الثلاثاء، مايو 15، 2007

هو المستقبل فى البلد دى ولا برة ؟؟؟

كنت بتكلم مع واحد صاحبى و زميلى فى الكلية و هو متمرد على انه يعيش هنا بعد ما يتخرج و انه لازم يسافر و يشتغل برة عشان يحقق نفسه و حياته و يجيب فلوس و بعدها هيجى و ان هنا مش هيلاقى الشغل و مش هيوصل لحاجة و انه هيقعد على الاقل لسن الاربعين عشان يوصل لحاجة لو قعد هنا ومش هيجوز غير فى السن ده كده و لما قلتله لا ممكن تتجوز فى الطريق و تكمل معاك قاللى مفيش بنات كده و لما قولتله لا فيه مقتنعش برضه ومقتنعش بانه ممكن يقعد هنا و يعمل حاجة و انا بكلمه و بلاقى نفسى برد عليه كده بأن لا البلد دى هنقدر نوصل فيها ونعمل حاجة وكأنى واثق اوى انى هعمل كده مع ان ده فى علم الله و بعدين انا اصلا كنت بفكر فى السفر لفترة و ارجع و انى عايز اشوف الدنيا و البلاد التانية بس انا بفكر فيها سياحة اكتر من شغل يعنى و حتى لو شغل برة يبقى حاجة كده اللى هو ليا مشروع هناك بروحله وارجع لان هنا شغلى الاساسى مش مقتنع انى اقعدلى يجى خمس سنين برة عشان اشتغل و اجيب فلوس و بعدين مشفتش حد راح يشتغل ورجع كله بيروح و يطمع و يقعد لحد ما يطلعوه هما من الشغل ولا حاجة و ساعتها يرجع معاه فلوس ااه ممكن بس مش هيلاقى شغل غير بقى خاص كده مشروع هو يعمله و يا عالم هينجح و لا لا
يبقى البلد دى احسن و لا برة؟؟

هناك 20 تعليقًا:

Davinci يقول...

معادلة صعبة..
تسافر في بداية حياتك.. في الوقت والسن الذي يمكنك فيه التعب والاجتهاد لتكوين نفسك.. ومهما طال الزمن ستعود..
وعندما تعود تكون وصلت لسن من أهم احتياجاتك فيه الاستقرار.. سترجع بنقود.. لكنك تحتاج إلى البداية من جديد.. والتعب من جديد..
المشكلة أنك الآن لست مخيرا.. هنا لا يوجد عمل حقيقي..

ربنا يتولانا برحمته...

The Alien يقول...

الهدف من السفر بيفرق من حد للتاني
يعني فيه ناس بتسافر عشان الفلوس
وفيه ناس بتسافر عشان تعيش
إنت عايز إيه؟
عايز فلوس ولا عايز تعيش
لو عايز فلوس يبقي سافر الخليج ... هناك هتحوش فلوس كويسه وبعد عمر طويل هترجع
لو عايز تعيش يبقي تسافر أوربا أو أمريكا
وبما إن دا مش ف إيدينا ومش بإختيارنا
يبقي الحل اﻷمثل هو إنك تستني هنا

أنا شخصيا محتار ومش مقرر
اللي أنا متأكد منه إني عايز أعيش مش أحوش فلوس
وبلدنا لافيها فلوس ولا عيشة
شوف إنت بقي المستقبل فين

تحياتي

الوردة السوداء يقول...

مش عارفة اقولك ايه
الموضوع فعلا صعب
فعلا محتاج تضحيات من ناس كتير

محتاج فهم للامور
وتوقعات للمستقبل

وتوفيق من ربنا

A.SAMIR يقول...

بص يا معلم
المستقبل ممكن يكون هنا وممكن يكون برة
ودي بتخضع للارزاق وتوفيق ربنا
ناس بتسافر برة وربنا بيوفقها وبتقدر تتأقلم على الغربة وناس تانية بتسافر ومابتقدرش وبترجع معقدة نفسيا
وناس بتفضل هنا وربنا بيكرمها وناس هنا وبتعاني وبتقاسي
صدقيني يا عزيزي
مالهاش قاعدة ثابتة

mohamed يقول...

