الاثنين، مارس 12، 2007

فى الميكروباص

بركب مكروباص ومروح و لسه السواق بيحمل لحد ما اتملى الميكروباص و اتبقى بس مكان واحد فاضى قدام جنب السواق كانت واحدة ست بس المهم مشى شوية كده لقى واحدة بتوقفوا وشايلة عيلين وقف عشان تركب ادام جنب الست اللى جنبه
راحت هى فتحت الباب و نزلت اللى كان قاعد عند الباب ده و قالتله اركب انت ادام و انا هركب مكانك نزل الشاب ده عشان يركب ادام و الست ام عيلين ركبت مكانه جه يركب هو بقى ادام قالتله الست لا مبركبش رجالة جنبى و بعدين السواق مشى بالعربية وساب الشاب و هو فضل واقف مذهول انه بعد ما ركب و قعد ينزل فى مكان صعب يركب منه تانى غير انه كان راكب اصلا و ملوش ذنب
الست ام عيلين قالت للست اللى قدام مركبتيهوش ليه قالتلها لا انا قولت رجالة ميركبوش جنبى و هو السواق كان معرفة ليها يعنى قريبها ولا حاجة

الموقف ده كان غايظنى اوى
يعنى واحدة بعيلين واقفة ونفسها تركب و تروح و لما لقت فرصة ركبت و اما عرفت الشاب اللى نزلها مركبش مفكرتش تنزل ترجعه يركب فكرت فى نفسها بس

التانية اللى كانت قاعدة ادام عاملة فيها مبتركبش رجالة و هى حاجزة بقى المكان ما دام السواق قريبها او معرفة و ملهاش دعوة بالواد اللى نزل برضه ده مش موافقة تركبه عشان مبدأها العبقرى

السواق ملوش دعوة اهو الميكروباص فيه ناس وخلاص مين ركب مين نزل ملوش دعوة اهو هيلاقى حد ياخد منه اجرته وخلاص اما المكان اللى جنبه فمش مهم حد يركب عشان الهانم اللى معاه طبعا تأمر

الشاب ده المسكين فعلا بس معلش اصل كل واحد بيفكر فى نفسه ولو كنت فكرت فى نفسك مكنتش نزلت للست اللى نزلتك

هناك 16 تعليقًا:

Dananeer يقول...

متفتكرش ان الولاد لوحدهم اللى بيحصلهم كده

البلد دى عايزه تتعلم الادب و النضافه و النظام
و حاجات كتير
بكرباج

ماهو مفيش حل
عايزين قوانين صارمه زى بتاعه الاتحاد السوفيتى
و مفيش مانع فى جميع انواع العقوبات
:)
معلش لحظه غيظ و تجلى

مش فاهم حاجة يقول...

سبحان اللة
موقف شبة دة حصلى النهاردة
انا نزلت عشان واحدة برضوا تركب
وانا طلعت اقعد قدام
جة واحد معدوم الزوق
وركب قدام
ومحكليكش بقى على التريقة اللى اخدتها
من السواقين اللى كانوا واقفين


وانا مع رائى دنانير

محتاجين تغير
فى السلوكيات بتاعنا

"*~Daisy~*" يقول...

welcome to egypt :D

محمد العدوي يقول...

وعجبي ..

يعني من وجهة نظر الست هي ذات حق ما دامت ستدفع أجرة المكان .

ومن وجهة نظر الجميع ان الشاب على تصرفه يستحق المجازاة .

علشان كدة ليس من الممكن أن تسير الحياة بالحق الذي لك أو لغيرك وحده .. مالم يخالطها جمال الخلق ورقة الطباع .


بس نأخذ في الاعتبار انه احيانا بنكون في ضيق ومليون حاجة في دماغ الواحد فيتصرف بهذه الصورة .. يعني الذوق لا يسعف أصحابه دوما ..

ربما ..


ونورتك .

غير معرف يقول...

jaleo- اللي يعيش ياما يشوف ولسه هنشوف كمان دى قلة ذوق من المراتين

إبراهيم محسن يقول...

