حدوتة مصرية

رسالة للمصريين

2011-08-06T11:02:00.000+02:00

لا نحتاج للروايات أو التشبيهات لايضاح مساوئ الحياه فيفيق لها الناس و ينتقدوها لأننا اصبحنا نعيشها .. نرى الظلم باعيننا و تفرح وجوهنا بما نراه و نهلل الجيش و الشعب ايد واحدة بينما هذه اليد اما تضرب فى اصحاب الحقوق و مريدي رفعة الوطن و حريته (الجيش) أو تصفق لما يحدث من اهانات للثوار (المواطنون) .

ما حدث و يحدث حرفيا هو ان الشعب قام بثورة عظيمة كانوا وحدة و هزموا كل الفساد و استشهد من ثوارها و اصيب اخرون ثم هدأ الشعب سريعا بعد التنحى و جلس ينتظر التغيير ان يحدث تلقائيا لكن المسار اختلف اصبح الشعب يتغلغل فى قناعاته ان من مات كان تاجرا للمخدرات او مدمنا او بلطجيا ففقدوا للشهداء هويتهم الشريفة لم يكتفوا بنسيانهم بل اسأوا لهم و لاهلهم ! و عندما قرروا الاعتصام حتى ترد الحقوق انتقد الشعب ايضا اعتصامهم و رفضه و اطلقوا الشائعات بالميدان من فيه بلطجية .. انهم يدخنون الحشيش فيه .. انهم يمارسون الدعارة .. دون دلائل تطلق الشائعات ويصدقها الناس و بالاشكال يحكمون ( شكلهم بلطجية – دول منظر ثوار ) ماذا تنتظرون من اشكال المواطنون المصريون هل انتم اشكالكم مختلفة ؟ هل اتينا بثوار مستوردين ؟

مطالب الثوار و المعتصمين كانت واضحة الشعب يعرف انها مطالب مشروعة لكنهم فى نفس الوقت لا يريدون ثورة او اعتصامات و ضغط لذلك يرفضونها و لأنها لا تخص ذاته فى نطاق تفكيره الضيق بل ان هناك الكثير من الشعب يرى عدم وجود مطالب لم تتحقق و يستنكر المطالب المرفوعة من الثوار .

و تتجلى المأساه فى احداث فض الاعتصام بالامس 1 اغسطس من قبل الشرطة العسكرية عندما فض الاعتصام بالعنف و بمنتهى السوء و بدلائل الفيديوهات المصورة التى حاولوا منعها ثم يخرجون علينا ليقولوا ان الاعتصام فض بطريقة سلمية هل هذه سلميتكم ؟ لم يختلف فضهم عن مرتين سابقتين كل مرة تكون بالعنف و الضرب و لم يختلفوا عن الشرطة التى انتقدها الجميع لكن الفاجعة فى الامر ان المواطنون العاديون فرحوا و اخذوا يشجعون الجيش لضرب و فض الميدان لا اعرف كيف هم لا يشعرون ؟

اقول للجميع اخيرا فلتتصور و(لأتمنى أنا ) ان ارى ابن كل منكم شهيدا مطالبا للحق ثائرا و تكون انت فى عذاب اهل الميدان المعتصمين من اجل حق اولادهم ثم يضربونك و يقبضون عليك فيفرح غيرك لما يحدث .

بدون عنوان

2010-12-14T23:14:00.009+02:00

- كلما فكرت أن الحياه تتسع للجميع أرى من يضيق العالم لحيزه و يخرج منه اخرون لأنهم فى نظره لايستحقون الحياه

- مصر بكل مطربيها و مُغنيها لم تنجب الا سيد درويش و الشيخ امام و محمد منير فقط

- لو كان ممتاز القط رجلا لقتلته و كذلك تامر حسني و القائمة تطول تشاهدوهم كل يوم فلا داعي لذكرها

-اعيش بالقراءة و الكتابة و الموسيقى و السينما و اعتبرهم عناصر اساسية للحياه فيما يظن البعض و يرى انها هوايات فقط فمن لا يعيش بهم هو محروم من الحياه

- عندما كنت صغيرا تمنيت دوما أن تكون الحياه كلها حب و سلام و عدل ( أحلام طفولية ) الان تصالحت جدا بأن أجد الحياه مليئة بالتناقضات و أنها طبيعية جدا أن ترى مثلا ملاهى ليلية مثلما ترى دور عبادة فلا غنى عن اي منهم

- اؤمن بتلاقي البشر بالأرواح قبل الهيئة فكم من هؤلاء عرفت و كانوا هم أصدقاء العمر و البشر الواقعي بينما الاخرون من لا يرون ذلك يؤمنون بواقعية مزيفة

- مصر كلها عاملة زي الميكروباص اللى مش عاجبه حاجة السواق بينزله و لو طول فى الكلام بيحدفه

- افضل الصمت عادة عندما اقابل من البشر من اختلف معهم تماما واراهم من المتشددين على رأيهم فاتركهم لما يروه و افعل ما اراه

- ارفض الحياه من اجل المال فتكون حياتي مقتصرة على عمل لجلب هذا المال بينما اكون بلا اي فكر و رؤية فاكون نصف حي و نصف ميت افضل من اكون ميت باحثا عن المال فقط.

- المسافات لعنة لا يصلح تقصيرها من طرف واحد .

- يصيبني ملل الحياه عندما اراها و لا اعرف ما يمكن عمله لاحس بها و ان كانت الكلمات و الكتب مجرد كلمات فارغة و ان الحياه اكبر من الكتابات و القراءات بكثير فكيف كان لله كتابه الذي جاء به لنعيش على كلماته و نفكر بها و هو مرسل للعالمين فلابد ان يكون الانسان ايضا صاحب رسالة يقدمها للبشرية بما جاء به فكره

- من المفترض ان تكون سياسة البشرية كغرس شجرة دوم فمن يغرسها لا يأكل ثمارها الا بعد مائة عام

لخبطة

2010-12-07T18:13:00.008+02:00

كل ما افكر ان الحياه عايزة احلام كتير تتحقق كل ما بيمر زمن يأكد ان تقريبا حلم ولا اتنين بس اللى ممكن يبقى حقيقي و الباقي ميلحقش يعمل حاجة فى الحياه ... كل ما اكبر و تمر ايام الحياه بحس عمري بيجري و انا مش عارف اعمل حاجة او مش عارف جديا ايه اللى ممكن يتحقق و يكون هدف نهائي .. انا نفسي فى حاجات كتيييير لكن ارجع و اقول انا عايزها عشان بحبها لكن هتعملي ايه طيب اللى ينفع بجد اعمله يعني دلوقتي انا بشتغل و بستنى كل شهر للقبض عشان اصرف على نفسي و احوش عشان اتجوز ده كويس لكن مش ده كل ما يرضيني و الحياه المادية دي بكرهها بشكل انا محبش اتقيد لمال لكن مضطر دخلت دوامة و مينفعش اخرج منها ولا اكون مش شغال و لا اكون مش بدور على دخل مادي بالعكس كمان بقى التفكير بيجيب اني ادور فى دخل مادي اضافي كمان بس و اخرتها الحياه عمرها ما كانت مادة كده !! مع ان اي حد من الاجيال السابقة هيأكد مليون تأكيد ان ده هو كل المطلوب في حين ان المطلوب ليا بتمناه اني اقعد اقرا للابد عدد من الكتب اللا نهائية و اشوف افلام و اكتب للابد مع اني تقريبا من ساعة ما اشتغلت مبكتبش و بكتب دلوقتي مجرد استفاضة عادية لان عندي احساس فقد الكتابة من شهور و جايز ارجع اتورط فى الكتابة و اربط نفسي بالمدونة دي تاني .. المدونة دي عملت حاجات كتير جدا جدا فى حياتي رغم ان للمدونات مساؤها

كل احداث مصر بتثبت ان الشرف و الاخلاق الخ انتهى من الغالبية بدليل ظهورها فى المستويات القيادية كلها و اختفاء اي رموز نضيفة فى البلد و كأن القيم و الاخلاق انعدمت تماما و لما بفكر انها لسه موجودة تبقى في خبايا خبايا الحياه انما باقي الناس العادية اللى يقولك احنا باخلاقنا و قيمنا تلاقي الناس دي الشتايم كلها على لسانهم و لعنتهم على اي حاجة و انه هو اللى محافظ بدليل كلامه ده !! او تلاقيهم كلهم شرفاء حيث الشريف دلوقتي بقى شريف نص كم زي مثلا رافض الرشوة فى مهنته لكنه قابل جدا انه يدي امين الشرطة ال10 جنيه عشان يسيبه يعدي يبقى ده ملوش دعوة بالشرف ولا بالرشوة و يبقى نضيف و اما يكدب على رئيسه يبقى عشان مصلحة الشغل لكن مش كداب و و من هذا الى اخره مش هتلاقي ولا واحد شريف فى البلد و لا واحد اخلاق

انعدمت البشر الطبيعية و اصبحت الحياه للبشر المغشوش

عودة و غياب قصير

2010-04-05T06:18:00.003+02:00

واضح ان البوست فى ابريل و اللى قبله ديسمبر يعني اربع شهور غبتها و مكنتش اعرف هرجع ولا لا لحد ما قررت ارجع و ده لان فى اصدقاء تمنوا ده و كمان لان دي فرصة لربط نفسي بالكتابة اي كتابة انا نفسي اكتبها

و عشان مكونش جيت بايدي فاضية فده كتبته من فترة كده و منشرتوش هنا

المجند

الخدمة العسكرية قدر لبعض الشباب و لكنها دائما خدمة موقوتة .. انت شاب تدخل الجيش .. تنتظر مرور الايام بشدة .. تحصرها ... تشعر بالملل و الاكتئاب و الوقت الضائع ربما .. تعيش الانتظار حتى انتهاء الخدمة فتترك لهم سنة او اكثر من عمرك تسلمها مع المخلة ... ثم يدخل شاب غيرك كانه يتسلم منك ... لا احد يبقى الكل يرحل .. فقط شئ واحد يسكن هو احساس الضيق و الملل ولان هذا الاحساس يعلم انه لن يعيش الا بسكن جسد بشري فهو يأخدهم الواحد تلو الاخر .
لا يبقى فى الجيش بشر ... الجيش لا يريدهم هو يريد اجساد لسكن الاحاسيس ليست احاسيس الضيق فقط فهي الاحاسيس عموما فهى ستتغير لو ان هناك حربا مثلا فتكون احاسيس الشجاعة و الانتماء فالجيش لا ينتصر باشخاص و البلد لا تريد منك سوى ايجار فترة من عمرك سكنا للمشاعر التى تقوم عليها ....

ايس كريم فى ديسمبر

2009-12-01T22:21:00.000+02:00

من سنة تقريبا الواحد مكنش متخيل السنة دى تعدى و انها ابوخ سنة فى حياته حتى لو فيها حاجات جميلة بتحصل فى حاجة كبيرة بايخة كانت هي المسيطرة ... قضيت ايام عمري ما كنت اتخيل اني اقضيها .. شفت و قابلت حاجات كتير متتحكيش لكن بجناني انا واثق ان هيجي وقت حكاياتها ... و الشهور قعدت تعدى تقيلة انا مش هنكر لانها كانت احداث تقيلة مع اني برضه كنت احسن من كتير ... الوقت بيعدي على طول بشكل ثابت بس احنا اللى احيانا بنعيشه نحس انه تقيل و بطئ و اوقات نحسها سريعة ده راجع لاحساسنا اما الوقت ثابت .... كمان اما المدة بتخلص بتقول يااه ده الوقت عدى لانه بيبقى راح فى الماضي و انت بعدت عنه فقلت ده عدى ...

كل الشهر من السنة دى بالذات كان بيمثلى شئ مهم ... زي شهر فبراير مبحبوش و ده لاسباب مش هقولها ... اما شهر اغسطس فهو زي ما احمد خالد توفيق كتب روايته الحب فى اغسطس ... اما شهر سبتمبر ده عيدي و محبوبي بحبه و بحب اللى يبقوا مواليده ... اما نوفمبر فهو كان sweet November الفيلم و كان حماسى و سعيد زي November sky مقطوعة المزيكا الجميلة لياني ... و انهاردة احنا ديسمبر و انا سعيد بيه ... ديسمبر عز الشتا و البرد و الدفا شهر فيه رومانسية كده ... و خلاص سنتي اللى انا مستنيها تخلص قربت خاصة 2009 لان الجاية مرحلة تانية مختلفة و انا اقصد سنتى دى اللى هى فى فبراير البايخ هتخلص .. و ده احد اسباب اني مبحبوش اني مش عاوزه.. عاوزه اما يجي يخلص ... عشان كده مارس هو شهر البداية بالنسبة ليا ..
نرجع لديسمبر و الشتا و احلى حاجة فى عز الشتا فى ديسمبر نخرج فى عز البرد و المطر كمان و ناكل ايس كريم و يكون شيكولاته ... و احسن ايام نوم و احلام بتكون فيها ...
انا بحب فيلم ايس كريم فى ديسمبر اوي ......

