الأحد، ديسمبر 28، 2008

2009 داخل الخدمة الوطنية .. هل من مزيد؟

- راس السنة و بداية سنة هجرية ... سنة جديدة اخرى بنعيشها و المرة دى قررت اكتب بوست يكون فى كل اللى عاوز اقوله عن السنين اللى فاتت و عن السنة الجاية دى و الامنيات و الواقعيات المفروضة ....
- قبل كده مكنتش بكتب عن راس السنة (ده فى المرتين اللى فاتوا يعني) او عن السنة الجديدة الا بعد ما تبدأ .. يعني 2007 قولت ان مفيش جديد على مستوى شخصى او مصري او اى حاجة كان عادي جدا
الجملة المفيدة اللى قولتها و اكيد لسه هقولها كل سنة واحنا زى ما احنا ما دام لسه محصلش مننا اللى يغيرنا ويغير الدنيا
- جيت اللى بعدها فى 2008 طبعا بدأت سنة بموقف وحش حتى مرضتش اقوله ساعتها لكن المهم بعدها حضرت حفلة منير و مش فاكر السنة اللى قبلها قضيت راس السنة مع منير برضه ولا لا بس انا بحب ابدأ السنة مع منير على الرغم من ان الناس بتكون فيها بتشرب انواع مختلفة لكن المهم منير و اهو بنحاول نبعد عنهم....
- كانت امنياتي التخرج و الخروج للعمل و اهو اتحقق الجزء الاول فعلا باني اتخرجت و ده كان شئ منتظره جدا لكن للاسف الخروج للعمل فعليا مش هيحصل الا بعد سنة من تقديم الخدمة الوطنية الاجبارية - اللهم لا اعتراض-
- بقالي كده 3 سنين مدون بالتمام لاني بدأت مع بداية يناير 2006 و فى السنين دى ادعي من الادعاء اني اتغيرت او حصلت يعني تغيرات فى حياتي بالتأكيد و للاحسن.. انا بشوفها كده .. 3 سنين عدوا و اهلى ميعرفوش حاجة عن اللى بكتبه هنا .. مع ان حال التدوين اتغير و انا مريت باوله لما كان كله شغال و موضة طالعة و خوف من المدونين و كل الحاجات دي لكن دلوقتي خلاص مبقاش التدوين زي ما هو يمكن فترته خلصت او الفيس بوك خد من حقه ... يعني تغيرات كتير الا اني لسه مستمر لاني محتاجها محتاج اكتب و ادون حتى لو محدش بقى بيتابع كمان
-صحيح في معدل انخفاض تدويني ماشى من سنة لسنة لو بصيت هتلاقيني كتبت 75 فى السنة الاولى و فى التانية 44 و السنة التالتة 38 و ده معناه احتمال اني ابطل قريب و اخلص لكن يمكن ارجع و اكتب برضه الله اعلم .. صحيح دلوقتي فى سبب هيبعدني لكن هرجع و اكتب كل ما احب اعوز اكتب ...
طبعا عدد الزيارات اللى عدى ال70 الف ده عدد خيالي مكنتش اتصوره هو اكيد مش رقم دقيق معبر عن زيارات حقيقية يمكن تصادف ناس تيجي غلط ولا حاجة بس هنا قدر كبير من الناس اعتقد زاروا مكاني المتواضع فاشكرهم جدا كلهم بجد ...
- فى حوار مطول حصل قريب مع الصديق الاقرب اوسو عن موضوع معقد و عاوزني احكم فيه فجأني اني فى الواقعية دبلوماسي و بدي ردود ديموقراطية مبتزعلش حد فى حين اني هنا فى المدونة بقول اراء حازمة اقوى و فاصلة و مكنتش منتبه لده الى حد ما ...و لذلك طلب مني احكم زي ما بحكم فى المدونة و بقول فيها و لما قولتله كانت الواقعية اللى بقولها فى مؤلمة و صعبة الحدوث و ان ممكن فى بعض الامور الدبلوماسية دى هى الحل الافضل عشان منخسرش كتير خاصة اما نكون خسرانين اصلا يعني نحاول نطلع باقل خساير ....
- عدت شهور على التخرج و على حياتي اللى اتنقلت من طالب لمهندس دي حاجة كويسة لكن كوني كنت عايش فى حياه و مع ناس و دلوقتي بقيت عايش لوحدي او يعني مع اللى هشتغل معاهم لما اشتغل و ان الناس دول كنا طول السنين مع بعض و بنقعد مع بعض اكتر ما بنقعد مع اهلنا... كانت دنيا تانية راحت خلاص ده شئ حاسه مؤسف و ادينا بنحاول نتواصل مع بعض بس اكيد زمان حاجة و دلوقتي حاجة ....
- دبلومة الدراسات العليا شئ مهم خاصة كمان اني لو مكنتش دخلتها كنت هنسى الهندسة و اني مهندس اصلا و هي بالحق مفيدة اتمنى النجاح و الاستمرار فيها و اهي كمان هتهون فى سنة 2009 دي.... ومن خلالها تعرفت على ناس جديدة دخلت فى حياتي و ده شئ كويس برضه لاني بحب اعرف كل الناس...
