الاثنين، يناير 29، 2007

مش عايز اتجوز زيكو

ببساطة فعلا مش عايز لا اتجوز و لا اخطب زيكو معلش يمكن انا مجنون بس هو كده
استحالة يعنى انى لما اجى يوم خطوبة ولا جواز انى اعمل اللى الناس بتعمله ده زى مثلا ان الاغانى اللى تشتغل تكون هابطة وحتى الاهل بيشجعوك على كده عايزين حاجة تفرح ودوشة و يقولولك حضر الاغانى دى لا بقى انا مش هشغل ولا اغنية هابطة و هتكون كلها راقية كمان و هتكون لمطربين محدش بيسمعهم من العامة زى منير او مارسيل خليفة او وجيه عزيز وفيها ايه يعنى بس مش هتكون اغانى كئيبة او على حزن طبعا
والرقص لو حصل اصلا لانى لا افضل و مبعرفش هيكون على خفيف برضه
عارف ان اهلى واهلها هيكونو معترضين و حاسين بضيق بس دى رغبتنا بقى
و عارف ان الشكل عموما للفرح او الخطوبة هيكون غير مألوف و عشان كده ممكن يبان انو وحش لكنه طبعا ان هيكون ده اللى جميل بجد مش الافراح بتاعتكو
وعارف انك هتكونى يا امى نفسك تفرحى بيا اوى و هتحسى ان اللى عايز اعمله ده مش حلو بس انا عايز كده وهفرحك برضه اكيد هحط اغانى سريعة و حلوة وكل حاجة بس مش هاااااااااابطة لا العنب ولا من خمسة
و حكاية اول اغنية هشام عباس اسماء الله الحسنى مش شرط برضه اعملها و حتى البدلة دى مش معترض عليها لكن فى دماغى انها ممكن تكون لبس عادى بس شيك و فيها ايه يعنى بس دى مش هنختلف اوى هنتفق
و هى فستان فرح طبعا ده احلى حاجة
حتى المكان عايزة مختلف بس لسه مستقرتش عليه ده و بعدين انا كل ده لسه اقتراحات العروسة بقى اللى هتساعدنى فى الموضوع

اه معلش كل كلامى ده جه على اساس انى هلاقى المجنونة اللى هتوافق على الحاجات دى كلها و تزودها

الثلاثاء، يناير 23، 2007

معرض الكتاب

معرض الكتاب حدث كل سنة اللى بقيت بستناه دايما و خصوصا من سنتين لما ارتبطت بانى اروح المعرض كل يوم طول فترته وده لانى
كنت شغال مع دار ليلى للنشر والاعلان
http://www.darlila.com/forums/
كانت لسه بداية الدار واول سنة ليها و الدار لسه كلها شباب و صاحب الدار الاستاذ محمد سامى كان معتمد على الشباب يشتغلوا فى الدار او يكتبوا و الدار تنشرلهم و اى موهبة يلاقيها فعلا بينشرلها
وفى السنة اللى فاتت كانت الدار اكيد بتكبر و برضه كانوا قالولى عشان اشتغل معاهم لكنى مقدرتش لاعتراضات اهلى انى مش محتاج و ان ده تعب وانا كنت فعلا عايز اروح المعرض بس من غير شغل فمشتغلتش بس كنت بروح كتير برضه يجى نص الفترة تقريبا و كنت بقف برضه ساعات او اى حاجة عايزينها اهو اساعد و كانت فرصة بشوف اصحابى فهما كل يوم موجودين لانهم شغالين طبعا
السنة دى بقى الدار طبعا فى استمرار نجاح يا رب دايما و الاصدارات كترت ما شاء الله بس معرفش ظروف الشغل عاملة ازاى لانى مشفتهمش بقالى كتييير واكيد لما اروح هعرف اخبارهم و ان شاء الله هروحلهم كتير كذا مرة يعنى لحبى للمعرض ولانى اشوفهم غير انه فضا بقى و دخلنا الاجازة و الحمد لله
الاصدارات حلوة و فى منها لدكتور احمد خالد توفيق ونبيل فاروق و غيرهم شباب كتير هتلاقوا الاصدارات هنا

http://www.darlila.com/forums/index.php?showtopic=3762&pid=30066&st=0&#entry30066

كل سنة بيبقى فى ندوة كمان للكتاب الشباب و لدكتور احمد خالد توفيق لسه مش عارف امتى هتكون السنة دى عايز اشوف دكتور احمد
(اعرفوا من الموقع دار ليلى برضه هتلاقوا موضوع للندوة)مع انى برضه بقيت بزهأ من الندوات دى
اتمنى المعرض السنة دى يكون اكتر نظاما و احسن من السنين اللى فاتت و طبعا المعرض كل سنة بيجى بيفلسنى بس المهم انه فى شئ حلو.
اكيد بقى اللى ناوى اشتريه باذن الله حاجات كتير من دار ليلى دى ومن المؤسسة طبعا ما وراء الطبيعة وفانتازيا لدكتور احمد خالد توفيق و حاجات تانية بقى زى متاهة مريم لمنصورة عز الدين و التلصص لصنع الله ابراهيم (كان نفسى اقراله حاجة من زمان) وعايز اجيب ابراهيم عبد المجيد لا احد ينام فى الاسكندرية و عتبات البهجة وعايز اشوف للمنسى قنديل و حاجات تانية بقى ممكن ابقى اقول اللى جبته كله ان شاء الله
اسوأ شئ فى الايام دى ان امى هتعاتبنى كالعادة على صرفى الفلوس على كتب!!!!

الأربعاء، يناير 03، 2007

احساس السنة الجديدة 2007

فى وقت عدى سنة كاملة عدت مش فاكر حاجات كتير فيها حصلت اكيد لما ارجع لبوستاتى بفتكر حاجات كتير لكن دلوقتى كل اللى فى دماغى ان اللى فرق انى بقيت من سنة تانية لتالتة عمارة بس مش فارق لسه طالب برضه يعنى
(يا رب اخلص بقى)
شايف الدنيا زى ما هى مش عارف ايه اللى تغير احنا زى ما احنا و الناس هى الناس و مصر هى مصر متغيرتش و لا اتحسن فيها حاجة يمكن ساءت كمان
سنة جديدة دخلنا فيها متوقعش فيها تغيير كبير او بسيط حتى
على المستوى الشخصى هكون لسه طالب زى ما انا
بكبر وبقرب اخلص (ده الحلو) لكن مش هيحصل حاجة تانى
مش عارف يعنى هو المفروض ايه اللى يحصل يعنى؟؟ شئ غريب
على مستوى الدنيا بقى لا اتوقع لمصر شئ لكن لسه امل برضه لان ربنااااااااا كبييييييير
طبيعتى مش متشائم لكنى بحالات ساعات اكون محبط و ساعات اكون مبسوط بتغير دايما

كل سنة واحنا زى ما احنا ما دام لسه محصلش مننا اللى يغيرنا ويغير الدنيا