مولود فى عز الشتا عيل جميل اوي و كان بردان اوي من الجو بس كان بيحب الدنيا اوي و عاوز يعمل حاجة كبيرة و كان هو نهاية لكل سنة و ده مش وحش لانه كان كل ديسمبر بيولد سنة جديدة و الاحتفال للمولد الجديد ... تخيلوا اما شهر يولد سنة كاملة ....

كوثر مصطفى كتبت قصيدة جميلة اوي قالت فيها ...
إنت و انا
أيام كتير
وشهور كتير
و سنين كتير
كلها كانت ديسمبر
شهر واحد ف السنة
لكن أخير
برد و مطر وانا فيه لوحدى

الله أعطانا الذاكرة بحيث قد يكون لدينا الورود في ديسمبر كانون الاول.
James M. Barrie جيمس م باري

مصر و الجزائر

2009-11-21T23:32:00.001+02:00

اولا طز فى الكورة و فى كاس العالم مليون مرة هفضل اقولها ولا عايز منتخبنا يلعب ولا يوصل ولا عاوزين كورة ما دام هتجيب خناق فى اخوات و هي حاجة ملهاش لازمة

ثانيا مش هقول احنا عرب عشان فى ناس بتقول اننا لا نعتبر عرب ولا هما ماشى احنا مسلمين ده الاهم و بيجمعنا الشرق الاوسط البلاد المسلمة اللى لغتها واحدة فمعنى كده ان اللى بنعمله ده عييييب من الجزاير و من مصر اما ترد عاوزة بلطجة او طرد او مقاطعة و احنا مش عارفين ولا عاوزين نقاطع اسرائيل ...يخرب بيت غباءنا يعني اما نقاطع ولا نحارب الجزاير و هما يحاربونا و اعدائنا بيتفرجوا و فرحانين يعني احنا بنقولهم ايوه احنا اى كلام و مش وحدة يعني اعملوا اللى انتو عاوزينو فينا و احنا منشطرش غير على نفسنا و اخواتنا
موضوع طرد السفير ولا مقاطعة الجزاير ولا ميدخلوش معرض كتابنا ده مش موافقه يعني هو احنا مقاطعين اسرائيل مبنصدرش ليها يعني طيب لما قتلوا على الحدود مصريين حاربناهم كده؟

ثالثا منتهى اكتئابي اما الاقى الاخبار العربية
- سعودى يقتل بنيران اليمن
- فتح و حماس و صراع داخلى مستمر
- مصر و الجزائر فى حروب بسبب كرة القدم و البلطجية

رابعا نيجي بقى نلاقي المصريين عاملين يقولولك اصل هما بلطجية اصل هما بيكرهونا كل الدول العربية بتكرهها
طيب و المصريين بيعملوا ايه مهو برضه كتير فيها بلطجية و قلة الادب اللى عندهم عندنا و هما بيكرهونا احنا بنكرههم يعني هو ده ينفع؟

خامسا
{وَإِنْ طَائِفَتَانِ مِنْ الْمُؤْمِنِينَ اقْتَتَلُوا فَأَصْلِحُوا بَيْنَهُمَا فَإِنْ بَغَتْ إِحْدَاهُمَا عَلَى الأُخْرَى فَقَاتِلُوا الَّتِي تَبْغِي حَتَّى تَفِيءَ إِلَى أَمْرِ اللَّهِ فَإِنْ فَاءَتْ فَأَصْلِحُوا بَيْنَهُمَا بِالْعَدْلِ وَأَقْسِطُوا إِنَّ اللَّهَ يُحِبُّ الْمُقْسِطِينَ } [سورة الحجرات: 9].

و متفرحوش فينا الاعداء حرام بجد اما نبقى احنا فى بعض بنتخانق كده يبقى بنديهم فرص يعملوا فينا اللى عاوزينه

احسن اللى قريته بقى فى الموضوع برضه لازم اجيبلكم لينكاتهم تقروها
عمرو سلامة
http://www.facebook.com/notes/amr-salama/-/181967294005
محمد النقيب
http://www.facebook.com/note.php?note_id=182590033443&ref=mf
شريف المشد
http://www.facebook.com/note.php?note_id=205571034467&id=523770382&ref=nf
امجد ابراهيم من مقال لكاتب سعودى
http://www.facebook.com/note.php?note_id=128332560237&id=691640202&ref=nf
و خاصة مقدمة مقاله التى اقتبسها هنا
يخطئ من يقيّم الأفراد قياساً على تصرفهم في لحظه من الزمن أو فعل واحد من الأفعال ويسري ذلك على الأمم, فيخطئ من يقيّم الدول على فتره من الزمان, وهذا للأسف سوء حظ مصر مع مجموعة من الشباب العرب الذين لم يعيشوا فترة ريادة مصر.

و يا رب يرحمنا و يهدينا و يجمعنا على دينا و نرجعله

اه على فكرة انا مش هقاطع الجزاير ولا هشارك فى وقفات ولا مع طرد سفير و لا مع عدم اشتراكهم فى المعرض
و لو شفت جزايري مش هقتله ولا هعمل فيه حاجة هكلمه و اعامله زي اي انسان و هتناقش معاه فى اللى بيحصل مناقشة متعقلة

اراء

2009-11-01T18:21:00.003+02:00

- معرفش مناسبات للكتابة لكن فجأة كده بتجيني الحالة انى اكتب .. اكتب و بس
- انا بحقد على عمرو دياب و تامر حسنى مش عشان هما كويسين ابدا بس عشان مصر كلها بتسمعهم خاصة المستويات المتدنية لما بترتقي يبقى هما دول اللى يسمعوهم بدل الشعبي
- بس انا كان نفسى اكون مكانهم او اى حد تاني مفيد مكانهم عشان يوصل اغاني ليها رسالة او مغزى مش كله فى موضوع واحد و هو الحب طبعا
- عشان كده مصر دى كلها مطلعتش مطرب غير محمد منير و بعض المحاولات التانية اللى مقدرتش توصل اما منير فهو عمل اللى عليه( و غنى فى غير الحب بتاع الحبايب )حتى لو لسه فى ناس كتير مبتسمعوش
- الدنيا مش كلها علاقة بين بنت و ولد بس عشان كل الاغاني و المواضيع تبقى عليها
- انا مقتنع ان الشعر او اى كلام حد بيكتبه لازم هو اللى يجرى ورا كل واحد يقوله دا انا بكتب و يسمعه و يشوف رأيه مش الشعر كشعر او فى القصة كقصة اكتر مهو فى الموضوع
- مقتنع برضه ان ناس كتير مستعدة تسمع لكن مش عارفة ولا لاقية انها تسمع بس برضه فى ناس كتير لا بتحب تسمع ولا عاوزة تشغل دماغها فى حاجة اصلا
- كل انسان مننا عنده اخطاءه اللى مش شايفها حد غير ربه اللى ساتره بس لكن المشكلة اما الانسان ده يفضح نفسه بنفسه و يتكلم عن ده
-انا مكنش عندى مشكلة اما اجي ارتبط ان اللى ارتبط بيها دي تطلع محجبة ولا لا المهم اكون حبيتها و عجبتني شخصيتها اما عن الحجاب فانا مقتنع بيه بس مكنتش هخليها تلبسه الا اما تقتنع اقتناع تام برضه و الا بلاش
- طبعا موضوع الحجاب ده بقى ازمة و محل خلاف و انا مش جاى اقنع حد ولا حد هيقنعني انا بس هقول ان البنت باحترامها سواء حجاب او بدون حجاب الا لو كانت يعني مبالغة فى قلة اللبس ولا التضييق شوية:D
- لما اكون مع واحد صاحبي و بيشرب سجاير و معنديش مشكلة يبقى كمان لو واحدة بتشرب مشوفش مشكلة
- لما بنت تكون محجبة و بتشرب سجاير بيتشاف انه حاجة شاذة و يمكن يتسأل ليه الحجاب يعني تقلعه احسن مثلا هيعجبكو؟!!!
- مشكلة المشاكل ان فى بنات تلبس الحجاب لمجرد شئ اجتماعي و هما مش مقتنعين بيه و انا مع حريتهم ما دام وصلوا للسن اللى يقدر يحكموا فيه بنفسهم يقلعوه دى حريتهم
-موضوع كان نقاش بيني و بين اصحابي مرة و هو ان البنت اللى بتهتم بنفسها هى اللى مش محجبة اما المحجبة فمش باينة بقى فمبتهتمش بنفسها محدش شايفها و انا كنت مختلف معاهم فى الموضوع ده لان اي بنت بتحب تهتم بنفسها و لو ان طبعا قدر اهتمامها مش هيبقى زي اللى بشعرها لان كل ما بتنزل مثلا بتسرحة و تظبطه اما البنت ممكن فى يوم كده تقلب و تغطى
- برضه البنت المحجبة هيبان اهتمامها بنفسها فى لبسها و عموما و لو مش كده تبقى مشكلة
- اى انسان مبيغلطش مع الناس او ادامهم بيغلط مع نفسه
-من مقال مروة رخا فى البوست اللى فات
على رأى هانى سلامة فى فيلم ويجا لما قال لأصحابه - ما معناه – إن لما كل واحد فيكم و فيهم يعرف بنت و يبوس و يحضن و يعمل شئ و شويات ويسيبها علشان هى كدة بقت مش كويسة ... هنجيبلكم منين بنات محدش لمسها

- معظم الشباب عاوزين يكونوا عملوا اللى عاوزينه اما البنت عاوزينها تبقى معرفتش غيره
- موضوع رفض النقاب فى الجامعات انا معاه جدا و مع ان النقاب يتمنع فى كل حتة كمان مش لسبب اكتر من انه وسيلة سهلة اوي للنصب و التخفى و حاجات كتير انما انا مع الحرية كل واحدة حرة تتنقب ولا متلبسش بس فى الزمن ده خطر التخفى ده غير طبعا انه مش موضوع ديني ده زيادة عن التدين

شائك

2009-10-02T18:08:00.002+02:00

من المفترض ان اكتب هنا كثيرا و عندى ما اريد ان استفيض به فى امور كثيرة ومتعددة و منها ما هو شائك ولكنه هام وحديثى هنا افضل اولا لان هنا يطرح الموضوع لمن اعرفه ولا اعرفه و من هم من الممكن الحديث معهم اما فى وجه الدنيا فصعب و كذلك هنا تفكير مع ذاتى حتى اصل انا لنفسى و ارائي فلا اجزم اني اعلمها من الان لكن اعرف ان لى موقفا ولان المواضيع لا تطرح فلا اتكلم ...
موضوعات كثيرة اريد ان اتكلم عنها اذكر منها عناوين حتى اذكر نفسى كى لا انساها عندما اعود لاكتب و كثير منها كتب عنها كثيرا و حدث جدالا كثيرا فى ناس لكني هنا لاقول قناعاتي او لاصل لها فلربما تختلف ارائى او اصل لما اريد بمشاركتكم او اقنعتكم او ظل كل منا برأيه و احترامه للاخر هى افادة ايضا ...موضوعات مثل الحجاب و النظرة لغير المحجبة او فى الجنس و الكبت و ما اراه فى مجتمعى الذى اعيشه من تناقضات او فى العلاقات بين الجنسين و هناك موضوع لم اكمله فى التواصل بين الجنسين ...
اتمنى عدم الكسل منى و فنون تضييع الوقت و اكتب و اكتب فادعو لى ...