إزيك يا محمد

اللي شفته ده طبيعي من ناس مش ناس في البلد دي

انا في مرة كنت راكب ميني باص وواقف على الباب بسبب الزحمة وواحدة ست طلعت في وسط الزحمة كانت هتقع من الميني باص وهو ماشي.. مسكت ايديها بسرعة وشديتها جوه.. لما دخلت زعقتلي علشان مسكت إيديها

عادي يعني ولا يهزك

سلام

shady يقول...

الميكروباص دا يا بني عالم لوحدة .. بص
اتنين عارفين مشكلة مصر وحلها .. السواقين والحلاقين

انا كل اسبوع باسافر دا غير تحركاتي في القاهرة وبصراحة سمعت وشفت ما هو اغرب وأبوخ واظرف أحيانا

اللي يعيش ياما يشوف .. واللي يركب الميكروباص يشوف أكتر

كراكيب نـهـى مـحمود يقول...

وما مصر الا ميكروباص كبير وصباحك فل

بيقولوا سايكو يقول...

بس سؤال هو ليه الهجوم الضارى اللى على الست اللى قاعدة قدام ؟ ساعات فعلا المكان قدام بيبقى سخيف جدا ان بنت ( أو ست ) تعد و جنبها راجل .. الغلط أساسا على سواق الميكروباص اللى ما رتبش الحكاية دى و على الست أم عيلين اللى وافقت ان ده يحصل و انه انا و من بعدى الطوفان .. و مش قادرة ألوم الشاب .. لانه ما عملش حاجة يستحق انه يلام عليها

ادم المصري يقول...

والله هي الدنيا كدا

وهي الناس كدا

احوال غريبة وناس غريبة واللي بيحصل لنا اغرب

تحياتي

shams يقول...

صحيح هي الدنيا كده .. وصحيح هي دي مصر يا عبلة قصدي يا محمد .. بس لو جيت تتكلم وتقول مثلاً للسواق اقف الشاب لسه مركبش هيقولولك يا إما انت مالك يا إما انزل وركبه .. يعني المشكلة انه ياريتها جت على قلة الذوق بس .. لأ ده دخلت في قلة الأدب كمان .. ومش بعيد كلهم يهبوا فيك انت مالك .. هو كان من بقية أهلك .. وهكذا .. أصل السكوت مش نافع والكلام برده مش نافع .. آه يا بلد

Noran يقول...

متعملش خير ......فى بلاد مفهاش مكان للخير


الطيب و الذوق ...بيضيع فى البلد ده


ربنا يستر علينا

:(

مياسه سمره يقول...

بجد هم يهاءهاء وهم يهيءهيء
هي دي مصر يامرسي هي دي مصر
وهما دول المصريين
او ممكن نسميهم مخلفات المصريين
انا طبعا ماقصدش حاجه
بس احنا في اسكندريه لسه الوضع
ماباقاش كده اوي الناس لسه بتتكلم
وبتهاتي هو اه ماحدش بيعبرنا بس شويه
بنقول...بس فعلا سواقين المشاريع دول
ماحدش يعرف ياخد معاهم حق ولا باطل
ويبقي الواحد فيهم غلط وكل الناس
اللي اعده عارفه ده بس ممكن ينط
في كرشك لو بصيتله بس
بس انا والله لسه متعاركه مع سواق
مشروع من يومين انا وراكب تاني
بس مشي اللي في دماغه في الاخر
بس اهو اسمنا اعترضنا الراجل نزل
مارضيش يكمل انا بقي كملت زي الجزمه
ماكنتش حلاقي مواصلات
يلا منهم لله البعدا
سورري عاللك

shabfa2re يقول...

معلش.. احنا بنعمل الخير عشان ربنا

shabfa2re يقول...

معلش.. احنا بنعمل الخير عشان ربنا

الأرمـوطــي يقول...

امال بقه لو غلط وركبت عربية السيدات فى المترو يووووووووووه استلقى وعدك بقه