الأحد، مارس 04، 2007

مصر ونيجيريا

كنت فى كليتى قاعد انا و شلتى لا بينا ولا علينا و شوية مننا كانوا بيلعبوا بكانز كأنها كورة (معلش بقى هيموتو على كورة فى الوقت ده) المهم لاقينا كمية ناس من الزنوج نازلين من مبنى و بعدين شوية منهم قرروا يقفوا معانا عشان عايزين يتصوروا معانا اتصوروا ومشيوا وبقى واحد منهم
بدأ كلامه معانا الاول عن الكورة و اسماء اللاعيبة النيجيرين واحنا نقوله اسامى برضه و قلنا كمان مصريين و بعدين خرجنا من موضوع الكورة ودخل فى الكلام التقيل بقى
كان بيسألنا و يحاول يعرف اكبر معلومات عن مصر وكان فاكر ان احنا عندنا الكهربا و الجاز و الانترنت و الخدمات دى كلها ببلاش و طبعا فهمناه انها بفلوس مش ببلاش حاجة عندنا فسأل سعر الجاز بتاع الاكل والكلام ده قلناله تقريبا 4 جنيه قالنا مهو رخيص اهو قلناه بس حسب الاستهلاك بقى
بعدين سأل عن الدكاترة فى مصر الاطباء بياخدوا كام مرتب قلناله لو حكومة كبيره 200 جنيه انما لو خاص هيبقى ازيد حسب و سألنا عن الحالة الاقتصادية للبلد و قلناله اننا بلد فقير الناس بتدور على اكلها بالعافية و دى النسبة الكبيرة وعندنا اغنيا اوى برضه اما الوسط فهما قليل و بعدين قالنا على كده انتو تسافرو احسن برة مصر عشان الفلوس وكده قالوله بلدنا ولا يمكن نسيبها و احنا االمصريين منسيبهاش ممكن بس نسافر و نرجع تانى ماشى قعد يكلمنا عن ان الواحد يبقى عنده حلم و ايمان قوى و قال كلام جامد كده اننا لازم نكون نفسنا و نعمل حاجة و قالنا انه عايش بين نيجريا ولندن عشان يكون حاجة كبيرة برضه
و سألنا السفر سهل ولا لا قلناله لا طبعا مش سهل و سألنا على الفيزا قالناله اه صعب تطلع و ان العرب كمان عموما بيحرصوا منهم
بعدين سألنا عن البنات و كان بيسأل ممكن واحد يمشى مع واحدة فى مصر قلناله اه ممكن بنعملها بس التقاليد و المعروف لا المفروض مينفعش قالنا عندهم عادى و قالنا انه متجوز بس بيكون ليه صديقة لكن بيخفى عن مراته لانها بتتضايق
بعدين شاف كام واحد مننا بيشرب سجاير قال ليه ومضرة و الكلام ده قالوله اه عارفين قال طيب ومش ممنوعة قلناله لا قال طيب البيرة قلناله لا دى منشربهاش والمسلمين ميشربوهاش قال ليه قلناله عشان بتفقد العقل و مينفعش مع صلاه المسلمين قال لو واحدة بس مش هتفقد وعى قلناله لا طبعا هو المبدأ من اوله مينفعش (طبعا مرضيناش نقول ان فى مسلمين كاسرين القاعدة و بيشربوا بيرة وكل حاجة)
بعدين سأل على الشيشة قالوله اه برضه بيشربوها قال دى بعلبتين سجاير لوحدها و مضرة جدا قالوله عارفين قال المفروض متشربوهاش و الصحة فواحد مننا قاله لا انا بشرب و بجرى ساعتين تلاتة والعب كورة الراجل مصدقش وقاله لا مش معقول
بعدين سألته هو فى نيجريا محدش بيشرب سجاير قال عندكو هنا فى اى مكان بتشربوا و بتتعزموا على بعض غريبة اوى انما عندنا محدش بيشرب واللى بيشرب بيكون مدارى ومخبى مش عادى كده و ان اللى بيشرب ده او يعزم على حد هناك بيقولوا عليه
bad boy
قلناله لا هنا عادى
و بعدين ودعناه ومشينا على اساس هنتقابل تانى بقى لانه عندنا بيدوهم كورسات وكده فى كليتنا

هناك 9 تعليقات:

MoHaMeD HoSSaM يقول...
أزال المؤلف هذا التعليق.
MoHaMeD HoSSaM يقول...

اجدع حاجة وهو بيسالكم هى الحاجات دى ببلاش ميعرفش الى بيحصل ربنا معانا فى الايام السودا

غير معرف يقول...

كمية ناس من الزنوج
موش شايف إن العبارة دي فيها حاجات غلط ؟؟؟؟؟؟؟؟؟؟؟؟؟؟

Yasser يقول...

يابووووووي
ايه يابني انت مازهقتش من الراجل دة
انا وقفت معاه خمس دقايق وتعبت
ولاهو فاهم حاجة منكو ولا انتو فاهمين منه حاجة واقفين بتتكلمو بالاشارات
ماتقوليش ان اللي كنتو بتتكلمو بيه دة كان انجليزي
دة ممكن يتقال عنه زنجليزي

انا اروح اقعد في الكافيتيرا بعد كدة على طول لو الراجل دة هاينط لنا كل شوية تاني

fares يقول...

ههههههههههههه ايه ياحمو الكلام الجامد ده يبني مانتا فاهم ان كل حاجه عندنا بفلوس انتا عارف شويه كده وهيبقي الهوا المعفن اللي احنا بنتنفسه هيبقي بفلوس ياريت يامحمد تشرفتني علي مدونتي سلالالام ياغالي

محمد ياسر يقول...

محمد حسام
اااه لو يعرف البلد بتتسرق منها قد ايه
مش يقولى الخدمات عندنا ببلاش فاكرنا فى نعيم

الاخ اللى معرفوش اللى بيقول العبارة فيها غلط معرفش ايه تقصد؟!!

ياسر
لا مزهقتش انا كنت مبسوط من كلامه معانا اما الانجليزى فهما النيجريين عندهم الانجليزى نطقه صعب شوية وغريب لكننا كنا متفاهمين

فارس
يا عم دول ناس مش حاسة بينا مين يقولهم بقى
منور يا ريس

أغلو يقول...

طرزان..... طرزان؟؟؟؟

محمد ياسر يقول...

اغلو
طرزان مين يا عم هو انا قلتلك انى قابلته فى الغابة و لا كان متشعلق على شجر

SaSo يقول...

على فكره يامحمد الراجل ده جاثوث,وبعدين انت موش شايف انك اتدلقت معاه ف الكلام وقولتله اسرار مكنش يصح تتقال,ايه الحاجات غاليه والكلام الفاضى ده وبنشرب سجاير ده انت كان ناقص تقوله اننا بنلف بانجو,موش شايف انك زودتها ونشرت غسلينا الوسخ ادام الرادل...زبعدين خلى بالك بقى فيها تهمه بتدخل الناس السجن اسمها"اهانه مصر"
انا قولت اهوه
وبعدين اول مره اعرف يامحمد انت بتتكلم نيجيرى!!