الاثنين، فبراير 12، 2007

الحل القتل ام العلاج؟؟

فى حلقة لهالة سرحان شفتها بالصدفة اللى لفت انتباهى في الحلقة دى انها كانت جايبة بنات كانوا مدمنين و دلوقتى المفروض بطلوا لكن المشرفة بتاعتهم اللى من المصحة اللى هما فيها ولا معرفش فين قالت انهم طبعا مبيسيبوش حد و بيفضل طول العمر معاهم او متابعينه عشان ميرجعش
ساعتها بابا قاللى انهم اكيد بيرجعوا لانهم عمرهم ما هيقدرو يبطلوها
و انا قلتله ما هما متابعين قاللى لا برضه و بعدين قاللى انت عارف فى الصين بيعملوا فى المدمنين ايه؟
فى الصين بيعدموهم
و هو ده حل مناسب او عادل؟
قاللى اه لان مش هيبطلوا ولان باقى الناس هيشوفوا كده فمش هيفكروا يدمنوا
قلتله بس برضه مش حل عادل افرض واحد ظروفه اجبرتهاو اى حاجة وهو ندمان و نفسه يبطلها فعلا
قاللى مش هيبطلها
تفتكرو الحل العادل نموتهم ولا نفضل برضه نحاول نعالجهم برغم ان العلاج فعلا صعب اوى بس انا شايفه ارحم واحسن

بغض النظر عن برنامج هالة سرحان لانه دلوقتى فى تحقيقات عليها لانهم بيقولوا ان اللى جابتهم دول مأجراهم عشان يعملوا الحلقات ولا هما مدمنين ولا حاجة او حتى القضية اللى بيتكلموا فيها ان اللى بتجيبه ده اساءة لسمعة مصر الجملة اللى مش هنخلص منها دى او ان فى رقابة ومينفعش الكلام اللى اتقال يكون بيتقال فى برامج

هناك 9 تعليقات:

sara يقول...

هى فعلا عملت كده و ادت كل بنت 400 جنيه و قالتلهم ان هى هتغير صوتهم و مش هتجيب شكلهم بس ضحكت عليهم

انا شايفه طبعا ان مش الحل الاعدام

ميرسى ليكى

Searcher يقول...

ما علينا من موضوع هاله سرحان هو واضح أوى إنه متفبرك
بس إيه حكاية الإعدام دى هما مش المدمنين دول بنى أدميين برضه ولا إيه الإدمان ده مرض لو كان المفروض اللى يتعب يعدموه يبقى بالأولى يعدموا اللى عنده سرطان و إيدز لأن ده هو اللى فعلاً مش هيخف
و بعدين مين قال إن المدمن مستحيل يتعالج إيه الكلام الغريب ده؟؟

Taher يقول...

يعنى بالعقل كده هم رضيوا انهم يتفضحوا قدام العالم

واضحة اوى يعنى


ياسر ما تعرفش البلوج بتاع مانورا قفل ولا صاحبته حصل لها حاجة لاقدر الله ولا ايه

محمد ياسر يقول...

سارة
اه فعلا
واكيد الحل مش اعدام انا معاكى

searcher
اه يا عم فى الصين بيموتوهم وغرضهم بكده ان لما دول يموتو محدش هيدمن بس فعلا المدمن صعب يبطل لكن كل شئ ممكن بالارادة

طاهر باشا
اه عندك حق
تقصد منورة منار يعنى اذا كنت تقصدها فهى اه بطلت تكتب فى المدونة وتقريبا سابتها خلاص بس هى كويسة والحمد لله

Hamed Ibrahim يقول...

تصدق أول مرة أخد بالي إنك عاشق منير إللي أعرفه
!!
إن شاء الله نتقابل في حفلة وجيه عزيز الجاية
حبيت بس أمسي عليك

~ Bato0ot ~ يقول...

akeeed el e3dam msh 7al abdan!!!

بيقولوا سايكو يقول...

أول مرة أسمع بصراحة ان المدمن مش بيتعالج .. أنا اعرف انه بيعد فترة طويل يتعالج و انه لازم يعد فترة نقاهة محترمة علشانم ما يرجعش تانى ... فمادام ليه علاج إيه حكاية غلإعدام دى ؟!

mano يقول...

بس انا اعرف ان فى علاج للأدمان

بس غريبه قوى انهم بيعدموهم فى الصين

Hannoda يقول...

على فكرة هي فكرة الإعدام مش وحشة على الأقل حاتسام في تقليل حجم المدمنين كتير و تكبر احساس الناس بسوء الادمان

بس هو أكيد منافي لشرع ربنا و ده بيلغيه كحل نهائيا


أما عن موضوع البنات .. فأنا مع اللي قاله انها تشويهه لسمعة المصريين

أنا حاساها عمليا هنا في قطر... من يوم الحلقة و أنا كتير بتسأل بدهشة عجيبة من الناس هنا

هو فعلا في مصر في بنات ليل بيتعرفوا من أشكالهم عندكوا؟؟

وأسئلة كده كتير بحس من خلالها بالاتهام و برد غصب عني كاني فموقف الدفاع

القضايا ده مكانها المحطات الأرضية لمناقشتها

ما انكرش اني عيطت لما اتفرجت ع الحلقة و اني انتبهت لمعاني معينة

بس ليه كل الناس تعرف عيوبنا .. العيوب عشان تتحل لازم احنا نعرفها و نتهز في نظر نفسنا .. ساعتها حانخاف نتهز في نظر غيرنا..

لكن لما نتهز في نظر غيرنا كمان تبقى هاصت ويبقى الوضع على ماهو عليه