الاثنين، ديسمبر 03، 2007

هى فوضى



بداية كلامى عن الفيلم مش نقد هو مجرد كلام عايز اقوله عن الفيلم و اللى مشافوش و ناوى يشوفه يبقى ميقراش عشان كلامى ممكن يحرق اجزاء من الفيلم فشوفوه الاول بعدين اقروا

الفيلم من اكتر الافلام اللى مش هنساها فى حياتى و اللى اثروا فيا اكيد الفيلم فى عيوب زى ما فى المميزات لكنه يستحق كم كبير من التقدير الفيلم جرئ و لو الرقابة كانت سايباه كمان شوية كان هيطلع اجرأ كمان و فى خصوص جزء الجرأة دى سواء بمشاهد عري او شتايم فالفيلم مش سفالة و لا انحطاط الفيلم قيمة كبيرة جدا مفيش مشهد فيه كان معمول زيادة ولا ملوش لازمة كون ان فيه مشاهد جنسية كبير و الفاظ شوية و لو انها اتحكمت كذا مرة بسبب الرقابة لولا كده كان عادى هتسمعها بس زى ما قلت كل حاجة فى مطرحها و حقيقية يعنى اما ادخل الفيلم ده مع اختى ولا اى بنات و لا اهلى انا مش هكون محرج زى ما ناس كتير ممكن تشوف كده

كل واحد من حقه يشوف فيلم زى ده و مهواش معمول عشان الشباب اللى معظم اللى بيدخلوا الفيلم بيكونوا داخلين عشان يشوفوا كمية الستات اللى فى الفيلم قالعين

انت هتشوف الفيلم لو طلعت منه بالمناظر تبقى ولا حاجة لو طلعت بكمية الاحاسيس و القيم اللى عايز الفيلم يقولها تبقى كده شوفته بجد

هتلاقوا فى كل حتة قصة الفيلم والرموز اللى فى الفيلم بتشير لايه و حاجات كده فمش مستاهلة انى اقولها انا كمان ممكن تقروا هنا

http://egyfilm.com/Forums/viewtopic.php?p=2476823&sid=05f9cc5a67d37ee9908246386624c0b8#2476823

لكن هقول على بعض الحاجات بقى

الفيلم كنت متفاعل معاه من اوله لنهايته لكن فى النص التانى و من اول ما حاتم (خالد صالح) خطف منة شلبى و اغتصبها و باينلك الدم على فستانها و الفستان متقطع اللقطة دى تعبتنى جدا كنت قاعد باخد نفسى بالعافية وهرجع و هعيط و الغل بقى مالينى كأنى عايز اقتل حاتم 100 مرة و جنبى اصحابى خلاص هيعيطوا برضه ايه المشهد ده كان صعب جدا جدا و بعدين اما تروح لامها هالة فاخر اللى قامت بدورها بروعة و صدمة الام اما تشوف بنتها داخلة بحالها دى و هى بتغطى صدرها و الحتة اللى فيها الدم و انا قاعد على اعصابى عايز ابرد دمى من اللى حصل و يستمر الفيلم عشان يثبتوا على حاتم عملته لحد مشهد النهاية اللى كان موفق جدا هى دى النهاية اللى مكنتش تنفع غيرها و اللى هدتنى الى حد ما

عمرى ما حسيت بحاجة فى فيلم زى ما كنت حاسس فى الفيلم ده

الفيلم واضح فيه تأثيرات شاهين و تأثيرات خالد متحسش انه بتاع واحد لا هما الاتنين عاملينه فعلا و ده اللى يمكن خلى الفيلم اقرب للناس من افلام شاهين القديمة اللى مكنتش عليها جماهرية زى ده

الفيلم بيعبر جدا عن حالتنا دلوقتى انجح فيلم عبر و قال حالتنا دلوقتى وهى الفوضى و اللى حلها الوحيد هو الفوضى برضه زى نهاية الفيلم بس دى فوضى جماعية بقى هى اللى لمت الناس عشان تحلها و الفيلم بين برضه ان زى ما فى الخراب اللى فى البلد و الناس اللى مبوظينها قالك برضه ان فى اللى بيحبوها و ماشيين فيها صح

كل ممثلين الفيلم طلعوا كل اللى عندهم حلو جدا و تفوقوا على نفسهم

تحية للمخرجين العبقريين يوسف شاهين و خالد يوسف

هناك 13 تعليقًا:

radwausama يقول...

انا برضه خرجت من الفيلم فى حالة حلوة
كان بقالى كتير ما شفتش سينما بجد.. انا متفقه معاك ان الفيلم فيه لمسات خالد يوسف ويوسف شاهين ..بس تحس فى النهايه ان الاغلب كان لخالد .. بس فيه حرفيه أعلى من امكانيات خالد شويه .. الفيلم فعلا كان حلو رغم المباشرة اللى بيتهمه بيها البعض

YOTTA يقول...

بصراحة مشفتش الفيلم
ومكنتش ناوية اشوفه
بس بعد الكلام اللى قريته
هاعيد التفكير ف الموضوع
ولوشفته بقى هبقى اقولك رأيى

:)

Desert cat يقول...

الفيلم باين عليه جميل
ان شاء الله اشوفه
تحياتى

ابن فطومة يقول...

كان نفسي فعلا أشوف الفيلم ده قبل م سافر. تحياتي

oceaneyes يقول...

