الأحد، يونيو 17، 2007

فكرة الكيان المستقل و تجميعه

بداية قريت فى كام مدونة عن عرض افلام قصيرة فى معهد جوته فقلت اروح و كلمت صديقى العزيز عبد الهادى و اتفقنا على اننا نروح

بغض النظر عن اننا اتقابلنا فى الزمالك ظنا منا ان معهد جوته هناك وخدنا لفة لغاية ما عرفنا معهد جوته انه فى شارع البستان فى التحرير وصلنا هناك متأخرين 10 دقايق يعنى فاتنا اول فيلم اللى كان اسمه سبيل الصغار و كان اخراج عمر خالد
دخلنا مع تتر الفيلم التانى ازرق و احمر اخراج محمود سليمان والفيلم كان بطولة باسم سمرة و مدته 11 دقيقة والفيلم ده جميل احداثه تدور ببساطة فى غرفة واحدة هى غرفة نوم باسم سمرة و احداثه تتلخص فى علاقة باسم ببنت و ان حصل بينهم اللى مكنش المفروض يحصل و كل واحد يفكر فى الطرق لمعرفة هيحصل الحمل ده ولا لا وايه الحل

الفيلم التالت كان يوم الاثنين اخراج تامر السعيد و مدته 8 دقايق فيلم حلو برضه بس ازرق واحمر احلى يعنى و انا كنت شفت الفيلم ده قبل كده و احداثه بين زوجين كل منهم يحكى عن يوم الاتنين واحساس كل واحد واللى حصل من وجهة نظره

الفيلم الرابع مكسيم اخراج محمد رشاد مدته 30 دقيقة فيلم معجبنيش الصراحة ولا فهمت منه حاجة ولا عرفت هو عايز ايه و المخرج كان عايز ايه؟؟

بعدها بدأت مناقشة مع الاربع مخرجين على الافلام دى و كانت مناقشة كويسة و كان فى حد علق بانهم يعملوا افلام عن الجميل فى مصر زى ما يعملوا الوحش الاتنين يعنى واننا عندنا اكيد الجميل لكن استفزنى رد تامر السعيد المخرج قال انا مشفتش حاجة حلوة فى البلد دى وكل شئ وحش و قام ماشى
و رسالتى لاى حد يقول كده ان كانت كده فعلا سيبها روح شفلك حتة تانية و عبد الهادى قال او شايفها وحشة حاول تخليها جميلة انت او يشوف الدنيا بنضارة تانية حلوة دى برضه

عدنا وعرض فيلم اثاكى للمخرج ابراهيم البطوط للمرة التانية بشوفه و هو فيلم جميل جدا و صادق و حقيقي الفيلم من غير سيناريو ولا قصة لا هو شخصيات بس واللى بيحصل واقع و الشخصيات دى جمعها المخرج فى الفيلم و ربطها بالفيلم ده
الشخصيات كانت
احمد كمال اللى قام بدور ابراهيم البطوط المخرج اللى سافر وعاصر حروب فى اماكن وله تجربه معاها مختلفة
بطرس غالى وحنان يوسف الزوجان وكل منهم له اهتمامات خاصة و حياه مختلفة
عصام عاشق الموسيقى واللى بيشوفها فى حياته كلها و كان من الجيش و جت شظية فى عين فتقاعد و خد وسام المحاربين القدامى
كريمة نايت و فتحى سلامة الموسيقيان
عمرو فكرى المحب للصوفية
و اخرين لا اعرف من هم حقيقة

الفيلم ده روائى على تسجيلى و مدته 70 دقيقة

بعدها كان فى مناقشة مع ابراهيم البطوط و الراجل كان جميل جدا كمان فى كلامه بجد تحفة وانا شكرته على الفيلم

فى النهاية كلمت عايدة وهى مخرجة مستقبلية باذن الله و هى منظمة موضوع عرض الافلام للمدونين ( ومعاها حد تانى ) و كلمتها عن الفكرة عشان اعرف بقى الموضوع فكانت ان فى سينما مستقلة زى الافلام دى كده و فى اكيد موسيقى مستقلة و مسرح مستقل و فى مدونين وهما كتاب مستقلين فكانت عايزة تربط و تجمع بين المستقلين دول كلهم فى كيان واحد لان محدش عارف التانى و الفكرة جميلة فعلا و هتبقى ناجحة للكل لو حصلت ان شاء الله
و يمكن المرة دى محضرش جمهور غير قليل و مدونين قليلين لكن برضه متعملش دعاية فى المدونات كافية ولا فترة كافية للمعرفة بالموضوع بس تتعوض على الاقل المرة دى اتعرفت برضه واترصدت ولو قليل لكنها اكيد المرة اللى بعدها هتكون اكبر و افضل


هناك 8 تعليقات:

مش فاهم حاجة يقول...

عجبنى اوى ردك على تامر السعيد

واعتقد ان الفكرة جميلة

فكرة الكيان المستقل

بس لازم نفكر فيها بموضوعية شوية

لان مهما زاد عدد المستقلين دول

هما مايساوش حاجة جنب باقى جموع المصريين اللى عاوزين نوصلهم الافكار دى

البتاع يقول...

احبك وانت ذاكرة السينما والمرسح والندوات

يعيش محمد ياسر ذاكرة الامة
يعيش يعيش

رايح حفلة محمد منير اللى فى الاوبرا فى راس سنه 2044؟؟؟

ابقى احجزلى معاك تذكرة:-)

تحياتى

محمد ياسر يقول...

مش فاهم حاجة
اشكرك
و اه هما مش قد جموع المصريين بس الاول جمع المستقلين دول عشان بعد كده يقدروا يبانوا و يوصلوا الافكار للجموع لما يكونوا وحدة انما فردي محدش هيوصلهم
حاجة
تحياتى


البتاع
ربنا يخليكى يا جميل
بس منير ايه اللى فى 44 ده يدينى ويديكى و يدى منير طولة العمر
و بعدين تعالى 2008 الاول ولا ايه؟؟

منورانى دايما

خليك فى البيت يقول...

ندعوكم لزيارة مدونة خليك فى البيت والمشاركة فى الحملة

sokoothansawat يقول...

حلوة قوي..فكرة عرض الأفلام القصيرة..مالهاش في مصر شعبية كبيرة..لكن اظنهافكرة رائعة ..تستحق المتابعة والإهتمام..و ياريت لو تقدر تنوه عن مواعيد الأفلام قبل عرضها..جايز حد يحب يحضر و مش عارف امتى
تحياتي

نفسنا يقول...

ندعوكم لزيارة العدد الثانى من مجلة نفسنا

محمد ياسر يقول...

خليك فى البيت
هزورك اهو و نشوف

سكوت هنصوت
اول ما اعرف اى مواعيد لعروض هاعلن باذن الله
تحياتى

نفسنا
هزوركم و اشكركم

غير معرف يقول...

~..........................................