الاثنين، فبراير 11، 2008

اسباب وجيهة للفرح

مبروووووووك لمصر !!!
معقول مصر دى كلها مفيهاش اسباب وجيهة للفرح غير كرة القدم !!!

مطلوب من كل معلق انه يقول اسباب وجيهة للفرح فى البلد دى بتحصل

عنوان البوست متاخد من عنوان ديوان عمر مصطفى

هناك 12 تعليقًا:

جـيـداء يقول...

انا مش شايفة اى حاجة تفرح فى البلد دى الصراحة

وده مش مبرر لحماسة الناس غير العادية فى التشجيع اللى حصلت فى اليومين اللى فاتوا

نفسى افهم فرحانين على ايه؟
هياخدوا فلوس زى اللى المنتخب نهبها مثلا؟

نيران يقول...

و دا بردو سؤال يتسئل؟؟


اخص عليك اخص،، لا حقيقي مالكش حق
يلا استلف ايدين عشان تعد عشان صوابع ايديك و رجليك مش هاتكفي اسباب الفرح
1- الديموقراطية الرهيييييبة اللي بنعيشها في البلد دي.. كل واحد بيقول اللي هو عايزه، ششششش مش مهم حد يسمعك، المهم انك تقول اللي انت عايزه

2- انعدام البطالة
3- الحياة و الرفاهية التي يعيشها كل افراد الشعب..
4- مافيش جرايم
5- احترام حقوق الانسان
6- الفن الراقي اللي بيسعد آلاف الناس
7- الموضوعية و الشفافية بين الشعب و بين الحكومة
8- ارتفاع مرتبات الموظفين و الشعب اوي اكتر من ارتفاع الأسعار لدرجة ان الشعب بيطالب الحكومة انها ما تجبيش عليه و تشيل الدعم لأن الشعب الغني اوي مش محتاجة
9- التعليم ، و يا عيني على التعليم.. و هنا طبعا بقا مش هاتكلم.. يعني احسن من كدا مافيش
10 الخدمات الصحية المتميزة جدا اللي بتقدم لأبسط المواطنين، مش الناس ولاد الناس.
11-تقدم سن الزواج و المنح اللي بتمنحها الدولة للشباب و الشابات عشان يتجوزوا و يخلفوا براحتهم.

تصدق انا تعبت من كتر الحاجات اللي مفرحاني..

بس شفت بقى انا معايا حق ازاي؟

يبقى مالكش حق تسأل.. ايه تاني اسباب وجيهة للفرح، غير ناس بتتلكك انها تفرح عشان أي حاجة..
و افتكرت ان لما اعلامنا اترفعت، اننا حققنا انتصار علمي، او حربي.. او اي انتصار

و طلع في الآخر انتصار كروي

و نقول لك الحمد يا رب

حسن ارابيسك يقول...

الله يبارك فيك يا ابو حميد

والسبب الوجيه سبق وذكرته من قبل
الناس ماصدقت لاقت حاجه تفرحها

إيما يقول...

بعيدا عن الكورة يا محمد ساعات بنفرح علشان عايزين نفرح..كلمة بسيطة ..حد كنت السبب في انه يتبسط .. ساعات نكتة بايخة ممكن توقعك من الضحك لو عايز تضحك ..يعني ..الفرح نسبي جدا من حد للتاني بس أكتر حاجة بتساعد علي الفرح وسط كل الاكتئاب واليأس اللي حوالينا هو إنك يكون عندك رضا

أنا عارفة أنا خرجت كتير عن الموضوع :)بس عموما مبروك علشان مصر دي برضه حاجة تفرح

تحياتي يا محمد

إبـراهيم ... معـايــا يقول...

فعلاً يا محمد !! تخيل قدر الاغتراب لما يكون السبب (الوجيه) لتجميع كل فئات الشعب وطوائفه على فرحــة مختلسـة هيا الكورة !!!!، تبقى مضطر تقول ألف مبروك لمصر !!، بس مش حاسس بيها بأمانة !!!
.
.
مش عاوز أبان كئيب ! ، لأني قررت أبطل كلام عن الموضوع ده
.
.
مممممممممممممممم
إيه ممكن يجمع الناس ع الفرح غير ده، الحقيقة مفيش ، ممكن أسباب أخرى شخصية !! فردية، لكن جمعية!، لم يعد لدينا هدف قومي أصلاً
تحيااااتي

إبـراهيم ... معـايــا يقول...

حلوة محاولات نيران على فكـرة لأسباب تبدو وجيهة للسعادة

oceaneyes يقول...

سؤالك حلو

بس للأسف الشديد ..مافيش فعلا حاجة فى البلد دى تفرح الشعب كله غير كرة القدم

!!!

