل كل دول بيكتموا برضه خااالص!!!!!

هناك 14 تعليقًا:

7arnkash يقول...

ما اهو اصلي الكبير بيسمع كلام الصغير
لو الست اكبر يبقي الراجل هيسمع كلامها

حلوالتفسير ده
هههههههه
طبعا انا كنت بهرج

وكمان انا عايز اقول ان انا معنديش اي مشكلة في الموضوع ده
يعني معنديش اي مشكلة ان اتجوز واحده اكبر او اصغر مش هتفرق كتير يعني
:)

Layaly يقول...

حلو جدا

saso يقول...

كل سنة وانت طيب يا محمد
:)
لحد ماجي اقرا البوست بضمير علشان انا في المكتب دلوقتي

ادم المصري يقول...

انا معاك

شايف ان طالما فيه تفاهم

وفيه حب

ليه ما يبقاش فيه جواز

Noran يقول...

نا أصلا مش بعترف بمقولة أكبر منك بيوم يعرف عنك بسنة .. فى ناس كتير أصغر منى
و تعرف أحسن منى

و التفسير المنطقى أن المرأة سنها
أصغر من الراجل فى الزواج :هو ان ندوج فكر المرأة بيكون قبله بكام سنة كده
عقاها بيكبر أسرع ...
عشان كده لازم تبقى أصغر عشان يبقى فى توافق عقلى .....
طبعا أنا كونت بهزر ياحرنكش
:)

*~Daisy~* يقول...

boss ya mohamed ana 7a2ollak 7ekaya gameela awi kan katabha "3abdelwahab metawe3" allah yer7amo fe ktab men kotobo...
enn marra kanet doctora, bet7ebb mo3eed, kanet heyya akbar menno 10 seneen!!!!!!!!!!!!!
we howwa kaman kan bey7ebbaha...
el nas estankaret gawazhom giddan, we ahlo, we ahlaha, wel gam3a...
koll el nas 7asset enn di moseeba we ba2o mestanneyeen natayeg-ha....
le7add ma 3adda shwayyaet wa2t..
we la7ez el nas, el far2 elly feehom...
enn howwa, be e7saso bel mas2oleyya, we 7oboo leeha, we e3temadha 3aleih, shaklo keber 5 seneen...
we enn heyya, be sho3oorha bel re3aya wel aman wel 7obb wel 7emaya,
shaklaha se3'er 5 seneen...
we ennohom be 7obbohom, zabbato mo3adlet 7ayat-hom... we ba2a e7sas-hom ennohom 2add ba3d....

el nas sa3at beteb2a fakra enn el senn bey2athar 3al ta3amol, we 3ally gowwana...
bass da mesh sa7ee7 3'eir law e7na sama7na be keda...
ya3ny tool mana 7atta fe dema3'y enn el ensan da as3'ar menny akeed da 7ay2athar 3alena,
laken law mesh 7atta da fe dema3'y, akeed da mesh 7ay2athar 3alena...

tamer afify يقول...

موضوع السن ده زي مانت ماقلت
مفيش قانون بيحكمه
ده بالإضافة الى انه نسبي
راجع لعوامل الخبرة والتفاهم

تحياتي

كراكيب نـهـى مـحمود يقول...

مش شايفه ان السن ممكن يحكم الموضوع ده بس تفتكر فيه حب اليومين دول

محمد ياسر يقول...

كلام جميل محدش عارض على السن خالص يعنى!!
بس يا ريت يكون واقعى

غير معرف يقول...

hi, when a W. older than a man she get faster older than him , then he will not get what he want when she is tird and he is feeling junger ???

do u get me?
Nagdi

محمد ياسر يقول...

اه فاهم اللى بتقوله يا نجدى وناس كتير بتقول زيك كده بس انا مش مقتنع

منور

سلمى صلاح يقول...

وأنا صغيرة ماما كانت بتعد تقولي نفس كلام نجدي..بس بصراحة انا مش مقتنعة

أصل هو الجواز مش مبني على مجرد ان الست تبقى حلوة..لو كده كتير من الجوازات هتفشل أو مش هتحصل أصلا..

غير معرف يقول...

اهى دى بقى من العادات العجيبة فى الشعب المصرى!! مش فاهمة ايه علاقة السن بالحب والتفاهم
ساعات الأنسان بيكون عنده 15 سنة بس مخه جامد وساعات واحد بيبقى عنده 50 سنة ومخه جزمة (سورى!) الموضوع مايتقاسش كده خالص... بدل في تفاهم يبقى أى حاجة تانية نتغاضى عنها

وأكبر دليل على كده زواج الرسول من السيدة خديجة.. هى كانت أكبر منه لكنهم كانوا بيحبوا بعض جدا


manal

ahmed يقول...

بوصو يا جماعه انا المشكله دى بتواجهنى الان والكل بيقولى من المستحب جدا فرق السن ليه بقه؟بيقولك يا سيدى ان الست زى ما قال واحد بتكبر بسرعه حتى طبيا دا صح جدا يعنى عند الاربعين خلاص وانت لو فى نفس عمرها هتكون اربعين وانت كده فى عز شبابك يا سيدى اذا ياهتبوص بره اوهتعمل خطيئه او لو انت زاهد عن المتعه ممكن يبقى مفيش مشاكل بس انا بحاول اتغلب على كل ده لأن المتعه فى الزواج مش كل حاجه فى حاجات تانيه كتير لأن الاسلام لم يضع السن فى شروط الزواج وهو عقيدتنا يا جماعهزانت ممكن تتجوز واحده اصغر منك بكتير وتعيش تعيس وممكن فى نفس سنك وتعيش مبسوط وشكراااااااااا