الأحد، سبتمبر 16، 2007

حلم مش عايز يسيبنى

من و انا صغير بحلم الحلم ده هو مش حلم ليا قد ما هو حلم للاخرين حلم لتحقيق حاجات لناس مبتحلمش دى عايزة اقل حاجات اساسية ليها و محرومين منها
من و انا صغير وانا كل ما اشوف حد فقير اوى وبيشحت محتاج فعلا ببقى عايز مش اديله فلوس لا ببقى عايز اخده اسكنه فى اوضة حتى و اشوفله اى شئ ممكن يكون مصدر رزق ليه بجد دايما كل ما اشوف واحد من دول فى الشوارع بيجيلى الحلم ده و اتخيله مجرد بس خيال او انى هيكون ليا دار رعاية للناس دى او مش دار ليا دار موجودة اقدر اخدهم فيها و خلاص
اكيد فى ناس بتشحت كأنها شغلانة يعنى مع انهم يقدروا ميشحتوش و انا اكيد مش بتكلم عن دول لانهم نصابين شايفين الشحاتة بتجيب فلوس من غير مجهود و لما بياخدوا فلوس مننا يبقى احنا بنساعدهم يستمروا و يعيشوا كده
نرجع تانى للمحتاجين اوى بجد و هما كتير برضه مما يؤسف عليه و خاصة نموذج موجود كتير جدا و بيكون واحد شعره و دقنه طولوا جدا جدا و ملابسه متقطعة و كله على بعض قذر جدا و تحس انه مجنون ان لم يكن كذلك و معظم الناس بتخاف منهم انا برضه بخاف منهم بس بيصعبوا عليا من اللى هما فيه ده وبشوف دول كتير اوى موجودين يعنى هى الدولة مش قادرة تلم الناس دى ولا توفرلها اى حاجة دول لا يملكوا اى شئ تماما حتى اقل الحقوق
و لحد انهاردة كل ما اشوف اى حد من اللى قلته يجيلى حلمى الخيالى بانى بعمل شئ لكن طبعا مبيحصلش ولا شئ و معرفش فى يوم هقدر اعمل حلمى ده ولا هيفضل مجرد حلم !!

هناك 6 تعليقات:

إيما يقول...

ربنا يكرمك يا محمد يا رب ويقدرك تحقق حلمك ويوفقك للخير دايما ويجعلك سبب ليه في كل مكان
كل سنة وانت طيب ورمضان كريم عليك يا رب

MAKSOFA يقول...

أن شاء الله تحقق الحلم ، والحلم ده بيدل علي أنك أنسان طيب رقيق المشاعر وحنون ، ربنا يديك وتفتح مؤسسه لرعايه المحتاجين

غمض عينيك يقول...

انا بردو عندي نفس الحلم
بس يمكن بيزيد معايا كمان لنكد طول اليوم
في مواقف كده بتخليني طول اليوم مزاجي بايظ اوي ومخنوق
وناس لما بشوفهم وبشوف حالهم بكره الدولة والحكومةوالناس والكل كليلة
نفسي يكون في مقدوري اعمل حاجة
نفسي

تحياتي ليك ياباشا
لو عندك فكره قولي ونتشارك
محمد سمير

Desert cat يقول...

تعرف يا محمد انا كمان بشوف نفس المناظر اللى بتحكيها دى
واكيد كلنا بنشوفها
بس اللى بياذينى انى الاقى واحده طول بعرض جايبه عيل تتسول عليه
لو اشتغلت هترحم نفسها من ذل السؤال
بيصعب عليا اوى اشوف ست او راجل كبير فى السن وبيمد ايده بحس انى ببقا نفسى احضن الست دى واقولها ذنبك فى رقبتنا
بدل ما تستريحى فى اخر ايامك بتنزلى الشاراع تمد ايدك
ربنا يهدى حكومتنا الموقرة وتقدر حتى توفر لهم اى حاجه
كل سنة وانت طيب يا محمد
ورمضان كريم

wa7dania يقول...

والله يا محمد
حلمي حلمك
أنا كمان نفسي أوي أشتغل في العمل التطوعي إن شاء الله
أول ما أخلص
و ربنا يقدرنا يا رب
منى

غير معرف يقول...

~..........................................