- دكتور عندنا ملوش لازمة اسمه ايه المهم كل ما ناس تقوله ننزل نصلي لان وقت محاضرته بيضيع العصر كله و هو كده كده بيضيع وقت فيصلوا و يجوا يقولهم لا مفيش صلاه و بعدين افتى الفتوى العظيمة ان العلم اهم من الصلاه و ان لما الواحد يقضيها فى العلم و بس كده هيموت شهيد و انه مقتنع انه هيموت شهيد عشان كده و مش مهم بقى صلاه و لا غيره ... حقيقي فرسني...
و عشان مبقاش بقول امثلة لدكتور سئ بس فعندنا دكتور بهاء بكري من اكبر دكاترة العمارة و مش هقول تاريخه الطويل لكن هقول بس انه دايما راجل متأمل و بيبص للقران فى كل حاجة بيعملها حتى انه اشرف على رسايل دكتوراه لم تحدث من قبل و هي رسائل عن العمارة و القران .... هذا من الاساتذة التي تستحق ان تقول بشرف ان هذا استاذي حتى لو تعارضت في اشياء بسيطة معه....
- حصل كمان فى السنة دى حاجة مهمة جدا جدا و هي اني وقعت فى الحب و من اول مرة اشوفها و ده كان يوم تاريخي الا و هو يوم 29/8 و اعتبر ان حياتي تغيرت من ساعتها لاني مبقتش عايش لوحدي و بقى عندي حد فى حياتي يهتم بيا و اهتم بيه لاقصى درجة بل و اعترف حقيقي اني بحس باهتمامها حتى لو بعيدة عني و فى ظروف فانا كل شئ لها و هي كمان كل شئ ليا .. بعترف انها بتهديني ايوه دى اكبر نعمة من ربنا بتمنى تدوم عشان حبها حقيقي و بالتفاصيل بتهتم بيا و بتسألني عن الصلاه و حقيقة لو تعرف اني كنت مقصر قد ايه فى الموضوع ده و ان فى فروض مني ساعات بتفوت او بفوتها بمعنى اصح لاسباب واهية و لكني بحاول الالتزام و مبسوط لانها بتساعدني في ده من غير ما تحس ...
و عشان كده ده تمني اخر بان السنة الجديدة ميفوتش فيها فرض واحد حتى الفجر اللى صعب لكن نحاول باذن الله...
و ليها هي كمان بتمنى اني دايما اقدر اسعدها و ارضيها زي ما هي بتعمل و يا رب دايما نسعد بعض و انا لا انسى جملتها احلى جملة سمعتها فى حياتي و مكنتش اتصورها بجد ربنا يخليكي ليا و مش هقولهالكم ......
- بتمنى ارتبط بيكي رسميا فى اقرب فرصة ممكنة ...
- بتمنى اشتغل طبعا لان ده شئ اساسي عشان الواحد يعيش مش عشان الم فلوس لكن عشان اعيش و عشان ساعتها هقدر احقق الامنية اللي فاتت ... فانا بطبعي و مع كل عام جديد باكد اني باشتغل و بجيب فلوس عشان اعيش الحياه نفسها يعني اشتغل اللى احبه و فلوس عشان اعيش مش اشتغل للفلوس و احوش طول عمري و الحياه تضيع مني...
- جهزت ديواني الاول و شايف انه يستحق النشر اتمنى متكونش نظرة وهمية ...عاوز انشر و اعرف رأيي الناس و يكون الاخير حتى مش مهم ... هاحاول ادور على من يتقبل قراءته و نشره من دور النشر اتمنى..
- معرض الكتاب هو حدث مهم في حياتي كل سنة و لازم بروحه دايما و اقابل اصحاب كتييير هناك و اجيب كل الكتب اللى عاوزها اقعد سنة اقراها لكن تقريبا السنة دى نظرا للظروف دي انا مش هشوف المعرض ده اصلا ..يا رب اعرف...
- فى مشوار منير موضوع استفزني جدا المقصود بيه الحرية فكان بيقول ان الحشيش يبقى بيتباع عادي فى اي حتة و مصرح بيه لان هولندا مثلا فيها كده و دي حرية و كمان هيبقى مكسب للحكومة .. ما علينا بباقي اللى قاله يعني
المهم ده طبعا مع تعارضي و استنكاري الشديد ليه الا انه نبهني لحاجة مفيدة و مكنتش فكرت فيها و هي ان الانسان مينفعش يكون فى حرية مطلقة و ان اللى بينادوا بده فيه ظلم كبير ليهم و ضرر اكبر عشان كده ربنا خلقنا باحكام و محرمات منعملهاش و ان الدين هو مقوم اساسي للانسان فيحطله سقف كده لمصلحته طبعا فالحمد لله...
- طبعا اللى حصل فى غزة من اسوء الاحداث خلال السنة و لا نملك سوى الدعاء لهم و مهما تحملنا من حزن لهم و عليهم و مهما حدثت من مظاهرات لن تفيد و لن تنفع و لا اعرف ما هو ينفع و يحدث تغيير حقيقي لكن من قلبي مقدرش اقول غير اسف يا فلسطين و اقول يا رب....
- 2009 هو عام تقضية الخدمة الوطنية اتمنى ان يحدث فيه شئ اخر كالعمل او الارتباط الرسمي رغم الاحتمالات الضعيفة جدا للاسف...