و اترككم الان مع مقالين لمروة رخا قراءتهم و بهم الكثير مما اعجبنى و انها تحاول ان تصلح فعلا بطريقتها و ربما اعقب ايضا على مقالها لاحقا

http://b7l2a.net/kotabna/847.html

http://b7l2a.net/kotabna/857.html

رؤية

2009-09-24T00:57:00.002+02:00

اعود لكم او لنفسى فقط اريد ان اكتب فاكتب اي شئ اريده و احتاجه ...
مؤخرا قرأت بعض الروايات اريد التعليق عليها
عزازيل هي رواية يوسف زيدان و هي رواية انسانية جدا من الدرجة الاولى هكذا اعتبرها هي رحلة لهيبا يبحث فيها عن اصل ديانته و يطرح التساؤلات و هكذا ارى الانسان هذه طبيعته طرح التساؤلات طوال العمر ... هيبا برغم انه راهب الا انه يتسائل و هو الذى جاء تعميده متأخرا و مشكلات امه و ابيه و اخطاءه و شهواته التى اخذته و هو الراهب فقد احب و اقام علاقة مع ثلاث نساء هما الرئيسيين فى الرواية و هذه طبيعة الانسان حتى لو كان متدينا فهو يخطئ لابد من ذلك ... دور النساء الثلاثة فى الرواية انساني ايضا يجعلك تتعاطف معهم جميعا و تحس بالظلم الذى عانوه بمختلف النواحى ولا اعرف هل كان يقصد ان يظهر هذا القهر على المرأة فى اشارة للحياه ام لا ؟ لكنه كان مبررا ... اما عزازيل هو محور الرواية كلها هو الشيطان الذى يوسوس لهيبا فيجعله يكتب كل حياته و اخطاءه هو الذى كان يشجعه لارتكابها ... كنت ارى عزازيل هو شخص هيبا الداخلى كما اظن ان بداخل كل انسان عزازيل فكما يوجد الشيطان الموسوس هناك النفس الموسوسة و الصراع الانسانى الدائم ... احب هذه الرواية ...
هذه المرة رواية شاب هو اسلام مصباح و ليلة واحدة بس هي تحكي عن ليلة رأس السنة من خلال الكثير من الاشخاص تتنقل من شخص لشخص عبر خيط يربطهم و تحكي مشاكل كل فرد و ما يعانيه و ما يبيحه لنفسه من اعمال لملله من الحياه او للاحتفال باليوم فهناك من يحتفل بالمخدرات و النساء و هناك من تعاني و لم تتزوج و تريد اقامة علاقة مع رجل و هناك من يريد كسب المال باى طريقة الى اخره من مشكلات يعانيها المجتمع و شباب اليوم.... هي رواية ستجدها صدمة لجيل الكبار اما جيل الشباب سيقرأها فيشعر انها عادية ليس لشئ سوى انه اصبح يعيش هذا بقوة فلا يستغرب اى مما يقرأه لذا هى رواية مهمة ...اما فى اسلوبها ستجد بها بعض الفقرات تشعر فيها بالمقالية و الخروج عن اسلوب الرواية و بعض المعلومات التى تأخذها مباشرة لكن لا بأس ستستمتع.....

وقت!!

2009-09-04T04:33:00.002+02:00

معنى الزمن و الوقت بالنسبة ليا بقى غريب مبقتش فاهمه ساعات يبقى سريع و ساعات يبقى بطئ جدا و كوني انتظر حاجة تنتهى و ارتاح منها و انا عارف ان ليها معاد ده شئ متعب جدا انك مجرد عاوز تملى ايام فى عمرك عشان توصل لسن او يوم فى سنة معينة عشان ينتهي اللى انت عاوزه ....
عيد ميلادي كان امبارح و تميت 23 سنة مع اني مش حاسسهم الرقم ده انا حاسس انهم اكتر معرفش ليه حتى اتسألت كام مرة و كنت برد 24 او بفتكر و احسبها لاني نسيت فعلا نسيت عمري و مبقتش بحسبه ولا حطه فى دماغي معرفش ليه ...
كنت بحس اني اما اوصل للسن ده ابقى كبير و النضج بيزيد معرفش ده حصل ولا لا ... بقى عندى حالة كأبة كده من نفسها بسبب اللى انا فيه السنة دى بس اكتئاب داخلى مش دايما بيطلع ...
عموما 23 من 24 ولا اكتر كمان مش فارقه الزمن معايا ...
الوقت بيتغير و بيغير و انا مش قادر املكه ولا افهمه كل اللى عاوزه انه يعدي يخلص الفترة دى ...
امنيات كتير سايبها لبعد الفترة دى عشان كده انا متوقف تماما عن الدنيا لحد ما ندخل السنة الجديدة على الاقل ...

التعليق لكم !!

2009-07-22T19:54:00.001+03:00

التواصل

2009-06-12T22:03:00.003+03:00

عندما اخرج كثيرا ما اتأمل الناس و حالهم و كل على حاله وحده كأنهم فى حالة توهان و كثيرا ما تجد فردا يمشي واضعا السماعات فى اذنه لينفصل عن العالم ... و اكون مثلهم اشعر شعورهم امشي لا احب ان اتكلم مع احد فى بعض الاحيان و احيانا اضع السماعات ايضا ... لكن فى حالتي العادية افكر لو اني اكلم احدهم اي احد اسأله عن حاله و ما به ؟ سواء كنت جالسا فى المترو او واقفا فى الشارع او على القهوة اي شخص بمفرده و حالته هذه الحالة العامة التي لا اعرف وصفها هي تقريبا التوهان كما قلت و الحزن و الشرود المرسوم على الوجه هذا يجعلني اتمنى فضفضته و الخروج من حالته البشر يحتاجون لذلك و لو فضفضة تخريفية ولو غير عاقلة خروج الكلام سيجعله يفكر به ايضا ... لكن افكر فى رد الفعل ماذا لو ذهبت لشخص و قلت له مالك؟ او ازيك؟؟ اتوقع بنسبة معينة ساجد من يتحدث و يفضفض تلقائيا لانه كان ينتظر سؤال من احد و ستختلف فضفضته ان يطيل بتفاصيل او يقول مجملا مختصرا و فى الحالتين هذا جيد اما النسبة الاكبر التى اتوقعها سيكون رد فعلها و انت مالك او هل تعرفني؟ اي من هذه الدهشة و لو كنت ذكرا تحدث انثى ربما لن ترد عليك و سيكون هذا بمثابة معاكسة و ربما هناك من يستخدمه كاسلوب معاكسة لكن هناك من يتكلم كبشرا لا اكثر ... و هذه النسبة الاكبرالرافضة للاغراب لاننا تربينا على هكذا او اصبحنا بهمومنا لا نتحمل ان نحدث اخرين و لا ان نسمع هموم اخرين و لا نتقبل بعض بسهولة و ربما يحدث شد عصبي ...
كنت اتمشى فى وسط البلد منذ فترة و وجدت امامي اب و ام تحمل طفلا و بنت صغيرة تمشي جانبهم و انا امر بجانبهم وجدت الاب يمد يده ضاربا البنت الصغيرة اسفل ظهرها صائحا فيها ان تمشي عدل كنت ساقف و استدير له لاحدثه لماذا يفعل ذلك و ان يعاملها بطريقة جيدة و دون ضرب و خاصة انه ليس ضرب على اليد مثلا و لكني كنت اعرف اني لو فعلت لكان تشاجر معي و وقف الشارع بيننا و كبرت الامور او على الاقل يقول القول الشهير و انت مالك... هذه الكلمة تكسف الكثير لكني ارى عندما اكون على وجهة نظر و لمصلحة من احدثه اذن انا فعلا لى دخل احق لنفسي ذلك نحن دائما نحتاج الى توجيه لكن بطريقة مناقشة و اقناع و هدوء حتى لو قلت له ما اريد و قال لى شكرا سافكر فى الامر او لا اقتنع ساتركه و شأنه لكن ربما كان هذا تنبيها جيدا ... نحتاج دائما لتنبيه حتى لو سيجعلنا نفكر فى شئ اخر عكس التنبيه هذا لكنه سيجعلنا نفكر فيما نعمل و نقتنع هل ما نفعل نرضى عنه ام لا ؟ هل اخطأنا ؟
فى مرة اخرى ركبت تاكسى .. سائقى التاكسي يعتبروا حالة معبرة جدا للتواصل لانهم يحبون دائما التحدث مع الزبون خاصة انهم يمشون فى عزلة و كل منهم وحيدا بسيارته لذا هو ينتظر ركوب الفرد حتى يحدثه و فى الغالب اذا وجد مبادلته الكلام يكمل الى اخر الطريق حديثه اما اذا لم يجد مبادلة يسكت ...
و هكذا فعل هذا السائق ركبت و بعد صمت دقائق بدأ بسؤال فجأة ما رأيك باوباما ؟
اجبته انه ذكي و استطاع ان يجئ و يكسبنا اي يكسب ودنا فكان هذا مبشرا لانه بان يتحدث فى رأيه و انطلق يقول رأيه مادحا الرجل و انه كان منصفا الى اخره الا انه يخاف ان لا يستطيع التنفيذ و انه يتوقع ان اسرائيل ستقتله ... حاولت ببساطة ان اوضح له انه مخدوع و لن يحدث خلاف بينهم فى اي شئ لكن لم يستجب فبدأت تركه والصمت او مجاراته بنعم نعم
... يعرف ان الحديث انتهى فيسأل عن عملى فاقول اني لم اعمل بعد و حديث التخرج يقول انه لا يوجد فرص هذه الايام و الشباب كله قاعد اقول هناك فرص لكن لمن يبحث و يريد لا يصدقني يقتنع برأيه احاول مرة اخرى لا فائدة فاتركه هو ايضا يصمت الى نهاية الطريق...
هنا تأتى مشكلة التعليم انا اراها هي الاولوية الاولى للمشاكل خاصة عدم التواصل موضوعنا فالمتعلم له رأي يبقى بعد قراءته و سماعه و تفكيره و له عمق و لو بسيط اما الجاهل له وجهة نظر ناتجة عن سماع الاخرين و اراءهم او تحكيم عقله دون تفكير علمى منطقي فيكون من الصعب توافق الفئتين مع بعضهما ... احيانا تجد متعلمين مثل الجهلاء هذا لعيوب التعليم ايضا و احيانا تجد جاهل لكن مفكر جيد هذا يرجع لعقله و خبراته لكنه يحتاج للتعلم ليزيد...
فى مرة كنت مع شخص جاهل لا يعرف الكتابة و القراءة وظيفته هي حمل الاوراق من مكتب لمكتب فقط و هو لا يفهم شيئا مما به و اذا به مرة يحدثني ان التعليم لا يرفع احدا و لا يزيد شئ عندما وجدنى اقرأ كتابا امامه هو يجد ان التعليم لا فائدة منه لذا هو لم يتعلم .. هذه مشكلة كبرى و حلها عسير لاقناعه بالعكس...
على مستوى الاسر و العائلات قديما كان هناك ارتباطا وثيقا بين العائلات فتجد الاخوة مترابطين مع ازواجهم و زوجاتهم و اولادهم و الاجداد عائلة كاملة بارتباط ربما تسكن بعمارة واحدة او بيت واحد و ربما بعيد عن بعض لكن هناك مقابلة دائمة و قرب ... اما الان هي اسر اب ام اولاد فقط لا يوجد اعمام ولا اخوال و لا اجداد الكل بعيد و تراهم كل فترات هذا جعل هناك عدم تواصل حتى ان خلافات قد تنشب فتبعدهم اكثر ...اصبح الاخ لا يريد مقابلة اخوه و هكذا ...
الاسرة ايضا نفسها تفككت تجد كل ابن على جهاز كمبيوتر مثلا يفعل كل ما يريد ربما كل فرد فى الاسرة و كل منهم يتحدث بالشات و لا يجلسون سويا هم فى بيت واحد لكن هناك تفكك كل فى حاله لا يعرف شيئا عن الاخر يجتمعون عند الاكل مثلا فقط....
هذه حقيقة انا ايضا كذلك مع اسرتي اعترف ان اخذ معظم الوقت للجهاز و النت و القراءة و اجلس معهم فى الغالب اوقات الاكل فقط ... هذا نتاج تقدم العصر و التكنولوجيا ما وصلنا اليه جعلنا كل منا منفرد بنفسه بعدما كنت مثل ااريد صديق لي اذهب له اصبحت احدثه تلفونيا ثم اصبح بالنت المباشر ...اصبح بدل زيارة الاشخاص مجرد اتصال بهم ...الجلسات المباشرة بالاماكن لم تكن مثل الاول فالجلوس و التجمع اصبح على النت كل فى مكانه يذهب الى ما يشاء ... هذا هو التقدم الذي جلب لنا من مميزات اكيدة لكن وفر ايضا عيوب التفرد و الاسر و العائلات المفككة .. هذا ما فعله الانسان ...

