الأحد، ديسمبر 28، 2008

2009 داخل الخدمة الوطنية .. هل من مزيد؟

- راس السنة و بداية سنة هجرية ... سنة جديدة اخرى بنعيشها و المرة دى قررت اكتب بوست يكون فى كل اللى عاوز اقوله عن السنين اللى فاتت و عن السنة الجاية دى و الامنيات و الواقعيات المفروضة ....
- قبل كده مكنتش بكتب عن راس السنة (ده فى المرتين اللى فاتوا يعني) او عن السنة الجديدة الا بعد ما تبدأ .. يعني 2007 قولت ان مفيش جديد على مستوى شخصى او مصري او اى حاجة كان عادي جدا
الجملة المفيدة اللى قولتها و اكيد لسه هقولها كل سنة واحنا زى ما احنا ما دام لسه محصلش مننا اللى يغيرنا ويغير الدنيا
- جيت اللى بعدها فى 2008 طبعا بدأت سنة بموقف وحش حتى مرضتش اقوله ساعتها لكن المهم بعدها حضرت حفلة منير و مش فاكر السنة اللى قبلها قضيت راس السنة مع منير برضه ولا لا بس انا بحب ابدأ السنة مع منير على الرغم من ان الناس بتكون فيها بتشرب انواع مختلفة لكن المهم منير و اهو بنحاول نبعد عنهم....
- كانت امنياتي التخرج و الخروج للعمل و اهو اتحقق الجزء الاول فعلا باني اتخرجت و ده كان شئ منتظره جدا لكن للاسف الخروج للعمل فعليا مش هيحصل الا بعد سنة من تقديم الخدمة الوطنية الاجبارية - اللهم لا اعتراض-
- بقالي كده 3 سنين مدون بالتمام لاني بدأت مع بداية يناير 2006 و فى السنين دى ادعي من الادعاء اني اتغيرت او حصلت يعني تغيرات فى حياتي بالتأكيد و للاحسن.. انا بشوفها كده .. 3 سنين عدوا و اهلى ميعرفوش حاجة عن اللى بكتبه هنا .. مع ان حال التدوين اتغير و انا مريت باوله لما كان كله شغال و موضة طالعة و خوف من المدونين و كل الحاجات دي لكن دلوقتي خلاص مبقاش التدوين زي ما هو يمكن فترته خلصت او الفيس بوك خد من حقه ... يعني تغيرات كتير الا اني لسه مستمر لاني محتاجها محتاج اكتب و ادون حتى لو محدش بقى بيتابع كمان
-صحيح في معدل انخفاض تدويني ماشى من سنة لسنة لو بصيت هتلاقيني كتبت 75 فى السنة الاولى و فى التانية 44 و السنة التالتة 38 و ده معناه احتمال اني ابطل قريب و اخلص لكن يمكن ارجع و اكتب برضه الله اعلم .. صحيح دلوقتي فى سبب هيبعدني لكن هرجع و اكتب كل ما احب اعوز اكتب ...
طبعا عدد الزيارات اللى عدى ال70 الف ده عدد خيالي مكنتش اتصوره هو اكيد مش رقم دقيق معبر عن زيارات حقيقية يمكن تصادف ناس تيجي غلط ولا حاجة بس هنا قدر كبير من الناس اعتقد زاروا مكاني المتواضع فاشكرهم جدا كلهم بجد ...
- فى حوار مطول حصل قريب مع الصديق الاقرب اوسو عن موضوع معقد و عاوزني احكم فيه فجأني اني فى الواقعية دبلوماسي و بدي ردود ديموقراطية مبتزعلش حد فى حين اني هنا فى المدونة بقول اراء حازمة اقوى و فاصلة و مكنتش منتبه لده الى حد ما ...و لذلك طلب مني احكم زي ما بحكم فى المدونة و بقول فيها و لما قولتله كانت الواقعية اللى بقولها فى مؤلمة و صعبة الحدوث و ان ممكن فى بعض الامور الدبلوماسية دى هى الحل الافضل عشان منخسرش كتير خاصة اما نكون خسرانين اصلا يعني نحاول نطلع باقل خساير ....
- عدت شهور على التخرج و على حياتي اللى اتنقلت من طالب لمهندس دي حاجة كويسة لكن كوني كنت عايش فى حياه و مع ناس و دلوقتي بقيت عايش لوحدي او يعني مع اللى هشتغل معاهم لما اشتغل و ان الناس دول كنا طول السنين مع بعض و بنقعد مع بعض اكتر ما بنقعد مع اهلنا... كانت دنيا تانية راحت خلاص ده شئ حاسه مؤسف و ادينا بنحاول نتواصل مع بعض بس اكيد زمان حاجة و دلوقتي حاجة ....
- دبلومة الدراسات العليا شئ مهم خاصة كمان اني لو مكنتش دخلتها كنت هنسى الهندسة و اني مهندس اصلا و هي بالحق مفيدة اتمنى النجاح و الاستمرار فيها و اهي كمان هتهون فى سنة 2009 دي.... ومن خلالها تعرفت على ناس جديدة دخلت فى حياتي و ده شئ كويس برضه لاني بحب اعرف كل الناس...
- دكتور عندنا ملوش لازمة اسمه ايه المهم كل ما ناس تقوله ننزل نصلي لان وقت محاضرته بيضيع العصر كله و هو كده كده بيضيع وقت فيصلوا و يجوا يقولهم لا مفيش صلاه و بعدين افتى الفتوى العظيمة ان العلم اهم من الصلاه و ان لما الواحد يقضيها فى العلم و بس كده هيموت شهيد و انه مقتنع انه هيموت شهيد عشان كده و مش مهم بقى صلاه و لا غيره ... حقيقي فرسني...
و عشان مبقاش بقول امثلة لدكتور سئ بس فعندنا دكتور بهاء بكري من اكبر دكاترة العمارة و مش هقول تاريخه الطويل لكن هقول بس انه دايما راجل متأمل و بيبص للقران فى كل حاجة بيعملها حتى انه اشرف على رسايل دكتوراه لم تحدث من قبل و هي رسائل عن العمارة و القران .... هذا من الاساتذة التي تستحق ان تقول بشرف ان هذا استاذي حتى لو تعارضت في اشياء بسيطة معه....
- حصل كمان فى السنة دى حاجة مهمة جدا جدا و هي اني وقعت فى الحب و من اول مرة اشوفها و ده كان يوم تاريخي الا و هو يوم 29/8 و اعتبر ان حياتي تغيرت من ساعتها لاني مبقتش عايش لوحدي و بقى عندي حد فى حياتي يهتم بيا و اهتم بيه لاقصى درجة بل و اعترف حقيقي اني بحس باهتمامها حتى لو بعيدة عني و فى ظروف فانا كل شئ لها و هي كمان كل شئ ليا .. بعترف انها بتهديني ايوه دى اكبر نعمة من ربنا بتمنى تدوم عشان حبها حقيقي و بالتفاصيل بتهتم بيا و بتسألني عن الصلاه و حقيقة لو تعرف اني كنت مقصر قد ايه فى الموضوع ده و ان فى فروض مني ساعات بتفوت او بفوتها بمعنى اصح لاسباب واهية و لكني بحاول الالتزام و مبسوط لانها بتساعدني في ده من غير ما تحس ...
و عشان كده ده تمني اخر بان السنة الجديدة ميفوتش فيها فرض واحد حتى الفجر اللى صعب لكن نحاول باذن الله...
و ليها هي كمان بتمنى اني دايما اقدر اسعدها و ارضيها زي ما هي بتعمل و يا رب دايما نسعد بعض و انا لا انسى جملتها احلى جملة سمعتها فى حياتي و مكنتش اتصورها بجد ربنا يخليكي ليا و مش هقولهالكم ......
- بتمنى ارتبط بيكي رسميا فى اقرب فرصة ممكنة ...
- بتمنى اشتغل طبعا لان ده شئ اساسي عشان الواحد يعيش مش عشان الم فلوس لكن عشان اعيش و عشان ساعتها هقدر احقق الامنية اللي فاتت ... فانا بطبعي و مع كل عام جديد باكد اني باشتغل و بجيب فلوس عشان اعيش الحياه نفسها يعني اشتغل اللى احبه و فلوس عشان اعيش مش اشتغل للفلوس و احوش طول عمري و الحياه تضيع مني...
- جهزت ديواني الاول و شايف انه يستحق النشر اتمنى متكونش نظرة وهمية ...عاوز انشر و اعرف رأيي الناس و يكون الاخير حتى مش مهم ... هاحاول ادور على من يتقبل قراءته و نشره من دور النشر اتمنى..
- معرض الكتاب هو حدث مهم في حياتي كل سنة و لازم بروحه دايما و اقابل اصحاب كتييير هناك و اجيب كل الكتب اللى عاوزها اقعد سنة اقراها لكن تقريبا السنة دى نظرا للظروف دي انا مش هشوف المعرض ده اصلا ..يا رب اعرف...
- فى مشوار منير موضوع استفزني جدا المقصود بيه الحرية فكان بيقول ان الحشيش يبقى بيتباع عادي فى اي حتة و مصرح بيه لان هولندا مثلا فيها كده و دي حرية و كمان هيبقى مكسب للحكومة .. ما علينا بباقي اللى قاله يعني
المهم ده طبعا مع تعارضي و استنكاري الشديد ليه الا انه نبهني لحاجة مفيدة و مكنتش فكرت فيها و هي ان الانسان مينفعش يكون فى حرية مطلقة و ان اللى بينادوا بده فيه ظلم كبير ليهم و ضرر اكبر عشان كده ربنا خلقنا باحكام و محرمات منعملهاش و ان الدين هو مقوم اساسي للانسان فيحطله سقف كده لمصلحته طبعا فالحمد لله...
- طبعا اللى حصل فى غزة من اسوء الاحداث خلال السنة و لا نملك سوى الدعاء لهم و مهما تحملنا من حزن لهم و عليهم و مهما حدثت من مظاهرات لن تفيد و لن تنفع و لا اعرف ما هو ينفع و يحدث تغيير حقيقي لكن من قلبي مقدرش اقول غير اسف يا فلسطين و اقول يا رب....
- 2009 هو عام تقضية الخدمة الوطنية اتمنى ان يحدث فيه شئ اخر كالعمل او الارتباط الرسمي رغم الاحتمالات الضعيفة جدا للاسف...



الخميس، ديسمبر 25، 2008

من اجل التدوين فى تونس



----------------------
تم تحديث التاريخ لليوم

الاثنين، ديسمبر 08، 2008

فضفضات ....

