الأربعاء، فبراير 21، 2007

و بعدين فى الوقت ده

حاجة وحشة اوى الوقت ده عمره ما خلانى مرتاح دايما عندى نظام الدراسة كله مشاريع وابحاث اطلع من واحد ادخل فى التانى ودايما لازم اتزنق فيهم او فى لوحة اسلمها واقعد اسهر عليها عشان الوقت و الحق اخلص
او يوم احب اخرج فيه و اقابل اصحابى والاقى المعاد ضارب مع حاجة تانية فمقدرش او احب اروح حفلة و الوقت برضه يطلع مش نافع
حتى و انا قاعد فى البيت كده عندى كتب كتييير من المعرض اللى فات واللى قبله و لسه متقرتش نفسى اقراهم اوى بس فين الوقت
كمان الكتابة ساعات بكون محتاج ابقى رايق كده و رامى كل حاجة ورا ضهرى لكن يفضل برضه الوقت و حاجات كتير تشغل
الاهل كمان ساعات ممكن يكلمونى فى معاد رجوعى صحيح كتير بقيت بعودهم بس لسه برضه لازم يتكلمو
حتى الصلاه بتفوت كتير منها و امتى مفوتهاش بقى حجج فاضية انا فيها يا رب سااامح و اهدي
الوقت دايما بيجرى و بيضيع مش عارف بلحق منه ايه وفاتنى اد ايه

الاثنين، فبراير 12، 2007

الحل القتل ام العلاج؟؟

فى حلقة لهالة سرحان شفتها بالصدفة اللى لفت انتباهى في الحلقة دى انها كانت جايبة بنات كانوا مدمنين و دلوقتى المفروض بطلوا لكن المشرفة بتاعتهم اللى من المصحة اللى هما فيها ولا معرفش فين قالت انهم طبعا مبيسيبوش حد و بيفضل طول العمر معاهم او متابعينه عشان ميرجعش
ساعتها بابا قاللى انهم اكيد بيرجعوا لانهم عمرهم ما هيقدرو يبطلوها
و انا قلتله ما هما متابعين قاللى لا برضه و بعدين قاللى انت عارف فى الصين بيعملوا فى المدمنين ايه؟
فى الصين بيعدموهم
و هو ده حل مناسب او عادل؟
قاللى اه لان مش هيبطلوا ولان باقى الناس هيشوفوا كده فمش هيفكروا يدمنوا
قلتله بس برضه مش حل عادل افرض واحد ظروفه اجبرتهاو اى حاجة وهو ندمان و نفسه يبطلها فعلا
قاللى مش هيبطلها
تفتكرو الحل العادل نموتهم ولا نفضل برضه نحاول نعالجهم برغم ان العلاج فعلا صعب اوى بس انا شايفه ارحم واحسن

بغض النظر عن برنامج هالة سرحان لانه دلوقتى فى تحقيقات عليها لانهم بيقولوا ان اللى جابتهم دول مأجراهم عشان يعملوا الحلقات ولا هما مدمنين ولا حاجة او حتى القضية اللى بيتكلموا فيها ان اللى بتجيبه ده اساءة لسمعة مصر الجملة اللى مش هنخلص منها دى او ان فى رقابة ومينفعش الكلام اللى اتقال يكون بيتقال فى برامج

