الأحد، أبريل 06، 2008

انطباعات



دى صور ايه؟؟ قليل اللى يعرف و ناس معينة
دى صور ماكيت يعنى مجسم كده بيوضح كتلة و ده بيعمله طلبة عمارة عشان تجسد مبانيهم

مشكلة الماكيت عموما بالنسبة ليا هى مشكلة واحدة بس و هى انى انزل الشارع بيه ازاى و اروح الكلية هو مش حجمه كبير ده مثلا كان حجمه صغير 20 *30 سم تقريبا المشكلة انا لازم يتمسك كويس و ميتبهدلش عشان ميبوظش فمقدرش مثلا احطه فى شنطة لاحسن يقع منه حاجة فبكون مجبر انزل بيه كده مش متغطى وهنا تبدأ المغامرة
اللى بتتشابه كل مر مع اختلاف الماكيت فمثلا المرة دى

اول ما نزلت من البيت و شايله فى ايدى كده و محرص عليه اول ما خرجت من العمارة و لسه فى شارعنا لقيت شوية عيال بيقولوا ايه الصواريخ اللى معاك دىو انا عامل اطرش و ماشى و ولد تانى بيقولى هات واحدة طيب و اجيبلك بكرة نص جنيه
و كملت و قلت اركب تاكسى بدل المواصلات هتبقى بهدلة و كلام اكتر خاصة طول ما انا ماشى فى الشارع كل بيبص بعجب فلو معلقش هيبص بس و فى سره هيقول ايه ده
ركبت التاكسى و حاطط الماكيت على رجلى كده بعناية و قاعد جنب السواق اللى مقالش حاجة طول الطريق الا انه كان عمال يبص كده على الماكيت ومستغرب جدا و انا سبته ما دام مسألش
بس فى مرة كان فى سواق تانى قعد يسأل بقى و رغى

طبعا انا خلاص بقيت متعود انزل عامل اطرش عن كل الناس و عادى جدا هو الماكيت ده عيب مثلا؟؟

هناك 9 تعليقات:

بيقولوا سايكو يقول...

مش قادرة غير إنى أقول .. نياهاهاهاهاهاهاهاهاهاهاهاها

و إن دى ضريبة القسم ياباشمهندس .. أنا أصلا مهما شلت لازم الناس تبص لى سواء بقى كان ماكيت أو ناصيبيان .. الله لا يعيد أيام الناصيبيان كان أكبر منى أساسا و مش باعرف أمشى بيه و الناس كلها تتفرج على و العيال بيمشوا ورايا و أسمعهم عمالين يقولوا الله دى رسمها حلو أوى .. آه لو يعرفوا درجتى كانت كام :)

ده انا حتى لما باشيل لوَح ملفوفة و حطاها فى الكيس الطويل ده الناس برضه بتبصلى .. دى حاجة غم

A.SAMIR يقول...

اصل الحشرية صفة اصيلة وسائدة في الشعب المصري
دة الواحد وهو ماشي في الشارع بيتكلم في التليفون بيحس ان في حد هييجي جانبه ويقول له
انت بتكلم مين؟
تحياتي واحتراماتي

زهرة الياسمين يقول...

ههههههههههههههههههههههههههههه
و الله زمان
فكرتنى أيام ما كنت فى الكلية يا محمد بس مع الفارق إنى كنت فى أسنان و كنت كل ما اشيل الشنطة اللى فيها الأدوات اسمع تعليقات ايه
شويه يقولوا انتى رايحه تصطادى و شويه ستات يوقفونى و يسألونى هو فيه تطعيم !!!
بس عادى يعنى دى ضريبة النجاح

إيما يقول...

عارف يا محمد أنا باحب جدا شكل طلبة هندسة وهما دايما شايلين في إيديهم أدوات أو ماكيتات أو المساطر الكبيرة بتاعتكوا دي :) باحس بالإبداع مش زي عندنا كدة
بس التطفل أكيد مزعج طبعا
المهم تبقي ماشي مبسوط وأنت شايلها كدة وتحس إنك عملت حاجة مختلفة...بعيدا عن رأي الدكاترة يعني عشان أنا عارفة مفيش حاجة بتعجبهم أبدا
:)
تحياتي

محمد ياسر يقول...

بيقولوا سايكو
اه فكرتينى لما كنا بشيل الشاسيهات من عندكم فنون لحد اكلية عندنا حاجة اخر بهدلة
و بلاش موضوع الدرجات ده كلنا كده الناس تقول حلو اوى عكس الدكاترةطبعا

احمد سمير
فعلا صفة متأصلة فى كل مصرى للاسف
و تحياتى ليك

زهرة الياسمين
دى ضريبة العلم لكن النجاح ده حسب الظروف انا ممكن اجيب واحد من عشرة مثلا حسب الدكتور و رأيه بس ربنا بيستر يعنى
و منورانى

ايما
اه انا فى الاخر ببقى مبسوط بس بروح اتنكد بقى من الدكاترة زى ما بتقولى كده
ربنا يخليهم لنا

بيقولوا سايكو يقول...

كنت من يومين فى الشارع علشان بنطبع حاجات .. و صاحبتى مش زينا شايلة لوَح لكنها شايلة رول اللى بيبقى 130 .. و طبعا ماشية بيه زى عمود السوارى قام واحد وقفها و قالها " إيه اللى انتى شايلاه ده " .. قالتله و انت مالك .. قالها "مالى ازاى مش عاملة زحمة فى الشارع" ... فضول فضول ساعتها افتكرت البوست بتاعك :)

سوكــا يقول...

ههههههههههههههه
لا انا كنت باحب ايام الساشيه
عالاقل كانت هي شنطة الشاسيه بس

دلوقتي الواحد يضرب شنطة اللاب واللوح والشفافات والمسطرة المتر عشرين ولو في ستادي موديل ولا ماكيت

بجد انا باصعب عليااااااا اوووووي


بس الصراحة مكدبش عليك اه الناس بتبصلي بصة ايه العبيطة اللي نزلة بكل ده بس برضه باصعب عليهم ولو كنت راكبة مشروع مش تاكسي تلاقي كل الناس توسعلي واللي يخد مني واللي يشيل مني

لا بيبقي شكلي شيك شيك

غير معرف يقول...

~..........................................

وداد الاوجلي يقول...

فكرت المشروع ايه