- اولا كل سنة و كل الناس طيبين و عيد اضحى سعيد عليكم يا رب
- حوا اتزفت من غير طرحة من غير مهر و شرط فى عقد
الجملة دى من غنوة حوا و ادم للمطرب الجميل علي الحجار(و الشريط جيد جدا اسمعوه) و اجمل ما فيها انها بتكلم عن العلاقات و الجواز انه من غير شروط و مهر و مؤخر والكلام ده و هى دى الفكرة
احنا فى زمن الجوازات كلها بالصعوبة دى عشان كده بتكتر المشاكل او بيقل الجواز اصلا
صحيح الزمن ده محدش مأمن حد عشان كده كل واحد بيفكر فى الضمانات المادية من مهر و شقة و مؤخر مع ان الفلوس مش ضمان ابدا لكن اهو بيشوفه كده لان الحياه بقت مادية للاسف
يعني انا هعذر كل اللى بيفكر كده و بالضمانات دى بس انا مش كده انا لسه مش عايش فى الدنيا دى و الحمد لله و لا عاوز اعيشها
- مفيش كسوف فى المحبة ولا للمحبة شروط
هنا منير قالها بشكل اعم و قوي جدا بقى
يعني اللى هو من الاساس مفيش اى شروط بقى لا مادية و لا معنوية و لا عائلية و لا اى حاجة للحب خلاها الحرية الكاملة اللى مفهاش كسوف كمان
و المشكلة هنا هى وجود الحب الحقيقي الفعلي اللى يقال انه مبقاش موجود او نادر و انا حاسه موجود و انا عايشه كمان الحمد لله بس في خوف بسبب الظروف اللى بتعوق احيانا و من المستقبل عموما لكن اكيد متمسك بيه جدا و ده اللى مخليني صابر و بامل انه مع الوقت كل حاجة هتتحسن
- و ده حب ايه ده اللى من غيييير اي حرييية
يمكن انهاردة اكتر يوم حاسس اني فعلا يونس(اغنية منير) و اننا فى حب اوي فعلا لكن مفيش حرية و كل الظروف ادامنا فى الفترة دى برضه عارف ان الظروف دى بعضها هتنتهي بعد فترة معينة و بعضها هنقضي عليها سوا مع بعض لكن دى على مدى يخليني فى الفترة دى تعبان حقيقي بس مش فى ايدينا حاجة
- ربما يحصل غياب عن المدونة و يمكن حاجة ترجعني تاني بعد فترة قصيرة الله اعلم لكن هناك غياب قريب هيحصل اجباريا لسبب اجباري دخل حياتي و هو من الظروف اللى بتجبرني على الحياه زى ما هي عاوزة مش زى ما انا عاوز
- على قد ما حبينا و تعبنا فى ليالينا الفرحة فى مشوارنا تاني هتنادينا
طول ما القلب صافي بحر العشق وافي كل عذاب الدنيا هيروق بكرة لينا
و يرجع على الحجار ليترك الامل باغنيته على قد ما حبينا و زى ما قال فى الاغنية الجميلة جدا دى ان ان شاء الله الفرحة هترجع و الدنيا هتروق
يا رب
يا رب


الجمعة، نوفمبر 28، 2008

لازم تشوفوا عين شمس

تحديث
الفيلم جميل جدا و جماله فى بساطته هو فيلم مصري جدا جدا و ده اللى عجبني فيه يعني الفيلم مش معجزة ولا عبقري لكن عبقريته فى بساطته المتناهية هو يشرح الحياه المصرية بتفصيلها الممل و المحبط و الجيد و المستمر باي ظرف

-------
فى ظل وجود الافلام السينمائية اللى كتير منها عبارة عن هلس و اى كلام يكون هناك بعض الامل و احب اذكر فيلم زى انهاردة تشوفوه لانه حلو جدا فعلا لكن دلوقتي كلامي عن فيلم عين شمس للمخرج ابراهيم البطوط والفيلم طويل مستقل وعشان كده اتعمل مشاكل على عرضه فى سينمات مصر عشان اللى شغالين فيه مش فى النقابة ومفيش سيناريو اتقدم والروتين ده لكن سمعت انه اخيرا وافقوا انه يتعرض

المهم ان الفيلم برضه اتشاف فى العالم و شوفوا حصل ايه
جائزة أحسن فيلم في مهرجان تاورمينا في إيطاليا
جائزة أحسن فيلم أول في مهرجان روتردام للأفلام العربية

واتعرض فى المهرجانات دى
مهرجان هامبورج الدولي للسينما (في المسابقة الرسمية)
مهرجان لندن الدولي لافلام السينما
مهرجان قرطاج السينمائي (في المسابقة الرسمية)

و ده وحده يشرف مصر اللى مكنتش عاوزة تعرضه

الفيلم هيتعرض فى معهد جوته فى مهرجان القاهرة للافلام المستقلة يوم التلات 2 ديسمبر
الافلام هتبدأ من 5 ل10ونص هو هيكون الفيلم الاخير يعني من الساعة 8 ونص مثلا
العنوان 5 شارع البستان التحرير- وسط البلد


نصيحة ان كان حد لسه بيتابع هنا يعني انه يجي يشوف الفيلم اكيد يستاهل و اقروا عنه على النت

الأربعاء، نوفمبر 19، 2008

متحف تاريخ العالم... هدم لتاريخنا و كياننا

تحت المسجد الاقصى تم عمل نفق الكل يعلم هذا و لو بحثت على الانترنت على ما يحدث ستعرف ان هناك نفق يعبر تحت المسجد لكن لما هذا النفق؟
هذا النفق يمر به الناس لمدة حوالي 50 دقيقة تمر كأنك تتابع فيلما عن الحياه من بداية الخلق الى نهاية الحياه و القيامة من وجهة نظر الاسرائيلين بالطبع .
يوجدون شيئا بالاسفل ذو اهمية عظمى بالنسبة لهم بالطبع لكن هل سيستمر ما هو اعلاه ؟!!!

الثلاثاء، نوفمبر 11، 2008

لحد امتى؟ اتخنقت بجد

لما كنت صغير لحد اولى ثانوي كنت مبخرجش من البيت مع اصحاب او غيره قلت معلش استنى لما اكبر
اما كبرت و بقيت بخرج كنت مقدرش اتأخر عن 12 و بقيت بزودها لواحدة او اتنين و بتعدي ساعات و ساعات لا لحد دلوقتي و كنت بقول معلش اما اخلص هبقى حر و اديني خلصت و متنيل مبقتش حر
اما كنت بقرر فجأة انا و قرايبنا الشباب اننا نخرج او نسافر فى نفس اليوم او اليوم اللى بعده او مع اصحابي كانوا يقولولي لازم يبقى عارف من زمان قبلها بكام يوم و نفكر فيها قلت معلش بكرة استقل
اما قولت عاوز اتابع الادب و اهتم بيه قالوا خليك فى دراستك احسن قلت معلش خليني بيني كده لحد ما اخرج من البيت ده
اما كنت عاوز اتعلم العزف على اله قالوا خليك برضه فى دراستك او اتعلم حاجة كورسات للدراسة برضه قولت استنى اما اطلع من سيطرتهم
اما اتعرفت على ناس كتير و مش من الكلية فضلوا ورايا ان اى حد من برة الكلية يبقى اكيد مش زيك و متعرفوش و متضمنوش ومتصاحبوش و حرس ايه التفكير ده!!!!!!
نفسي يعاملوا كل الناس على انهم مش حلو و وحش لا انهم بشر بشر و بس
اما حبيت اتكلم فى السياسة قالولي بس اوعى و سكت برضه لحد ما اخرج منهم او بتكلم فى السر يعني
اما عرفوا انى بحب و اعتبر مرتبط قالولي لسه على الاقل سنتين ايه اللى فرضهم سنتين يعني ما انا اتجوز دلوقتي لو عاوز هو مش انا بقيت فى سن رشد و متنيل مسئول
اما ابديت استعدادي لزيارة جدي كتير و اني اروحله و هو قاعد لوحده و بيتمنى اني اجيله بالذات او اى حد و هما يقولولي خليك احسن او خليك انت عندك كلية او شغل مع ان ممكن ميبقاش عندي حاجة بس اهو كده لمجرد خلافات فى العيلة ممكن تزول لو هما فكروا و عاوزين
فضلوا زن فى دماغي 3 شهور اني اشتغل و انا عند فيهم مشتغلتش و ودوني لمكتب يعرفوه رحت مرة و قلتلهم اه هاجي و نفضتلهم عند برضه فى اهلي و مستني هشتغل لما اعوز و لما دخلت دراسات عليا قررت ده بنفسي و فجأتهم عشان انا عاوز ده مش عشان مجرد ابسطهم
و اديني بعد كل ده مستني برضه اني اشتغل و يكون لي بيت مستقل و اسرة تكون متفهماني و بنفس فكري و راضية بدماغي اللى مغلباهم دى عشان ساعتها نعمل اللى عاوزينه و محدش يقدر يكلمنا نبقى معتمدين على نفسنا تماما
و غير ده كتييييييييير اخرتها ايه و امتى؟؟؟؟؟؟؟؟؟؟؟؟؟
و قال ايه عاوزين يعلمونا الاعتماد على النفس طيب ازاي يعني اما هما مش فاهمين اصلا

نتيجة للى بيعملوه ده
هيجي اليوم اللى يعرفوا فيه اني مدون من وراهم بقالي 3 سنين و بقول اللى عاوزه و اللى مبيسمعهوش مني لانهم مسبوش ليا المساحة للكلام بحرية
هيجي اليوم اللى يلاقوني فيه بقول اراء انا مصدقها و مصر عليها لما بيسمعوها مني بيفتكروه كلام عيال و اهو هيتغير
هيجي اليوم يعرفوا اني نزلت من وراهم مظاهرة وحيدة لاني كنت عاوز ده و كان عندي دافع
هيجي اليوم يعرفوا اني هربت من المدرسة فى يوم مع اصحاب الدرس اللى هما اختاروهم اخد معاهم الدرس ده
هيجي اليوم يعرفوا اني كنت بسافر من وراهم لاني مقتنع بده و لاني حر


نفس السؤال اللى هموت بيه اكيد و اللى انا مقتنع بيه برضه ان الحياه مش تتعلم عشان تشتغل و تلم فلوس و تجوز و تخلف و مت بالرسالة العظيمة كده لو دى الحياه مش عاوزها

-----------------------------------------------------------
رسالة خاصة
اتمنى تكوني جنبي دايما انتي اللى هتقدري تعيشيني و تخليني اكون انا انا زي منا عاوز و تساعديني

الجمعة، أكتوبر 31، 2008

تضامن

تضامن اول
قضية نهي رشدى قضية التحرش التى تم الحكم بها على المتحرش ب3 سنوات و 5 الاف جنيه الان تعود القضية بسبب محامية تطلب الاستئناف لصالح المتهم و الحجة ان نهى طلعت اسرائيلية !!!
http://www.almasry-alyoum.com/article2.aspx?ArticleID=184484&IssueID=1209

و هنا لنا وقفة
يعني لو هى اسرائيلية يبقى حقه يمد ايده ولا يتحرش بيها؟؟
طيب و هو ماشى فى الشارع كده و لا عارفها اصلا يعني هيعرف ازاي انها اسرائيلية فيلا نتحرش بقى بيها
ده طبعا لو هى اسرائيلية لانها طبعا مش كده و هى ردت و قالت انها من اب فلسطيني و انها مولودة فى ليبيا كمان و كون ابوها من عرب 48 اللى ليهم جنسية اسرائيلية بس دول عرب زينا و مظلومين مش اسرائيلين
اكيد مش من حق اى حد يتحرش بحد بحجج انها لابسة قصير او انها من دولة اخرى ولو اسرائيل حتى او انها من ديانة مختلفة ولا اى حاجة تسمح بكده
عاوزين قوانين حاسمة فى الموضوع ده

تضامن ثاني
حادثة مترو راحت بسببها بنت عندها 25 سنة و ده لان (باقتباس من المصري اليوم ) أن السائق أغلق الباب بصورة سريعة علي قدمها اليسري في حين كانت هي في الخارج، وأن القطار سحبها ولم يتوقف رغم سقوطها علي القضبان
و النتيجة البنت اتقطعت و بعد ما قريت المقال ده من كام يوم
http://www.almasry-alyoum.com/article2.aspx?ArticleID=183577&IssueID=1203

يوم ما قريته انا قريت الخبر من هنا و بعدها على طول معملتش غير انى رحت قافل الكمبيوتر من غير ما اقفل اى حاجة كنت فاتحها و رحت قاريلها الفاتحة و داعيلها و داخل نايم
اى تعويض ممكن يكون لاهلها و فين المحاكمة للسواق و المسئولين عنه و الوزير نفسه له من المسئولية لازم يكون فى حل و موقف لحاجة زى دى

تضامن ثالث
مدرس قتل طالب لما ضربه شلوت فى بطنه اقرو الخبر
http://www.al-jazirah.com.sa/87103/ms7d.htm

المدرس قتله خطأ و مكنش قاصد غير الضرب طيب برضه مهو الضرب ده ممنوع تماما حرام يعني وبعدين اهو مات دلوقتي المدرس ده هياخدله كام سنة لقتل خطأ و شكرا طيب و اللى مات ده و اهله
طيب فين العقاب بجد للمدرس و المدير و الوزير برضه كمان

احداث مؤسفة كلها يا رب تترد الحقوق

الخميس، أكتوبر 23، 2008

تحرش

حوادث التحرش كترت و نسبة التحرش بقت عالية فى البلد و مع انى رجل الا انى عمري ما فكرت حتى اعاكس واحدة ولو بكلمة مقدرش
عشان كده الرجال اللى بيقوموا بالتحرش هما مش رجالة ولا بني ادمين و لا حيوانات هما ايه بقى معرفش
بس دول تتحمل مسئوليتهم البلد عشان مشكلات احد انواع الكبت عند الشعب و هو الكبت الجنسي و برضه هما الاشخاص نفسهم دول عليهم مسئولية و عشان كده برضه ليهم حل و هو زى ما بيتعمل فى طب بيطري للحيوانات

كون ان يحصل اول محاكمة لقضية تحرش دى خطوة كويسة جدا احتمال تقل من التحرش بنسبة كويسة و الحكم ده كان عادل و بجد دى خطوة ايجابية
الموضوع محتاج كمان توعية و حل مشكلات الشباب و تحمل مسئولية لان اللى بيتحرشوا دول غير مسئولين عن اى حاجة فى الدنيا

بالمناسبة بموت من الغيظ كل ما اروح اركب المترو و الاقي رجالة راكبين عربية سيدات سواء الدائمة او حتى التاسعة بلاقيهم من السادسة فى رجالة و قبل كده كمان و دول برضه مش رجالة ايوه مش رجالة مش واثقين فى رجولتهم و الا ايه اللى ركبهم مع الستات و لا اى عذر منهم هيخليني اقول العكس وده برضه لوحده بيعتبر تحرش

الأحد، أكتوبر 19، 2008

احسن فرقة ( من تكويني الخاص)

بيانو و اورج فتحى سلامة فرقة شرقيات فتحى سلامة
ناى و كولة عبد الله حلمي فرقة محمد منير
عود
حازم شاهين فرقة اسكندريللا
اليكترك جيتار اوسو فرقة نغم مصري ( و فرقة افتكاسات سابقا)
كمان محمد مدحت فرقة افتكاسات
كمان محمد سامي فرقة الدور الاول و فرقة بشير (و فرقة بلاك تيما سابقا)
ساكس نور عاشور فرقة رسالة وفرقة الدور الاول
درامز بوب فرقة وسط البلد
و فرقة الدور الاول
بركشن ميزو فرقة وسط البلد و فرقة الدور الاول او هاني بدير فرقة افتكاسات و فرقة وجيه عزيز

احسن فريق حاليا افتكاسات و شرقيات فتحي سلامة
بفكر اكتب بوست عن كل فريق اعرفه و سمعته كويس اتكلم برؤية نقدية خاصة بيا بما انى سامع و عارف كويس يعني احتمال اعمل كده قريب

الثلاثاء، أكتوبر 14، 2008

تجربتي

طول السنين اللى فاتت عايش فى وسط البلد تقريبا هى معظم خروجاتي و قهوة الندوة الثقافية و قهوة التكعيبة و قهوة البورصة هما اكتر 3 قهاوي بقعد فيهم
و طول الفترة دى قابلت ادباء و كتاب و شعراء و عرفت دور نشر و مكتبات و احتكيت بكل دول الى حد ما و عرفتهم كويس و نشرت كمان عمل واحد مع مجموعة شباب و اتمنيت انى انشر ديوان لكن ملقتش الفرصة لسه و ناس تقولي جميل و ناس تقولي وحش و ناس تقولي لسالك شوية و انا بكمل بدماغي و لسه برضه مع الشعرا و الكتاب و الناس اللى بحبهم و حاسس انهم بيحبوني
و بعدين احتكيت بغنا الشوارع و الفرق الموسيقية اللى بتحاول تعمل مزيكا بجد فرق وسط البلد و بلاك تيما و نغم مصري و افتكاسات و فتحى سلامة و كتيييييييير اوي اخرهم ديما و بركة و مايند و عرفت من كل الفرق تقريبا و حضرت للاغلب كمان و اتمنيت ان اكتب حاجة تتغنى من الفرق دى و عبد الهادى قاللي فى حاجات من كلامى تتغنى بس لحد دلوقتى محصلش بس فعلا اغلب اللى بيتغنى مش كله بيبقى كلام عننا فعلا و غنى للشوارع مش غنى بحبك عشان بحبك و بحبك و كله كده و بس
و بعدين عرفت السينما المستقلة و الافلام القصيرة و حضرت عروض افلام كتير منها و تابعت و كنت فى مشروع لفيلم كمان لكن لسه متمش قولوا يا رب و مع ذلك ملقتش الفيلم اللى يحسسني انه مستقل و انه مختلف الا نادرا اوي و مفيش ولا فيلم بيحكي عنا زى ما بيقولوا ولا فيلم لحد دلوقتى حسسنى بكده و نادرا ما تعجبني افلام اذكر مثلا فيلم ايثاكى و فيلم انهاردة 30 نوفمبر
و بعدين تابعت المسرح و حضرت بتاع 5 مسرحيات او اكتر شوية مش كتير يعني الصراحة لكن اهتميت بيها برضه و برضه دخلت مشروع كده مع ناس و لسه متمش قولوا يا رب
كل ده مع دراستي العمارة اللى اتمنى انى احقق شئ معماريا كمعماري و اديني دخلت دراسات عليا عشان اكمل قولوا يا رب اوصل كما اتمنى تحقيق المجالات الاخري المختلفة التى تابعتها دى فى حياتي و انى اشوف نتاج فعلي للى بحاول اعمله
لانى اعترف طبعا و بصدق ان كل دى يمكن محاولات لكن لحد دلوقتى يعتبر معملتش حاجة
قولوا يا رب

الثلاثاء، أكتوبر 07، 2008

لقطات

- مسلسل الحرائق ما زال مستمرا اقوى من كل مسلسلات رمضان و اكثرهم واقعية
بعد حريق المسرح القومى حريق 3 مصانع فى غزل المحلة و 5 مصانع بالنزهة الجديدة
اتصلوا و خمنوا اين الحريق القادم ........انتظروا الحلقة القادمة .........

- نجاح مسلسل الدالي ليس لشئ الا انك حتى لو فتحت الحنفية هتلاقى المسلسل شغال فهتشوفه هتشوفه

- اغنية اصالة بقى طبيعي جميلة بشكل غير طبيعي و تخليك تفرح

- البومين لفتحى سلامة هتسمع مزيكا حلوة اوي بجد
http://www.mediafire.com/?l4njtyymtmz
خاصة مقطوعة موود بسمعها على طول بحبها اوييي
http://www.mediafire.com/?oogujuxnio5
اكيد كل الشكر للى رافعهم لانه مش انا


- عمرو سلامة مخرج متميز شفت افلامه القصيرة و عنده هدف فى شغله عشان كده فيلم زى انهاردة متوقع يعجبني عاوز ادخله

- اخويا فى تالتة اعدادى قالوله فى البيت هتاخد درس رياضة مع انه شاطر لوحده و هو حتى مكنش عاوز و كمان المدرسة عنده معظم المدرسين كويسين (ما عدا طبعا اللى حكيتلكم عنه قبل كده من فترة ) و لما عارضت و قلت الدروس سبب من اسباب الفشل سكتوني

- خروج ابراهيم عيسى شئ كويس جدا و موقف ممتاز من مبارك و لو انى كنت مستغربه

- حال البلد كل شئ فيه بيخليني احس باكتئاب منها يعني عيلتين يقتلوا فى بعض فى حلوان و حرايق مستمرة و ليه و منين مش عارفين و تلوث لا نهائي و منطقة معرفش ايه بقت عايشة فى صرف صحي و كل ده و احنا ما دام فى بيوتنا و بيوتنا سليمة خلاص تمام مش هنتحرك

- البلد كلها بتشرب سجاير او شيشة او حشيش او خمور او ممكن كذا حاجة طيب ليه و ليه قليل اما الاقى حد مبيشربش ولا حاجة كده زى حالاتى و لا عمره هيجربهم حتى بحس ان انا اللى شاذ عن القاعدة بس مبسوط و مصر على ده

- لما البيت عرف انى بحب حسسونى انه غلط و مش وقته قلتلهم انسوا مفيش حاجة بس انا بحب برضه و براحتي بعيد عنهم

- الشاعر السوري ادونيس و الاديبة الجزائرية اسيا جبارمرشحين لنوبل السنة دى هل حد منهم هيفوز ؟ طيب فى اى حال انا عاوز اقرالهم هل فى كتب ليهم فى مصر؟

- رواية وردة لصنع الله ابراهيم حلوة اوي مع انى لسه مخلصتهاش بس حبيتها

- موقف البوست اللى فات لو محدش قراه يقراه برضه و يفكر لو مكانى هيعمل ايه لان ده علمني اكلم كل البني ادمين كبني ادمين و بس


الأحد، أكتوبر 05، 2008

موقف

كنت مستعد امبارح ليوم جميل بحفلة بلاك تيما و قد كان و فى اخره قابلت انا و اوسو صاحبي مدونة عطشان، شاب ظريف اتكلم معانا و كلمناه بتلقائية من غير ما نعرف بعض و كان ماشى بعصاية و بيتسند لانه عامل حادثة فى رجله كبيرة و بعدين كنا خارجين و خدناه يخرج معانا من المكان و صعب علينا الصراحة من اللى هو فيه مع ان هو كان عادى بيضحك و يهزر وقولنا هنوصله لحد ما نسيبه مع حد او يروح و نمشى و ده لان مورناش حاجة و لانه شخصية ظريفة يستاهل نقعد معاه و نعرفه و لان اكيد بجد صعبان علينا قبل اى حاجة
رحنا قعدنا معاه على قهوة كان مستنى واحد صاحبه و قعدنا نتكلم و عادى جدا فل الفل لحد ما جه صاحب ليه و مشينا و بعد ما سيبناه لقيت اوسو كانوا اتكلموا مع بعض لوحدهم و انا مسمعتش فبيقولي بعدها بقى
ان الشاب ده طلع بهائي و عيلته كلها كده كانت مفاجأة طبعا و معرفتش اقول ايه و هل نقاطعه ولا نكلمه تانى ولا ايه الموقف ؟ خاصة انى طبعا مش معترف باى حاجة مسماه بالبهائية و مكنتش اتصور انى اعرف حد منهم ولا هشوفهم فين
المهم ان فى الاخر قررت انى هكلمه عادى و مش هقاطعه و انى عرفته كانسان و مكنتش اعرف ايه ديانته و هفضل اكلمه كانسان و مش هاجى فى نقطة خلافنا عشان اكيد مش هيبقى صح
كون ان ده يحصلي ده كويس عشان يوعيني و ما دام بنعامل بعض كويس و فى احترام متبادل يبقى خلاص مفيش مشاكل
و ربنا يهدى الجميع

الخميس، أكتوبر 02، 2008

عيد سعيد ان شاء الله و يا رب نكون بلغنا رمضان

- على الرغم من ان رمضان مبقاش رمضان فى احساسى الداخلى و محستوش لكن يا رب نكون قدرنا نعمل فيه حاجة و ربنا يتوب علينا
- لما تكون فى مصلحة حكومية من اى المصالح و تلاقى 3 او 4 على الاقل واقفين و الموظف سايبهم و قاعد على مكتبه بيقرا فى القران و الناس تتذنب شوية عشان خاطره يبقى اكيد ان الموظف ده مش هياخد ثواب القران اللى هو بيقراه ده و كمان ممكن يرد كده بالعافية و هو عمال يكمل قراية برضه
هو مش كل حاجة ليها وقتها ولا ايه و لا هو يعنى مش هياخد ثواب اما يقضى شغله بجد
- فرحة العيد ليا مش فى زيارات القرايب لانها انقطعت تقريبا بقت يا دوب من بعيد و مفيش لمة ولا فى اى حاجة
-اكتر فرحة بحسها فعلا هى وقت نزول صلاه العيد حتى لو كنت نازل لوحدي لانى بشوف اكتر عدد تجمع للناس بشوفه فى حياتى فى البلد دى و الشوارع كلها بتتملي بالناس و صوت تكبيرات الناس كلها فعلا احساس جميل هو ده ممكن يبقى فرحة العيد بس كده
- منكرش ان رمضان و العيد كانوا مختلفين جدا ليا السنة دى لان حصل حدث شخصي جميل ربنا يديمه عليا


الأحد، سبتمبر 28، 2008

و ما زالت مصر بتتقدم بينا و من حريق لحريق و من كارثة لكارثة

من 3 سنين اتحرق مسرح بني سويف و كانت كارثة ادينا السنة دى فى تقدم اكبر من حوالى شهر اتحرق مبنى مجلس الشورى و امبارح اتحرق المسرح القومي فى العتبة و من صدمة لصدمة لما خلاص تعبت و الناس كلها تعبت و مفيش فايدة مصر بتتقدم بينا و من حريق لحريق و الدور الجاي على ايه يتحرق مش عارف بس الاكيد اعصاب الناس بتتحرق و باستمرار كمان مبتتطفيش دى ولا بتلحق اننا نطفيها و من كام يوم كارثة المقطم اللى مقدرتش انى اعلق و لا اقول حاجة هعمل ايه يعنى اهى كل الكوارث بتحصل و احنا بنتفرج و بندعي للناس اللى راحت ضحايا و بندعي على اللى اتسببوا فى الكوارث دى و اللى عليهم المسئولية
كفاية بقى كوارث و حوادث و حرايق و مصايب
يا رب الطف بينا و احمينا
اللهم انك عفو تحب العفو فاعفو عنا

السبت، سبتمبر 20، 2008

حواديت

سر الحياه لو تعرفيه يا حبيبتي سر الحياه نبض الحياه انا و انتى
دى مركبي فضة و فرحي لو قضى حبيبتي تبقى معاي من غيرها مش هرضى
يا قلب صبح و مسايا ما بين رحايا و رحايا و يحوشوا عنك ندايا امد ليكى البصاير
ده عنيكي دول مرايات مرسوم انا فيهم
علمونى عنيكي اسافر علمونى اكون مسامح زى نبع الحب صافي
لو يتغير الزمان و قابلتيني فى اى مكان كنت اعشق من غير ما تقولي
طب خدينى فى ريح طيفك حتى حتى فى ليل كيفك ده انتى مالية الشوق ملوااا نفسه لو يلمس طراطيفك
مدى ايديك ادى ايدي ده الطريق زحاااام خلى قلبك ويا قلبي هتهون الالام انا و انتى يا حبيبتي حلم من الاحلام
تنده اقول حاضر مهما تغيب حاضر شايفك بعيد حاضر و انت الحبيب حاضر
احلى بكرة لينا تحلى الذكرى بينا طول ما احنا يا ناس عايشين مبنجرحش العاشقين
سهران بناديكي فاتح شبابيكي عاشق بغنيكي و الدنيا و عنيكي من لون لياليكي.... و الحياه لها لون لون جمال ليالينا
كل الحاجات الا عيونك ممكن انساه كل الحاجات من حواليا عارفة و حساه ...كل الحاجات بتفكرنى و الذكرى مش بتصبرني
يا ليلة عودى تانى يا ليلة كونى تانى
عيون حبيبتي الطيبين بيعلمونى اكون حنين ده مفيش ما بينا لأ وليه ولا كدب نتأسف عليه
قلبي يا قلبي شبكتك مهرك دمى يا كل شراييني تعالى اتجمعى اتلمى هعملهم خيط من نور و هلضم فصوص قلبي كردان داير ما يدور ...
بحبك تستكين الريح فى قلبي و الامانى تزيح بحبك اعشق التصريح و دربي فى الضلام مغمور بحبك تبتدى البدايات تاخدنى ضحكتك بالذات تعيبني روح و قلب و ذات تعيدنى كشف للمستور
حلى ضفايرك للهوا و اتمايلي فى بحور الهوا غني للحب اللى جمعنا سوا مركب هوانا فى الهوا حلى الشراع رايحين سوا لبلاد متعرفش الخداع
انتى فرحى اللى عاش يا عنيا و انتى بكرة اللى غير فيا و انتى دا انتى اللى خايفة عليا يا لحنان بشتاق
عمرك ده رسمه على كفوفي ابصله يهرب خوفي
و انا الهدى لما تضيعي و انا الهوى لما تحبي لبي ندايا و لا تخبي ازرعلك العمر جواهر ...
فى عنيكي غربة و غرابة و انا فيكي مغرم صبابا احلم على شالك انام كأنى فرد من الحمام برموش عنيكي تغطيني رمشك شطوط طب رسينى انتى انا و بكرة ليا و ليكي
مفيش كسوف فى المحبة و لا للمحبة شروط عمرك ما تشعر بغربة الا فى حنين مكبوت و انتى يا سامعة و شايفة احساسى فوق الوصف من غير ما اقول انتى حاسة عارفة اللى فيه بالحرف
يا غزالى يا حلالى فى عيونك حلمي انا يا انا يا انا يا سكر بالهنا يا انا ما انا دايب كام سنة
قلبي يبقى نبع صافى و جنني طول البعاااد
يا شال الهوى غطيه يا نسيم الاطيب ده داويه و تحاسبي يا غربة عليه بكيني و اضحكى ليه
مهما عيون الناس بتعرفنى غيرك ما يعرفنى مهما ليالى الوعد توعدنى قلبي بيوعدنى ضحكتك بتنهدلى نظرتك بتعرفنى
انا انسى فى شفايفك اسمي انا فاهم فى كنوز العفة انا ممكن اجريلك دمي انا حاسس دمي هيتصفى
يا ابتسامة سمرا نيلي تسلميلي
امانة يا موج بوس خشب المراكب امانة يا موج طبطب على اللى راكب امانة يا هوا تكتب على الشراع اللقا اكيد من بعد الوداع
دى شفايفك لما بتتنهد انا بستشهد و بعيش فى النار و عيونك لما بتتلفت انا بتفتفت ملحقش احتار يا اللى انتى حبك حرية فى العشق اه ولا شئ ممنوع يا سمرا يا سمرااا
حبيتك اد ده كله سوااا حبيتك و انتى عشاني هواااا

----------
بشكر محمد منير تعبت انا وهو اوي فى البوست ده

الجمعة، سبتمبر 05، 2008

مودي وحسين الأمام.


بقالى فترة عايز اكتب البوست ده و كل شوية حاجة تعطلنى المرة دى خلاص بقى هكتب
فى التمانينات ظهرت فرقة اسمها طيبة الفرقة كانت مكونة من مودى و حسين الامام و عازف الدرامز ليهم وقتها كان احمد عز اللى هو بتاع الحديد دلوقتى !! تقدر تقول ان نوع مزيكتهم روك و ده مش موجود اصلا كتير فى مصر و عملوا حوالى 3 البومات بس لكن كانوا بيعملوا مزيكا حلوة بجد و كلام بسيط اوى لكن معبر و بيحكى حواديت

الاغنية دى اسمها و ماله و غنوها فى احدى حفلات راس السنة فى التمانينات و لان الفيديو ممتاز و هو الوحيد تقريبا اللى ممكن تلاقيه فلازم احطه و الاغنية نفسها المزيكا اللى كانوا عاملينها سابقة التمانينات بكتير و حلوة اوى و الكلمات للشاعر عصام عبد الله بسيطة لكن صادقة و جميلة جدا وشوفوا ادائهم مع بعض جميل

وهتتعدل مهما تطول عمر ما شئ يثبت على حاله و ماله و ماله يا سيدى و ماله عمر ما شئ يثبت على حاله مهما عملوا و مهما قالوا

هاخدكم جولة سريعة كده لاكتر اغانى حبيتها ليهم
اغنية ودعي المكان اغنية هادية رومانسية كلمات عصام عبد الله و اداء و لحن متميز منهم كالعادة
دورى بعنيكى فى كل حتة.. المسكى كل الحاجات.. حسسى على الذكريات .. رتبيها لخبطيها كسريها او خديها و انتى ماشية ودعينى ودعيها ودعي المكان

عودة للمزيكا السريعة فى اغنية ازاى الصحة
فى حوار جميل مع الدنيا يشكرها لما تحلو و يشكيها لما بتقلب فجأة و يسألها ليه
اسمعوا الاغنية نفسها مش هكتب الكلام

اغنية المجهول كلمات عصام عبد الله و تحمل معانى صعبة جدا و كلمات صعبة تترجم لفهم مباشر تحس انها المجهول فعلا و عشان كده بحبها و مزيكتها روعة بحبها جدا ابدعوا فيها مزيكا و اداء
ستار الليل بيداري ميلاد بعيد مجروح و طير الاغتراب يدور بلا مدلول رغم الهدوء الدافي و العزف على الاوتار و الورود و الالوان الاصل فى الاسرار ............ اسمعوها

