السبت، ديسمبر 30، 2006

اول خروجة فى يوم وقفة عيد

اول مرة اخرج فى وقفة عيد الاضحى ده قبل كده كان فى البيت يا مسافر لاهل كده يعنى
انهاردة الاول خرجت مع 3 اصحابى رحت الساقية على الساعة 8 كانت امسية شعرية غنائية لاحمد حداد و كان معاه عمر جاهين وايه حميده و حازم شاهين موسيقى و احمد على الحجار غناء و حازم كان بيغنى برضه و كانت حفلة حلوة و عجبنى ابن على الحجار الواد طالع لابوه و صوته جميل و شبهه بحركاته و على الحجار نفسه كان موجود بس كان قاعد مشاهد زينا هو واسرته كلها معاه اما حازم فكااان صوته حلو ويبان عليه انه من مطربين زمان كده و كلهم كانوا حلوين فعلا
خرجنا بعد كده قعدنا على قهوة شوية ورحنا طالعين على وسط البلد و جت فى دماغنا ندخل سينما كنا بقينا ستة جينا نبص على اوديون مليانة ايه الشارع كله ناس اصلا و اقرب حفلة الساعة 2 بليل وعليها الحجز شغال كمان طيب خلاص
مشينا رحنا على هيلتون رمسيس و هناك بقى دخلنا السينما لاقينا فى اماكن حفلة 12 فدخلنا فيلم الرهينة اوحش حاجة قبل ما اقول عن الفيلم ان المكان كان مليان عرب كتييير و مليان رجالة لامؤاخذة مش رجالة
الفيلم بقى الحاجة اللى عجبتنى فيه التصوير والاخراج لساندرا و الموسيقى لعمر خيرت اما القصة فمباشرة ومش حلوة و لنبيل فاروق كمان و لو مكنوش كتبوها هى باينة انه هو التمثيل بقى احمد عز كان كويس بس مبحبوش برضه لكن نور عجبنى تمثيلها و بعدها ياسمين عبد العزيز و الفيلم فى قصته بقى قعد يتكلم على الارهاب وخلاف المسلمين والمسيحين وان الخلاف ده فى مصر و ان عالم عشان مسيحى فمش مهتمين بيه لكن لو مسلم يبقى نهتم و فى اخر الفيلم كلمتين كده ملهمش لازمة عن وحدة وطنية و مفيش خلاف بقى والكلام ده و مع نهاية الفيلم تلاقى اغنية المطرب التخين حسين الجاسمى بحبك وحشتينى ومش فاهم محطوطة فى الفيلم ليه و ايه لازمتها و ليه مطرب خليجى اصلا لكن على رأى صاحبى اللى رد عليا وقاللى عشان الدوحة اللى احنا قاعدين فيها من كتر العرب حوالينا و اه كان فى واحد خنقة فى السينما بيضحك بصوت عالى جدا كل الناس ممكن تضحك لكن خفيف اما ده صوته عالى كنت عمال اقول حد يطلعه برة
طلعنا بعد كده نحاول ندور على اى مطعم اكل لغاية اما لاقينا الحمد لله فى الساعة اللى كانت بقت4 تقريبا كلنا و روحن
و شكرا

ليست هناك تعليقات: