الأحد، يونيو 08، 2008

الفترة الجاية هغيب عن المدونة و ده اللى مكنتش عملته قبل كده تماما من ساعة ما بدأت تدوين لكن دلوقتى غصب عنى لان هتبدأ فترة تبييض (هشرحها كمان شوية) مشروع التخرج وده هيخلينى لا ادخل نت ولا اعمل اى حاجة فى الحياه غير المشروع حتى ان اشوف اهلى هيبقى صعب
و لانى فى قسم عمارة فمشروع التخرج مختلف عن اى اقسام هندسية تانية بتاخد مشروع التخرج و شغلنا فى جهد اكبر و كل طالب بيبقى ليه مشروع تخرجه لوحده مش زى الاقسام التانية بيبقوا مجموعات
و مشروع تخرجى هو مطار اقليمي
اما عن الفترة القادمة وهى فترة تبييض المشروع يعنى ان بعد ما قعدنا نسلم اسكتشات طول الوقت للدكاترة بالتصميم اللى كل واحد عامله لمطاره بنوصل لمعاد معين يبدأ فيه تبييض المشروع يعنى اعادة رسم المشروع كامل باظهار حلو حسب ما تعرف بقى رصاص حبر الوان براحتك و المشروع ده بيتم على من 4 الى 6 شاسيهات و الشاسيه الواحد معناه لوحة للرسم مقاسها 120سم *80 سم على كل دول بقى على كل دول بقى هعمل مشروعى مطارى
و المشروع هيتسلم 5/7 يعنى حوالى شهر او اقل هما اللى هغيبهم و ارجعلكوا تانى
اه و عشان تعرفوا برضه التبييض ده بيتم فى الكلية و بيتم بانك كل يوم تروح الكلية من الصبح الساعة 8 كده و تروح مش قبل 12 بليل يعنى طول اليوم شغال و يا دوب تروح تنام كام ساعة عشان تصحى ترجع للمشروع ده اذا مطبقتش فى معظم الايام اصلا و عشان كده بقى مفيش اى وقت لاى حاجة عرفتوا بقى
ادعولى بقى فى مشروعى
و اشوفكم على خير

هناك 13 تعليقًا:

ياسر خاطر يقول...

ماتنساش
كل يوم من قبل الساعة 8 ونص او من بعد الساعة 2
ليه
عشان في امتحاناتدة غير اني سمعت سمع خير ان هايجيبو هدية لكل واحد حبل مشنقة يتحط جنب الشاسيهات في العرض النهائي
عشان لو حصل حاجة يتكل على الله وينجز

enjy يقول...

ربنا معاك ان شاء الله وترجع منتصر وحالتك النفسية زى الفل......... ركز انت بس وانا هاخدلك بالى من عالم التدوين لغاية ما ترجع ربنا معاك

Om LMriala Ko7ly.. يقول...

ربنا يعينك و يقوييييييك
إمتياز إنشاءالله

The Alien يقول...

شد حيلك عشان نحضر حفلت منير مع بعض

أتمنالك التوفيق
تحياتي

نوبية جدا يقول...

ربنا معاك ان شاء الله
بس غريبة انكم لسا بتشتغلوا مانيول
عندنا مشاريع التخرج بالكومبيوتر
حتى من سنة تانية كانت المشاريع بالكومبيوتر
انت فى جامعة ايه ؟؟؟؟؟
لكن اعتقد المانيول أحسن
بيكون الطالب معمارى حقيقى

محمد ياسر يقول...

ياسر
هما لو يحطو الحبل من دلوقتى و يشنقونا يبقى ارحم
و اشوفك قريب يا زميل المذابح المعمارية

انجى
ربنا يستر و ابقى قوليلى الاخبار اه يا ريت
و ربنا يخليكى

ام المريلة الكحلى
ربنا يخليكى و انتى كمان تجيبى امتياز فى تخرجك ان شاء الله

الين
بيشو العزيز
اهو ربنا يسهل و ان شاء الله نحضرها مع بعض

نوبية جدا
يا رب
و عن المانيول و الكمبيوتر هو كل واحد حر يرسم براحته بس يكونوا عارفين من الاول يعنى عشان يعرفوا دى قدراته فعلا ولا لا وعشان الدكتور بتاعنا بيميل للمانول اكتر و للعلم احنا 14 طالب بس تقريبا 3 هما اللى هيكونوا كمبيوتر بس
و الجامعة هى هندسة طيران فى مطار امبابة اسمها كده اه لكن درسنا العمارة الطبيعية وفى الاخر تخرجنا اهو مطار

تحياتى و الى لقاء لا اعلم متى

إيما يقول...

ربنا معاك يا محمد وتخلص مشروعك علي خير باذن الله وعايزين امتياز ان شاء الله

ترجع مدونتك بالسلامة
:)

emo يقول...

ربنا معاك ديما ويوفقك يا محمد
وتنور المدونة من تانى

عطشان يقول...

يا عم انت حتستعبط كل دا علشان كام يوم حتشتغل فيهم زى الرجالة
من انت كنت مقضيها بالطول و العرض
!افضحك :d
على العموم ابقى اعمل زى ما قولتلك تشحن كارت ب 100 او 200 علشان تبقى تتطمن على كل شوية و ماتخفش حبقى احكيلك اللى حصل فى حفلة بلاك تيما و إسكندريلا :p

ساسوا يقول...

ربنا معاك امتياز انشاء الله

بيقولوا سايكو يقول...

محمد .. قلبى معاكوا .. أنا حقيقة حقيقة مش عارفة ازاى الكلية لغاية مشروع التخرج بتعذبكوا و بتقولكوا ارسموا بإيدكوا .. هتقولى بيطلع الشغل حلو وكلمتين دول .. بس برضه لما تيجوا تشتغلوا برة مش هتشتغلوا بإيدكوا أمال الكمبيوترات بتعمل إيه .. أنا باكره كليتكوا ..و انتوا قسم عمارة الوحيد اللى بيحسسنىن كليتنا جنة .. يارب تخلصوا منها على خير

Ihab Omar يقول...

تروح و ترجع بالسلامة يا محمد و باذن الله تعالي مشروعك ياخد اول مشروع

افلام اون لاين يقول...

مشكوووووووووووووووووووووووووور