اغنية الدنيا صغيرة و وداع حبيبته لانه مسافر بس بيقولها
و هنتقابل من غير معاد دى الدنيا صغيرة
افتكرينى خدى عنوانى يمكن نتقابل من تانى ممكن نتصاحب فى الجوابات و هنتقابل من غير معاد دى الدنيا صغيرة

و من البوم انياب
هى اغانى فيلم انياب و المفاجأة ان التعاون كان بين مودى وحسين الامام و على الحجار و احمد عدوية وكلمات كل الاغانى عصام عبد الله برضه الله يرحمه
اسمعوا جهرشة
الدنيا دى يا صاحبي يا بمبي يا اسودا لو حظك مش مصاحبك انا ذنبي ايه فى دااا

اسمعوا كل شئ يشبه لبعض
اداءهم كلهم كل واحد بيقول مقطع


لتحميل الالبومات التلاتة
http://www.mawaly.com/music/egypt/tibba_band/albums/wemalo/
http://www.mawaly.com/music/egypt/tibba_band/albums/eldonya_soghaera/
http://www.mawaly.com/music/egypt/tibba_band/albums/film_anyab/

فى الالبوم بقى رابع ليهم كان عامل صدى حلو وقتها برضه و كان اسمه فطومة اللى يجيبه يبقى جدع

الثلاثاء، سبتمبر 02، 2008

تاج من تانى فى سؤال لاسراري

التاج من صديقى العزيز فنان فقير
http://fannanfakir.blogspot.com/

السؤال بيقول
اذكر ستة أسرار قد لا يكتشفها من يحدثك لأول مرة

هو من الصعوبة مش عارف ارد

بس هحاول يعنى

ممكن اقول انه هيكتشف انى هادى اوى لكن مش هيعرف انى مجنون من اول مرة

انى اشول بكتب و باكل بشمالى و دى قليل اللى بياخد باله من اول مرة

بالتالى بلبس الساعة فى اليمين و محدش بياخد باله برضه كتير

من الحاجات اللى بكرهها فعلا الحلاقة عشان كده بسيب شعرى شهرين تلاتة لو اكتر ميهمنيش لحد ما الاقى البيت بيطالبنى احلق و
كذلك دقنى هى مرة واحدة فى الاسبوع بحلقها و مرضاش اكتر من مرة فى الاسبوع ابدا

انى على قناعات بحاجات و اراء ممكن تخالف العامة يعنى بكون مخالف فيها اهلى نفسهم

انى خجول بجد و عندى كده زى صعوبة اما اكلم ناس خاصة لاول مرة الا لو اتعودنا على بعض على طول و لو بنت اللى اتعرفت عليها ببقى فعلا اللى هو خجل على الاخر بقى بس بعد كده لو فى صداقة يبقى الكلام بينا عادى بقى


كان فى تاج تانى قديم مكملتوش محطوط درافت انزله بقى معاه هتلاقوه تحت

كعادتى امرر لمن يريده
فليعتبر الكل



تاج بالصور


شفت التاج ده عند ناس كتير و عجبنى فقلت اعمله
شروطه
http://photobucket.com/أولا: تدخل ثانيا : تكتب اجابتك فى الموقع ده ثالثا: تختار صورة من أول صفحة وبس رابعا: حط الصورة أجابة للسؤال

الحالة الأجتماعية ؟
alone boy
تعديل تعتبر الحالة الاجتماعية اختلفت البوست قدييييم

الحالة المزاجية ... ؟
waiting someone

المطرب /الفرقة المفضلة ؟
Mounir

الفيلم المفضل ؟
V for Vendetta

محل الأقامة ؟
The Great Pyramid of Giza, Egypt

مكان العمل ؟
Our messy drawing studio.

الاثنين، أغسطس 25، 2008

احداث اليومين دول

الفترة دى بعتبر حاجات كتير حصلتلى و مهمة و معظمها حلوة يعنى
التخرج طبعا مع انه يحمل بعض الالم حيث ان الواحد لازم يشتغل بقى مينفعش القعاد لكنى قاعد لسه بمزاجى لحد بعد رمضان ناوى اشتغل فى المجال هندسة العمارة
لكن دلوقتى لا
بحاول اعمل حاجات تانية
باخد 3 دى ماكس وشغال فيه كويس الحمد لله مش زى كل مرة
كلمنى صديق قديم بقاله 11 سنة صاحبى بس كان فى انقطاع فى النص المهم رجعنا و سعيد بده و الاكتر اسعدنى انه طلبنى اكتبله الشعر لمسرحيته الجديدة لانه مخرج و انى قادر الحمد لله لحد دلوقتى ادعولى
فرصة المسرحية دى عرفتنى على ناس جداد متأكد ان هيفضل منهم اصدقائى بعد كده دايما
حصل حاجة بس محزنة عن شعرى فى موضوع تانى لكن مش مشكلة ربك لما يريد
فى حاجة كمان لما يبقى ليها وقتها بقى تتقال

السبت، يوليو 19، 2008

تاج عن النفس

عشان خاطر العزيزة بنورة مدونةهمس القلوب
مقدرش ارد طلبها عن اجابتى للتاج مع انه صعب جدا يمكن اصعب تاج اعمله
و هو سؤال واحد أن أذكر 16 صفة في نفسي

الهدوء فأنا كسكون الكتاب لا يتحدث الا اذا فتحته لتقرأ

التردد فمعظم احوالى و قراراتى اتردد كثيرا في اخذها و عندما افعل افكر من جديد هل كان من الافضل قرار اخر

الطيبة فلا اقابل الشر بالشر ربما بالخير حتى

ازرق حيث صفاء السماء و عطاء البحر و اثور مثله عند الغضب

قليل الثقة ليس فى غيري لكن فى نفسى

منير حيث افيض حبا و تعبيرا عن نفسى من خلال اغانيه

اصرار و صبر لا بأس به لعمل شئ او تعلمه او حتى تحمله

صدوق فاصادق كل من يريد صداقتى و احب الجميع

يملكنى خوف من ردود الافعال عموما و من الدنيا

تائه احيانا حيث لا ادرى كيف استقر و اقرر ما اريد حتى لو لم يرض احد و لكن ما زلت حالم

مواجه بالحقيقة فقط ان وجدت من امامى يريدنى اواجهه صدقا

كثير التعلم حيث محبتى لتعلم كثير من الاشياء فى مجالات متعددة

مسامح زى نبع الحب صافى

نفس تحتاج زيادة الايمان بالفعل

بتمنى حد وانا وحيد... مستنى حد يكون عيونى احضنها جامد اوى بجفونى

عصفور متدلع ... ولان محدش كلمنى انا بمشى على شاطئ حزنى و كأن العالم مش ملكى

------------
و فى النهاية بقول

لو هقدر اغير راح اغير لو مش قادر انا لازم اغير و اتغير

و انتو طبعا كتير منكم عارفنى كويس ممكن يعدل فى اللى قولته و يقول هو شايفنى ازاى

و التاج ده لكل من يحب تدبيس نفسه


الأحد، يوليو 13، 2008

باب الشمس

باب الشمس هى رواية الياس خورى و فيلم المخرج المصرى يسري نصر الله
اتمنيت اشوف الفيلم ده من ساعة ما نزل سينما و اتشال و مشفتوش و كنت عاوز اشوفه باى طريقة لحد ما اخيرا بقى عندى و شفته زى ما اتمنيت املك الرواية اللى تعدى ال500 صفحة وتمنها 50 جنيه ولانى مبشتريش كتاب باكتر من 20 جنيه لاسباب غير الفلوس ان امى كل ما اجيب كتاب تقولى كلام كتير كأن حرام ادفع فيه ما بالك 50 جنيه بقى
بس ان شاء الله لازم اجيبه بعد الفيلم اللى حمسنى اكتر لكده لان الرواية اكيد هيبقى فيها اكترو اجمل من كده بس يا رب اجيبها قريب بقى

الفيلم طبعا عن فلسطين و طبعا مش هقول اى قصة ولا حكاية عشان تشوفوه او تقروا الرواية بس التمثيل بجد خرافى خاصة الشيخ الاعمى ابو يونس و حبيت نهيلة زوجة يونس رائعة و حبيت الدكتور اللى كان قاعد مع يونس برضه
بجد فيلم مش عادى تخيل لما يبقى باسم سمرة اللى هو احسن واحد بيمثل فى مصر يبقى من اقل الممثلين تمثيلا و دور
و اخراج يسرى نصر الله مفيش كلام يتقال عليه
و موسيقى تامر كروان كانت مفاجأة انى الاقيه هو اللى عامل المزيكا و الاغنية يبكى و يضحك اللى غنتها فيروز العظيمة المرة دى لحن تانى مع مطرب تانى و لحن قوى جدا من تامر كروان

بجد شكرا للفيلم و اللى عملوه ... فيلم يبقى فى الذاكرة
و شكرا للصديق العزيز بشرى مش هنسى برضه ان هو اللى اهدانى الفيلم ده

الاثنين، يوليو 07، 2008

مهندس معمارى

اخيرا انتهى مشروع التخرج و عدت الخمس سنين على خير الحمد لله و اخيرا اصبحت مهندس معمارى
مشروع التخرج كان مجهد جدا الحقيقة و صحيح الدكتور اللى من برة الكلية اللى جه يناقشنى خنقنى
قال ايه واحد مسافر من المطار للكويت و معاه بلاص مش فى الشنطة هعرف منين ؟!! كل ده عشان عايزنى اقوله ان فى كلاب فى المطار و انا عامل ليهم اوضة .... اه يا راجل يا بلاص ده انا هسيب عليك انت الكلاب
يلا ما علينا اهو راح و الحمد لله كله خير و ربنا يسهل

و اعود اليكم من جديد كمدون ...و معمارى
تحياتى

الأحد، يونيو 08، 2008

الفترة الجاية هغيب عن المدونة و ده اللى مكنتش عملته قبل كده تماما من ساعة ما بدأت تدوين لكن دلوقتى غصب عنى لان هتبدأ فترة تبييض (هشرحها كمان شوية) مشروع التخرج وده هيخلينى لا ادخل نت ولا اعمل اى حاجة فى الحياه غير المشروع حتى ان اشوف اهلى هيبقى صعب
و لانى فى قسم عمارة فمشروع التخرج مختلف عن اى اقسام هندسية تانية بتاخد مشروع التخرج و شغلنا فى جهد اكبر و كل طالب بيبقى ليه مشروع تخرجه لوحده مش زى الاقسام التانية بيبقوا مجموعات
و مشروع تخرجى هو مطار اقليمي
اما عن الفترة القادمة وهى فترة تبييض المشروع يعنى ان بعد ما قعدنا نسلم اسكتشات طول الوقت للدكاترة بالتصميم اللى كل واحد عامله لمطاره بنوصل لمعاد معين يبدأ فيه تبييض المشروع يعنى اعادة رسم المشروع كامل باظهار حلو حسب ما تعرف بقى رصاص حبر الوان براحتك و المشروع ده بيتم على من 4 الى 6 شاسيهات و الشاسيه الواحد معناه لوحة للرسم مقاسها 120سم *80 سم على كل دول بقى على كل دول بقى هعمل مشروعى مطارى
و المشروع هيتسلم 5/7 يعنى حوالى شهر او اقل هما اللى هغيبهم و ارجعلكوا تانى
اه و عشان تعرفوا برضه التبييض ده بيتم فى الكلية و بيتم بانك كل يوم تروح الكلية من الصبح الساعة 8 كده و تروح مش قبل 12 بليل يعنى طول اليوم شغال و يا دوب تروح تنام كام ساعة عشان تصحى ترجع للمشروع ده اذا مطبقتش فى معظم الايام اصلا و عشان كده بقى مفيش اى وقت لاى حاجة عرفتوا بقى
ادعولى بقى فى مشروعى
و اشوفكم على خير