ما تحدثت عنه عن الاتصال و التواصل بين الاهل الاسر و العائلات هو الاوقع و المطلوب اولا لعودة تواصل الناس قبل ان يحدث تواصل الاغراب (ما تحدثت عنه فى البداية لان هناك من يعتبره جنانا اكيدا ) فلا يوجد اغراب عن بعض فى الدنيا كلنا بني ادمين لكننا نتقبل و نرفض افكار بعض و هذا لا يؤثر على التواصل ...
كان هناك تعبير من احد الاصدقاء علي ذات يوم قال ان نفسي حلوة و هذا لاني اقبل جميع الناس و احدثهم فى حين ان هناك بعض ناس لا يطاقوا من وجهة نظرهم ولا يحدثوهم لكني احدثهم رغم كوني ربما اكون لا اطيق فيهم اشياء ايضا لكني اعرف ان اتعامل مع الجميع فى الغالب ...
نقطة اخرى هامة دائما ما يقال اننا لا نعاني مشاكل عنصرية و لكنها موجودة جدا لا يمكن انكار ذلك او الاخفاء ... مثل علاقة المسيحي بالمسلم هناك من يتعامل بحذر و حدود و يكون يكره الاخر داخله لكن يحدثه لاننا بمجتمع واحد .. لا اقول ان الجميع هكذا لكن هناك نسبة لهؤلاء و هذا يعود ايضا للجهل و كما قلت ليس الجميع فهناك من يكن حياديا جدا مسلم مثل مسيحي مثل اي شئ اخر المهم هو الاحترام المتبادل لمعتقدات الاخر ... هناك من يرفض الاكل مع فرد من دين اخر ... هناك من يرفض الاكل مع فرد من نفس دينه لانه لا يصلي !! رأيت هذا بعيني .. هل نحاسب الاخرين و نقاطعهم لانهم يفعون خطأ ؟ بالتأكيد لا هذا لنفسه علاقته بربه و مثل هذا ربما تجد مشكلات اللون البشري و السلوك الشخصى المدمن مثلا هذا لنفسه لكنه فى النهاية بشرا هناك ايجابيات به يكفيك عدم اشراكك له خطأه و ان تحسسه به على قدر الامكان حتى يعي لكن لا توقف تواصلك معه هذا سيزيده ...
هذه دعوة مني لتواصل الجميع ببعضهم لاننا نحتاج لذلك و لان ذلك سينفعنا مهما ضر فهناك نفع..

غياب

2009-05-09T15:15:00.003+03:00

لم اكتب هنا من فترة طويلة لم اغب هكذا من قبل و لا اعلم لما هذا الغياب و لكنه لا يبشر بأمر جيد .. ربما اصبحت مفرغا او لا احمل جديدا او لا اجد جدوى للكتابة هنا مع العلم اني ما زلت اكتب الشعر لكن ليس بالمدونة ايضا ربما لان دور النشر الورقي قد حان و لله الحمد و ما زلت اكتب خرافات اخرى ربما ستصل بي لقصة او رواية او مجرد لا شئ عبث فقط الله اعلم
كنت اتمنى الكتابة و الاستمرار هنا لاني احببت هذا المكان الذي يتناول فى معظمه ذاتيتي و رغم اني املك مشاريع كتابة هنا كنت نويتها من مدة طويلة ولكن لا اعلم لما لم يحن الوقت لفعلها...ربما قريبا..
ايضا احسست ان المكان اصبح مغطى بالاتربة و قد اكتفى الزائرون منه فاصبح وحيدا ...
اتمنى العودة و لكن لا اجد ما اعود به...

ابحث عني

2009-03-06T23:02:00.001+02:00

لكم اكره هذا الغياب فهو غياب عن حبيبتي التي لا استطيع ان يمر يومي و اكون حيا دون سماع صوتها على الاقل ... عن اهلي و الحنين الى البيت فوقت الغياب جعلني اقدره ... عن اصدقائي الذين يأخدون مساحة كبيرة من حياتي فلا اعيش دون الناس الذين احبهم ... عن وسط البلد التي لا يمر اسبوع حتى اذهب لها ولو لمرة على الاقل فهي احد الاماكن التي اعشقها ... كل هذا الغياب يضاف اليه غيابي عن ذاتي فلا اجدها هي الاخرى ...
لا اعلم ما هي الحالة التي تأتيني عندما اذهب الى هناك فانا اتغير لا اجد نفسي و لا اعرفها و لا اعرف احد بل فقط انعزل ابتعد اقل من الاختلاط مع الاخرين ليس لسؤهم و لكن لاني اكتئب .. يسألون عني لما تنعزل عنا فلا استطيع الايجاب فاقول انا معكم معكم ... احببت الكثير من الاشخاص هناك و لن انساهم و ساكون حريصا على السؤال عنهم ... و مع ذلك اقترب مني احدهم فهو متوافق معي فى الفكر لذا اندمجنا سويا جيدا تلقائيا ...
كان الصديق الملازم لي فى هذه الفترة الاخيرة هو ديوان الشاعر الصديق سالم الشهباني الملح و البحر و كم هو ديوان جميل قراءته كل يوم هناك و علمت على المقاطع التي نالت اعجابي بشدة فكله اعجبني كثيرا و من معي هناك قرأه و نال اعجابه ايضا و نويت ان اعطيه لحبيبتي عندما اراها فى اول فرصة ...
بعض المقاطع من الديوان لسالم التى شعرت بها تعبر عننا اكتبها
الملح..
ادى الوجود للبحر..
العشق بينهم ازل..
و انا و انتي بينا الخوف
جعل كل الدروب ..
ملح.
-------------
انتي وانا زي الشجر..
و الريح..
واحد بيشرك فى السكك
و التاني .. واقف منكسر ..
و ف جرحه ضَل
و غيرها من المقاطع تقرئيها بنفسك عندما اعطيه لكي
من ما افرحني هناك عندما اعطوني زي رياضي مستعمل لالبسه هو شئ مقرف لكن ما ارضاني عنه و جعلني ارتديه دون الشعور بالكثير من المضايقة انه مكتوب عليه حرفي ال M و H و بينهم كلمة LOVE كبيرة كأن من كتبها من قبلي( و هو من ارتداه بالتأكيد) يعلم ان من سيأتيه بعده سيكون له نفس النصيب فى الحروف ....
دائما عندما اخرج فى اجازتي اذهب لوسط البلد اقابل اوسو نقضي الوقت فى التمشية و الحديث و القهاوي المفضلة بوسط البلد ... اسير معه بوسط البلد و انا اتخيل و اتمنى اني امشي معها ... نسير على كوبري قصر النيل و نسمع يونس و اتمنى لو تكون فتاتي معي فى هذا الوقت...نمشي سويا نغني سويا ...كلما سمعت يونس بالذات اذكر تلك الليلة حفلتنا من اجمل الليالي عندما كنا بصحبة منير واقفا امامنا يغني و يقول و انتي تقوليلي فانظر لها اجدها تكملها هي بالكلمة بحبك كانت اجمل مرة سمعت فيها الاغنية ...
نجلس على قهوتنا المفضلة وحدنا او مع الاصدقاء و اتمنى لو كانت معنا ايضا ... اؤمن انه سيأتي الوقت ليحدث باذن الله فما يعوق هذا الان هي كالعادة الكلمة السخيفة الظروف...
لا اقصد الاستغناء عن اوسو لكن اتمناها معي فى هذه الاوقات الجميلة و اوسو له من نصيب الصديق المقرب بالتأكيد لكن اريد ان احصل على نصيبها وهو الاكبر بالتأكيد و هي من سوف تشاركني كل شئ باذن الله ...
يعني عاوز ابقى انا و فتاتي لوحدنا فى المواقف دي او مع جروب اصحابنا لكن اوسو برضه ربنا يخليهولنا زي ابني برضه ..
العديد من الاشياء البسيطة هناك هي التي كانت تهون علي و تجعلني استمر متماسكا مع الاشياء الكثيرة التي تكرهني فى الحياه هناك...
اعود الى الحياه فيكون فى ذهني ان اريد ان افعل مئات الاشياء و لكني لا استطيع و لا املك الوقت الكافي فالعن هذا الغياب الذي يؤثر على حياتي ... لا استطيع رؤية كل من اريد رؤيتهم او هم يريدوني ... لا استطيع متابعة دراستي العليا ... لا استطيع ان استنشق الحرية ... لا استطيع ان اقرأ الكثير و الكثير الذي اود قراءته ...
كم يراودني حلم ان اعزل بمكان لا احد سواي فيه انا و الكتب فاعيش بها و لاقراءها اقرأ الكثير و الكثير و لا يشغلني عنها مشغلات الحياه فالقراءة لى حياه اخرى لكنها تَسرق مني كثيرا ...
اشتقت سماع منير و فيروز مدرستي حياتي ...

ان تبحث عن شقة

2009-03-04T16:29:00.004+02:00

اولا انتم تعلمون غالبا لماذا اغيب و اسف لذلك و كم اتمنى ان اكتب الكثير لكن لا يسعني لاسباب كثيرة و لكني اعود و ساكتب كل ما اريد لان عدم الكتابة يميت المدونة كما يميتني لاني اعيش بهذه الكتابات و يؤثر ايضا على زيارتي او الاهتمام بقراءة ما اكتب فهل ما زال من متابع ؟ اكتب على اي حال .....
-----------------------------------
كل شاب بعد تخرجه يحين وقت للبحث عن شقة و نتفق انه لن يقدر شاب على شراءها لذا فهي حسب مقدرة اهله متى يكون فى مقدرتهم شراءها له اما لو لم يقدروا فلن يحصل عليها قبل الكثير من الاعوام ...
و لكن عندما اتفق اهلي معي على النزول و البحث عن الشقة كانت الرحلة و البحث طويلا و لان هناك ظروف غياب لي فكانوا يبحثون ايضا فى غيابي ...
جلسنا نتفق اولا اين نبحث عن الشقة فكانت المقترحات زهراء مدينة نصر و جسر السويس و ذلك لاعتبارات انه ربما يكون عملي مستقبلا فى هذه المنطقة فاكون قريب من العمل او البحث فى الهرم و فيصل و ذلك لاعتبارات القرب من اهلي ...
اما المناطق الاخرى التي يمكن التفكير بها مثل الدقي المهندسين و امثالها هي اماكن مرتفعة الثمن و لا يوجد بها تقريبا عمارات جديدة ... اما المدن الجديدة فهي بعيدة و ما زالت غير معمرة و لن تجد ايضا ما يناسبك و تحتاج الى سيارة ..
اذن فلننظر لما رأيت اولا كانت خطوات البحث الاعلانات فى الجرائد عن شركات او مكاتب عقارية و ذهبنا بالفعل للعديد ثم اصبحت الطريقة هى النزول الى المنطقة و السؤال عند كل عمارة امامها مقاولها عن التفاصيل للشقق عنده ولاني معماري كنت ابحث بدقة و شروط و كنت اريد رسومات ايضا غير رؤيتي للطبيعة و نادرا ما كنت اجد ذلك اما عن التراخيص للبناء فلا تقلق لن تجد اي منها اصلا فهم يبنون دون تراخيص و ربما تؤخد الارض بوضع اليد اصلا و ان وجدت ترخيصا فربما لخمسة او ستة ادوار فقط فى حين ان العمارات كلها بال11 او 12 دور و رغم ذلك ستجد ان معظم شقق العمارات قد بيعت بالفعل فلا شئ يمنع ...
اما عن مواصفات الشقة المرادة فكانت 3 غرف نوم مع باقي المواصفات العادية و لن تفرق حماما او اثنين و مساحات من 100 الى 140 م2 و كنت اريدها على ناصية حيث تجد كل الغرف و الريسبشن على شوارع و بها اضاءة و تهوية طبيعية و ليست الغرف على مناور كما ستجد فى معظم الشقق الموجودة فهي بمناور اما النواصي فهي قليلة و سريعا ما تنتهي ...
اما عن الاسعار فكنت ابحث فى فئة قليلة عندما تبحث عن شقق باسعار 140 الف على اقصى تقدير فى حين انك ستجد المعظم باسعار من ربع مليون جنيه الى النصف مليون خاصة عندما اتجهت الى الهرم و فيصل لاكون بقرب اهلي فاصبح ليس سواي الا ان ارضى بشقق واجهة و بها غرف على مناور وفى ادوار عالية حتى اجد بسعر ما اريد و فى منطقة مزدحمة اكثر و هو ما لم اوافق عليه الى الان ...
اما فى جسر السويس وجدت ما اريد تقريبا و لكن بقيت بعض معوقات الاهل التي لم اعرف هل ستنتهي بموافقتهم لهناك ام سابحث فى الهرم اكثر حتى اجد ...
لا اعرف كيف يجد الناس الشقق فهي اصبحت اشبه بالمعجزات رغم انك تتنازل عن الكثير و انت تحصل عليها ايضا فما بالك لو انك تفكر فى شقة الاحلام فلتبحث عنها اذن فى المريخ ....
و بعد الحصول عليها اعلم ان هناك انتظار لاني من ساقوم بتشطيب الشقة فلن يسع الاهل فعل المزيد للابناء و لكن ما زلت بلا عمل ولا اعلم فى كم من الوقت فى العمل ساستطيع فعل ذلك اصلا ...
الله يعلم و كان الله فى عون كل من يبحث عن شقة بمواصفات بسيطة و ليست بالمبالغة ...
جعلتني هذه الرحلة ان افكر كيف ساقضي على هذه المشاكل و انا المعماري الذي سوف ابني مثلما يبنوا هؤلاء المقاولين و الذين لا يراعون الله فى اسعار ولا اخلاص فى عمل العمارات ولا بتصميم جيد او لائق ...
فى حين ان اهلي اصبحوا يتمنون لو اصبح مقاولا مثلهم لانهم يجنون من المال الكثير و الكثير ....

اهو ده اللى صار و اتي

2009-01-30T14:54:00.004+02:00

بصراحة مكنتش ناوي اكتب حاجة هنا ولا كنت بفكر فى ده خاصة ان هما يومين هدنة كده من الجيش و اللى خلاني اكتب ان اوسو صاحبي طلب اكتب و لو حتى كلمات اغنية بس و قولتله ان مفيش روح و ان لو قولت اغنية يبقى شبابيك لمنير لان هي دايما اللى كنت بغنيها هناك اكتر واحدة و فعلا الروح بتموت هناك الواحد بيتحط فى نظام كده يخلي كل حاجة منه تتمسح حياته كلها كنت بحس احيانا انه فقد للانسانية بس مع الايام الواحد بيتعود و كمان عشان فى زمايل كتير و كلنا فى حال واحد فبنساند بعض و بعدين تشتاق للناس و الشوارع و لكل حاجة لانها بتفقد تماما ... كنت كل يوم بعد ما نخلص اعدي على كباين التليفون يمكن افوزلي بمكان قريب فى طابور المكالمات عشان اعرف اكلم امي بابا حبيبتي اصحابي لكن فى الغالب طبعا مفيش غير الحسرة .. وكوني بعمل كده لان الروح برضه مش انتهت لكنها اندفنت و هي حية لدرجة اني كنت بكلم نفسي كأني بكلم حبيبتي ادامي او بكلم اي حد ...
يمكن الروح اتجددت اكتر لما عرفت اطلع الاجازة دى واكلم حبيبتي براحتي و اكلم و يكلمني كل اللى بحبهم و بيحبوني و اعدي على وسط البلد اكتر الاماكن المتعلق بيها و اللى بتدي روح برضه و الساقية الحاجات دى بتجدد نفسي ....
اشتقت اني اشوف حبيبتي و اقابلها ... اشتقت اسمع اغانيا منير و الشيخ امام و اي حاجة بحبها ... اشتقت الكتب و معرض الكتاب اللى غيبت عنه ... اشتقت كل حاجة و معرفتش اشبع منها فى الكام ساعة اللى طلعتهم طبعا ...
طبعا الكل بيقول اسمريت و بقيت اقرع و صوتي اتغير ... حقيقي الجيش بيغير و ان كنت اتغيرت ظاهريا اتمنى متغيرش داخليا و اكون زي منا و ده اللى بحاوله دايما و ان الجيش ميأثرش عليا كتير ...

كارهك يا وداع ولا بديل..

2009-01-13T00:24:00.000+02:00

اول بوست للعام الجديد الذي بدأ مأساوي لما يحدث فى ارض غزة و لا اقول كلمات اخرى فيكفي ما قال .. فنحن لا نفعل سوى الكلام ...
امضي الايام الاخيرة قبل الرحيل فى فعل ما احب و ما اريد و اقابل من اريد رؤيتهم من اصدقاء احبهم قبل ان يحين الموعد و فى الايام السابقة اخذت اقرأ روايات .. قصص..شعر .. و لكن قراءاتي لا تستمر متواصلة اي لم اعد اقرأ كثيرا كالسابق و لكن منذ يومين وقفت اختار اي رواية اقرأ مما لم اقرؤه بعد .. فاخترت الاختيار الاصوب الذي جعلني اقرأ الرواية فى ليلة واحدة لم استطع ان اتوقف فيها و كنت اريد قراءتها لاخرها .. شدتني و قليلا ما يحدث ان اقرأ رواية كاملة فى تواصل فى ليلة واحدة غير اني كنت لم اعط وقتا كبيرا للقراءة فى هذه الفترة ولا وقتا كافيا حتى و لكن الرواية جذبتني من اول سطر الى اخرها .. و احببت نفوس شخصيات الرواية .. احببتهم ذاتهم .. احببت الباشكاتب و سالم و لبنى ثلاثتهم .. احداث الرواية التي تمس نفوسهم و ربما نفسي .. هي رواية نقطة النور لبهاء طاهر ....
ذهبت اول الامس للاسكندرية مع اصدقاء الكلية كان ينقصهم اخرون اريدهم معنا فى الرحلة لكن الظروف منعتهم .. قضينا يوما وليلة جميلة ... بحر و حديث و اكل و نزهة و سينما ...
بعد الغد باذن الله اقابل اصدقائي الاعزاء فيما يشبه حفل وداع ايضا كما قالت سلمى فى ردها في البوست السابق مع الاحتفال بعيد ميلاد اوسو و هم يعلمون انهم اعز الاصدقاء هم و اصدقاء الكلية...
بالطبع لم انسها قط هي حبيبتي رأيتها منذ عدة ايام فيما يشبه الوداع ايضا و تمنيت لو اراها كل يوم كما هي تتمنى لكن هي الاقدار التي تقف دائما لكن هناك عودة و قريبة باذن الله فلا تحزني ساعود.. و يكفي اننا نرى بعض دائما داخل قلوبنا..
اخيرا وداعا للمدونة التي كثيرا ما افادتني و اخرجت ما في نفسي و لكن اقول ايضا ساعود باذن الله لن اغيب طويلا...

2009 داخل الخدمة الوطنية .. هل من مزيد؟

2008-12-28T00:36:00.003+02:00

- راس السنة و بداية سنة هجرية ... سنة جديدة اخرى بنعيشها و المرة دى قررت اكتب بوست يكون فى كل اللى عاوز اقوله عن السنين اللى فاتت و عن السنة الجاية دى و الامنيات و الواقعيات المفروضة ....

- قبل كده مكنتش بكتب عن راس السنة (ده فى المرتين اللى فاتوا يعني) او عن السنة الجديدة الا بعد ما تبدأ .. يعني 2007 قولت ان مفيش جديد على مستوى شخصى او مصري او اى حاجة كان عادي جدا
الجملة المفيدة اللى قولتها و اكيد لسه هقولها كل سنة واحنا زى ما احنا ما دام لسه محصلش مننا اللى يغيرنا ويغير الدنيا
- جيت اللى بعدها فى 2008 طبعا بدأت سنة بموقف وحش حتى مرضتش اقوله ساعتها لكن المهم بعدها حضرت حفلة منير و مش فاكر السنة اللى قبلها قضيت راس السنة مع منير برضه ولا لا بس انا بحب ابدأ السنة مع منير على الرغم من ان الناس بتكون فيها بتشرب انواع مختلفة لكن المهم منير و اهو بنحاول نبعد عنهم....
- كانت امنياتي التخرج و الخروج للعمل و اهو اتحقق الجزء الاول فعلا باني اتخرجت و ده كان شئ منتظره جدا لكن للاسف الخروج للعمل فعليا مش هيحصل الا بعد سنة من تقديم الخدمة الوطنية الاجبارية - اللهم لا اعتراض-
- بقالي كده 3 سنين مدون بالتمام لاني بدأت مع بداية يناير 2006 و فى السنين دى ادعي من الادعاء اني اتغيرت او حصلت يعني تغيرات فى حياتي بالتأكيد و للاحسن.. انا بشوفها كده .. 3 سنين عدوا و اهلى ميعرفوش حاجة عن اللى بكتبه هنا .. مع ان حال التدوين اتغير و انا مريت باوله لما كان كله شغال و موضة طالعة و خوف من المدونين و كل الحاجات دي لكن دلوقتي خلاص مبقاش التدوين زي ما هو يمكن فترته خلصت او الفيس بوك خد من حقه ... يعني تغيرات كتير الا اني لسه مستمر لاني محتاجها محتاج اكتب و ادون حتى لو محدش بقى بيتابع كمان
-صحيح في معدل انخفاض تدويني ماشى من سنة لسنة لو بصيت هتلاقيني كتبت 75 فى السنة الاولى و فى التانية 44 و السنة التالتة 38 و ده معناه احتمال اني ابطل قريب و اخلص لكن يمكن ارجع و اكتب برضه الله اعلم .. صحيح دلوقتي فى سبب هيبعدني لكن هرجع و اكتب كل ما احب اعوز اكتب ...
طبعا عدد الزيارات اللى عدى ال70 الف ده عدد خيالي مكنتش اتصوره هو اكيد مش رقم دقيق معبر عن زيارات حقيقية يمكن تصادف ناس تيجي غلط ولا حاجة بس هنا قدر كبير من الناس اعتقد زاروا مكاني المتواضع فاشكرهم جدا كلهم بجد ...
- فى حوار مطول حصل قريب مع الصديق الاقرب اوسو عن موضوع معقد و عاوزني احكم فيه فجأني اني فى الواقعية دبلوماسي و بدي ردود ديموقراطية مبتزعلش حد فى حين اني هنا فى المدونة بقول اراء حازمة اقوى و فاصلة و مكنتش منتبه لده الى حد ما ...و لذلك طلب مني احكم زي ما بحكم فى المدونة و بقول فيها و لما قولتله كانت الواقعية اللى بقولها فى مؤلمة و صعبة الحدوث و ان ممكن فى بعض الامور الدبلوماسية دى هى الحل الافضل عشان منخسرش كتير خاصة اما نكون خسرانين اصلا يعني نحاول نطلع باقل خساير ....
- عدت شهور على التخرج و على حياتي اللى اتنقلت من طالب لمهندس دي حاجة كويسة لكن كوني كنت عايش فى حياه و مع ناس و دلوقتي بقيت عايش لوحدي او يعني مع اللى هشتغل معاهم لما اشتغل و ان الناس دول كنا طول السنين مع بعض و بنقعد مع بعض اكتر ما بنقعد مع اهلنا... كانت دنيا تانية راحت خلاص ده شئ حاسه مؤسف و ادينا بنحاول نتواصل مع بعض بس اكيد زمان حاجة و دلوقتي حاجة ....
- دبلومة الدراسات العليا شئ مهم خاصة كمان اني لو مكنتش دخلتها كنت هنسى الهندسة و اني مهندس اصلا و هي بالحق مفيدة اتمنى النجاح و الاستمرار فيها و اهي كمان هتهون فى سنة 2009 دي.... ومن خلالها تعرفت على ناس جديدة دخلت فى حياتي و ده شئ كويس برضه لاني بحب اعرف كل الناس...
- دكتور عندنا ملوش لازمة اسمه ايه المهم كل ما ناس تقوله ننزل نصلي لان وقت محاضرته بيضيع العصر كله و هو كده كده بيضيع وقت فيصلوا و يجوا يقولهم لا مفيش صلاه و بعدين افتى الفتوى العظيمة ان العلم اهم من الصلاه و ان لما الواحد يقضيها فى العلم و بس كده هيموت شهيد و انه مقتنع انه هيموت شهيد عشان كده و مش مهم بقى صلاه و لا غيره ... حقيقي فرسني...
و عشان مبقاش بقول امثلة لدكتور سئ بس فعندنا دكتور بهاء بكري من اكبر دكاترة العمارة و مش هقول تاريخه الطويل لكن هقول بس انه دايما راجل متأمل و بيبص للقران فى كل حاجة بيعملها حتى انه اشرف على رسايل دكتوراه لم تحدث من قبل و هي رسائل عن العمارة و القران .... هذا من الاساتذة التي تستحق ان تقول بشرف ان هذا استاذي حتى لو تعارضت في اشياء بسيطة معه....
- حصل كمان فى السنة دى حاجة مهمة جدا جدا و هي اني وقعت فى الحب و من اول مرة اشوفها و ده كان يوم تاريخي الا و هو يوم 29/8 و اعتبر ان حياتي تغيرت من ساعتها لاني مبقتش عايش لوحدي و بقى عندي حد فى حياتي يهتم بيا و اهتم بيه لاقصى درجة بل و اعترف حقيقي اني بحس باهتمامها حتى لو بعيدة عني و فى ظروف فانا كل شئ لها و هي كمان كل شئ ليا .. بعترف انها بتهديني ايوه دى اكبر نعمة من ربنا بتمنى تدوم عشان حبها حقيقي و بالتفاصيل بتهتم بيا و بتسألني عن الصلاه و حقيقة لو تعرف اني كنت مقصر قد ايه فى الموضوع ده و ان فى فروض مني ساعات بتفوت او بفوتها بمعنى اصح لاسباب واهية و لكني بحاول الالتزام و مبسوط لانها بتساعدني في ده من غير ما تحس ...
و عشان كده ده تمني اخر بان السنة الجديدة ميفوتش فيها فرض واحد حتى الفجر اللى صعب لكن نحاول باذن الله...
و ليها هي كمان بتمنى اني دايما اقدر اسعدها و ارضيها زي ما هي بتعمل و يا رب دايما نسعد بعض و انا لا انسى جملتها احلى جملة سمعتها فى حياتي و مكنتش اتصورها بجد ربنا يخليكي ليا و مش هقولهالكم ......
- بتمنى ارتبط بيكي رسميا فى اقرب فرصة ممكنة ...
- بتمنى اشتغل طبعا لان ده شئ اساسي عشان الواحد يعيش مش عشان الم فلوس لكن عشان اعيش و عشان ساعتها هقدر احقق الامنية اللي فاتت ... فانا بطبعي و مع كل عام جديد باكد اني باشتغل و بجيب فلوس عشان اعيش الحياه نفسها يعني اشتغل اللى احبه و فلوس عشان اعيش مش اشتغل للفلوس و احوش طول عمري و الحياه تضيع مني...
- جهزت ديواني الاول و شايف انه يستحق النشر اتمنى متكونش نظرة وهمية ...عاوز انشر و اعرف رأيي الناس و يكون الاخير حتى مش مهم ... هاحاول ادور على من يتقبل قراءته و نشره من دور النشر اتمنى..
- معرض الكتاب هو حدث مهم في حياتي كل سنة و لازم بروحه دايما و اقابل اصحاب كتييير هناك و اجيب كل الكتب اللى عاوزها اقعد سنة اقراها لكن تقريبا السنة دى نظرا للظروف دي انا مش هشوف المعرض ده اصلا ..يا رب اعرف...
- فى مشوار منير موضوع استفزني جدا المقصود بيه الحرية فكان بيقول ان الحشيش يبقى بيتباع عادي فى اي حتة و مصرح بيه لان هولندا مثلا فيها كده و دي حرية و كمان هيبقى مكسب للحكومة .. ما علينا بباقي اللى قاله يعني
المهم ده طبعا مع تعارضي و استنكاري الشديد ليه الا انه نبهني لحاجة مفيدة و مكنتش فكرت فيها و هي ان الانسان مينفعش يكون فى حرية مطلقة و ان اللى بينادوا بده فيه ظلم كبير ليهم و ضرر اكبر عشان كده ربنا خلقنا باحكام و محرمات منعملهاش و ان الدين هو مقوم اساسي للانسان فيحطله سقف كده لمصلحته طبعا فالحمد لله...
- طبعا اللى حصل فى غزة من اسوء الاحداث خلال السنة و لا نملك سوى الدعاء لهم و مهما تحملنا من حزن لهم و عليهم و مهما حدثت من مظاهرات لن تفيد و لن تنفع و لا اعرف ما هو ينفع و يحدث تغيير حقيقي لكن من قلبي مقدرش اقول غير اسف يا فلسطين و اقول يا رب....
- 2009 هو عام تقضية الخدمة الوطنية اتمنى ان يحدث فيه شئ اخر كالعمل او الارتباط الرسمي رغم الاحتمالات الضعيفة جدا للاسف...