المستقبل يا محمد حيثما تريده أن يكون , المهم تعمل أقصى ما تستطيع لتحقيقه ..
صحيح
you've been tagged
http://hedoo2.wordpress.com/2007/05/18/p16/

sokoothansawat يقول...

المهم تغتنم الفرصة...يعني محاولة البحث عن فرصة لازم تكون جوا...قرار السفر برة ما ينفعش يتاخد غير لما يكون متأمن...يعني عارف انت رايح على ايه بالظبط...وهتسافر فين بالضبط...خليج..ولا اوروبا...ولا أمريكا...لإن كل واحدة من دول شكل واتجاه...انا رايي ان الإنسان لازم يوزن الأمور كويس...يعني الأول يدور على فرص عمل محترمة جوا...وفي نفس الوقت ...يسعى جاهدا انه يطور نفسة طول الوقت عشان يلاقي سوق برة...والي تيجي تكسب...ربنا يوفقك في الإختيار

البتاع يقول...

بص يادودو
بالنسبة للشق الاول ان مفيش بنات كده
فأنا برد بالأصالة عن بنات كتير
ان لا فيه بنات كده واكتر
انا عن نفسى سبت اللى بحبه عشان هو اللى مكانش كده
مش العكس

بالنسبة لموضوع البلد
ممكن البلد دى تبقى احسن بعد 30 سنة
لكن حاليا البلد دى هواياتها سحق الطموح
والمواهب
يمكن بتحس انه واجبها تجاهنا؟؟
مش عارفة

بس الامثل
روح برة
اشتغل
اعمل مركز وخبرة وفلوس
ارضى طموحك
بس ارجوك ارجع بلدك
بمركزك حاول تغير
متستسلمش زى زويل من اول جولة مع الفساد
ده رأيى

شىء ما يقول...

انت لازم تدور على مستقبلك فى بلدك الاول
صعب انك تسيب بلدك والاهل والاصدقاء بسهوله
لو ملقتش مستقبلك فى بلدك ابقى سافر
بس بعد ماتحاول مره واتنين وتلاته
وخلى السفر دا اخر حاجه تفكر فيها
وربنا يوفقك

mohamed sabry يقول...

اولا احب اشكرك يا زيزو علي الاهتمام بكلامنا انا وانت
بما اني انا الشخص اللي عاوز يسافر انا بقول اني كده هختصر الطريق ان شاء الله وانا عمري ماهنسي بلدي انا راجع راجع ان شاء الله و عمري ماهنسي مصر ابدا ازاي انسي
انسي اهلي و صحابي
انسي احمد منيب و محمد منير و
اما بالنسبه لموضوع المستقبل هو اولا و اخيرا بايد ربنا بس احنا بنفكر و بنتمني من ربنا يثبت خطانا و يوفقنا
اما بالنسبه يا زيزو انت سالتني هتجوز من بره بارده قولتلك لااااااااااااااااااا
بنت بلدي اولي مع انهم اليومين دول مش جدعان بس بارده ماينفعش غير مصريه بحلاوتها و بسمارها و دمها و احيانا الغباء و التفاهه!!!!

غير معرف يقول...

u r 20 years and u think u can find a chance abroad as easy as just traveling. u r so young dear. u can check the net and u will find many stories how life is HARD. in ur age exams time was the hardest time ever., and this is the funniest part people in ur age believe in. ask ur father how life is hard and he will tell u good Stories.
Ahmed

شادي فايد يقول...

يعني ايه مستقبل
؟؟؟

mohamed sabry يقول...

