السبت، يوليو 21، 2007

حاسب من مترو الانفاق


من وانت لسه داخل المترو قبل ما تنزل السلم او تطلع هتلاقى واحد واقفلك و لو معاك شنطة هيوقفك و يقولك الشنطة يا اخ لو سمحت و يفتشها و كأن معاك قنابل و داخل تفجر المكان و بعد ما تسيبه وتدخل تجيب التذكرة (اللى غالبا بتعمل مشاكل فى الدخول نظرا لان التذكرة فيها حاجة او المكنة اللى فيها ) و تروح عشان تعدى تلاقى واحد واقفلك تانى عشان يفتش... فى ايه يا عم مهو فى واحد فتش فوق... لا معلش بنشوف تانى

و تسأل وتسمع من الناس بقى كل واحد بيقول حكاية ان مش عارف ايه دخل مصر ومستهدف المترو
او ان المخابرات عاملة مش عارف ايه
او بن لادن عايز يضرب المترو عندنا
و غيرهم كتييييييير ولا احنا عارفين فى ايه!!!

هناك 8 تعليقات:

Davinci يقول...

أصلهم بيقولوا فيه توقعات بعملية إرهابية.. عادي يعني!
متوقعين إيه من الناس بعد كل اللي بيحصل غير إنهم يبقوا كلهم إرهابيين.. وهما يزودوا القمع والناس تزود العنف.. وهكذا!

shams يقول...

عشان هم خايفين بيعملوا كده
وطول ما هم ماشيين في سكة الندامة طول ما هيعذبونا معاهم

زمان سيدنا عمر بن الخطاب لما كان عادل في حكمه قدر يقعد تحت الشجرة وينام ملء جفنيه
واللي عدى عليه قاله حكمت فعدلت فنمت يا عمر
او كما قال

المهم هو ده اللي فيها

ابن فطومة يقول...

بص يا محمد أنا عندي اقتراح ياريت مستر بن لادن ولا مسيو الظواهري يقروه:
هم فعلا لازم يفجرو المترو بس قبليها بقى يجيبوا العصابة كلها فيه بدءا من الرجل الكبير والمحروس ابنه والأخ النظيف اللي بيبرق ديما وشلته وخصوصا"زير" النقل والموصلات علشان يسوق المترو وسنقر الكلبي (لا مؤاخذةالعدلي) عشان مهمة التأمين، طبعا صفوت قرني وفتحي شرور وزكروتي مش محتاجين دعوة.

ونظرا لصعوبة المهمة أدعو مستر بن لادن ومسيو الظواهري تولي التنفيذ شخصيا. أكيد الناس هتدعلهم كتير بعد ما يغوروا (لامؤاخذة يستشهدو) في العملية العظيمة دي.

امام الجيل يقول...

يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

حسن ارابيسك يقول...

عزيزي محمد ياسر
عجبتني في اتناولك للموضوع
بطريقة خير الكلام ما قل ودل

المهم عاوز رأيي من غير زعل اللي بيتعمل ده ميزعلش بالعكس يريحك ويطمنك
لأن إحنا ساعة مابيحصل حاجه ويروح فيها أي حد مالوش ذنب
من أهالينا لا قدر الله هانقعد نلطم ونقول البلد سايبه ونقول مفيش أمن في البلد
واللي قايمين على أمن البلد نايمين صدفنى هانقول كتير قوى ساعة مايحصل بلوة
وف حالة زي حالتك دي لو عدت حاجه لا قدر الله وكان مكان حيوي زي ده مستهدف ها تبلقى الخسارة كبيرة جداً من ارواح ويكفي ان عصب المواصلات هايصاب بالشلل التام شوف انت ساعات لما المترو بيتعطل الناس على مستوى اللقاهرة بيحصلها ايه وحركة المرور بيحصلها
وانا هاضربلك مث فرضاً ان بواب او حراس الأمن في عمارتك سايبناها سايبه للي داخل واللي خارج ايه اللي ممكن يحصل يحصل ممكن سرقات يحصل ممكن حد يطلع يتهجم على واحده في شقتها والبلاوي كتيرة كذلك رجال الأمن اللي في مرفق مهم زي ده اعتبرهم بوابين عماراتك وخايفين حد غريب يدخل يعمل اي حاجه لو بصيتلها كده صدقنى مش هاتزعل وها تقول ربنا يقويهم ويكونوا صاحيين كمان وكمان ولا ان حاجه لا قدر الله تحصل

ادعوك لقراءة قصيدة متواضعه مستوحاه بوست للكاتبه نمرة

خالد منصور يقول...

ياريت تشرف مدونتي بزيارتك

شقاوة شعب يقول...

مافيش مشكلة ان يكون من ضمن الاجراءات اللامنية انهم يفتشوا الشنط
بس بجد الجهاز الامنى عندنا محتاج يتطور كتير ومحتاج ينضف
ومحتاج يركز فى شغله مش طوول الوقت يجرى ورا الاخوان وسايب البلد تولع والفساد ينتشر لحد ما نلافى الارهاب كمان يدخل البلد وهما نايمين على روحهم

غير معرف يقول...

~..........................................