الأحد، سبتمبر 28، 2008

و ما زالت مصر بتتقدم بينا و من حريق لحريق و من كارثة لكارثة

من 3 سنين اتحرق مسرح بني سويف و كانت كارثة ادينا السنة دى فى تقدم اكبر من حوالى شهر اتحرق مبنى مجلس الشورى و امبارح اتحرق المسرح القومي فى العتبة و من صدمة لصدمة لما خلاص تعبت و الناس كلها تعبت و مفيش فايدة مصر بتتقدم بينا و من حريق لحريق و الدور الجاي على ايه يتحرق مش عارف بس الاكيد اعصاب الناس بتتحرق و باستمرار كمان مبتتطفيش دى ولا بتلحق اننا نطفيها و من كام يوم كارثة المقطم اللى مقدرتش انى اعلق و لا اقول حاجة هعمل ايه يعنى اهى كل الكوارث بتحصل و احنا بنتفرج و بندعي للناس اللى راحت ضحايا و بندعي على اللى اتسببوا فى الكوارث دى و اللى عليهم المسئولية
كفاية بقى كوارث و حوادث و حرايق و مصايب
يا رب الطف بينا و احمينا
اللهم انك عفو تحب العفو فاعفو عنا

هناك 6 تعليقات:

Geddo Iskandar يقول...

أنا نزلت إشتريت طفاية إمبارح ... إحتياطي !!!

إيما يقول...

والله أعلم المرة الجاية ايه اللي هيتحرق !!

كل سنة وأنت طيب يا محمد :) ..عيد سعيد عليك وعلي أسرتك وكل أحبابك يا رب

محمد ياسر يقول...

جدو اسكندر
اه يمكن يتحرقلنا حاجة و احنا مش داريين
كل واحد احتياطي يجيب طفاية
ربنا يستر علينا و منور المدونة

ايما
ربنا يستر يا ايما و ميبقاش فى حرايق تانى
وانتى طيبة و بخير و عيد سعيد عليكي و على اسرتك انتى كمان
منوراني دايما

hodhoda يقول...

تجربه حريق بنى سويف انا عشتها بكل قسوتها والالم الى نتج عنها عشان مات فيها بنوته زميلتى والمخرج بتاعنا والى سمع غير الى شاف والى حكوه زمايلنا عن الفوضى والاهمال الى اتسببت فى كده يحرق دم واعصاب اى حد عامه ربنا يرحم الجميع وربنا يستر على الى جاى

محمد ياسر يقول...

هدهده
ربنا يصبر اهلهم و ربنا معانا و ان شاء الله متحصلش كوارث تانى
طبعا انا بمني نفسي الاماني مش اكتر

7okaaa يقول...

أنت بتعترض على قضاء الله وقدره
وكمان شايفك بتلمح كده وبتخبط فى الحكومه
أنت شيوعى ولا أخوان أنا شاكك فيك
لأ الحكومة ذى الفل وكله تمام واضح اٍن العيب فى النار والماس الكهربى
وعلى العموم دلوقتى بيتباع طفايه محموله تحت شعار الطفايه فى يد الجميع
عشان الواحد يطفى النار اٍلى جواه وميحصلوش حاجه
وربنا يصبرنا
ملحوظه"لو حد ليه حد فى امبابه يلحق يهربه فى اخبار انها هتولع قريب واكيد السبب معروف مسبقا ماس كهربى"