الخميس، ديسمبر 25، 2008

من اجل التدوين فى تونس



----------------------
تم تحديث التاريخ لليوم

الاثنين، ديسمبر 08، 2008

فضفضات ....

- اولا كل سنة و كل الناس طيبين و عيد اضحى سعيد عليكم يا رب
- حوا اتزفت من غير طرحة من غير مهر و شرط فى عقد
الجملة دى من غنوة حوا و ادم للمطرب الجميل علي الحجار(و الشريط جيد جدا اسمعوه) و اجمل ما فيها انها بتكلم عن العلاقات و الجواز انه من غير شروط و مهر و مؤخر والكلام ده و هى دى الفكرة
احنا فى زمن الجوازات كلها بالصعوبة دى عشان كده بتكتر المشاكل او بيقل الجواز اصلا
صحيح الزمن ده محدش مأمن حد عشان كده كل واحد بيفكر فى الضمانات المادية من مهر و شقة و مؤخر مع ان الفلوس مش ضمان ابدا لكن اهو بيشوفه كده لان الحياه بقت مادية للاسف
يعني انا هعذر كل اللى بيفكر كده و بالضمانات دى بس انا مش كده انا لسه مش عايش فى الدنيا دى و الحمد لله و لا عاوز اعيشها
- مفيش كسوف فى المحبة ولا للمحبة شروط
هنا منير قالها بشكل اعم و قوي جدا بقى
يعني اللى هو من الاساس مفيش اى شروط بقى لا مادية و لا معنوية و لا عائلية و لا اى حاجة للحب خلاها الحرية الكاملة اللى مفهاش كسوف كمان
و المشكلة هنا هى وجود الحب الحقيقي الفعلي اللى يقال انه مبقاش موجود او نادر و انا حاسه موجود و انا عايشه كمان الحمد لله بس في خوف بسبب الظروف اللى بتعوق احيانا و من المستقبل عموما لكن اكيد متمسك بيه جدا و ده اللى مخليني صابر و بامل انه مع الوقت كل حاجة هتتحسن
- و ده حب ايه ده اللى من غيييير اي حرييية
يمكن انهاردة اكتر يوم حاسس اني فعلا يونس(اغنية منير) و اننا فى حب اوي فعلا لكن مفيش حرية و كل الظروف ادامنا فى الفترة دى برضه عارف ان الظروف دى بعضها هتنتهي بعد فترة معينة و بعضها هنقضي عليها سوا مع بعض لكن دى على مدى يخليني فى الفترة دى تعبان حقيقي بس مش فى ايدينا حاجة
- ربما يحصل غياب عن المدونة و يمكن حاجة ترجعني تاني بعد فترة قصيرة الله اعلم لكن هناك غياب قريب هيحصل اجباريا لسبب اجباري دخل حياتي و هو من الظروف اللى بتجبرني على الحياه زى ما هي عاوزة مش زى ما انا عاوز
- على قد ما حبينا و تعبنا فى ليالينا الفرحة فى مشوارنا تاني هتنادينا
طول ما القلب صافي بحر العشق وافي كل عذاب الدنيا هيروق بكرة لينا
و يرجع على الحجار ليترك الامل باغنيته على قد ما حبينا و زى ما قال فى الاغنية الجميلة جدا دى ان ان شاء الله الفرحة هترجع و الدنيا هتروق
يا رب
يا رب