الأحد، يونيو 01، 2008

صحوبية

اكتر الحاجات اللى مبحبهاش لما يرتبط واحد بواحدة ان يسميها صاحبتى او اصحابه يسموها صاحبته ... افتكر انا ساعتها ان صاحبته دى يعنى صديقة مش اكتر عادى يعنى انما صاحبة يعنى حبيبة دى محبهاش ... حبيبة دى يعنى ارتباط يعنى خطوبة اى علاقة مش صحوبية ... و كمان بقى اما تلاقى بقى كل واحد و صاحبته يدوا بعض الباسورد للايميل و للفيس بوك كمان مثلا و قال ايه بقى عشان كل واحد يشوف مين بيبعتله ايه و عنده مين... ليه بقى يعنى ده ايه لازمته كل واحد بيعمل حاجة المفروض اصلا مراعى فيها التانى و بعدين فى ثقة مش اخد باسورد والكلام ده

الأحد، مايو 25، 2008

خروج منتظر

على الرغم من انى ابعدت النواحى الدراسية بنسبة كبيرة جدا فى هذه المدونة فلم اذكر الا نادرا جدا عن الدراسة و الكلية الا انى حاجتى هذه الايام جعلتنى اريد الكلام عنها و عن ما يتعلق بدراستى حتى لو كان هذا بوست شخصى جدا قد لا يعنى اى احد سواى

امضيت سنواتى الخمس فى الكلية بمشاعر مختلفة كثيرة لا تهم الان .. فالاهم مشاعرى الان و انا فى نهايتها فى مشروع التخرج اخر شئ سيربطنى بهذه الكلية و لا يعنينى او انظر كثيرا لان اكون افضل من غيرى فلا انظر لغيرى فقط انظر لمشروعى الذى اتمناه بقوة و توفيق يرضينى و هذا لا يكون بدرجات فلا اعنيها ايضا .. فقط اعنى ان يكون مشروع جيد و من يراه يرى به هذا المستوى و منذ بدأته و انا راضى عن فكرتى و مشروعى و كنت اشعر بتشجيع به هو شعور فقط و ربما كنت مخدوع او موهم انا به
المهم الان اشعر ان مشروعى ليس بفكرة جيدة ولا مشروع جيد و لا اى شئ و هذا انطباع يتكون لدى الان حتى لو انى لا ادرى
فقط اريد مشروع جيد جدا فقط اريد مشروع يرضينى و يكتمل رضاى هذا برضا الاخرين عنه حتى لو كانوا اشخاصا لا يفهمون ( مشكلتى انى انتظر رضا الناس لا رضاى انا فقط فلو لم يرضوا اهتزت ثقتى )
لا اعنى ان اكون من الاوائل ولا ان ابحث عن درجات ولا اعلى تقدير فانا اعرف تقديرات و تقييم سيأتى لاخرين لكنى كنت اتمنى لو ارى نفسى و اعرف اين اتجه و تقييمى فلا اشعر به .. هل فيما اتمنى ام تقييم اقل
كثيرا ما اشعر بتقديرات الغير و قليلا عندما اشعر بتقديراتى

مع هذا المشاعر تصاحبنى مشاعر اخرى لها ارتباط اخر و هو التخرج ذاته و هذا لا اراه سوى شئ واحد و هو المجهول لا ادرى من سيظل من اشخاص و لو انى اثق باشخاص واخاف ان تضيع ثقتى هذه عندما نصل لبعد التخرج فلا اجدهم كما يقلقنى العمل فلا اصدقه ولا استوعبه حتى الان
هل ساجد عملا متيسرا فعلا ؟؟ ان كان هذا السؤال فانا اتوقعه و لكن هناك ما يقلقنى اكثر و هو عندما اكون هذا المهندس فعلا هل ساكون كفء للعمل ؟ هل ساستطيع ان اؤدى مهنة العمارة هذه ببراعة ؟.. لا اعرف فانا اشعر انى كطفل لا افقه شيئا ولا اعرف و ساكون (محتاسا) فى العمل كمن لا يدرى و لم يتعلم العمارة ما كنت ارغب فيها و فى العمل بها منذ دخلت الهندسة و العمارة............

الخميس، مايو 08، 2008

الأحد، مايو 04، 2008

انا حاسس انى فى الجنة !!!!!!!!

بقلم ممتاز القط كتب اليوم


ليه بنحبك ياريس

'ياريس كل سنة وانت طيب وربنا يخليك لينا'..
كل سنة ومصر تعيش معك أغلي وأعز أيامها.. سنوات مرت وكأنها حلم جميل داعبنا، وجعلنا نبتسم لكل أيامنا.
في عيد ميلادك ياريس ندعو الله لك بالعمر المديد، لكي تحقق لنا المزيد والمزيد.. فنحن سيدي الرئيس قدرك، وانت قدرنا. لمن غيرك نشكو؟! من مين غيرك نطلب!! لمن غيرك نروي احلامنا وآمالنا في مستقبل نملك فيه القدرة علي ان نحقق طموحاتنا، ونترك لاولادنا وأحفادنا وطنا عزيزا وقادرا علي ان يحقق لنا كل ما نتمناه.
بصراحة.. إحنا بنحبك لأنك إنسان أصيل.. بتعرف تحافظ علي كرامة وكبرياء بلدك وشعبك.. بتعرف تقرأ المستقبل صح ياريس.. وفي كل حاجة.. بره وجوه.
بنحبك.. لأنك مابتعملش حاجة إلا بعد ماتحسبها صح.. ويكون قرارك في الصميم.. بنحبك لان تاريخك كله نظيف.
تاريخ بطل.. كان يكفيه من كل الدنيا وسام الانتصار في حرب أكتوبر. الوسام الذي وضعه شعب مصر كله علي صدرك داخل مجلس الشعب تقديرا لبطولاتك ودورك الذي فتح أبواب أعظم انتصاراتنا.
دايما ياريس، القرار الغلط في أي مجال يكون له تأثيرات سلبية، بتختلف من مكان لمكان.. ولكن في الطيران القرار الغلط يعني الموت.. من هنا دايما بيكون فيه تقدير وحسابات كاملة قبل أي قرار.
طول ما إحنا معاك ياريس حسينا بالحكاية دي.. مفيش انفعال ولاغضب.. أي حاجة دايما تسبقها دراسة كاملة.. كتير قوي ياريس مواقف مرت علينا وعلي بلدنا.. تحديات كتيرة لا لها أول ولا لها آخر.. لكنك ياريس عدتها كلها بسلام.. بحنكة ومهارة وتفكير.. كانت دايما ياريس مصر معاك.. في قلبك وعقلك والعدو والحبيب دايما بيحسب لبلدنا معاك ألف حساب.
بنحبك ياريس.. لأن سمعة مصر معاك أصبحت زي البرلنت.. وبيحسدونا عليك.. لأنك مننا.. دايما ياريس كنت معانا.
ساعات كتيرة كنا بنكلم نفسنا.. بنقول ياتري الريس حاسس بينا.. ياتري الريس حاسس بمشاكلنا وهمومنا.. وفي كل مرة ياريس نكتشف الحقيقة إنك معانا.. أنت جزء مننا وإحنا جزء منك.. بتتكلم زينا.. وحاسس بالظروف الصعبة اللي إحنا عشناها.
وبصراحة ياريس.. إحنا نسينا أيام زمان.. إحنا ادلعنا ياريس في عهدك.. ونسينا كل حاجة وحشة.. نسينا زمن الاشتراكية اللي ضحكوا بيها علينا لاننا اكتشفنا إننا بنعيش في وهم جميل صحينا منه يوم 5 يونيه.
نسينا زمن تليفون العمدة وبقينا دلوقتي محتارين.. نركب 012 ولا 010 ولا 011 ولا أرضي.
نسينا القطارات ماركة اللي يحب النبي يزق!! نسينا زمن كل حاجة بالبطاقة من قطن العرايس لحد قماش التيل والبفتة والدبلان.. نسينا زمن المجاري اللي طافحة وطلمبات الميه البحاري ووضع النواية جوه الزير.. نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر.
دلوقتي كله بيتكلم.. مفيش حد خايف.. شلت الخوف من قلوبنا يا ريس ودي نعمة إحنا مكناش حاسين بيها.. دلوقتي ممكن أي واحد ينتقد رئيس الجمهورية والحكومة وكل حاجة!! ساعات بنزودها حبتين!! لكن جوانا شعور إننا مش خايفين.. عارفين إن فيه كبير في البلد.. بيحبنا وبنحبه.. عايش في قلوبنا وقريب دايما مننا.
بنحبك ياريس لأنك مننا.. انت الرئيس الذي لا يتحدث بلغتين.. اللي بتقوله في الغرف المغلقة هو اللي بتقوله في العلن.. ودايما آراءك وأفكارك سباقة والعالم كله يا ريس آد أيه بيحترمك ويقدرك.. طولة بالك وسعة صدرك ياريس وحبك لينا.. خلانا نطمع أكتر واكتر ياريس.
في عيد ميلادك الناس.. اهلك... وشعبك... كل اللي بيحبوك المفروض يقدموا لك ورود الدنيا كلها.. لكنك ياريس كنت سباق بالخير.. طول عمرك سباق بالخير.. العلاوة ياريس كانت مفاجأة.. كانت عبور بالموظفين الغلابة من الدوامة اللي عايشينها ليل نهار.. الناس كلها دعت لك ياريس بالصحة والسعادة.. حسوا ساعتها انك جزء منهم وانت بتطالب الحكومة إنها تدبر الموارد عشان العلاوة لأن الناس مش ناقصه.!!
الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.. 'علاوة ريس'.. له في قلب كل مصري حب ما يتقدرش بأموال الدنيا كلها.
كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!
كل سنة وأنت بكل خير ياريس.