يمكن فى حاجات تانية كتيرة بس بتخص اشخاص معينين ..او اهتمامات معينة ..

زى مثلا فرحة القراء بمعرض الكتاب ,,واهتمام الدولة بإنشاء المعرض اصلا


مش عارفة دى خيبة ولا لا الصراحة



:S


بس اللى اعرفه انى بحب مصر ...وفرحت برده وقت ما مصر فازت بالكاس


مش بإيدى ..بس ده احساس اى مصرى ...واكيد انت كمان فرحت بكدة

ولا ايه ؟؟؟؟

حدوتة مصرية--ياسر شمس الدين يقول...

يا محمد
الحمد لله ان فيه اى حاجة لسة كويسة فى البلد اى حاجة مش مهم هى ايه المهم ان فيها حاجة كويسة
وعلى فكرة لو تابعت خلال البطولة وبعد البطولة الاسعار ولعت كان الحكومة بتضربنا على افانا لا مواخذه يعنى لقيت الشعب ده بيفرح وكمان بتفرج على كورة
انا حاسس ان الناس ديه قاصدين انهم يبهدلونا

ملكة يقول...

مفيش
أنا مع كل اللي أجمعوا على إن الأسباب الوجيهة اللي تفرح انقرضت

بس لو من وجهة نظر تانية
مختلفة نوعاً
ممكن من الأسباب تكون

اسكندرية

النيل الصبح ومش هتحبه إلا هنا حتى لو مليون بلد تانية عندها زيه

وسط البلد كحياة مش مجرد مكان

ضحكتك لما تبص على يافطة موالسة
أو ضحكتك برضو لو سمعت 10 دقايق من خطاب أي حد من الموالسين/المسؤولين

و أخيراً
محمد منير!

أما الكورة وابو تريكة والبتنجان ده فاحنا لامؤاخذة كنا بنهلل وقت ما اخدوا الكاس بدافع "والنبي ألاقيش عندكوا فرحة صغننة اسد بيها ريقي الناشف؟"
وبعدها نلعن في أبو الكورة وأبو البلد وأبو الملايين اللي بيهبروها اللعيبة اللي كنا بنشوف الناس بتبوس صورهم!! وأبو حسن شحاتة وأبو الكاس وأبو وزارة الرياضة اللي اتعمت عن كل حاجة إلا الكورة وابو الحكومة اللي غلت الاسعار 200% في خلال ال5 شهور الأخيرة وبتلهينا زي عيال صغيرين بالكورة وأبو زحمة الشوارع عشان الكورة وأبو الأمن المركزي اللي مشفناش منهم واحد وقت ماكانوا الناس بالالاف في الشارع ويوم ما يبقى فيه 50 واحد بيقولوا مش لاقيين ناكل يحوطوا كل واحد فيهم ب100 عسكري ويسحلوهم وأبو أحمد عز اللي غلى الحديد ومش عارفين نتجوز بسببه وأبو اللي سايبينه يعمل فينا كدة وأبو اللي سابوا العبارة وال1000 اللي ماتوا من سنتين وراحوا يدفعوا بالروح وبالدم تذكرة الاستاد عشان يشجعوا الكورة

دي بقى أسباب وجيهة جدا لسب الدين للحكومة وللبلد!!

عقبال 2010 يا مصريين
تكونوا بتشحتوا وقتها
بس بتدوروا على تمن كرسي ع القهوة عشان تشجعوا المنتخب!!

بيقولوا سايكو يقول...

مش عارفة و الله إاللى ممكن يفرح المصريين غير الكورة أو حاجات مستحيلة الحدوث ... لكن على المستوى الشخصى فى ألف حاجة و حاجة ممكن تفرح .. صحيح مش حاجات دايمة بس مين اللى قال إن فيه أى حاجة بتدوم

shady يقول...

أسباب الفرح الوجيهة عديدة .. الجديد أن تجد سببا يجمع الكل تحت راية واحدة .. بمعني .. كل منا بالتاكيد لديه ما يفرح له ولكن الجيد أن تجد كل من حولك تجمعهم الفرحة بشئ واحد وهوا ما يغيب عنا لفترات طويلة للأسف .. النتصارات نادرة جدا علي مستوي الجماعة .. والهزائم ملها الجميع .. الفرح لمباراة كرة القدم رغم اننا نتمني فرحة أخري تجمع الكل تحت راية واحدة ولكنه منحنا لحظة جميلة ستعين البعض علي تحمل هزائم أخري تحدث في نفس الوقت

( ايه الكلام الكبير دا )

غير معرف يقول...

~..........................................