السبت، يوليو 07، 2007

امتى الحاجات دى بتتفهم؟؟

من فترة كبيرة اخويا الصغير(13 سنة) بيتفرج على فيلم النوم فى العسل فكل شوية يسمع كلمة مبيعرفش طبعا مسكتش
راح سألنى مبيعرفش ايه
انا: مبيعرفش يتجوز
هو:ازاى يعنى مهو متجوز
انا :.............
وهربت فى حاجة تانى وهو مرجعش سألنى

امبارح بقى بيشوف فيلم the mexican
و كل شوية يقرا فى الترجمة لوطى
راح سأل :محمد يعنى ايه لوطى
انا: هاا
هو: يعنى ايه لوطى دى
انا: يعنى نسبة لقوم لوط
هو: و مالهم يعنى قوم لوط
انا: هاا كانوا علاقتهم رجالة برجالة مش بستات
هو: يعنى ايه؟؟؟
انا: بس عايز اشوف الفيلم بقى
و سكت و مسألش تانى

معرفش بقى فهم ايه ومفهمش ايه
بس ده خلانى افكر هو انا امتى مكنتش اعرف الحاجات دى ومعانيها وامتى عرفتها يمكن تالتة اعدادى مثلا او من اول ثانوى اذكر ان المرحلة الثانوية دى على الرغم من انها سيئة و بكرهها فى كل حاجة الا انها عرفتنى حاجات كتير و اكتشفت حاجات كتير

هناك 6 تعليقات:

شقلوطة يقول...

بما إنك ولد بأكيد هاتبقى متطور عنى شوية ..انا ماكنتش أعرف أى حاجة عن الحكايات دى كلها غير فى تالتة ثانوى ..بس أنت ماقلتش أخوك قد إية ..علشان على أساسه تشوف هاتديله المعلومات إزاى يعنى ..عامة سكت أو ما سكتش ..هو هايعرف يا محمد ..ماحدش بيتساب فى حاله الأيام دى

غمض عينيك يقول...

عندك حق الثانوي على سوءه الا انه مرحله مهمة في حياه اي واحد بيعرفه فيها اي حاجة وكل حاجة بس الذكاء بقه ان المتلقى يكون واعي عشان يفرق بين الصح والغلط
عشان كده انا كان رائي انك تفهم اخوك واحده واحده...انت عارف في ثانوي هيفهموه ازاي

:)
تحياتي ليك

محمد سمير

محمد ياسر يقول...

شقلوطة
تم التعديل و اخويا 13 سنة
و انا عارف انه اكيد فى يوم من الايام هيعرف كل حاجة

وهو الادراك مبيجيش مرة واحدة تعرف كل حاجة يعنى مش معنى كده انى من اولى ثانوى مثلا كنت عرفت لكن فى خلال المرحلة كلها و دايما بيزيد الادراك


غمض عنيك
فعلا لازم المتلقى يكون واعى لان فى خطورة فى المرحلة دى الى حد ما و الاندفاع بيبقى مالكهم
مش عارف بقى يعرف منى احسن ولا من اختلاطه بالمجتمع اصلا اللى مبيسبش حد

تحياتى لكم

Davinci يقول...

يابني فهم أخوك بنفسك أحسن.. بدل ما حد يفهمه غلط.. دي أصلا فرصة تقرب منه وتبقى صاحبه.. فرصة مش هاتتكرر صدقني..

shams يقول...

اخي الحبيب
موضوعك شيق جدا و اعتقد من راي الشخصي فهمة انت احسن ما حد غيرك يفهمه المفاهيم الخطأ

غير معرف يقول...

~..........................................