الخميس، يناير 17، 2008

وحدى .. واوراقى القديمة ....

الحب مش اتنين بيحبوا بعض و بس
الحب ممكن يبقى شغال فى واحد و هو ملوش حبيب
الحب احساس طبيعى دائم .. محتاج يتوجه لحد

يمكن عشان كده رغم انى لوحدى الا انى بحس بحب و مش لحد لا ده حب كده طبيعى شغال على طول فعلا ..محتاج بس حد يتوجه ليه الحب ده عشان يحس بيه و احس بيه انا اكتر و ده مش عيب انى احتاج احب و برضه مش هيكون اندفاع لانى ادور او اعيش اى حب و خلاص

بحظى الايام دى كده فتحت دولاب كتبى القديمة و ببص لقيت كشكول قديم مكتوب كاملا باشعار و خواطر زمان انا كنت بكتبها كنت نسيتها تماما و مكتوب فى اول الكشكول اسمى و الفصل 2/24 يعنى كان تانية ثانوى لانى مكنتش فاكر فعلا هى انهى سنة تحديدا و مسكته قعدت اقرا فيه و استعبطه كله تقريبا بس مش احساسيه لا انى فاكر انه شعر لانه كان كلام فعلا ممكن يتقال عليه كلام مراهق و ده مش وحش هو اكيد كان جميل فى وقته كل الكتابات تقريبا كانت عن الحب بمواضيعه و احيانا لفلسطين ايامها كنت متأثر برضه باحداثها و باندفاعى فى المرحلة العمرية دى ... فرحان ان كان فيها حاجات جميلة كده مع انى مش حابب اى حاجة كتبتها فى الايام دى لكن زى ما قلت ان ليها جمالها و افتكرت بقى كل كلامى ده كان على مين و جت فى بالى اغنية وجيه و هو بيقول انا اصلى كنت زمان حبيب و شعر ايه و غنى ومكاتيب ...ليه كل ما امسك هى تسيب فعلا كنت حبيب بس هى واحدة بس اللى كنت حبيتها الهمتنى فعلا كل الكلام و الحاجات اللى كنت كتبتها زمان دى بس راحت طبعا زى حاجات كتير بتروح فمتسألوش عنها مبقتش اعرف اى حاجة عنها تماما و متفتكروش برضه انى كنت قايلها انا كنت اعرفها طول فترة سنة تانية دى فعلا لكن ولا مرة قلتلها انى معجب ولا بحبها كان كل كلامنا عادى و عام و فى الدراسة بس كنت ببقى مبسوط جدا لما اشوفها و اكلمها و فضلت شوية فى تالتة الى ان تلاشت فى اخرها او قبل كده كمان
و بعد كده قفلت الكشكول و شيلته تانى بعد ما فكرنى بزمان و ايامه بحلوها و مرها
دلوقتى ادعى ان كتاباتى اختلفت و مبقتش عن الحب بس و نضجت و كمان بقت من غير اى شخص ملهم للاسف بس اتطورت و هى فى مدونتى خواطر نفس
-------------------------------------
بما انى حسيت الكلام ده اوى قلت لازم اكتبه

مطلوب منك .. انك
تهرب منك.. و انك
تبعد عنك .. و انك
ترمي حاجات جواك من سنك .. و انك
تدبح فنك .. و انك
تسرق دمع البوح من ننك .. وانك
تطرح عنك كل معانى الحلم لأنك
عايش وحدك وسط الناس
مشكلتك .. عندك احساس

الشاعر الجميل محمود رضوان من ديوانه نضارة نظر

--------------------------
ختاما ادعو بالرحمة للمدون محمد الكردي رحمه الله و غفر له و مدونته هى بقايا قلب و وطن زوروها كانت مدونة جميلة و لم اعرف بوفاته الا اليوم رغم انه توفى من عدة اشهر !!!

هناك 11 تعليقًا:

ساعد نسرين الايمن يقول...

كلام حلو جميل
وساعات بيكون كلام الفترة ديه
من اصدق الكلام اللي الواحد بيقولها
خلال عمره

موجة يقول...