من اجل التدوين فى تونس

2008-12-25T00:20:00.001+02:00

----------------------
تم تحديث التاريخ لليوم

فضفضات ....

2008-12-08T11:43:00.000+02:00

- اولا كل سنة و كل الناس طيبين و عيد اضحى سعيد عليكم يا رب

- حوا اتزفت من غير طرحة من غير مهر و شرط فى عقد
الجملة دى من غنوة حوا و ادم للمطرب الجميل علي الحجار(و الشريط جيد جدا اسمعوه) و اجمل ما فيها انها بتكلم عن العلاقات و الجواز انه من غير شروط و مهر و مؤخر والكلام ده و هى دى الفكرة
احنا فى زمن الجوازات كلها بالصعوبة دى عشان كده بتكتر المشاكل او بيقل الجواز اصلا
صحيح الزمن ده محدش مأمن حد عشان كده كل واحد بيفكر فى الضمانات المادية من مهر و شقة و مؤخر مع ان الفلوس مش ضمان ابدا لكن اهو بيشوفه كده لان الحياه بقت مادية للاسف
يعني انا هعذر كل اللى بيفكر كده و بالضمانات دى بس انا مش كده انا لسه مش عايش فى الدنيا دى و الحمد لله و لا عاوز اعيشها
- مفيش كسوف فى المحبة ولا للمحبة شروط
هنا منير قالها بشكل اعم و قوي جدا بقى
يعني اللى هو من الاساس مفيش اى شروط بقى لا مادية و لا معنوية و لا عائلية و لا اى حاجة للحب خلاها الحرية الكاملة اللى مفهاش كسوف كمان
و المشكلة هنا هى وجود الحب الحقيقي الفعلي اللى يقال انه مبقاش موجود او نادر و انا حاسه موجود و انا عايشه كمان الحمد لله بس في خوف بسبب الظروف اللى بتعوق احيانا و من المستقبل عموما لكن اكيد متمسك بيه جدا و ده اللى مخليني صابر و بامل انه مع الوقت كل حاجة هتتحسن
- و ده حب ايه ده اللى من غيييير اي حرييية
يمكن انهاردة اكتر يوم حاسس اني فعلا يونس(اغنية منير) و اننا فى حب اوي فعلا لكن مفيش حرية و كل الظروف ادامنا فى الفترة دى برضه عارف ان الظروف دى بعضها هتنتهي بعد فترة معينة و بعضها هنقضي عليها سوا مع بعض لكن دى على مدى يخليني فى الفترة دى تعبان حقيقي بس مش فى ايدينا حاجة
- ربما يحصل غياب عن المدونة و يمكن حاجة ترجعني تاني بعد فترة قصيرة الله اعلم لكن هناك غياب قريب هيحصل اجباريا لسبب اجباري دخل حياتي و هو من الظروف اللى بتجبرني على الحياه زى ما هي عاوزة مش زى ما انا عاوز
- على قد ما حبينا و تعبنا فى ليالينا الفرحة فى مشوارنا تاني هتنادينا
طول ما القلب صافي بحر العشق وافي كل عذاب الدنيا هيروق بكرة لينا
و يرجع على الحجار ليترك الامل باغنيته على قد ما حبينا و زى ما قال فى الاغنية الجميلة جدا دى ان ان شاء الله الفرحة هترجع و الدنيا هتروق
يا رب
يا رب

لازم تشوفوا عين شمس

2008-11-28T02:09:00.003+02:00

تحديث
الفيلم جميل جدا و جماله فى بساطته هو فيلم مصري جدا جدا و ده اللى عجبني فيه يعني الفيلم مش معجزة ولا عبقري لكن عبقريته فى بساطته المتناهية هو يشرح الحياه المصرية بتفصيلها الممل و المحبط و الجيد و المستمر باي ظرف

-------
فى ظل وجود الافلام السينمائية اللى كتير منها عبارة عن هلس و اى كلام يكون هناك بعض الامل و احب اذكر فيلم زى انهاردة تشوفوه لانه حلو جدا فعلا لكن دلوقتي كلامي عن فيلم عين شمس للمخرج ابراهيم البطوط والفيلم طويل مستقل وعشان كده اتعمل مشاكل على عرضه فى سينمات مصر عشان اللى شغالين فيه مش فى النقابة ومفيش سيناريو اتقدم والروتين ده لكن سمعت انه اخيرا وافقوا انه يتعرض

المهم ان الفيلم برضه اتشاف فى العالم و شوفوا حصل ايه
جائزة أحسن فيلم في مهرجان تاورمينا في إيطاليا
جائزة أحسن فيلم أول في مهرجان روتردام للأفلام العربية

واتعرض فى المهرجانات دى
مهرجان هامبورج الدولي للسينما (في المسابقة الرسمية)
مهرجان لندن الدولي لافلام السينما
مهرجان قرطاج السينمائي (في المسابقة الرسمية)

و ده وحده يشرف مصر اللى مكنتش عاوزة تعرضه

الفيلم هيتعرض فى معهد جوته فى مهرجان القاهرة للافلام المستقلة يوم التلات 2 ديسمبر
الافلام هتبدأ من 5 ل10ونص هو هيكون الفيلم الاخير يعني من الساعة 8 ونص مثلا
العنوان 5 شارع البستان التحرير- وسط البلد

نصيحة ان كان حد لسه بيتابع هنا يعني انه يجي يشوف الفيلم اكيد يستاهل و اقروا عنه على النت

متحف تاريخ العالم... هدم لتاريخنا و كياننا

2008-11-19T03:55:00.000+02:00

تحت المسجد الاقصى تم عمل نفق الكل يعلم هذا و لو بحثت على الانترنت على ما يحدث ستعرف ان هناك نفق يعبر تحت المسجد لكن لما هذا النفق؟
هذا النفق يمر به الناس لمدة حوالي 50 دقيقة تمر كأنك تتابع فيلما عن الحياه من بداية الخلق الى نهاية الحياه و القيامة من وجهة نظر الاسرائيلين بالطبع .
يوجدون شيئا بالاسفل ذو اهمية عظمى بالنسبة لهم بالطبع لكن هل سيستمر ما هو اعلاه ؟!!!

لحد امتى؟ اتخنقت بجد

2008-11-11T02:06:00.001+02:00

لما كنت صغير لحد اولى ثانوي كنت مبخرجش من البيت مع اصحاب او غيره قلت معلش استنى لما اكبر

اما كبرت و بقيت بخرج كنت مقدرش اتأخر عن 12 و بقيت بزودها لواحدة او اتنين و بتعدي ساعات و ساعات لا لحد دلوقتي و كنت بقول معلش اما اخلص هبقى حر و اديني خلصت و متنيل مبقتش حر
اما كنت بقرر فجأة انا و قرايبنا الشباب اننا نخرج او نسافر فى نفس اليوم او اليوم اللى بعده او مع اصحابي كانوا يقولولي لازم يبقى عارف من زمان قبلها بكام يوم و نفكر فيها قلت معلش بكرة استقل
اما قولت عاوز اتابع الادب و اهتم بيه قالوا خليك فى دراستك احسن قلت معلش خليني بيني كده لحد ما اخرج من البيت ده
اما كنت عاوز اتعلم العزف على اله قالوا خليك برضه فى دراستك او اتعلم حاجة كورسات للدراسة برضه قولت استنى اما اطلع من سيطرتهم
اما اتعرفت على ناس كتير و مش من الكلية فضلوا ورايا ان اى حد من برة الكلية يبقى اكيد مش زيك و متعرفوش و متضمنوش ومتصاحبوش و حرس ايه التفكير ده!!!!!!
نفسي يعاملوا كل الناس على انهم مش حلو و وحش لا انهم بشر بشر و بس
اما حبيت اتكلم فى السياسة قالولي بس اوعى و سكت برضه لحد ما اخرج منهم او بتكلم فى السر يعني
اما عرفوا انى بحب و اعتبر مرتبط قالولي لسه على الاقل سنتين ايه اللى فرضهم سنتين يعني ما انا اتجوز دلوقتي لو عاوز هو مش انا بقيت فى سن رشد و متنيل مسئول
اما ابديت استعدادي لزيارة جدي كتير و اني اروحله و هو قاعد لوحده و بيتمنى اني اجيله بالذات او اى حد و هما يقولولي خليك احسن او خليك انت عندك كلية او شغل مع ان ممكن ميبقاش عندي حاجة بس اهو كده لمجرد خلافات فى العيلة ممكن تزول لو هما فكروا و عاوزين
فضلوا زن فى دماغي 3 شهور اني اشتغل و انا عند فيهم مشتغلتش و ودوني لمكتب يعرفوه رحت مرة و قلتلهم اه هاجي و نفضتلهم عند برضه فى اهلي و مستني هشتغل لما اعوز و لما دخلت دراسات عليا قررت ده بنفسي و فجأتهم عشان انا عاوز ده مش عشان مجرد ابسطهم
و اديني بعد كل ده مستني برضه اني اشتغل و يكون لي بيت مستقل و اسرة تكون متفهماني و بنفس فكري و راضية بدماغي اللى مغلباهم دى عشان ساعتها نعمل اللى عاوزينه و محدش يقدر يكلمنا نبقى معتمدين على نفسنا تماما
و غير ده كتييييييييير اخرتها ايه و امتى؟؟؟؟؟؟؟؟؟؟؟؟؟
و قال ايه عاوزين يعلمونا الاعتماد على النفس طيب ازاي يعني اما هما مش فاهمين اصلا