الأحد، أبريل 27، 2008

مش عارف

الحمد لله خلصت امتحانات و مش همتحن تانى ان شاء الله قولوا يا رب و مش ناقص غير مشروع التخرج ادعولى
و بماان دى فترة فراغ فبحاول اعمل حاجة او عايز اعمل بس مش عارف
ليه مش عارف؟
مش عارف
عايز اقرا و نفسى فعلا بس اجى اقرا الاقينى مش عارف الكتاب بيمشى بطئ كده و مش عيب فيه اعتقد
عايز انشر ديوان فيه كتاباتى اللى فى مدونتى التانية و غيرها بس مش عارف
حتى لو حد هيقول انه مش شعر انه خواطر او اى حاجة مش مهم
المهم انى مؤمن بكتاباتى دى و عشان كده حاسس انها تستحق تتنشر بس مش عارف
عايز اعمل اى حاجة فى الوقت ده و حاجة تبسطنى بس مش عارف
عايز اخرج و اقابل ناس بس معرفش فين و مع مين
عايز احب و اتحب بس مش عارف لان مفيش حد

اعمل ايه بقى دلوقتى
مش عاااارف

الاثنين، أبريل 14، 2008

بلاك تيما



مضايق من همومك*
مضايق من هدومك
مضايق من حياتك
قول ااااااه
يا حبيبى تعالى الحقنى شوف اللى جرالى


لو مضايق من اى حاجة
عايز تفرح و تستمتع و تسمع مزيكا حلوة جدا مع كلام جميل
يبقى تروح وتسمع بلاك تيما
كون سعيد **
عيش كأنك فيها وليد
كون سعيد
لسه الحياة ياما فيها جديد
لسه القمر بيرمى ضوئه ع النجوم و ينوره
لسه الولد بيجيب حمام و يطيره
لسه الربيع بيضمنا
لسه الحبايب فى الليالى بيسهروا
بلاك تيما فرقة بتكون من عبده و امير و بحر3 شباب نوبيين بيغنوا عشان يعبروا عن الناس
أملك صورة انا فيها صغير ***
شكلى اتغير ما عرفتوش
كان فى جيوبى مكعب سكر
داب السكر ما لقيتهوش !
و اما اتقطعت منى الساعة
وقع الوقت لاقيتنى كبير !
بحب عبده اكتر واحد فيهم و بحسه هو اللى غنى الكوبليه اللى فات ده و غنى من عشر سنين
افلت زمام امالك****
هتلاقى الكون قبالك
ده الفرحة هى لحظة
يشبع فيها جنانك
مجنون و الحب غاية
بحلم من غير نهاية
امانة يا بحر طبطب
على شمس تكون مراية
الفرقة بقى
محمد محمود ( زتونة ) : بركيشن و دف
عادل ( ميخا ) : طبلة و دف
مصطفى جويدة : باص جيتار
مدحت على : إليكتريك جيتار
محمود عبد العزيز : درامز
عمرو الشيمى : كى بورد
محمد سامى : كمان اجمد واحد فيهم
كل مرة بدق باب*****
يفتحلى واحد قلبه داب
أصعب عليه فنصير صحاب
أصعب عليه فنصير صحاب
اسأله فين طيّب نروح
يقول لى دوّر ع الطموح
طموحه يملانى بجروح
تطلعلى روح من جوّا روح
مالقيتش حد يعزّنى و لا عمر حد حسّنى
مع إن بركان م الحنان بيهزّهم و يهزّني
حتى اللّي بين حب ظاهر
اقتنعت إنه طاهر
فجأة بان له الف ناب
ما أنا كل مرة بدق باب
لما تسمع بلاك تيما يبقى اكيد بتسمع حالة مختلفة جدا من الغنا مش الاغانى المنتشرة دى لا كلام مختلف بمزيكا مختلفة
حتى انى حطيت بلاك تيما فى قائمة احسن الفرق الموسيقية بعد اسكندريلا و نغم مصرى مع انخفاض وسط البلد و افتكاسات عنهم

من عشر سنين و أكتر ******
أبني الأكبر ..
شاب فارع لونه أسمر ..
كان جميل الصوت ..
صوت عنبر ..
حتى فوق مادنة بلدنا ..
لما كان يطلع يكبر ..
كل خلق الله ..تكبر ..
كنت ألف معاه كفور مصر و نجوعها ..
بالربابة ..
هو يغني سيرة الأبطال ..
أبو زيد و الزناتي و عنتر ..
حتى جه اليوم طلب الجيش ..
راح يوميها ويا شبان البلد عالجهادية ..
كلهم راحوا و عبروا ..
و بعدها رجعوا ..إلا هو ..راح مجاش !!
و أنتظرت كتير على شط القنال ..
قلت لازم يوم هيرجع ..
لحد يوم ما شفته من بعيد..
جاي مغبر ..
صحت أكبر ..
الله أكبر
------------------------------------
على الهامش اسماء الاغانى و التحميل لها
بلاك تيما*
كون سعيد**
مكعب سكر ***
افلت زمام****
كل مرة*****
من عشر سنين******
اسمعوا بقى
ايه يعنى لما سبتينى
من عشر سنين و كون سعيد
انسان

الأحد، أبريل 06، 2008

انطباعات



دى صور ايه؟؟ قليل اللى يعرف و ناس معينة
دى صور ماكيت يعنى مجسم كده بيوضح كتلة و ده بيعمله طلبة عمارة عشان تجسد مبانيهم

مشكلة الماكيت عموما بالنسبة ليا هى مشكلة واحدة بس و هى انى انزل الشارع بيه ازاى و اروح الكلية هو مش حجمه كبير ده مثلا كان حجمه صغير 20 *30 سم تقريبا المشكلة انا لازم يتمسك كويس و ميتبهدلش عشان ميبوظش فمقدرش مثلا احطه فى شنطة لاحسن يقع منه حاجة فبكون مجبر انزل بيه كده مش متغطى وهنا تبدأ المغامرة
اللى بتتشابه كل مر مع اختلاف الماكيت فمثلا المرة دى

اول ما نزلت من البيت و شايله فى ايدى كده و محرص عليه اول ما خرجت من العمارة و لسه فى شارعنا لقيت شوية عيال بيقولوا ايه الصواريخ اللى معاك دىو انا عامل اطرش و ماشى و ولد تانى بيقولى هات واحدة طيب و اجيبلك بكرة نص جنيه
و كملت و قلت اركب تاكسى بدل المواصلات هتبقى بهدلة و كلام اكتر خاصة طول ما انا ماشى فى الشارع كل بيبص بعجب فلو معلقش هيبص بس و فى سره هيقول ايه ده
ركبت التاكسى و حاطط الماكيت على رجلى كده بعناية و قاعد جنب السواق اللى مقالش حاجة طول الطريق الا انه كان عمال يبص كده على الماكيت ومستغرب جدا و انا سبته ما دام مسألش
بس فى مرة كان فى سواق تانى قعد يسأل بقى و رغى

طبعا انا خلاص بقيت متعود انزل عامل اطرش عن كل الناس و عادى جدا هو الماكيت ده عيب مثلا؟؟

الثلاثاء، أبريل 01، 2008

عن الثقافات و علاقاتها بالشعب (عن جنينة الاسماك)

ملحوظة البوست منقسم لجزئين (موضوعين) ذات صلة ببعضهما

عن الفيلم من غير ما احرق احداث ولا اقول قصة ابدى تعليقى على الفيلم الذى احببته كثيرا -
الفيلم كله يدور حول فكرة واحدة تظهر فى الكثير جدا من الصور و هى فكرة الخوف -
ستجد كل مشاهد الفيلم تحدث لتكلمك عن الخوف و انه الشئ المسيطر على مصر حاليا خوف من كل شئ -
ستجد حرفية يسرى فى تقديم تفاصيل و افكار كثيرة و تصوير ممتاز كما انه جعل الممثل يحدث المشاهد مباشرة كان -موفقا جدا و معبر فى الفيلم اعتبره اضافة
لن اعرف التعبير عن الفيلم قدر ما يفضل مشاهدته و انصح بذلك
و اقرا حوار يسرى الرائع
http://www.elbadeel.net/index.php?option=com_content&task=view&id=15669&Itemid=98

اكثر ما يهم فى الموضوع هو قبول الفيلم من عدمه لدى الجمهور العام
دائما الافلام التى تحمل ثقافات مغايرة و اختلافات عن الافلام التقليدية ما تحمل عبئا على المشاهد فيجعله لا يحب الفيلم و لا يجد به شيئا جيدا مثلما رأيت فى عرض هذا الفيلم و من افلام سابقة
فلن يتحمل الجمهور العادى التفكير فى ما هى الفكرة الرئيسية للفيلم التى تبدو واضحة لكن لا تجد اى رغبة فى مجرد التفكير البسيط و لا حتى مجرد الاحساس بالفيلم و ما به فتراه يرى هذه الافلام باستخفاف و عدم اعطاء اى قيمة للفيلم و هنا المشكلة التى اراها ليست فى من يصنعوا هذه الافلام التى تدعو لتفكير او اختلاف و سينما جيدة فلا غبار عليهم ( حتى هذا الفيلم فهو مباشر يدعو للتدقيق و التركيز فقط)
لكن المشكلة تكمن فى الجمهور الذى لا ينتظر من الافلام سوى الكوميديا او الحب او اى تقليدية من اجل المرح و التسلية فقط ليس ان يروا فيلما واقعيا يتحدث عنهم او فيلم يحمل مضمونا ثقافيا
و هذا لسبب نقص الثقافة فى هذا الشعب فتجعله لا يقدر الافلام الحقيقية و لايريد سوى الافلام التجارية المكررة بلا اضافة و لا حتى ولو قدر من الاحترام للفكر فى الافلام
وهذا ايضا لا يلام عليه جمهور يريد اى شئ ينسى الدنيا بما فيها من كئابة و خوف فلا يريد اى تفكير اخر و لكن يلام على عدم انتشار الثقافة فى الشعب

ملحوظة اكيد بعد ما يوفرولهم العيش الاول عشان يعيشوا

ولعل فى يوم ما ينتهى الخوف فلا نصبح فراخا ولا اسماكا و يكون لنا خروج من جنينة الاسماك فكلنا داخل الجنينة المرعبة كل منا متقوقع فى حوضه او يخفى ما يفعله

الخميس، مارس 06، 2008

تدخل للاهم

عندما تموت بنت مصرية لمجرد انها خرجت من بيتها فوجدها عسكرى اسرائيلى و اطلق الرصاص فماتت..
عندما يموت اربعة اشخاص فى طابور للعيش مجرد طلب للعيش يصبح ازمة و مأساه بل و الموت فى سبيله ..

فلا تجد سوى تدخل للرئيس لحل مشكلة الحضرى !!!!!!!!!!!!!

الاثنين، مارس 03، 2008

عن قصيدة مفيش كوكو.. لعلي سلامة

قريت انهاردة قصيدة شاعرى المفضل و صديقى العزيز الفخور به دائما على سلامة و القصيدة بتقول
أخر كلام يا عم..
طعام..
يعني مم..
يعني علي سبيل المثال..
سندويتشات..
وأرجوكو..
ماحدش يجيب سيرة الكوكو..
قدام العيال..
وكوكو للي مش عارف..
يعني دجاج..
يعني شوربة..
يعني ظفر..
معقول ده محتاج..
عقد عمل..
وغربة..
وسفر..
عارف..
لسه شوارعنا بتخاف من المطر..
ومطر للي مش عارف..
يعني خير..
إزاي ف بلدنا الخير..
أصبح خطر..

اكتر ما عجبنى فى القصيدة ان فكرةالمطر اللى اصبح خطر فى بلدنا و مهواش خير الفكرة دى كانت فى دماغى جدا من قبل ما اقرا القصيدة انهاردة خاصة فى ايام المطر اللى فاتت و كنت بقول ان الارض مبقتش عايزة المطر و ان السما اللى كلها خير و بتنزل المطر الارض بقت رفضاها
الجميل بقى انى الاقى علي كتب الكلام من غير ما اقوله و لا حاجة يعنى على بيكتب شعور الناس من غير ما يقولوا و بيحس بكل حاجة ممكن يحسوها

بالمناسبة دى تابعوا على سلامة كل يوم قصيدة فى جريدة المصرى اليوم

الاثنين، فبراير 11، 2008

اسباب وجيهة للفرح

مبروووووووك لمصر !!!
معقول مصر دى كلها مفيهاش اسباب وجيهة للفرح غير كرة القدم !!!

