الاثنين، فبراير 05، 2007

تاج يفوت ولا حد يموت

ياسر http://thequ.blogspot.com/
اللى يكرمه مررلى تاج و اهو تاج يفوت و لا انا اموت
وبعد اسبوع من تأجيجى قررت اجاوب و هو سؤال واحد بس تقيل اوى وصعب جداو هو
انى اقول خمس حاجات محدش يعرفها عنى
الاول انى اشول بكتب و باكل و بشرب وبعمل كل حاجة بايدى الشمال و دى حاجة انا مبسوط بيها بحس انى مختلف يعنى شوية و انا الوحيد الاشول فى دفعتى المعمارية و الحقيقة انى فى اول دخولى الهندسة و مع الرسم والمفروض المسطرة على الشمال لان الواحد بيمسكها و يرسم باللمين بس انا كنت بحطها على الشمال وارسم بالشمال!! حاجة صعبة و مكنتش اعرف حل و محدش قاللى و فضلت كده لحد ما تعودت
كمان حكاية انى باكل بالشمال دى اللى كتير من الاصدقاء بينتقدوها فيا بس انا اشول ومعرفش اكل باللمين زى ما انتو متعرفوش بالشمال يمكن لو كنت اتعلمت وانا صغير ماشى لكنى متعلمتش و دلوقتى مينفعش لانى لو جربت اكل باللمين مش هعرف اكل يعنى ماكلش؟؟ وانا راضى و مش شايف مشكلة
التانية كان نفسى اوى لو صوتى يطلع حلو لكنه وحش والحمد لله و كان نفسى اطلع عازف على اى اله موسيقية اصلى بحب الموسيقى اوى و ده عمره ما تحقق بس يمكن انويها بعدين مين يعلم
التالتة انا حبيت مرة فى حياتى و كان فى ثانوى كنت بحب من طرف واحد ومقلتش لحد ابدا على حاجة زى دى و بعد ما دخلت الجامعة نسيتها و بدأت فى انى اقول حاجة زى دى بصراحة بحس دلوقتى انها اللى كنت بحبها دى كانت حلم و راح زى احلام كتير ما بتروح و تتنسى
الرابع انى بحتقر كل انسان يتف فى الشارع او الطريق يعنى خلاص مستخسر مناديل و كمان بحتقر الشيشة والسجاير والحشيش و الخمور كل الحاجات دى بحتقرها اوى ومع ذلك ممكن تلاقينى مع ناس بيعملو كل ده و اصحابى و كل حاجة عادى لكن جوايا بحتقر اللى بيعملوه ده و مخجلش انى اقولهم كده
توضيح بحتقر الحاجات دى لكن اشخاص كتير ممكن يكونو فى الموال ده وبحبهم لان دى حريتهم برضه وهما المسئولين
الخامس و الاخير بقى انى بساند المرأة فى حاجات كتير اوى بشوف اللى حواليا بيرفضوها طبعا زى ان بنت تروح حفلة او تخرج كتير او يكون عندها نمرة تليفون واحد الاهل ممكن يرفضوا اوى لكن لو كان ابنهم ولد يعنى لا عادى بقى تليفونه مليان بنات
كمان انا اؤمن ان فى صداقة بين ولد وبنت اه ايه يعنى ما دام فى حدود الاحترام وحاجات تانية كتير فى حكاية المرأة دى بقى

دبس حد بقى دلوقتى بس انا هدبسهم وهما براحتهم بقى
كلمتين http://daisyduality.blogspot.com/
عايشة وخلاص http://unavilable.blogspot.com/
من كام شتا http://yassernaeim.blogspot.com/
و اى حد تانى يحب يجاوب بقى

هناك 8 تعليقات:

Taher يقول...

انا اشول برضه

بس ليه يا عم انت بتحتقر اللى بيشربو سجاير ممكن تزعل منهم تتضايق تتخنق يا اخى انما تحتقرهم لا مش للدرجة دى

:)

www.blogs4arab.com يقول...


يسعدنا تشريفك
www.blogs4arab.com

albida يقول...

أهلا بيك فى عالم التدبيس!! ولا يهمك التدبيس للجدعان
هههههههه

أنا متفقة معاك جدا فى موضوع اللى بيشربوا سجاير وشيشة وخمور وحاجات من دى.... ببقى مضايقة اوى وزعلانة علشنهم, والله أنا بعمل اللى عليا وبنصحهم

كمان طلعت جدع فى موضوع مساندة البنات دى
:)
بس مين سمعك؟!! فى مجتمعنا البنت محرم عليها حاجات كتير.. والسبب؟ أنها بنت!! دى ثقافة مجتمع وبتاخد وقت علشان تتغير


manal

frozen love يقول...

egabtk 7lwa awy ya m7md...enty ensan safy awy 3la fkra

t7yaty

~ Bato0ot ~ يقول...

ana kont shoola zman w mamty fdlt waraya l7ad ma ba2et bktb bel yemen :D

w btw :D mafish welad kteer zayak keda :D fe 7ekayet el mar2a w el kalam da :D momkn ye2olo keda manzar msh aktar

محمد ياسر يقول...

طاهر
انا مش بحتقرهم بمعنى انى بتخنق وبتضايق فعلا انما انا ليا اصحاب كتير بيشربو سجاير وبحبهم واصحاب عادى

منال
وانا كمان بنصحهم وربنا يخليكى وان شاء الله تتغير ثقافة المجتمع

frozen love
ربنا يخليك واتمنى اشوفك دايما

batooot
مش عارف حكاية الواحد يطلع اشول نخليه يكتب باليمين ونفضل وراه احسن ولا نسيبه!!
ان شاء الله يبقى فى كتير زيى ويقتنعو و اه فى بيقولوا منظر بس بينكشف لو هو رأيه غير كده

saso يقول...

طبعا الخامس او الاخير دي بجد حاجة تفرّح ان في حد بيفكر كده

يا بختك بنتك لما تيجي -ان شاء الله -ان عندها بابا حلو كده
اوعي تغير بس رأيك وقتها

محمد ياسر يقول...

ساسو
لا ان شاء الله رأيي زى ماهو لانى مقتنع بيه