نتيجة للى بيعملوه ده
هيجي اليوم اللى يعرفوا فيه اني مدون من وراهم بقالي 3 سنين و بقول اللى عاوزه و اللى مبيسمعهوش مني لانهم مسبوش ليا المساحة للكلام بحرية
هيجي اليوم اللى يلاقوني فيه بقول اراء انا مصدقها و مصر عليها لما بيسمعوها مني بيفتكروه كلام عيال و اهو هيتغير
هيجي اليوم يعرفوا اني نزلت من وراهم مظاهرة وحيدة لاني كنت عاوز ده و كان عندي دافع
هيجي اليوم يعرفوا اني هربت من المدرسة فى يوم مع اصحاب الدرس اللى هما اختاروهم اخد معاهم الدرس ده
هيجي اليوم يعرفوا اني كنت بسافر من وراهم لاني مقتنع بده و لاني حر

نفس السؤال اللى هموت بيه اكيد و اللى انا مقتنع بيه برضه ان الحياه مش تتعلم عشان تشتغل و تلم فلوس و تجوز و تخلف و مت بالرسالة العظيمة كده لو دى الحياه مش عاوزها

-----------------------------------------------------------
رسالة خاصة
اتمنى تكوني جنبي دايما انتي اللى هتقدري تعيشيني و تخليني اكون انا انا زي منا عاوز و تساعديني

تضامن

2008-10-31T00:28:00.000+02:00

تضامن اول
قضية نهي رشدى قضية التحرش التى تم الحكم بها على المتحرش ب3 سنوات و 5 الاف جنيه الان تعود القضية بسبب محامية تطلب الاستئناف لصالح المتهم و الحجة ان نهى طلعت اسرائيلية !!!
http://www.almasry-alyoum.com/article2.aspx?ArticleID=184484&IssueID=1209

و هنا لنا وقفة
يعني لو هى اسرائيلية يبقى حقه يمد ايده ولا يتحرش بيها؟؟
طيب و هو ماشى فى الشارع كده و لا عارفها اصلا يعني هيعرف ازاي انها اسرائيلية فيلا نتحرش بقى بيها
ده طبعا لو هى اسرائيلية لانها طبعا مش كده و هى ردت و قالت انها من اب فلسطيني و انها مولودة فى ليبيا كمان و كون ابوها من عرب 48 اللى ليهم جنسية اسرائيلية بس دول عرب زينا و مظلومين مش اسرائيلين
اكيد مش من حق اى حد يتحرش بحد بحجج انها لابسة قصير او انها من دولة اخرى ولو اسرائيل حتى او انها من ديانة مختلفة ولا اى حاجة تسمح بكده
عاوزين قوانين حاسمة فى الموضوع ده

تضامن ثاني
حادثة مترو راحت بسببها بنت عندها 25 سنة و ده لان (باقتباس من المصري اليوم ) أن السائق أغلق الباب بصورة سريعة علي قدمها اليسري في حين كانت هي في الخارج، وأن القطار سحبها ولم يتوقف رغم سقوطها علي القضبان
و النتيجة البنت اتقطعت و بعد ما قريت المقال ده من كام يوم
http://www.almasry-alyoum.com/article2.aspx?ArticleID=183577&IssueID=1203

يوم ما قريته انا قريت الخبر من هنا و بعدها على طول معملتش غير انى رحت قافل الكمبيوتر من غير ما اقفل اى حاجة كنت فاتحها و رحت قاريلها الفاتحة و داعيلها و داخل نايم
اى تعويض ممكن يكون لاهلها و فين المحاكمة للسواق و المسئولين عنه و الوزير نفسه له من المسئولية لازم يكون فى حل و موقف لحاجة زى دى

تضامن ثالث
مدرس قتل طالب لما ضربه شلوت فى بطنه اقرو الخبر
http://www.al-jazirah.com.sa/87103/ms7d.htm

المدرس قتله خطأ و مكنش قاصد غير الضرب طيب برضه مهو الضرب ده ممنوع تماما حرام يعني وبعدين اهو مات دلوقتي المدرس ده هياخدله كام سنة لقتل خطأ و شكرا طيب و اللى مات ده و اهله
طيب فين العقاب بجد للمدرس و المدير و الوزير برضه كمان

احداث مؤسفة كلها يا رب تترد الحقوق

تحرش

2008-10-23T01:46:00.000+02:00

حوادث التحرش كترت و نسبة التحرش بقت عالية فى البلد و مع انى رجل الا انى عمري ما فكرت حتى اعاكس واحدة ولو بكلمة مقدرش
عشان كده الرجال اللى بيقوموا بالتحرش هما مش رجالة ولا بني ادمين و لا حيوانات هما ايه بقى معرفش
بس دول تتحمل مسئوليتهم البلد عشان مشكلات احد انواع الكبت عند الشعب و هو الكبت الجنسي و برضه هما الاشخاص نفسهم دول عليهم مسئولية و عشان كده برضه ليهم حل و هو زى ما بيتعمل فى طب بيطري للحيوانات

كون ان يحصل اول محاكمة لقضية تحرش دى خطوة كويسة جدا احتمال تقل من التحرش بنسبة كويسة و الحكم ده كان عادل و بجد دى خطوة ايجابية
الموضوع محتاج كمان توعية و حل مشكلات الشباب و تحمل مسئولية لان اللى بيتحرشوا دول غير مسئولين عن اى حاجة فى الدنيا

بالمناسبة بموت من الغيظ كل ما اروح اركب المترو و الاقي رجالة راكبين عربية سيدات سواء الدائمة او حتى التاسعة بلاقيهم من السادسة فى رجالة و قبل كده كمان و دول برضه مش رجالة ايوه مش رجالة مش واثقين فى رجولتهم و الا ايه اللى ركبهم مع الستات و لا اى عذر منهم هيخليني اقول العكس وده برضه لوحده بيعتبر تحرش

احسن فرقة ( من تكويني الخاص)

2008-10-19T21:44:00.000+02:00

بيانو و اورج فتحى سلامة فرقة شرقيات فتحى سلامة
ناى و كولة عبد الله حلمي فرقة محمد منير
عود حازم شاهين فرقة اسكندريللا
اليكترك جيتار اوسو فرقة نغم مصري ( و فرقة افتكاسات سابقا)
كمان محمد مدحت فرقة افتكاسات
كمان محمد سامي فرقة الدور الاول و فرقة بشير (و فرقة بلاك تيما سابقا)
ساكس نور عاشور فرقة رسالة وفرقة الدور الاول
درامز بوب فرقة وسط البلد و فرقة الدور الاول
بركشن ميزو فرقة وسط البلد و فرقة الدور الاول او هاني بدير فرقة افتكاسات و فرقة وجيه عزيز

احسن فريق حاليا افتكاسات و شرقيات فتحي سلامة
بفكر اكتب بوست عن كل فريق اعرفه و سمعته كويس اتكلم برؤية نقدية خاصة بيا بما انى سامع و عارف كويس يعني احتمال اعمل كده قريب

تجربتي

2008-10-14T20:40:00.001+02:00

طول السنين اللى فاتت عايش فى وسط البلد تقريبا هى معظم خروجاتي و قهوة الندوة الثقافية و قهوة التكعيبة و قهوة البورصة هما اكتر 3 قهاوي بقعد فيهم

و طول الفترة دى قابلت ادباء و كتاب و شعراء و عرفت دور نشر و مكتبات و احتكيت بكل دول الى حد ما و عرفتهم كويس و نشرت كمان عمل واحد مع مجموعة شباب و اتمنيت انى انشر ديوان لكن ملقتش الفرصة لسه و ناس تقولي جميل و ناس تقولي وحش و ناس تقولي لسالك شوية و انا بكمل بدماغي و لسه برضه مع الشعرا و الكتاب و الناس اللى بحبهم و حاسس انهم بيحبوني
و بعدين احتكيت بغنا الشوارع و الفرق الموسيقية اللى بتحاول تعمل مزيكا بجد فرق وسط البلد و بلاك تيما و نغم مصري و افتكاسات و فتحى سلامة و كتيييييييير اوي اخرهم ديما و بركة و مايند و عرفت من كل الفرق تقريبا و حضرت للاغلب كمان و اتمنيت ان اكتب حاجة تتغنى من الفرق دى و عبد الهادى قاللي فى حاجات من كلامى تتغنى بس لحد دلوقتى محصلش بس فعلا اغلب اللى بيتغنى مش كله بيبقى كلام عننا فعلا و غنى للشوارع مش غنى بحبك عشان بحبك و بحبك و كله كده و بس
و بعدين عرفت السينما المستقلة و الافلام القصيرة و حضرت عروض افلام كتير منها و تابعت و كنت فى مشروع لفيلم كمان لكن لسه متمش قولوا يا رب و مع ذلك ملقتش الفيلم اللى يحسسني انه مستقل و انه مختلف الا نادرا اوي و مفيش ولا فيلم بيحكي عنا زى ما بيقولوا ولا فيلم لحد دلوقتى حسسنى بكده و نادرا ما تعجبني افلام اذكر مثلا فيلم ايثاكى و فيلم انهاردة 30 نوفمبر
و بعدين تابعت المسرح و حضرت بتاع 5 مسرحيات او اكتر شوية مش كتير يعني الصراحة لكن اهتميت بيها برضه و برضه دخلت مشروع كده مع ناس و لسه متمش قولوا يا رب
كل ده مع دراستي العمارة اللى اتمنى انى احقق شئ معماريا كمعماري و اديني دخلت دراسات عليا عشان اكمل قولوا يا رب اوصل كما اتمنى تحقيق المجالات الاخري المختلفة التى تابعتها دى فى حياتي و انى اشوف نتاج فعلي للى بحاول اعمله
لانى اعترف طبعا و بصدق ان كل دى يمكن محاولات لكن لحد دلوقتى يعتبر معملتش حاجة
قولوا يا رب

لقطات

2008-10-07T15:44:00.002+02:00

- مسلسل الحرائق ما زال مستمرا اقوى من كل مسلسلات رمضان و اكثرهم واقعية

بعد حريق المسرح القومى حريق 3 مصانع فى غزل المحلة و 5 مصانع بالنزهة الجديدة
اتصلوا و خمنوا اين الحريق القادم ........انتظروا الحلقة القادمة .........

- نجاح مسلسل الدالي ليس لشئ الا انك حتى لو فتحت الحنفية هتلاقى المسلسل شغال فهتشوفه هتشوفه

- اغنية اصالة بقى طبيعي جميلة بشكل غير طبيعي و تخليك تفرح

- البومين لفتحى سلامة هتسمع مزيكا حلوة اوي بجد
http://www.mediafire.com/?l4njtyymtmz
خاصة مقطوعة موود بسمعها على طول بحبها اوييي
http://www.mediafire.com/?oogujuxnio5
اكيد كل الشكر للى رافعهم لانه مش انا

- عمرو سلامة مخرج متميز شفت افلامه القصيرة و عنده هدف فى شغله عشان كده فيلم زى انهاردة متوقع يعجبني عاوز ادخله

- اخويا فى تالتة اعدادى قالوله فى البيت هتاخد درس رياضة مع انه شاطر لوحده و هو حتى مكنش عاوز و كمان المدرسة عنده معظم المدرسين كويسين (ما عدا طبعا اللى حكيتلكم عنه قبل كده من فترة ) و لما عارضت و قلت الدروس سبب من اسباب الفشل سكتوني

- خروج ابراهيم عيسى شئ كويس جدا و موقف ممتاز من مبارك و لو انى كنت مستغربه

- حال البلد كل شئ فيه بيخليني احس باكتئاب منها يعني عيلتين يقتلوا فى بعض فى حلوان و حرايق مستمرة و ليه و منين مش عارفين و تلوث لا نهائي و منطقة معرفش ايه بقت عايشة فى صرف صحي و كل ده و احنا ما دام فى بيوتنا و بيوتنا سليمة خلاص تمام مش هنتحرك

- البلد كلها بتشرب سجاير او شيشة او حشيش او خمور او ممكن كذا حاجة طيب ليه و ليه قليل اما الاقى حد مبيشربش ولا حاجة كده زى حالاتى و لا عمره هيجربهم حتى بحس ان انا اللى شاذ عن القاعدة بس مبسوط و مصر على ده

