الأحد، يوليو 13، 2008

باب الشمس

باب الشمس هى رواية الياس خورى و فيلم المخرج المصرى يسري نصر الله
اتمنيت اشوف الفيلم ده من ساعة ما نزل سينما و اتشال و مشفتوش و كنت عاوز اشوفه باى طريقة لحد ما اخيرا بقى عندى و شفته زى ما اتمنيت املك الرواية اللى تعدى ال500 صفحة وتمنها 50 جنيه ولانى مبشتريش كتاب باكتر من 20 جنيه لاسباب غير الفلوس ان امى كل ما اجيب كتاب تقولى كلام كتير كأن حرام ادفع فيه ما بالك 50 جنيه بقى
بس ان شاء الله لازم اجيبه بعد الفيلم اللى حمسنى اكتر لكده لان الرواية اكيد هيبقى فيها اكترو اجمل من كده بس يا رب اجيبها قريب بقى

الفيلم طبعا عن فلسطين و طبعا مش هقول اى قصة ولا حكاية عشان تشوفوه او تقروا الرواية بس التمثيل بجد خرافى خاصة الشيخ الاعمى ابو يونس و حبيت نهيلة زوجة يونس رائعة و حبيت الدكتور اللى كان قاعد مع يونس برضه
بجد فيلم مش عادى تخيل لما يبقى باسم سمرة اللى هو احسن واحد بيمثل فى مصر يبقى من اقل الممثلين تمثيلا و دور
و اخراج يسرى نصر الله مفيش كلام يتقال عليه
و موسيقى تامر كروان كانت مفاجأة انى الاقيه هو اللى عامل المزيكا و الاغنية يبكى و يضحك اللى غنتها فيروز العظيمة المرة دى لحن تانى مع مطرب تانى و لحن قوى جدا من تامر كروان

بجد شكرا للفيلم و اللى عملوه ... فيلم يبقى فى الذاكرة
و شكرا للصديق العزيز بشرى مش هنسى برضه ان هو اللى اهدانى الفيلم ده

هناك 17 تعليقًا:

The Alien يقول...

أنا كمان دورت عليه كتير وشفته مرة علي قناة فضائية
الفيلم فعلا رائع
كل حاجة فيه حلوة .. القصة السيناريو التمثيل الصوت الصورة والإخراج .. عمل فعلا متكامل

تحياتي

ياسر خاطر يقول...

يعني الحمد لله انت شوفت الفيلم
اعتقد بقى نبعت الاسطوانة
والا هاعلن الحرب على شارع ترسا كله

ملكة يقول...

nice :)
استغلك انا بقى واقولك ان عندي الجزء الاول منه بس وعايزة التاني لو عندك
ولك الاجر والثواب عند الله ويارب تنجح ويوفقك ببنت الحلال قااااااااادر ياكريم :))

محمد ياسر يقول...

الين
فعلا يا بيشو الفيلم ده بحبه جدا مش هنساه ولا همسحه حتى

ياسر
جايالك ان شاء الله

ملكة
منورة المدونة اولا
:)ثانيا امين يا رب
ثالثا انتى تأمرى هو عندى و ان شاء الله اجيبهولك

عطشان يقول...

يعنى انا اجيبلك الفيلم بعد ما كنت حتبوس إيدى و بعدين تكتبلى شكراً للعزيز بشرى اللى اهدانى الفيلم ...هوانا اللى اديتك الفيلم يا بنى آدم ولا بشرى !

تصددق انا نفسى فعلاً السيديهات تتحرق علشان تبقى تشوف بشرى حيعمل ايه :p
يا رب السيديهات تتحرق :p

محمد ياسر يقول...

ايه يا عم انت
انت الموصلاتى بس مش اكتر و نشكر عم محمد الموصلاتى للسى دى من بشرى ليا

اديك اعترفت و دعيت تتحرق لانها ملك بشرى يبقى انت مالك

و ان شاء الله دعوتك مش مستجابة

محمد صبحى يقول...

هههههههههههههه

التعليق لمحمدمصطفى


ده أولا


ثانيا بقى يامعلم

بخصوص الرواية أنامستعد نشتريها شرك

ايه رأيك؟

:))))))))))))


الفيلم أنا مش هاتكلم عليه لإن مافيش كلام هايوفيه حقه

enjy يقول...

يا الف نهار ابيض يا الف نهار مبروك اخيرا خلصت المشروع عودا حميدا خلاص بقى عايزاك تتحفنى ماشى؟؟؟؟؟

عطشان يقول...

على فكرة بقى السيديهات كانت عندى بس ماكنتش فاكر هى فين بالظبط علشان كدا قلفت عليك انى قافش مع بشرى و السيديهات عنده :))

بس و حياة منير لو شفت حاجة تانى :p

بيقولوا سايكو يقول...

أنا شفت الفيلم من فترة لما جه على الـart الجزء الأول منه بس و عجبنى بطريقة غبية .. صحيح مش فاكرة عنه حاجة حاليا بس ناوية إن شاء الله أشوفه تانى ماحنا سجلناه .. عقبال الجزء التانى

بالنسبة للرواية فأنا ماشتريهاش طبعا مش لمبدأ الـ50 جنيه اللى مامتى بتقولى زى مامتك .. بس لو جبتها أكيد أمة لا إله لا الله هتستلفها منى و تبقى ما تسواش 50 قرش

محمد ياسر يقول...

محمد صبحى
فعلا مفيش كلام يوفى حق الفيلم
و حلوة فرة نشترك فيه ممكن برضه
نتكلم فيها لما اقابلك

انجى
الله يبارك فيكى
بس اتحفك بايه بالظبط؟

عطشان
ايوه كانت عندك بس جايبها منين؟ واخدها من مين و عشان تروح لمين؟
واخد بالك انت
يا ريت بشرى كان هنا كان ظبطك هو كمان و نبقى خلصنا احنا الاتنين عليك

بيقولوا سايكو
ان شاء الله يجى قريب وتشوفيه
و لو جبتها مش هديها لحدعشان كده و من غير زعل حد

تحياتى

عطشان يقول...

انا قافشها من درج السيديهات عينى عينك قدامه و واخدها علشان اشوفها مش علشانك وقتى كدا فى وشك :p
مش حقول حاجة على بشرى علشان هو مانطقش معايا إنما انت تعرف تظبطنى
يا ابنى البلد دى كلها محدش يعرف ياكل معايا

محمد ياسر يقول...

يا ابنى ما طبيعي هتاخدها منه تشوفها الاول يعنى مش هتشوفها مثلا

و بعدين السيديهات دى مش هترجعلك انت تانى خلاص

Davinci يقول...

ماشفتش لبفيلم للاسف.. وطبعا - كا تتوقع - أنا أنتظر دوري بأدب لاستعارته منك.. وربنا يخليك للغلابة!

Hassan يقول...

محمد باشا مش عارف من ساعة البوست لحد النهاردة قريت الرواية ولا لسه ... لو تحب تقراها وتوفر ده لينك لنسخة PDF للرواية

http://www.4shared.com/file/48820108/7fd5f1e0/__online.html

محمد ياسر يقول...

دافنشى
انت تأمر خلينا نشوفك بس و هجيبهولك

حسن
مش عارف اشكرك ازاى
انا لسه مشتريتش الرواية فعلا و الف شكر لكن لو بقى معايا فلوس زيادة هشتريها برضه لان للورق طعم تانى
بس هقراها من البي دي اف دلوقتى بجد الف شكر

غير معرف يقول...

~..........................................