الثلاثاء، مارس 06، 2007

احمد منيب الذكرى 17

الراجل ده كان تحفة و لازم نفتكره فى ذكراه و نفتكر الحاجات الجميلة اللى عملها الراجل ده كان طيب و هو نوبى للى ميعرفوش هحاول اقول كل اللى اعرفه عنه هو كان الاب الروحى لمنير و حاجات كتير اوى لمنير لحنها ليه و بدايات حميد الشاعرى غناله و علاء عبد الخالق غنى الفرح ليه صاحب و فؤاد غناله صدقنى يا صاحبى وحميد رجع تانى فى الشريط الاخير ليه غناله يا وعدى على الايام

وقدم احمد منيب اكثر من 85 لحناً لكبار المطربين وغنى من هذه الحان اكثر من 53 لحناً

و لو تسمعوا اغانى الراجل تشوفوا اد ايه جميلة وانه حاول يغنى لكل حاجة و يمكن غنى لكل حاجة فعلا

اسمع مثلا عشرية شوف بيتكلم عن الزوجة ازاى و بيقول مين اللى يسهر جنبى الليل مين اللى باله معايا طويل

اسمع بنسهر الاوتار اللى غناها منير برضه اغنية تحفة

اسمعه بيغنى مع اطفال الدنيا برد و بيغنى بابا يا بابا وبيقول بابا يا بابا يا ضى عنينا قول بتحب مين اكتر فينا و كلامه ليهم تحس كلام بين اب و ولاده فعلا

اسمع الوعد والمكتوب و تعرف حال الدنيا و المكتوب علينا

و اسمع احسن فرحة باغنية فرحة قلبى و اه و اه و يا فرحة قلبى كنت طير وصبحت مراكبى يعنى ملكت فرحة الاتنين وكأنك عشت الحالتين و تسمعها تفرح فعلا

و اسمع مد الايام اللى تديك امل و تنسى الحزن و هى اللى انا حاططها على المدونة تسمعوهاا اهو جميلة اوى

و اسمع روق بالك و لو كان مشغول اكيد هيروق فعلا و تبقى سعيد

و اسمع صدقنى يا صاحبى وتحس بان واحد صاحبك فعلا بيكلمك

و اسمع مشتاقين وعيط بقى

و اسمع راح اغنى و ربك هو العالم و ابو الريش و مفيناش من الخوف و كان ماشى وكان وكان و مصرية وانا مصرى ومكتوبين لبعض و اتمايلى

و الحانه بقى مع منير كتييييير

الله يرحمك يا منيب يا راجل يا طيب

اغانيه هتلاقوها فى طرب توب وفى كذا حتة دور وهتلاقى و ان حد عايز حاجة يقولى ان شاء الله اساعده

هناك 4 تعليقات:

ياسمين يقول...

محمد منيب من الناس الحلوة اللى فاكراهم واحنا صغيرين

ادخل انت يا محمد واعمل اللازم .. احنا تيم وورك واحب انك تكون من الناس الفعالة فى المجموعة وشكلنا هنعتمد عليك فى الدعاية
:))))

غير معرف يقول...

عشان إنت جميل يا محمد .. بيعيش جواك كل شئ جميل

تحياتي
علي سلامة

The Alien يقول...

أحمد منيب إحساس غريب
بحب كل ألحانه وبموت فصوته
لما بسمع الدنيا برد بحس إنه فعلا جنيني بيحب الورد

علي فكرة ... الخميس هيبقي فيه ف الساقية يوم ليه
أنا مش عارف التفاصيل
لو تعرف حاجة عن اليوم ده ياريت تقولي

تحياتي

محمد ياسر يقول...

ياسمين
اه جميل
و ان شاء الله ربنا يقدرنى اذا عرفت اعمل حاجة
و انا دخلت فعلا قولت خلاص

المفاجأة دى رهيييييبة يا استاذ على و انا مبسوط لتعليقك

the alien
مش عارف الحقيقة بس معتقدش بتبقى حلوة انا قريت عن بتاعة السنة اللى فاتت و متحمستش

تحياتى