الاثنين، فبراير 05، 2007

تاج يفوت ولا حد يموت

ياسر http://thequ.blogspot.com/
اللى يكرمه مررلى تاج و اهو تاج يفوت و لا انا اموت
وبعد اسبوع من تأجيجى قررت اجاوب و هو سؤال واحد بس تقيل اوى وصعب جداو هو
انى اقول خمس حاجات محدش يعرفها عنى
الاول انى اشول بكتب و باكل و بشرب وبعمل كل حاجة بايدى الشمال و دى حاجة انا مبسوط بيها بحس انى مختلف يعنى شوية و انا الوحيد الاشول فى دفعتى المعمارية و الحقيقة انى فى اول دخولى الهندسة و مع الرسم والمفروض المسطرة على الشمال لان الواحد بيمسكها و يرسم باللمين بس انا كنت بحطها على الشمال وارسم بالشمال!! حاجة صعبة و مكنتش اعرف حل و محدش قاللى و فضلت كده لحد ما تعودت
كمان حكاية انى باكل بالشمال دى اللى كتير من الاصدقاء بينتقدوها فيا بس انا اشول ومعرفش اكل باللمين زى ما انتو متعرفوش بالشمال يمكن لو كنت اتعلمت وانا صغير ماشى لكنى متعلمتش و دلوقتى مينفعش لانى لو جربت اكل باللمين مش هعرف اكل يعنى ماكلش؟؟ وانا راضى و مش شايف مشكلة
التانية كان نفسى اوى لو صوتى يطلع حلو لكنه وحش والحمد لله و كان نفسى اطلع عازف على اى اله موسيقية اصلى بحب الموسيقى اوى و ده عمره ما تحقق بس يمكن انويها بعدين مين يعلم
التالتة انا حبيت مرة فى حياتى و كان فى ثانوى كنت بحب من طرف واحد ومقلتش لحد ابدا على حاجة زى دى و بعد ما دخلت الجامعة نسيتها و بدأت فى انى اقول حاجة زى دى بصراحة بحس دلوقتى انها اللى كنت بحبها دى كانت حلم و راح زى احلام كتير ما بتروح و تتنسى
الرابع انى بحتقر كل انسان يتف فى الشارع او الطريق يعنى خلاص مستخسر مناديل و كمان بحتقر الشيشة والسجاير والحشيش و الخمور كل الحاجات دى بحتقرها اوى ومع ذلك ممكن تلاقينى مع ناس بيعملو كل ده و اصحابى و كل حاجة عادى لكن جوايا بحتقر اللى بيعملوه ده و مخجلش انى اقولهم كده
توضيح بحتقر الحاجات دى لكن اشخاص كتير ممكن يكونو فى الموال ده وبحبهم لان دى حريتهم برضه وهما المسئولين
الخامس و الاخير بقى انى بساند المرأة فى حاجات كتير اوى بشوف اللى حواليا بيرفضوها طبعا زى ان بنت تروح حفلة او تخرج كتير او يكون عندها نمرة تليفون واحد الاهل ممكن يرفضوا اوى لكن لو كان ابنهم ولد يعنى لا عادى بقى تليفونه مليان بنات
كمان انا اؤمن ان فى صداقة بين ولد وبنت اه ايه يعنى ما دام فى حدود الاحترام وحاجات تانية كتير فى حكاية المرأة دى بقى

دبس حد بقى دلوقتى بس انا هدبسهم وهما براحتهم بقى
كلمتين http://daisyduality.blogspot.com/
عايشة وخلاص http://unavilable.blogspot.com/
من كام شتا http://yassernaeim.blogspot.com/
و اى حد تانى يحب يجاوب بقى