عندك حق و الله في كل كلمة
شعورك جميل
و احاسيس عالية
في بوست فوق العادة
خالص تحياتي
احمد

ادم المصري يقول...

احمد ربنا انك قدرت تلخص مشكلتك
.
.
مشكلتك انك انسان حساس
.
.
فيه ناس مش عارفه تحدد ايه مشكلتها

Davinci يقول...

طبيعي إنك تنضج.. لكن مش عشان القصة انتهت.. لكن عشان انت كبرت!
الظاهر الواحد بتجيله أوقات يحب على روحه كده.. وإما يزهق زي حالاتك كده وينسى.. وإما الموضوع ينتهي نهاية تراجيدي زي حالات ناس تانية!
مش عارف.. متهيألي حتى لو الموضوع استمر برضه هيبقى فيه نضج.. كفاية انه غالبا هيبقى فيه زواج.. يعني نهاية مضمونة!

بيقولوا سايكو يقول...

ياه على الذكريات .. باتفق معاك فى اللى قلته على نفسك دلوقتى .. و باتفق معاك فى اللى قلته على نفسك زمان .. .لإن كل الكلام ده أنا باعمله و الحمد لله ... بس غالبا باحس إنى مجنونة :)

عطشان يقول...

تصدق إنى لما قريت شعر محمود رضوان قولت الواد بقى جامد و اول ما قريت شعر محمود رضوان زعلت
ايوا كده اظهر و بان شعر و حب و الذى منه
فاكر قصر الأمير طاز .. وجيه عزيز
بس احب اقولك برضوا يا محمد إن السنة دى حتبقى فقر
و صبرى عنده حق غنه يسيب البلد
و على فكرة مستواك نزل اوى فى المزيكا
بقى يا راجل شريط وسط البلد حلو
هو مفيهوش غير شمس النهار و هيلا هوب و يمكن

Ala'a يقول...

بوست جميل جدا
انا عجبتني قوي المدونه بتاعتك واتمني تشرفني في مدونتي المتواضعه
الاء

Banota يقول...

مفيش أحسن من حب أيام المراهقة .. وبجد مش كلام مراهقين زى ما أنت كنت كاتب
يمكمن أكون انا غلط وممكن أكون أنا صح .. الله أعلم .. بس الشعر بتاعك عجبنى أحساسة العالى أوى
استمر با أحساس دة
بالنجاح

محمد ياسر يقول...

اسف لتأخير عدم الرد و انا كنت فاكرنى رديت اصلا يلا المهم

ساعد نسرين الايمن
فعلا ساعات بيكون كده و ساعات يكون لا

موجة
اشكرك جدا و يا رب دايما يعجبك

ادم المصرى
اهم حاجة الانسان يعرف ايه مشاكله هو شخصيا كده هيوصل لجزء كبير من الحل و هيعرفه
و الحقيقة محمود رضوان هو اللى لخصهالى تحياتى ليه

دافنشى
رد جميل
اكيد فى نضج فى كل الاحوال وفعلا ساعات الواحد يحب على روحه كده و ساعات يزهق

بيقولوا سايكو
يبقى انا كمان مجنون انا عارف انى مجنون اصلا

عطشان
مش لدرجة محمود لانه شاعر جامد
و قصر طاز محصلش فيه حاجة و السنة مش فقر يا كئيب و لا حد حقه يسيبها
اما مستوايا فى الاغانى يا اللى فاكر نفسك عالى الشريط مستواه جيد برضه

الاء
اشكرك جدا و انا شفت مدونتك وهى برضه جميلة

بنوتة
اشكرك جدا و حب المراهقة مش دايما بيكون احسن حب بس لعلمك لو كان حصلى و استمر كنت هقول احسن حب بس مكنش ليه ظروف استمرار اصلا

تحياتى

زهرة الياسمين يقول...

بيقولوا عليها مشاعر مراهقة لكن بسميها هواء و حياة
من غيرها نكون عايشين و مش عايشين
مش عارفه ليه الناس بقيت بيها بتستهين
مع إنها بقيت جزء منا و بقينا جزء منها
و زادنا فى سفرنا و نور فى دفاترنا

غير معرف يقول...

~..........................................