الاثنين، يناير 29، 2007

مش عايز اتجوز زيكو

ببساطة فعلا مش عايز لا اتجوز و لا اخطب زيكو معلش يمكن انا مجنون بس هو كده
استحالة يعنى انى لما اجى يوم خطوبة ولا جواز انى اعمل اللى الناس بتعمله ده زى مثلا ان الاغانى اللى تشتغل تكون هابطة وحتى الاهل بيشجعوك على كده عايزين حاجة تفرح ودوشة و يقولولك حضر الاغانى دى لا بقى انا مش هشغل ولا اغنية هابطة و هتكون كلها راقية كمان و هتكون لمطربين محدش بيسمعهم من العامة زى منير او مارسيل خليفة او وجيه عزيز وفيها ايه يعنى بس مش هتكون اغانى كئيبة او على حزن طبعا
والرقص لو حصل اصلا لانى لا افضل و مبعرفش هيكون على خفيف برضه
عارف ان اهلى واهلها هيكونو معترضين و حاسين بضيق بس دى رغبتنا بقى
و عارف ان الشكل عموما للفرح او الخطوبة هيكون غير مألوف و عشان كده ممكن يبان انو وحش لكنه طبعا ان هيكون ده اللى جميل بجد مش الافراح بتاعتكو
وعارف انك هتكونى يا امى نفسك تفرحى بيا اوى و هتحسى ان اللى عايز اعمله ده مش حلو بس انا عايز كده وهفرحك برضه اكيد هحط اغانى سريعة و حلوة وكل حاجة بس مش هاااااااااابطة لا العنب ولا من خمسة
و حكاية اول اغنية هشام عباس اسماء الله الحسنى مش شرط برضه اعملها و حتى البدلة دى مش معترض عليها لكن فى دماغى انها ممكن تكون لبس عادى بس شيك و فيها ايه يعنى بس دى مش هنختلف اوى هنتفق
و هى فستان فرح طبعا ده احلى حاجة
حتى المكان عايزة مختلف بس لسه مستقرتش عليه ده و بعدين انا كل ده لسه اقتراحات العروسة بقى اللى هتساعدنى فى الموضوع

اه معلش كل كلامى ده جه على اساس انى هلاقى المجنونة اللى هتوافق على الحاجات دى كلها و تزودها

هناك 9 تعليقات:

Princess يقول...

كلام جميل ويا رب نشوف افراح مختلفة بجد عشان الواحد اتخنق

Nouran يقول...

اعمل فرح زي عمرو ورضوة فرح فوق العادة

"*~Daisy~*" يقول...

belzabt :D lessa gayya a2oollak sob7an Allah men yomein ta2riban et3amal fara7 3'er taqleedy fara7 amr w radwa (rabbena yehanneehom w ybareklohom) :D w enn da mesh genan, da eltezam be qana3tak w afkarak :D

حائر في دنيا الله يقول...

عاقل من يومك يعم محمد
بس عايزك تسأل انتا لو مشغلتش هشام عباس في الاول الجواز ينفع ولا لأ
:)

محمد ياسر يقول...

برنسيس عندك حق
نوران اه كان فرح كويس عجبنى فيه حاجتين البساطة والمكان حديقة الازهر
بس مش هيبقى مكان فرحى
شكرا يا ديزى ومش هتخلى عن قناعاتى وافكارى دى
حائر فى دنيا الله
حسيت انك تعرفنى من يومى عشان تقول كده
اما سؤالك عجيب ايه علاقة الجواز ينفع ولا مينفعش بهشام هو كان المأذون؟

غير معرف يقول...

مش عاوزة اتجوز زيك ولا زيكو...

الاغاني الهابطة مرفوضة تماما
باقي الحاجات مش هتفرق مادام الاتنين مقتنعين ببعض يتجوزوا حتي فوق سطح عمارتهم مش هتفرق.........ده مش علشان الفلانتين داي لا سمح الله...اللي هو مش فارق كتير برضه...والناس بتحتفل بيه زي مايكون عيد النصر....واخيرا انا معرفكشمس كلكم بس موضوعكم عجبني فقولت ادخل ارخم....لقد جمعنا الحب فمن يفرقنا.....

محمد ياسر يقول...

و انا سعيد بردك و حلو الاختلاف و اهلا بيك فى اى رد

saso يقول...

معلش بقي
مش يمكن هيا كمان مش عاوزة تلبس فستان
:D
سيبها تختار بقي هي ورغبتها

انا فاكرة يوم قلت اني عاوزة اعمل الفرح الصبح ..بعد نقاش شهور وصلنا لنتيجة مهمة اوي
انك ممكن تلغي الجواز لكن تلغي الفرح دي جريمة

محمد ياسر يقول...

ساسو
تلبس فستان او بنطلون جينز حتى
اى حاجة براحتها برضه