الأحد، أكتوبر 05، 2008

موقف

كنت مستعد امبارح ليوم جميل بحفلة بلاك تيما و قد كان و فى اخره قابلت انا و اوسو صاحبي مدونة عطشان، شاب ظريف اتكلم معانا و كلمناه بتلقائية من غير ما نعرف بعض و كان ماشى بعصاية و بيتسند لانه عامل حادثة فى رجله كبيرة و بعدين كنا خارجين و خدناه يخرج معانا من المكان و صعب علينا الصراحة من اللى هو فيه مع ان هو كان عادى بيضحك و يهزر وقولنا هنوصله لحد ما نسيبه مع حد او يروح و نمشى و ده لان مورناش حاجة و لانه شخصية ظريفة يستاهل نقعد معاه و نعرفه و لان اكيد بجد صعبان علينا قبل اى حاجة
رحنا قعدنا معاه على قهوة كان مستنى واحد صاحبه و قعدنا نتكلم و عادى جدا فل الفل لحد ما جه صاحب ليه و مشينا و بعد ما سيبناه لقيت اوسو كانوا اتكلموا مع بعض لوحدهم و انا مسمعتش فبيقولي بعدها بقى
ان الشاب ده طلع بهائي و عيلته كلها كده كانت مفاجأة طبعا و معرفتش اقول ايه و هل نقاطعه ولا نكلمه تانى ولا ايه الموقف ؟ خاصة انى طبعا مش معترف باى حاجة مسماه بالبهائية و مكنتش اتصور انى اعرف حد منهم ولا هشوفهم فين
المهم ان فى الاخر قررت انى هكلمه عادى و مش هقاطعه و انى عرفته كانسان و مكنتش اعرف ايه ديانته و هفضل اكلمه كانسان و مش هاجى فى نقطة خلافنا عشان اكيد مش هيبقى صح
كون ان ده يحصلي ده كويس عشان يوعيني و ما دام بنعامل بعض كويس و فى احترام متبادل يبقى خلاص مفيش مشاكل
و ربنا يهدى الجميع

هناك 3 تعليقات:

enjy يقول...

مش عارفة بصراحة.......اولا مش متخيلة ان البهائيين دول ناس كدة زينا بيمشوا فى الشوارع وممكن تقابلهم عادى.......لو مكانك اعتقد انى مش هكمل اصله مالوش ديانة خالص

mahmoud يقول...

الي انت وصلتلوا دة عين العقل وانا علي فكرة السنة الي فاتت اول ما دخلت الكلية لقيت دكتور من دكاترة الرياضة الي بيدوني بهائي والكلية كلها عارفة وفعلا لما دورت علي اليوتيوب و جوجل لقيت انو لي لقاءات ومقالات في الموضوع دة وانو من كبار البهائيين في مصر وكنت بتلاقي الطلبة كلهم يعضوا يشتموه في ما بينهم وانا بصراحة كنت بتضايق جدا من الموضوع دة لانه مغلطش فيا ولا في ديني صحيح الاسلام بيقولنا ان دة كدة يبقي كافر لكن برضه قالنا" لكم دينكم ولي دين" و "لا ينهاكم الله عن الذين لم يقاتلوكم في الدين" والمسلمين لما فتحوا بلاد الشرق القصي كان في ديانات كتير غير سماوية زي البوذية واشباهها ومكانش في اضطهاد لاصحاب الديانات دية وبعدين ما في ناس كتير مكتوب في البطاقة مسلم او مسيحي وهو من جواه ملحد فالموضوع موضوع الي فقلب وعقل كل واحد ايه وطالما ما اذانيش بتفكيروا يبقي مش عدوي

محمد ياسر يقول...

انجي
انا عارف احساسك ده بس اهم بقوا موجودين و هو مبقاش صديق يعني برضه هو معرفة فقط و مينفعش نقاطعه هتبقى النتيجة اكثر سلبية
و ربنا يهدي الجميع

محمود
فعلا ما دام محترمني خلاص انا هحترمه و ما دام ما اذانيش بتفكيره ومتعرضش لديني بسوء يبقى اوك و اللى انت قولته هو اللى عين العقل برضه

تحياتي