واضح انه فيلم حلو فعلا ..انا لسة ما شوفتوش ...ومش متعودة اتفرج على اى فيلم لشاهين ...يمكن خالد بقبله بالعافية

بس واضح من كلامك ومن كلام ناس كتير عن الفيلم انه حلو فعلا وبعيد كل البعد عن مستوى افلام شاهين


عموما هحاول اتفرج عليه ..ومرسى جدا على البوست الحلو ده


تحياتى


:)

بيقولوا سايكو يقول...

انا مش باحب شاهين و باكره خالد يوسف بس دخلت الفيلم تانى يوم نزوله السينما .. أولا حسيته مختلف و ثانيا أنا باعشق أداء خالد صالح فدخلته و طبعا كالعادة خالد صالح أمتعنى لدرجة تفوق الوصف و رغم إنى كنت عايزة أقتله بس فى نفس ذات الوقت كان صعبان على جدا و عبوديته لنور اللى هى رافضاها.. فعلا منة شلبى و هالة فاخر تألقوا فى اللقطات اللى انت قلتها عليها ... يوسف الشريف بيثبت إنه فى تحسن دائم و مستمر ... طبعا خالد صالح متألق و مش محتاجة كلام

بس بالرغم من كل شئ الفيلم كان فيه حاجات مالهاش لزمة زى لما كان عند الكوافير إيه لزمته ؟ .. كمان المشهد اللى قبل النهاية لما الهالتين كانوا بيقوموا الناس على حاتم .. حسيتها عبيطة جدا و كنا عمالين نضحك ما وقفش الضحك غير النهاية بتاعت الفيلم

حاجة بسيطة بس عجبتنى جدا فى الفيلم و تقريبا عيطت مش فاكرة الست اللى كانت بتدور على ابنها اللى كان فى المظاهرة و ساعة لما شافته .. كانت مأثرة فى أوى

و الحمد لله الموسيقى التصويرية طلعت فعلا بتاعت ياسر عبد الرحمن.. و الإخراج مش عارفة ما حستش بشاهين خالص .. حسيته كله خالد

الفيلم فى مجمله جيد جدا

بحب السيما يقول...

حاسس بالشعور اللى انت كنت فيه يامحمد
لان كل الناس اللى كانوا حواليا فى السينما تقريبا كانوا عايشين مودك ده
بس المشكلة انى ماكنتش عايشه
الفيلم كفكرة يستحق التقدير
بس كسينما فى كلام كتير اوى
عموما هو تجربة جيدة رغم كل العيوب وعقبال مانهنى بعض قريب على تجربة مصرية ممتازة
شكرا ليك يامحمد

joker يقول...

انا اول لم شفت الاعلان بتاعه عجبنى بس انا هشوفه
علشان اعرف معنى اسمه وايه اللى بيحصل فى البلد واحنا مش شيفينه


مع تحياتى

شبـــ اون لاين ـــاب

حسن ارابيسك يقول...

من شاهد أعمال خالد يوسف بتمعن من قبل يدرك اسلوبه في الأخراج
ولذلك انا أاقول ان هذا الفيلم عبارة عن دماغ خالد يوسف
أما السب والألفاظ الخارجة فهي ليوسف شاهين

L.G. يقول...

متفقة شوية مع الأستاذ حسن أرابيسك خالد يوسف لو خرج من عباءة يوسف شاهين حتلاقي فيلم شديد اخراج وتصوير وسيناريو وتمثيل من غير الة أدب وشتيمة مشفتش الفيلم بصراحة مبروحش سينما أصلا الا فيما ندر ولكن لما شفت فيلمخيانة مشروعة كان فيلم متماسك جداً ربط دماغ يعني وواضح انه يستند بشكل أو آخر لمرجعية واقعية وواضح انه خالد يوسف بيصور الواقع واخراجه حرفي جدا والتصوير وعدم الملل فيلم خيانة مشروعة قدر يحسن من أداء هاني سلامة بشكل كبير
الاعلام والسينما مهمة حتى لو عارض ده وجهة النظر الاسلامية بس بيأثروا في الناس

غير معرف يقول...

6K聊天室,080中部人聊天室,聊天室交友,成人聊天室,中部人聊天室,情色聊天室,AV女優,AV,A片,情人薇珍妮,愛情公寓,情色,情色貼圖,情色文學,色情小說,色情,寄情築園小遊戲,AIO交友愛情館,情色電影,一葉情貼圖片區,色情遊戲

言情小說,情色論壇,色情網站,微風成人,成人電影,嘟嘟成人網,成人,成人貼圖,成人交友,成人圖片,18成人,成人小說,成人圖片區,微風成人區,成人網站,免費影片,色情影片,自拍,hilive,做愛,微風成人,微風論壇,AIO

情趣用品,情色,成人,A片,自拍

情趣用品,色情,成人影片,色情影片,免費A片

情趣用品,成人網站,A片下載,日本AV,做愛

情趣用品,美女交友,A片,辣妹視訊,情色視訊

情趣用品,色情聊天室,聊天室,AV,成人電影

غير معرف يقول...

~..........................................

غير معرف يقول...

الفيلم سخيف و تافه جدا وانا أعترض دائما علي طريقة عرض خالد و يوسف لأن معظم أفلامهم غير محترمة و خادشة للحياء وكل أفلام تحت شعار هموم الناس و التطور و التحرر لكن الحقيقة غير ذلك وطبعا فكرهم تسيطر عليه السيطرة الكاملة اليهودية و الماسونية دون النظر إلي أن هذة الأفلام تبني عقول شباب و أطفال
ملاحظة أنا لم أشاهد الفيلم و راي بناء علي الإعلان ولن أشاهده