الجمعة، نوفمبر 24، 2006

وجيه عزيز

متجرحوش الورد بلاش.. ده الشوك رخيص و ساعات ببلاش.. حتى ان خاصمنى الحظ مجاش متجرحوش الورد.......
------------
بغيب لكن برجع و احس بوحشة للشارع و للحارة و للقلة على شباكى و للشمس اما بتصاحب حيطان البيت
على بابك انا غنيت و حسيت بالدفا معاكى انا حسيت........
---------------
هى عيشة ولا موتة و لا فوتة فى حارة سد
قول معايا صوتى لسه منتهاش ليه بنرخص ليه بنرضى نبيع بلاش!!....
---------------
شوية هموم بتوع كل يوم يلفوا فى راسى ..افر يطولونى ..ولما يطولونى.. اقلع مداسى والعن دماغ اللى نايم وناسى....
تعدى عليا الليالى تقولى بتضحك يا طيب طييب
---------------
مش كل ما تفتح ايدك تبقى بتحضن بنى ادمين .. ده احنا ساعات لما نفرح غنوة يقوم يترد علينا اللحن حزين..
وفر حزنك لسه هتحزن و لم ضلوعك تحت ايديك و قبل ما تحضن بص الاول تحضن مين...
احنا ساعات يوحشنا الناس.. احنا ساعات يوحشنا البنى ادمين..
----------------
اعرف عيون هى الجمال والحسن ..و اعرف عيون تاخد القلوب بالحب.. و عيون مخيفة وقاسية وعيون كتيير ..و بحس فيهم كلهم بالحزن..
----------------
خفت عارفة خفت ليه .. ليه يا عينى ليه؟.. شفت قلبى جريت عليه.. ليه يا عينى ليه؟.. شوفته مرة حلمت بيه ومن يوميه احكى ايه ولا ايه
ساكتة لييه ايوه ليه؟.. ايه جوه قلبك شايلة ايه؟...
-------------------
الضحك شكل البكا خالص تلامذة وفصول ومدارس يا مانجه ليه طارحة فى مارس...
زعلان شوية (وماله) وفرحان شوية (على ايه )زهقااان (من ايه) مبسوط شوية( ماشى) تعباان( امممم)...
-------------------
عاشق للكون فى هواكى وراسم احلام وياكى واسأل عن قلبك عادى واسكت لما اسمع ردك...
-----------------
انا زارع فى جناين بكرة الفرحة بالقول واللمس.. انا عاشق مجنون ولكنى انا راسمك بقلوب على الشمس..
-----------------
فنان فقير على باب الله و الجيب مفهيش ولا سحتوت و العمر فايت بيقول ااااه و القطر فايت بيقول توووت ...



ملخص سريع لابداعات وجيه عزيز الغنائية
حفل وجيه عزيز يوم الثلاثاء القادم 28\11 الساعة 8 ونص فى ساقية الصاوى و معاه الشاعر الجميل على سلامة
http://wagihaziz.com/

الجمعة، نوفمبر 17، 2006

فكر واحد للشباب

دلوقتى فكر واحد للشباب مفيش غيره و هو البنات و الجنس ده بس اللى شاغل ومالى دماغهم طول ما هو ماشيين فى الشوارع تلاقيهم بيعاكسو و يوصلو لمد الايدين و المضايقات( واللى منها اللى حصل فى وسط البلد و اللى بقاله سنين بيحصل بس الموضوع بان المرة دى لكنه دايما كان بيحصل و ايام ما كنت فى ثانوى كنت لما الاقى تجمع والطلاب طلعو برة المدرسة و ابقى عارف انها مش مظاهرة لحاجة يبقى اتأكد انه بنت عدت ادام المدرسة و الطلبة ماسبوهاش )
او يمشو يتكلمو على البنات و لو اقل حاجة يقعدو يملو نظراتهم من البنات اللى يعدو قدامهم او يتكلمو عن الافلام الجنسية و عن كل واحد جاب ايه احدث حاجة و مين هيجيب الهارد بتاعه عشان ياخدو منه الافلام و الافلام تلف على الكل
و لومشيت فى شارع ضلمة الاقى ولد واخد بنت و شغاليين ..
الجنس بقى اهم شئ وكل شئ للشباب و التعامل مع البنات بقى لمجرد انهم لحم و خلاص مش تعامل على انهم بنى ادميين و بقى لتعارف عليهم للسبب ده وبس و كل واحد يبقى فرحان ادام اصحابه انه ظبط كام واحدة او عمل ايه مع كام واحدة و هكذا

لكن كام واحد بقى بيعاملهم كبنى ادميين!!؟

طيب وبعدين الحل ايه؟؟!!!

السبت، نوفمبر 11، 2006

جريدة اخبار مبارك

جريدة اخبار اليوم عاملة انهاردة ملحق خاص و كاتبين اسمه مصر التى فى خاطرى و طبعا المقصود مصر مبارك و الملحق انهاردة مجانى و هو عبارة عن 12 صفحة للرئيس العظيم افضل رئيس فى الدنيا حسنى مبارك و حرمه احسن زوجة رئيس فى الدنيا برضه و كل الملحق صور ليهم هما الاتنين و جولتهم للصين و روسيا وغيرها و كلام بقى عن مجهودات الرئيس وحرمه اللى احنا مش مقدرنهم و حبة كلام بقى من ممتاز الكلب او القط كفاية عليه ينونو اللىسيادته دايما بياخده معاه و الحقيقة الكلب بيعمل الواجب وزيادة يروح ويرجع يمجد و يقول كل مجهودات الرئيس و كما يعمله ملحق لوحده و مظبطه صور
معنديش كلام تانى ومش عايز اغلط

الخميس، نوفمبر 09، 2006

فيلم دنياااااااااااااا نزل



فيلم دنيا نزل ونفسى ادخله ان شاء الله قريب اوى
(اخلص بس المشروع اللى شغال فيه ده خلاص ناقصله يومين )


__________
و ده اعلان عشان الناس تدخله برضه
-------------
تعديل الفيلم طلع انه اعلانات بس فى الجرايد وفى موقع ايجى فيلم لكن لما سألت السينمات نفسها قالوا لسه
تقريبا االاسبوع الجاى باذن الله