الثلاثاء، أكتوبر 14، 2008

تجربتي

طول السنين اللى فاتت عايش فى وسط البلد تقريبا هى معظم خروجاتي و قهوة الندوة الثقافية و قهوة التكعيبة و قهوة البورصة هما اكتر 3 قهاوي بقعد فيهم
و طول الفترة دى قابلت ادباء و كتاب و شعراء و عرفت دور نشر و مكتبات و احتكيت بكل دول الى حد ما و عرفتهم كويس و نشرت كمان عمل واحد مع مجموعة شباب و اتمنيت انى انشر ديوان لكن ملقتش الفرصة لسه و ناس تقولي جميل و ناس تقولي وحش و ناس تقولي لسالك شوية و انا بكمل بدماغي و لسه برضه مع الشعرا و الكتاب و الناس اللى بحبهم و حاسس انهم بيحبوني
و بعدين احتكيت بغنا الشوارع و الفرق الموسيقية اللى بتحاول تعمل مزيكا بجد فرق وسط البلد و بلاك تيما و نغم مصري و افتكاسات و فتحى سلامة و كتيييييييير اوي اخرهم ديما و بركة و مايند و عرفت من كل الفرق تقريبا و حضرت للاغلب كمان و اتمنيت ان اكتب حاجة تتغنى من الفرق دى و عبد الهادى قاللي فى حاجات من كلامى تتغنى بس لحد دلوقتى محصلش بس فعلا اغلب اللى بيتغنى مش كله بيبقى كلام عننا فعلا و غنى للشوارع مش غنى بحبك عشان بحبك و بحبك و كله كده و بس
و بعدين عرفت السينما المستقلة و الافلام القصيرة و حضرت عروض افلام كتير منها و تابعت و كنت فى مشروع لفيلم كمان لكن لسه متمش قولوا يا رب و مع ذلك ملقتش الفيلم اللى يحسسني انه مستقل و انه مختلف الا نادرا اوي و مفيش ولا فيلم بيحكي عنا زى ما بيقولوا ولا فيلم لحد دلوقتى حسسنى بكده و نادرا ما تعجبني افلام اذكر مثلا فيلم ايثاكى و فيلم انهاردة 30 نوفمبر
و بعدين تابعت المسرح و حضرت بتاع 5 مسرحيات او اكتر شوية مش كتير يعني الصراحة لكن اهتميت بيها برضه و برضه دخلت مشروع كده مع ناس و لسه متمش قولوا يا رب
كل ده مع دراستي العمارة اللى اتمنى انى احقق شئ معماريا كمعماري و اديني دخلت دراسات عليا عشان اكمل قولوا يا رب اوصل كما اتمنى تحقيق المجالات الاخري المختلفة التى تابعتها دى فى حياتي و انى اشوف نتاج فعلي للى بحاول اعمله
لانى اعترف طبعا و بصدق ان كل دى يمكن محاولات لكن لحد دلوقتى يعتبر معملتش حاجة
قولوا يا رب

هناك 8 تعليقات:

hodhoda يقول...

يارب. ان شاء الله يا محمد تحقق كل الى انت عايزه المهم تعمل لنا باى باى لو طلعت فى التلفزيون

enjy يقول...

يارب.............اكيد تستاهل تحقق احلامك طالما كلها احلام مشروعة

واحد مش فاهم حاجة يقول...

عارف زى ماكون ماشى وراك فى سكتك

خدت الطريق دة خطوة خطوة وبرضوا لسة مش مستقر

مع انك عندك الميزة بانك اختلط مع شعرا
وادباء بطريقة مباشرة


تفتكر دة لان مفيش ولا جنب منهم ريحك

ولا انت حابب تستريح على كل الجوانب دى

بيقولوا سايكو يقول...

والله يا محمد انت تستاهل كل خير .. ويااااارب ياااااااارب يااااااارب كل المشاريع اللى فى بالك تعرف تحققها وتنجح


محمد .. فى البوست اللى فات ... الحب مافيهوش حاجة غلط و .. عقبالنا ;)

prince4ever يقول...

البرنس محمد ياسر
يا رب يا معلم تقدر توصل للي في بالك
بالمناسبه كده فانا امنية حياتي اني اعمل فيلم قصير....انا شفت افلام كتير و قريت كتب اخراج((هوايه كده)) و هموت واعمل فيلم...مع العلم اني عامل سيناريوهات كتير لافلام قصيره في بالي ونفسي احقق واحد منهم
بجد لو عندك سكه دلني
تحياتي

سمكه وحده يقول...

اولا
السلام عليكم ورحمه الله وبركاته
ثانيا تسمحلي اعلق اكيد طبعا هتسمح هو انت بأيدك حاجه منا بعلق اهو هههههه
بالنسبه لانك في حجات نفسك تحصل بس لسه اكيد ان شاء الله كلها هتتحقق بس كله بوقته ويكفي شرف المحاوله يعني كفايه انك بتحاول
ثالثا بقي لما قريت عندك وشوفت كذا بوست ليك عجبني شخصيتك انك مش بس مهندس او مختص في حاجه معينه لاء بتحب مجالات كتير وبتحضر لاماكن كتير وحجات ترقي الانسان وتجعل ليه فكر ويكون انسان بجد احيك وبتمني اكون كده يارب ادعيلي انا كمان احقق حجات كتير
ربنا يكرمك وتحقق كل احلامك يارب
تحياتي
سمكه

محمد ياسر يقول...

هدهدة
طبعا انا اقدر انساكم ده انتو هتبقوا احد اسباب طلوعي بس ادعو بس يتحقق حاجة

انجي
اشكرك و هى احلام مشروعة فعلا مستنية تتحقق بس

واحد مش فاهم حاجة
كويس انك خدت الطريق ده برضه انا بشوف الموضوع كله مرتبط ببعضه الادب بالسينما بالمسرح بالغنا بالعمارة كمان كلهم مرتبطين ببعض

بيقولوا سايكو
ربنا يخليكي يا رب و تحققي انتى كمان كل احلامك
فعلا الحب مفهوش حاجة غلط و اشكرك جدا و عقبالك

برنس فور ايفر
يا رب
و بالنسبة للسكة انت بس ما دام بتشوف برضه افلام كتير كل ما تروح فيلم كده امسك فى اللى شغالين فيه و كلمهم و اعرف خبراتهم و ممكن تدخل حاجات كتير بتعلم و بتعمل افلام
او تاخد سكة مع نفسك بما انك عندك خبرة لوحدك كون مجموعة عمل لو تقدر و اشتغل و اعمل فيلمك و قدمه بعد كده للجهات و هيقبلوه ما دام مواصفاته كويسة

سمكه وحده
اولا وعليكم السلام و رحمة الله
ثانيا حصلت
و ادينا بنحاول و بندعي يتم حاجة
ثالثا اشكرك جدا و ده كلام كبير عليا و ان شاء الله تحققي كل اللى عاوزاه و اكتر يا رب

غير معرف يقول...

~..........................................