الخميس، فبراير 01، 2007

فيروز كراوية جميييلة بجد

لاول مرة اروح حفلة لفيروز كراوية كان انهاردة فى الساقية كنت بسمع عنها بس لكنى تحمست انهاردة ورحت والحمد لله انى رحت كانت رااائعة
فيروز صوتها رائع اوى اول ما سمعته مصدقتوش بجد مفيش اجمل من ده صوت حسيت انه مش طالع منها مش قصدى اقلل منها لكن من جماله اوى كأنه متسجل مثلا و فى حركات تعديل الصوت دى لكنه طلع طبيعى و جمييل والاداء كان جميل وعندها قدرات طبقات صوت متعددة اعلى واقل و هادى
فيروز عندها فرقة حلوة اوى بقيادة عمرو جاهين (عود)اجمد واحد فيهم ومحمد عبد الله (بيانو)جامد و محمد درويش (اليكتريك جيتار)و محمد يوسف (كى بورد) مكنش باين و احمد عادل (كمان)جاامد و مايكل عاطف (بيز جيتار) و شريف كمال و هانى سيكا(بركشن) واحمد هشام (درامز)
فيروز دخلت باغنية (القهوة) والاغنية حلوة اوى كلمات احمد حداد والحان شريف الوسيمى
وبعدها غنت (لوحدك)تأليف فيروز كراوية والحان عمر الرخاوى
التالتة كانت (مقدرش انسى البشر)كلام صلاح جاهين والحان سولى
بعدها اغنية (باعدى الشارع) لعمر طاهر والحان عمرو جاهين
الخامسة (باقى ايه) اياد ابو بكر ومحمد عبد الله
السادسة (تسابيح) احمد الفخرانى
السابعة(على بالك) احمد الفخرانى وعمرو جاهين
الثامنة (انت ما بتضحكش ليه) محمود عزت والحان فيروز كراوية
التاسعة (دمك تقيل) احمد حداد ومحمد رمزى
دمك تقيل كلامك قليل وفى حبك بخيل دايما مطنش بصراحة دمك تقيل تعالى بالضحكة نضيع وقت ممل تعزمنى على السيما نقضى وقت جميل اصل الكلام راحة بصراحة دمك تقيلكلمنى فى التليفون قلى كلام فاضى انا عايزة حب جنون ليه انت مش راضى ...
العاشرة (جربت) تامر فتحى وعمر الرخاوى
جربت تصحى لوحدك تمشى لوحدك فى قلب الشارع ناس كتير .....
ال11 (عاشق قليل البخت) لاحمد الفخرانى وعمرو جاهين
بتقول عاشق قليل البخت فى ايده ورد و فى جسمه رعشة برد وفى قلبه قلب وحيد وحلم طاير بعيد ....
الاخيرة كانت (بنات يا بنات) كلمات كوثر مصطفى والحان اكرم مراد
وبتقول بنات بنات يا بنات هو احنا ليه بحالات فينا حاجات تتحب وحاجات تجن ساعات ... من غير ما تحصل حاجة يدق دايما قلبى من غير ما بعمل حاجة بلاقينى عايزة اخبى بخبى ليه و بدارى ايه.. ايه السبب.. قلة ادب ....بسرح كتير و اكدب كتير ........معرفش ليه بعمل كده
الحقيقة حاولت اكتب الكلام اللى افتكرته من الاغانى او اللى سجلتها مقاطع صغيرة نظرا لموبايلى المتواضع
كلمات الاغانى تحسها كلها قريبة منك و تحسها اوى كلام تحبه اول ما تسمعه
الالحان كلها جميلة بجد مش عارف اقول غير كده
كان نفسى لو اقدر اسجل الحفلة كلها فعلا
عجبنى فيروز كل اغنية بعد ما تقولها بتقول اللى كاتب و اللى ملحن مع ان كان فى ورقة بتتوزع علينا مكتوب فيها بس هى برضه كانت بتقول فى الورقة كان مكتوب الموقع بتاعها
و لما روحت دخلته على طول هو مفيهوش اغانى لكن فيه شوية حاجات تخليك تعرف قد ايه فيروز دى جميلة بجد ومتعددة المواهب لانك هتدخل تقرا ليها بتكتب مقالات وحاجات تانية غير تأليفها لاغانى او الحان غير الغنا طبعا
و فى اول كتابتها بعنوان منولوجات رجولية
اللى كانت بتتكلم فيها عن 8 مونولوجات عن الرجال بالطبع
و بعدها مقال اسمه رسالة
ثم مقال رسالة 2 واسمه هل اختار الغياب؟
بعده مقال اسمه ايمن نور .. تامر حسنى ...المجرم والنجم
مقال جميل يا فيروز
ثم مقال نحو بطل بلا بطولة
واخيرا سيناريو فيلم صباح الفل
اللى كان مشروع تخرج شريف البندارى وتمثيل هند صبرى بجد كل مقالاتك وكتابتك وصوتك وادائك تحفة
موقع فيروز كراوية واللى فيه كتاباتها

http://fayrouzkarawya.com/?language=english