الجمعة، سبتمبر 05، 2008

مودي وحسين الأمام.


بقالى فترة عايز اكتب البوست ده و كل شوية حاجة تعطلنى المرة دى خلاص بقى هكتب
فى التمانينات ظهرت فرقة اسمها طيبة الفرقة كانت مكونة من مودى و حسين الامام و عازف الدرامز ليهم وقتها كان احمد عز اللى هو بتاع الحديد دلوقتى !! تقدر تقول ان نوع مزيكتهم روك و ده مش موجود اصلا كتير فى مصر و عملوا حوالى 3 البومات بس لكن كانوا بيعملوا مزيكا حلوة بجد و كلام بسيط اوى لكن معبر و بيحكى حواديت

الاغنية دى اسمها و ماله و غنوها فى احدى حفلات راس السنة فى التمانينات و لان الفيديو ممتاز و هو الوحيد تقريبا اللى ممكن تلاقيه فلازم احطه و الاغنية نفسها المزيكا اللى كانوا عاملينها سابقة التمانينات بكتير و حلوة اوى و الكلمات للشاعر عصام عبد الله بسيطة لكن صادقة و جميلة جدا وشوفوا ادائهم مع بعض جميل

وهتتعدل مهما تطول عمر ما شئ يثبت على حاله و ماله و ماله يا سيدى و ماله عمر ما شئ يثبت على حاله مهما عملوا و مهما قالوا

هاخدكم جولة سريعة كده لاكتر اغانى حبيتها ليهم
اغنية ودعي المكان اغنية هادية رومانسية كلمات عصام عبد الله و اداء و لحن متميز منهم كالعادة
دورى بعنيكى فى كل حتة.. المسكى كل الحاجات.. حسسى على الذكريات .. رتبيها لخبطيها كسريها او خديها و انتى ماشية ودعينى ودعيها ودعي المكان

عودة للمزيكا السريعة فى اغنية ازاى الصحة
فى حوار جميل مع الدنيا يشكرها لما تحلو و يشكيها لما بتقلب فجأة و يسألها ليه
اسمعوا الاغنية نفسها مش هكتب الكلام

اغنية المجهول كلمات عصام عبد الله و تحمل معانى صعبة جدا و كلمات صعبة تترجم لفهم مباشر تحس انها المجهول فعلا و عشان كده بحبها و مزيكتها روعة بحبها جدا ابدعوا فيها مزيكا و اداء
ستار الليل بيداري ميلاد بعيد مجروح و طير الاغتراب يدور بلا مدلول رغم الهدوء الدافي و العزف على الاوتار و الورود و الالوان الاصل فى الاسرار ............ اسمعوها

اغنية الدنيا صغيرة و وداع حبيبته لانه مسافر بس بيقولها
و هنتقابل من غير معاد دى الدنيا صغيرة
افتكرينى خدى عنوانى يمكن نتقابل من تانى ممكن نتصاحب فى الجوابات و هنتقابل من غير معاد دى الدنيا صغيرة

و من البوم انياب
هى اغانى فيلم انياب و المفاجأة ان التعاون كان بين مودى وحسين الامام و على الحجار و احمد عدوية وكلمات كل الاغانى عصام عبد الله برضه الله يرحمه
اسمعوا جهرشة
الدنيا دى يا صاحبي يا بمبي يا اسودا لو حظك مش مصاحبك انا ذنبي ايه فى دااا

اسمعوا كل شئ يشبه لبعض
اداءهم كلهم كل واحد بيقول مقطع


لتحميل الالبومات التلاتة
http://www.mawaly.com/music/egypt/tibba_band/albums/wemalo/
http://www.mawaly.com/music/egypt/tibba_band/albums/eldonya_soghaera/
http://www.mawaly.com/music/egypt/tibba_band/albums/film_anyab/

فى الالبوم بقى رابع ليهم كان عامل صدى حلو وقتها برضه و كان اسمه فطومة اللى يجيبه يبقى جدع

هناك 5 تعليقات:

YOTTA يقول...

كنت باتجول مره ف النت واتكعبلت ف غنوة ليهم كلامها بيقول - مش عايز اسمع اغانى او حاجة شبه كده- وكنت سامعة وماله قبل كده
وقلت هانزل باقى الاغانى بس معرفش نسيت ولا كسلت ولا ايه
بس عجبتنى اوى الكلمات بتاعتهم خصوصا ودعى المكان
عموما شكرا انك فكرتنى.. اول ماافضى هانزلهم غالبا

محمد ياسر يقول...

يوتا
كويس هما منتشروش كتير للاسف و مش موجود اغانيهم فى حتت كتير
بس كويس انها عجبتك
و منورانى

غير معرف يقول...

~..........................................

MAHMOUD يقول...

البوم فطومة هنا اهو

http://7asryat.org/vb/showthread.php/3559-%D9%85%D9%88%D8%AF%D9%89-%D9%88-%D8%AD%D8%B3%D9%8A%D9%86-%D8%A7%D9%84%D8%A7%D9%85%D8%A7%D9%85-%D9%81%D8%B7%D9%88%D9%85%D8%A9-Cover?highlight=%CD%D3%ED%E4+%E3%E6%CF%EC+%C7%E1%C7%E3%C7%E3


و دى صورة الغلاف

http://i222.photobucket.com/albums/dd17/Faridakasseb/last/Fatoma.jpg

و فى كمان ده

http://7asryat.org/vb/showthread.php/3463-%D8%AD%D8%B3%D9%8A%D9%86-%D9%88-%D9%85%D9%88%D8%AF%D9%89-%D8%A7%D9%84%D8%A7%D9%85%D8%A7%D9%85-%D9%84%D9%8A%D9%87-%D8%AA%D8%B4%D8%BA%D9%84-%D8%A8%D8%A7%D9%84%D9%83-Cover?highlight=%CD%D3%ED%E4+%E3%E6%CF%EC+%C7%E1%C7%E3%C7%E3

و دى صورة غلافة

http://i222.photobucket.com/albums/dd17/Faridakasseb/last/Mody.jpg

قلم جاف يقول...

فكرتني بالفريق الرائع دة.. وفكرتني بـ"مودي الإمام" اللي كان زعلان جداً على ضياع معظم نسخ أغاني "طيبة" إلا اللي موجودين على النت .. ما كانش حد متوقع إن الفريق دة حيعاد اكتشافه مرة تانية بعد كل السنين اللي فاتت ، وحيرد كمان اعتباره زي ما بيرد اعتبار ناس كتيرة موهوبة غنت في فترة التمانينات ..

عندي بس توضيح واحد بالنسبة لفيلم "أنياب"..

كل أغاني الفيلم تأليف "عصام عبد الله" باستثناء أغنية واحدة بس هي أغنية "يا لهو بالي" اللي بيعتبرها "عدوية" نفسه من كلاسيكياته ، ودي من كلمات "حسن أبو عتمان" وألحان "محمد عصفور" وإن كان التوزيع طبعاً للأخوين "مودي" و "حسين الإمام".. واللي عملوا حاجات عملها الموزعين بعد كدة .. الفريق دة كان سابق عصره في حاجات كتير ، في التنفيذ الموسيقي كمان مش بس في لغته الغنائية..