ايه ياعم انت ياللي اسمك
Anonymous
20 سنه ايه و بتاع ايه
اولا المفروض من وانت صغير تفكر في مستقبلك مش تقولي اسال ابوك هيقولك الحياه صعبه
ماحنا عارفيين انها متنيله جبت انت ايه جديد مش محتاجه فكاكه
وعشان هي متهببه صعبه لازم نفكر شوف الاس التانيه رادين ازاي وانت بترد فين انت بترد علي موضوع تاني خالص مع الاعتذار لمحمد صاحب المدونه اني رديت عنده

محمد ياسر يقول...

دافنشى باشا
فعلا معادلة صعبة
بس انت قفلتها بلا يوجد عمل حقيقى هنا
تحياتى

the alien
طيب ابقى قولى رسيت على ايه يا جميل و ان شاء الله تتوفق بدل ما ااحنا الاتنين محتارين

الوردة السودة
ربنا معانا بقى يا وردة
منورانى

a samir
انت شايف كده؟؟ يمكن برضه

محمد
عايزه ناجح و مش عارف هنا ولا هناك و انهى اولى
و تاجك فوق راسى هعمله باذن الله

سكوت هنصوت
صح بس تيجى الفرصة المضمونة

البتاع
اكيد لما سافر هيبقى هدف انى ارجع فى وقت يا جميل
منورة

شئ ما
شايفانى لازم اكون مع البلد و احاول كتير و انا برضه بفكر فى كده و ربنا يسهل و نشوف

محمد صبرى
طبعا كلامك تمام و ان شاء الله تروح و تنجح وترجع ما دمت قررت وان شاء الله تلاقى بنت البلد بقى يا عم

احمد المجهول
بتكلم فى السن وده علاقته ايه باى حاجة ليه السن دايما له رابط وان تفكر الواحد صغير وكبير بسنه ممكن اكون اكبر منك بعقلى و الحياه الصعبة دى على طول مش عند ابويا بس و انا لسه فى النعيم و على فكرة مش اصعب اوقاتى وقت الامتحانات بالعكس دى السهلة انت تعرف منين

شادى
و الله لو انت مش عارف يبقى عايش ليه !!!

محمد صبرى
مدونتك يا باشا و براحتك و انت سبقتنى بالرد

فى النهاية ناس قالت اقعد وجرب كذا مرة و ناس قالت سافر و ارجع تانى لازم و ناس محتارة لسه برضه
تحياتى للجميع

احمد عبد الهادي يقول...

اول مره هارد علي حد رد
مش علي البوست نافسه ياعني
سوري يازيزو انا هالبس جلبابك واتقمص شخصيتك لمدة 10 ثواني بس ...... استحملني

البتاع

مع احترامي لرايك طبعا
بس ازاي اروح ابني مستقبلي باره وبعد كده ابقي اجي احاول اغير في بلدي
اولا البلد اللي انا رحت عملت نفسي فيها دي تستحق مني اني اعمل فيها او حتي اعملها زي ماهي عملتني
وبعدين مين اللي هيبقي فيه حييل انه يشتغل تاني بعد ما اشتغل 30 سنه كلب عند ناس كلاب ( لا مؤاخذه ياعني )هه
ثانيا المفروض ان انا اتجوز قبل ما اروح بما اني قاعد 30 سنه باره
توافقي انتي تسرافري مع واحد هيقعد 30 سنه بره مصر
طب توافقي انتي تقعدي 30سنه بره مصر
ده والله ماينفع وحتي لو كان هاقعد هناك اسبوع وهنا اسبوع
وبعدين زويل مرحش اشتغل بره ولا حاجه

ولا يا زيزو .... اقعد هنا يا والمستقبل هنا ان شاء الله ومش علشان البلد دي احسن من غيرها والكلام الحمصي ده
لا علشان البلدي محتاجلنا اكتر ما احنا محتاجينها
وان شاء الله هاتتغير علي ايدينا

البتاع يقول...

