الجمعة، يوليو 27، 2007

سبب الجواز

اكتر اللى بيتجوزوا فى مصر بيكون عشان بنت وحلوة وخلاص حاجة تقليدية كده
يعنى الاساس انه بيتجوز واحدة للجنس و حتى كتير من اللى بيحبوا بيحبوا الواحدة للجسم برضه مش لشخصية او البنت نفسها ازاى
حتى اصلا ممكن تلاقى الاهل بيقولوا لابنهم فى بنت زى القمر و من عائلة
ايه رأيك
طيب و فين شخصيتها بقى مش مهم يعرف هى دماغها ايه

يعنى معظم اللى بيتجوزوا بيكون للجنس مش للدماغ و خاصة كمان ان فى قول يردده الكتييير ان المثقفات ( اللى هما فى طريق الثقافة طبعا مش خلاص وصلوا) مش حلوات دى قاعدة كده معروفة للكتير

مما نتج ان من الناس اللى (بيحاولوا يبقوا مثقفين ) منهم اللى بيفكر انه لما يتجوز هيختارها عشان دماغها مش جسمها و فى غيرهم برضه اللى هما المثقفين دول بيفكروا انه لا عايز جسم للجنس و بس مش عايز دماغها فى حاجة و انه يبقى قاعد فى مكتبه بيشتغل مثلا و مراته ملهاش دعوة بيه غير لما يطلع و تبقى فى دور الزوجة الجنسية و شكرا لانه مكتفى بمعرفة المثقفات اللى بيشوفهم فى حياته كتير

اختيار واحدة عشان دماغها لا يمنع انها تكون جميلة كمان لكن الاساس الدماغ و ده طبعا مش كتير بيفكر فيه

هناك 11 تعليقًا:

الصقر الجارح يقول...

هى ديه المشكله مهما قلنا وعدنا برده ايه العمل
الشاب هيفضل زى ماهو بدرس ويخلص ويخش الجيش ويشتغل زى الحمار فى الساقيه
وفى الاخر عايزه يعمل ايه هو لسه هيعمل تست للهيتجوزها اكيد هو عايز واحده وخلاص
مش هتفرق معاه لانه ممكن كمان بعد سنه ولا اتنين جواز مش هيبقى فاضى لحاجه حتى اللى اتجوز علشنها
الغلط مش فينا الغلط اكيد فى الدماغ اللى التربطه فى الساقيه

semsem يقول...

مش محتاجين ده كلها
الموضوع محلول يا حماعه
قال رسول الله صلى الله عليه وسلم
(تنكح المرأة لأربع: لمالها ولحسبها ولجمالها ولدينها، فاظفر بذات الدين تربت يداك)
دا للاختيار

اما للسبب

فالسبب فى الاياس الفطرة التى فطرة الله عليها البشر

وسنه الله فى الكون

دنــــيــــــا مـحـيـرنـي يقول...

بجد شكرا جدا اا يا محمد اول مره الاقي رجل يعترف بالحقيقه ده انا قرئت و حبيت اول الكلمتين دول بس هارجع تاني عشان اعلق تاني بكلام كتير بس اركز شويه تحباتي

غير معرف يقول...

وانت؟
عاوز ايه منها

أميرة ويلز يقول...

موضوع مهم جدا اللى بتحكى فيه دة

ويمكن كانت محيرانى اوى طريقة الجواز اللى الشباب بيتجوزوا بيها اليومين دول بس انت بينت جزء فعلا فسرلى هما ليه كدة

الاختيار على اساس الشكل ومش مهم الباقى حتى مابيحاولش يعرف مستوى تفكيرها ايه ولا دماغه تركب على دماغها والا لا حتى لو هى ليها دماغ فتتلغى وتتلغى شخصيتها
تفكير غريب لعقليات اتربت على التفاهة والتسلط

تحياتى ليك ولمدونتك
سلامى

غمض عينيك يقول...

المهم الروح ياباشا

ممكن تكون مثقفة ودماغها حلوة وجميلة بس تلاقيها مثلا منغلقة على نفسها...مش بتحب الكلام الكتير...غيورة نكدية..كده يعني


والله يامحمد الجواز دا اخطر قرار في الدنيا ولازم يشمل نواحي كتير اوي...تقولشي دراسة جدوى ياخويا

:)

تحياتي ليك
محمد سمير

حسن ارابيسك يقول...

شوف يامحمد
وخدها قاعدة
كل ما هو سطحي يبحث عن ما هو سطحي مثله
وفي موضوعك الذي ضربته لنا مثلاً
تحدث الطامة الكبرى بعد تذوق طعم الجسد في دقائقه المعدوده
ولا يبقى إلا أن يتذوق طعم الفكر الذي أمامه والذي لا يقف عند دقائق معدوده بل على مدار اليوم والعمر بأكمله
وهنا تحدث الصدمة
حينما يجد فكرا على الزيرو
وفكراً معاق
وفكراً متخلف
وفكراً لايعرف الاتجاهات
وفكراً لايعرف من الحياة شيئاً
وفكراً لايستطيع البقاء أمامه والتعايش معه ويحدث ما لايُحمد عقباه
شكرا لطرحك موضوعك القيم

ياسمين يقول...

حتى المثقفين اللى انت بتتكلم عنهم دول بيتجوزوا الواحدة وهم معجبين بدماغها ومنجذبين لشكلها وجسمها كأنثى
لكن بعد الجواز فجأة بيقرروا يلغوا عقلها
أوامر وبس ولا زم تتنفذ .. ليه؟
عشان هو الراجل
طب فين بقى العقل اللى كان قبل الجواز؟
استخبى ورا الراجل الشرقى اللى جوة كل واحد منكم

يمكن الجيل الجديد يبقى فيه ناس مختلفة
ارجو ذلك

بوست حلو بجد

غير معرف يقول...

انت شكلك اتأثرت اوي بمناقشتي مع محمد فوزي في الأوبرا
مش كده برضه ؟

أحمد زكريا

محمد ياسر يقول...

احمد زكريا
هى صراحته معايا كان لها بعض الاثر لكن التأثير الاكبر فى الشباب عموما الذى يتمنى الزواج من واحدة جامدة جدا مظهريا و جسما دون النظر لشخصيتها وعقلها و دون الاهتمام بهذا

غير معرف يقول...

~..........................................