مطلوب من كل معلق انه يقول اسباب وجيهة للفرح فى البلد دى بتحصل

عنوان البوست متاخد من عنوان ديوان عمر مصطفى

الاثنين، يناير 28، 2008

احساس الاخرين

فى هذا الوقت تتجمع الاحداث و المواقف لتجعلنى اشعر بما حولى و اعرف احساس الاخرين الذين فقدوا هذا الاحساس تماما او اصبح باردا جدا... كذلك هم مغيبين ..
فالكل يعيش هنا مع البطولة و غانا و فوز مصر العظيم على الكاميرون و بعدها السودان و الطريق للبطولة و قمة الفرحة و تشجيع و تجمهر فالوطن اصبح داخل ملعب لكرة القدم فقط ..غير ذلك لا وطن و لاحزن سوى لهزيمة.. ليست احتلال ارض او تعذيب او اى شئ سوى هزيمة دخول اهداف داخل شباك...
كم من يدروا بالبطولة و غانا و المنتخب ولا يدروا بغزة و ما يحدث بها ...
كل الاعلام الموجه الذى يغويك بفوز منتخبنا.. و لا يدريك بما يحدث فى غزة اللهم سوى بعض الاغانى التى لا تعبر عن شئ.. سوى انها لموضة الحديث عن فلسطين و العرب و لكنها لا تحرك احدا سوى ان تعلى من نجم المطرب...
كم يتمنون مساعدة المنتخب و مؤازرته ولو يستطيعوا لذهبوا لغانا للتشجيع ..اما غزة فلا تضامن بسيط حتى ولو بالكلام والاعتراضات او مد اى عون بسيط لهم من اى نوع ...

وفى نفس هذا الوقت مع الحدثين.. هناك حدث ثالث لا معنى له ولا يستحق ان يكون حدث لكنه كذلك للاسف و هو ستار اكاديمى عندما تجد تجمع مجموعة من شباب و بنات ليس سوى لفعل كل ما هو مسئ و ليس له علاقة بالغنى او الطرب فهذا قمة الاسفاف و للاسف كثيرون جدا متابعون لهم و تضامن مع كل متسابق و تشجيع المصريين للمصرى و اللبنانين للبنانى و هكذا رغم ان كلهم لا يستحقون و لا حتى سماعهم فهم مجرد عابثون ..

و الحدث الاخر من جهة اخرى هو معرض الكتاب الذى يهمله معظم الشعب المصرى ..كما يهمله الاعلام.. كما يهمله من اقاموا ومنظمين على المعرض .. لا احد يهتم بالقراءة فكأنها هى العبث ذاته و انها ليست ذات اهمية (فى ظنهم) ..انها اقل اهمية بكثير من البطولة الكروية و من ستار اكاديمى و كذلك لا يخفى ايضا دور الاعلام الذى لم يهتم ايضا كثيرا مثلما اهتم بالامرين الاخرين...

اخيرا اتمنى التوعية بان الكرة ليست سوى هواية و مجرد متعة ليست اهم ما بالوجود و اهم ما يحدث فى مصر الان فهناك امور كثيرة اهم فلو شخص يعمل فى وقت مباراة يترك عمله هذا من اجلها اما غزة مثلا فلا مساعدة لها و لو فى اوقات الفراغ التى تملأ معظم وقت الانسان المصرى او حتى القراءة (مع الفارق فى الموضوع فلا علاقة بالقراءة و غزة) ..
لا اميز نفسى ابدا ولا اقول انى افعل هذا و لست افعل ذاك فانا اشاهد المنتخب لكنى لست متعصبا و لا مهتما جدا و لن احزن عندما يخرج المنتخب لانها لا شئ سوى كرة ...و احس بغزة فى قلبى من اجل غزة الوطن المسلوب الذى نعجز و نصمت امامه و اخاف ان اموت صمتا و اشعر باهمية القراءة التى لا اوفيها حقها و لن اوفيها
فقط ادعى انى اعي اكثر و احاول فعل الافضل و الافيد ....و ربما انا لا اعي !!!

الخميس، يناير 17، 2008

وحدى .. واوراقى القديمة ....

الحب مش اتنين بيحبوا بعض و بس
الحب ممكن يبقى شغال فى واحد و هو ملوش حبيب
الحب احساس طبيعى دائم .. محتاج يتوجه لحد

يمكن عشان كده رغم انى لوحدى الا انى بحس بحب و مش لحد لا ده حب كده طبيعى شغال على طول فعلا ..محتاج بس حد يتوجه ليه الحب ده عشان يحس بيه و احس بيه انا اكتر و ده مش عيب انى احتاج احب و برضه مش هيكون اندفاع لانى ادور او اعيش اى حب و خلاص

بحظى الايام دى كده فتحت دولاب كتبى القديمة و ببص لقيت كشكول قديم مكتوب كاملا باشعار و خواطر زمان انا كنت بكتبها كنت نسيتها تماما و مكتوب فى اول الكشكول اسمى و الفصل 2/24 يعنى كان تانية ثانوى لانى مكنتش فاكر فعلا هى انهى سنة تحديدا و مسكته قعدت اقرا فيه و استعبطه كله تقريبا بس مش احساسيه لا انى فاكر انه شعر لانه كان كلام فعلا ممكن يتقال عليه كلام مراهق و ده مش وحش هو اكيد كان جميل فى وقته كل الكتابات تقريبا كانت عن الحب بمواضيعه و احيانا لفلسطين ايامها كنت متأثر برضه باحداثها و باندفاعى فى المرحلة العمرية دى ... فرحان ان كان فيها حاجات جميلة كده مع انى مش حابب اى حاجة كتبتها فى الايام دى لكن زى ما قلت ان ليها جمالها و افتكرت بقى كل كلامى ده كان على مين و جت فى بالى اغنية وجيه و هو بيقول انا اصلى كنت زمان حبيب و شعر ايه و غنى ومكاتيب ...ليه كل ما امسك هى تسيب فعلا كنت حبيب بس هى واحدة بس اللى كنت حبيتها الهمتنى فعلا كل الكلام و الحاجات اللى كنت كتبتها زمان دى بس راحت طبعا زى حاجات كتير بتروح فمتسألوش عنها مبقتش اعرف اى حاجة عنها تماما و متفتكروش برضه انى كنت قايلها انا كنت اعرفها طول فترة سنة تانية دى فعلا لكن ولا مرة قلتلها انى معجب ولا بحبها كان كل كلامنا عادى و عام و فى الدراسة بس كنت ببقى مبسوط جدا لما اشوفها و اكلمها و فضلت شوية فى تالتة الى ان تلاشت فى اخرها او قبل كده كمان
و بعد كده قفلت الكشكول و شيلته تانى بعد ما فكرنى بزمان و ايامه بحلوها و مرها
دلوقتى ادعى ان كتاباتى اختلفت و مبقتش عن الحب بس و نضجت و كمان بقت من غير اى شخص ملهم للاسف بس اتطورت و هى فى مدونتى خواطر نفس
-------------------------------------
بما انى حسيت الكلام ده اوى قلت لازم اكتبه

مطلوب منك .. انك
تهرب منك.. و انك
تبعد عنك .. و انك
ترمي حاجات جواك من سنك .. و انك
تدبح فنك .. و انك
تسرق دمع البوح من ننك .. وانك
تطرح عنك كل معانى الحلم لأنك
عايش وحدك وسط الناس
مشكلتك .. عندك احساس

الشاعر الجميل محمود رضوان من ديوانه نضارة نظر

--------------------------
ختاما ادعو بالرحمة للمدون محمد الكردي رحمه الله و غفر له و مدونته هى بقايا قلب و وطن زوروها كانت مدونة جميلة و لم اعرف بوفاته الا اليوم رغم انه توفى من عدة اشهر !!!

السبت، يناير 05، 2008

!!عام جديد فهل يحمل جديد ؟؟

مرت سنة كانت صعبة جدا لحد اخرها و عشان اخرج منها فى حالة جديدة و افرح رحت حفلة منير عشان ابدأ سنة جديدة سعيدة و رغم ان قبل دخولى على طول عملت موقف غير ظريف تماما و لا ينسى لا داعى لذكره الا انى كنت استبشر بعام جديد و لكن اسمع اخبار تخلينى احس انه لا جديد ولا غيره و ان المسيرة العظيمة مستمرة فمثلا هيئة المصل واللقاح هتتباع والتطعيم هيغلى كلام غريب يعنى كمان هيصعبوا ابسط الحقوق و الحديد غلى باى حجة و محدش يقدر يقف ادام عز طبعا و اسعار عمالة تزيد و تضرب
و طبعا صديق ليا ناوى يهج من البلد بعد ما نتخرج من كتر اللى بيحصل فيها و مش مؤمن انه فى تغيير ولا غيره و شوفوا البوست بتاعه و بيسأل عن الناس بتاعة زمان و حبها للبلد و اما اقوله ما تبقى زيهم و تقعد و تعمل و هو معندوش اى امل او مستنى يحصل تغيير بس مش على ايده طب ليه ما نقعد و نحاول نعمل حاجة يعنى هنسيبها و نروح فين و ليه ولا اى مكان احسن من هنا و بالمناسبة للبلد و الغربة اسمعوا اغنية هيلا هوب من شريط وسط البلد الجديد
بتقولك هيلا هوب و هيلا هوبا يا ابن بلدى الغربة صعبة البلد دى ترابها اغلى مرها من الشهد احلى عذابها متشرب هريسة ... حط كتفك جنب كتفى لقمة ناشفة حاف تكفى

فى اكتر الاحيان الدموع بتبقى كتير فى عيونى تقريبا معظم الوقت عينى بتدمع ده لانى اولا املك حساسية فى العين لا علاج لها تجعلنى ادمع باستمرار كما انها تتأثر بالاضاءة الشديدة و الشمس و حاجات كتير ممكن تأثر فيها و كمان سهل انها تدمع لحزن او فرح و احيانا بتختلط المشاعر حزن و فرح و الحساسية برضه و الناتج بيبقى واحد هو الدموع طبعا لكن حقيقي ساعات بحس انه صعب التمييز الدموع دى ليه هى حساسية شغالة بتدمع عينى ولا من حزنى يمكن فرحى بيبان لكن الحزن اصعب انه يبان انا بجد مبفهمش مشاعرى حتى ساعات لما الناس تسألنى بتدمع ليه بقولهم انها حساسية وده لانه الاغلب فعلا انها الحساسية لكن ممكن يكون لسبب تصفية نفسى مثلا الدموع دى بحس انها بتصفينى فعلا عشان كده عمرى ما كرهتها او اتمنيت ان حساسية عينى تروح
ملحوظة انا مش عارف فقرة الدموع دى ايه علاقتها بعنوان البوست لكن كنت عايز اكتبها حاجة جوايا عايز اقولها و خلاص

اما عن مايحمله العام الجديد لى فهو يحمل اهم الاحداث الشخصية و هو التخرج من الكلية و الخروج للعمل ربنا يتمها على خير

كل سنة و انتم طيبين وكل سنة و احنا كلنا بنحاول نعمل اى حاجة تعمر خرابنا