معلش يادودو برضه حرد عندك بس مش ليك :-)

احمد عبد الهادى

اه اوافق اقعد 1000000 سنة مع اللى بحبه برة مصر
ده لو عشت ال100000 سنة دول

بالنسبة لخليك فى البلد دى
خدت منها ايه؟
الوطن والدين اشياء لما تكبر ليك حق انك تحددهم
كبرت واخترت انك تفضل مسلم
لكن ايه الدليل ان مصر وطن؟

للعلم انا بحبها اوىىىى
وببقى نفسى انها تكون انسان عشان اديها قلم يفوقها
بس بالعقل

الوطن هو الناس اللى بتحبهم بغض النظر فين الارض

ثم ان البلد دى مش بتسحق اى طموح واى حد عاوز ينجح حينجح وانا بتبلى عليها؟؟

تحياتى يااحمد وتحياتى ليك يادودو

وفى الاول وفى الاخر ده مجرد رأيي

احمد عبد الهادي يقول...

بما ان الراجل متكلمش لما خدنا المدونه بتاعته لكلمنا
وبمان ده مجرد راي

انا بس هاسال سؤليين ليكي
الاول ايه الدليل علي انك بتحبيها اوي؟
ده انتي حتي بتنشري غسلنا الوسخ ومش علشان ينضف لا علشان نعرف
التاني البلد دي عملت ليكي انتي شخصيا ايه ؟
علشان تقولي بتسحق الطموح بتسحق الطموح
انتي محسساني ان انتي 35 سنه ولسه مشتغلتيش
امال لما تاخدي بقي منها بجد هاتعملي ايه

بس
مجرد راي
مجرد سؤال

البتاع يقول...

معلش يادودو تانى

احمد انت عاوز ايه؟
البلد حلوة والعيش متوفر ونضيف
وكل حاجة رخيصة
والوظايف على قفا من يشيل
ومفيش لا بطالة ولا عنوسة
وكل واحد بياخد حقه من حبة عين اى مسئول
ومجلس الشعب حبيبنا
والوزارة بتحبنا واللى يحبنا ميضربش نار فى فرحنا
ولا فيه معتقلات وفيه حرية وكل حاجة ألسطة
وكلمة فساد دخلت المعجم ومطلعتش منه تانى
والرئيس عشان يغير عربيته ال 128
بيستأذن الشعب فى استفتاء عام
وحققنا اعلى مستوى دخل فى العام المالى 2007\2008
واعلى مستوى استثمار فى العالم العربى
وبقى عندنا شوارع للمعاقين
والمكفوفين
والدنيا فاضيييييييييية
ونضيفةةةةةةةةةةةة
والناس مستحمية اسم الله عليهم
والدعم مغرق الناس وفايض
والمصانع ماليه الصحرا
والصعيد بقى عضو فاعل فى الحياة النيابية
والمسحيين والمسلمين امريكا متستجريش تتحجج بمشاكلهم
والامية بقت سالب 10% بحلول العام الماضى
وانتاجنا مغرق امريكا والصين
والصين بتطالبنا نخف شوية عشان انتاجها المحلى مبيتباعش
وعندنا وزير للرفاهية لزوم الفشخرة
ودى لا باظت ولا خربت

حلو كده؟؟
كده يعجب؟
وميبقاش نشر غسيل؟؟؟؟؟

احمد عبد الهادي يقول...

الله مانتي عارفه كل حاجه اهو
نعملكوا ايه تاني بقي
سبحان الله علي ده شعب

انتي كده جبتي من الاخر
كفاية كلام بقي

البتاع يقول...

طفاسة شعب بعيد عنك
عاوزين شاكيرا لكل راجل

وباتريك ديمباسى لكل ست
دى الحااااااااجة الوحييييييدة الناقصة


بعد كده لنا مدونة نتخانق فيها
مش فى بيوت الناس كده؟؟

مش حقدر اقول نورتنى عشان مش بيتى
هههههههههه

محمد ياسر يقول...

نورتو انتو الاتنين
وخلاص شطبنا ابقى تعالو اتخانقو فى بوست تانى بقى

تحياتى