السبت، يناير 05، 2008

!!عام جديد فهل يحمل جديد ؟؟

مرت سنة كانت صعبة جدا لحد اخرها و عشان اخرج منها فى حالة جديدة و افرح رحت حفلة منير عشان ابدأ سنة جديدة سعيدة و رغم ان قبل دخولى على طول عملت موقف غير ظريف تماما و لا ينسى لا داعى لذكره الا انى كنت استبشر بعام جديد و لكن اسمع اخبار تخلينى احس انه لا جديد ولا غيره و ان المسيرة العظيمة مستمرة فمثلا هيئة المصل واللقاح هتتباع والتطعيم هيغلى كلام غريب يعنى كمان هيصعبوا ابسط الحقوق و الحديد غلى باى حجة و محدش يقدر يقف ادام عز طبعا و اسعار عمالة تزيد و تضرب
و طبعا صديق ليا ناوى يهج من البلد بعد ما نتخرج من كتر اللى بيحصل فيها و مش مؤمن انه فى تغيير ولا غيره و شوفوا البوست بتاعه و بيسأل عن الناس بتاعة زمان و حبها للبلد و اما اقوله ما تبقى زيهم و تقعد و تعمل و هو معندوش اى امل او مستنى يحصل تغيير بس مش على ايده طب ليه ما نقعد و نحاول نعمل حاجة يعنى هنسيبها و نروح فين و ليه ولا اى مكان احسن من هنا و بالمناسبة للبلد و الغربة اسمعوا اغنية هيلا هوب من شريط وسط البلد الجديد
بتقولك هيلا هوب و هيلا هوبا يا ابن بلدى الغربة صعبة البلد دى ترابها اغلى مرها من الشهد احلى عذابها متشرب هريسة ... حط كتفك جنب كتفى لقمة ناشفة حاف تكفى

فى اكتر الاحيان الدموع بتبقى كتير فى عيونى تقريبا معظم الوقت عينى بتدمع ده لانى اولا املك حساسية فى العين لا علاج لها تجعلنى ادمع باستمرار كما انها تتأثر بالاضاءة الشديدة و الشمس و حاجات كتير ممكن تأثر فيها و كمان سهل انها تدمع لحزن او فرح و احيانا بتختلط المشاعر حزن و فرح و الحساسية برضه و الناتج بيبقى واحد هو الدموع طبعا لكن حقيقي ساعات بحس انه صعب التمييز الدموع دى ليه هى حساسية شغالة بتدمع عينى ولا من حزنى يمكن فرحى بيبان لكن الحزن اصعب انه يبان انا بجد مبفهمش مشاعرى حتى ساعات لما الناس تسألنى بتدمع ليه بقولهم انها حساسية وده لانه الاغلب فعلا انها الحساسية لكن ممكن يكون لسبب تصفية نفسى مثلا الدموع دى بحس انها بتصفينى فعلا عشان كده عمرى ما كرهتها او اتمنيت ان حساسية عينى تروح
ملحوظة انا مش عارف فقرة الدموع دى ايه علاقتها بعنوان البوست لكن كنت عايز اكتبها حاجة جوايا عايز اقولها و خلاص

اما عن مايحمله العام الجديد لى فهو يحمل اهم الاحداث الشخصية و هو التخرج من الكلية و الخروج للعمل ربنا يتمها على خير

كل سنة و انتم طيبين وكل سنة و احنا كلنا بنحاول نعمل اى حاجة تعمر خرابنا

هناك 7 تعليقات:

سوسكــا يقول...

علي الرغم من اقتناعي ان الشريط كله جاااااامد
وصوت الاغاني احلي بكتييييير من تسجيل الحفلات
بلاش نقر علي سكان القاهرة والحفلات اللي كل شوية
:)
بس اكتر اغنية فعلا جذبتني كلامها هي الاغنية دي

واكتر جملة وقفتني هي الجملة اللي انت كاتبها دي

عامة مع كل عام جديد
بنتمني ان يحمل ليس الجديد فقط ولكن الافضل والاحسن

حقيقي ربنا يستر

إيما يقول...

كل سنة وأنت طيب يا محمد
يا رب تكون سنة حلوة عليك وإن شاء الله تحمل كل حاجة جديدة وجميلة بتتمناها

Yasser يقول...

هو بالنسبة للسنة الجديدة والقيمة انا رأيي ان مافيش حاجة بتتغير في وليلة ودلوقتي اليوم والسنة مابقاش فرق بينهم
اللهم الا لما احنا بنعمل الفرق دة

واحمد ربنا على نعمة الدموع
صدقني دي نعمة كبيرة قوي
ناس كتيرة مش عندها

احمد عبد الهادي يقول...

زيزو
من غير شتيمه
المسنجر عاندي بايظ
والنت بيستهبل

انا كتبت بوست
بس

ibn nasser - ابن ناصر يقول...

منير هو الملك
وياعيني عالي بيحبو
الصعلوك عمرو دياب
والقرداتي تيمور حسني
محدش يزعل دي القاب
تحياتي موضوع رائع

محمد ياسر يقول...

سوسكا
اشكرك جدا
و هى فعلا اغنية جميلة بس اكتر اللى شدنى اغنية مجنون
و اكيد الجديد لازم يكون كمان افضل

ايما
و انتى طيبة و ان شاء الله تكون سنة حلوة عليكى كمان

ياسر
يا رب بقى نعمل كل سنة فرق عشان نحس حتى اننا عملنا حاجة
الحمد لله على الدموع و على كل حاجة
اشكرك جدا

احمد عبد الهادى
من غير شتيمة
لينا كلام
و شفت البوست

ابن ناصر
نورت مدونتى و اكيد تقصد على بوست زمان على المطربين
اشكرك
و تحياتى للجميع

غير معرف يقول...

~..........................................