- لما البيت عرف انى بحب حسسونى انه غلط و مش وقته قلتلهم انسوا مفيش حاجة بس انا بحب برضه و براحتي بعيد عنهم

- الشاعر السوري ادونيس و الاديبة الجزائرية اسيا جبارمرشحين لنوبل السنة دى هل حد منهم هيفوز ؟ طيب فى اى حال انا عاوز اقرالهم هل فى كتب ليهم فى مصر؟

- رواية وردة لصنع الله ابراهيم حلوة اوي مع انى لسه مخلصتهاش بس حبيتها

- موقف البوست اللى فات لو محدش قراه يقراه برضه و يفكر لو مكانى هيعمل ايه لان ده علمني اكلم كل البني ادمين كبني ادمين و بس

موقف

2008-10-05T16:38:00.001+02:00

كنت مستعد امبارح ليوم جميل بحفلة بلاك تيما و قد كان و فى اخره قابلت انا و اوسو صاحبي مدونة عطشان، شاب ظريف اتكلم معانا و كلمناه بتلقائية من غير ما نعرف بعض و كان ماشى بعصاية و بيتسند لانه عامل حادثة فى رجله كبيرة و بعدين كنا خارجين و خدناه يخرج معانا من المكان و صعب علينا الصراحة من اللى هو فيه مع ان هو كان عادى بيضحك و يهزر وقولنا هنوصله لحد ما نسيبه مع حد او يروح و نمشى و ده لان مورناش حاجة و لانه شخصية ظريفة يستاهل نقعد معاه و نعرفه و لان اكيد بجد صعبان علينا قبل اى حاجة

رحنا قعدنا معاه على قهوة كان مستنى واحد صاحبه و قعدنا نتكلم و عادى جدا فل الفل لحد ما جه صاحب ليه و مشينا و بعد ما سيبناه لقيت اوسو كانوا اتكلموا مع بعض لوحدهم و انا مسمعتش فبيقولي بعدها بقى
ان الشاب ده طلع بهائي و عيلته كلها كده كانت مفاجأة طبعا و معرفتش اقول ايه و هل نقاطعه ولا نكلمه تانى ولا ايه الموقف ؟ خاصة انى طبعا مش معترف باى حاجة مسماه بالبهائية و مكنتش اتصور انى اعرف حد منهم ولا هشوفهم فين
المهم ان فى الاخر قررت انى هكلمه عادى و مش هقاطعه و انى عرفته كانسان و مكنتش اعرف ايه ديانته و هفضل اكلمه كانسان و مش هاجى فى نقطة خلافنا عشان اكيد مش هيبقى صح
كون ان ده يحصلي ده كويس عشان يوعيني و ما دام بنعامل بعض كويس و فى احترام متبادل يبقى خلاص مفيش مشاكل
و ربنا يهدى الجميع

عيد سعيد ان شاء الله و يا رب نكون بلغنا رمضان

2008-10-02T11:31:00.000+02:00

- على الرغم من ان رمضان مبقاش رمضان فى احساسى الداخلى و محستوش لكن يا رب نكون قدرنا نعمل فيه حاجة و ربنا يتوب علينا
- لما تكون فى مصلحة حكومية من اى المصالح و تلاقى 3 او 4 على الاقل واقفين و الموظف سايبهم و قاعد على مكتبه بيقرا فى القران و الناس تتذنب شوية عشان خاطره يبقى اكيد ان الموظف ده مش هياخد ثواب القران اللى هو بيقراه ده و كمان ممكن يرد كده بالعافية و هو عمال يكمل قراية برضه
هو مش كل حاجة ليها وقتها ولا ايه و لا هو يعنى مش هياخد ثواب اما يقضى شغله بجد
- فرحة العيد ليا مش فى زيارات القرايب لانها انقطعت تقريبا بقت يا دوب من بعيد و مفيش لمة ولا فى اى حاجة
-اكتر فرحة بحسها فعلا هى وقت نزول صلاه العيد حتى لو كنت نازل لوحدي لانى بشوف اكتر عدد تجمع للناس بشوفه فى حياتى فى البلد دى و الشوارع كلها بتتملي بالناس و صوت تكبيرات الناس كلها فعلا احساس جميل هو ده ممكن يبقى فرحة العيد بس كده
- منكرش ان رمضان و العيد كانوا مختلفين جدا ليا السنة دى لان حصل حدث شخصي جميل ربنا يديمه عليا

و ما زالت مصر بتتقدم بينا و من حريق لحريق و من كارثة لكارثة

2008-09-28T03:09:00.001+02:00

من 3 سنين اتحرق مسرح بني سويف و كانت كارثة ادينا السنة دى فى تقدم اكبر من حوالى شهر اتحرق مبنى مجلس الشورى و امبارح اتحرق المسرح القومي فى العتبة و من صدمة لصدمة لما خلاص تعبت و الناس كلها تعبت و مفيش فايدة مصر بتتقدم بينا و من حريق لحريق و الدور الجاي على ايه يتحرق مش عارف بس الاكيد اعصاب الناس بتتحرق و باستمرار كمان مبتتطفيش دى ولا بتلحق اننا نطفيها و من كام يوم كارثة المقطم اللى مقدرتش انى اعلق و لا اقول حاجة هعمل ايه يعنى اهى كل الكوارث بتحصل و احنا بنتفرج و بندعي للناس اللى راحت ضحايا و بندعي على اللى اتسببوا فى الكوارث دى و اللى عليهم المسئولية
كفاية بقى كوارث و حوادث و حرايق و مصايب
يا رب الطف بينا و احمينا
اللهم انك عفو تحب العفو فاعفو عنا

حواديت

2008-09-20T21:57:00.000+02:00

سر الحياه لو تعرفيه يا حبيبتي سر الحياه نبض الحياه انا و انتى
دى مركبي فضة و فرحي لو قضى حبيبتي تبقى معاي من غيرها مش هرضى
يا قلب صبح و مسايا ما بين رحايا و رحايا و يحوشوا عنك ندايا امد ليكى البصاير
ده عنيكي دول مرايات مرسوم انا فيهم
علمونى عنيكي اسافر علمونى اكون مسامح زى نبع الحب صافي
لو يتغير الزمان و قابلتيني فى اى مكان كنت اعشق من غير ما تقولي
طب خدينى فى ريح طيفك حتى حتى فى ليل كيفك ده انتى مالية الشوق ملوااا نفسه لو يلمس طراطيفك
مدى ايديك ادى ايدي ده الطريق زحاااام خلى قلبك ويا قلبي هتهون الالام انا و انتى يا حبيبتي حلم من الاحلام
تنده اقول حاضر مهما تغيب حاضر شايفك بعيد حاضر و انت الحبيب حاضر
احلى بكرة لينا تحلى الذكرى بينا طول ما احنا يا ناس عايشين مبنجرحش العاشقين
سهران بناديكي فاتح شبابيكي عاشق بغنيكي و الدنيا و عنيكي من لون لياليكي.... و الحياه لها لون لون جمال ليالينا
كل الحاجات الا عيونك ممكن انساه كل الحاجات من حواليا عارفة و حساه ...كل الحاجات بتفكرنى و الذكرى مش بتصبرني
يا ليلة عودى تانى يا ليلة كونى تانى
عيون حبيبتي الطيبين بيعلمونى اكون حنين ده مفيش ما بينا لأ وليه ولا كدب نتأسف عليه
قلبي يا قلبي شبكتك مهرك دمى يا كل شراييني تعالى اتجمعى اتلمى هعملهم خيط من نور و هلضم فصوص قلبي كردان داير ما يدور ...
بحبك تستكين الريح فى قلبي و الامانى تزيح بحبك اعشق التصريح و دربي فى الضلام مغمور بحبك تبتدى البدايات تاخدنى ضحكتك بالذات تعيبني روح و قلب و ذات تعيدنى كشف للمستور
حلى ضفايرك للهوا و اتمايلي فى بحور الهوا غني للحب اللى جمعنا سوا مركب هوانا فى الهوا حلى الشراع رايحين سوا لبلاد متعرفش الخداع
انتى فرحى اللى عاش يا عنيا و انتى بكرة اللى غير فيا و انتى دا انتى اللى خايفة عليا يا لحنان بشتاق
عمرك ده رسمه على كفوفي ابصله يهرب خوفي
و انا الهدى لما تضيعي و انا الهوى لما تحبي لبي ندايا و لا تخبي ازرعلك العمر جواهر ...
فى عنيكي غربة و غرابة و انا فيكي مغرم صبابا احلم على شالك انام كأنى فرد من الحمام برموش عنيكي تغطيني رمشك شطوط طب رسينى انتى انا و بكرة ليا و ليكي
مفيش كسوف فى المحبة و لا للمحبة شروط عمرك ما تشعر بغربة الا فى حنين مكبوت و انتى يا سامعة و شايفة احساسى فوق الوصف من غير ما اقول انتى حاسة عارفة اللى فيه بالحرف
يا غزالى يا حلالى فى عيونك حلمي انا يا انا يا انا يا سكر بالهنا يا انا ما انا دايب كام سنة
قلبي يبقى نبع صافى و جنني طول البعاااد
يا شال الهوى غطيه يا نسيم الاطيب ده داويه و تحاسبي يا غربة عليه بكيني و اضحكى ليه
مهما عيون الناس بتعرفنى غيرك ما يعرفنى مهما ليالى الوعد توعدنى قلبي بيوعدنى ضحكتك بتنهدلى نظرتك بتعرفنى
انا انسى فى شفايفك اسمي انا فاهم فى كنوز العفة انا ممكن اجريلك دمي انا حاسس دمي هيتصفى
يا ابتسامة سمرا نيلي تسلميلي
امانة يا موج بوس خشب المراكب امانة يا موج طبطب على اللى راكب امانة يا هوا تكتب على الشراع اللقا اكيد من بعد الوداع
دى شفايفك لما بتتنهد انا بستشهد و بعيش فى النار و عيونك لما بتتلفت انا بتفتفت ملحقش احتار يا اللى انتى حبك حرية فى العشق اه ولا شئ ممنوع يا سمرا يا سمرااا
حبيتك اد ده كله سوااا حبيتك و انتى عشاني هواااا

----------
بشكر محمد منير تعبت انا وهو اوي فى البوست ده

مودي وحسين الأمام.

2008-09-05T16:42:00.004+02:00

بقالى فترة عايز اكتب البوست ده و كل شوية حاجة تعطلنى المرة دى خلاص بقى هكتب
فى التمانينات ظهرت فرقة اسمها طيبة الفرقة كانت مكونة من مودى و حسين الامام و عازف الدرامز ليهم وقتها كان احمد عز اللى هو بتاع الحديد دلوقتى !! تقدر تقول ان نوع مزيكتهم روك و ده مش موجود اصلا كتير فى مصر و عملوا حوالى 3 البومات بس لكن كانوا بيعملوا مزيكا حلوة بجد و كلام بسيط اوى لكن معبر و بيحكى حواديت
الاغنية دى اسمها و ماله و غنوها فى احدى حفلات راس السنة فى التمانينات و لان الفيديو ممتاز و هو الوحيد تقريبا اللى ممكن تلاقيه فلازم احطه و الاغنية نفسها المزيكا اللى كانوا عاملينها سابقة التمانينات بكتير و حلوة اوى و الكلمات للشاعر عصام عبد الله بسيطة لكن صادقة و جميلة جدا وشوفوا ادائهم مع بعض جميل

وهتتعدل مهما تطول عمر ما شئ يثبت على حاله و ماله و ماله يا سيدى و ماله عمر ما شئ يثبت على حاله مهما عملوا و مهما قالوا

هاخدكم جولة سريعة كده لاكتر اغانى حبيتها ليهم
اغنية ودعي المكان اغنية هادية رومانسية كلمات عصام عبد الله و اداء و لحن متميز منهم كالعادة
دورى بعنيكى فى كل حتة.. المسكى كل الحاجات.. حسسى على الذكريات .. رتبيها لخبطيها كسريها او خديها و انتى ماشية ودعينى ودعيها ودعي المكان

عودة للمزيكا السريعة فى اغنية ازاى الصحة
فى حوار جميل مع الدنيا يشكرها لما تحلو و يشكيها لما بتقلب فجأة و يسألها ليه
اسمعوا الاغنية نفسها مش هكتب الكلام

اغنية المجهول كلمات عصام عبد الله و تحمل معانى صعبة جدا و كلمات صعبة تترجم لفهم مباشر تحس انها المجهول فعلا و عشان كده بحبها و مزيكتها روعة بحبها جدا ابدعوا فيها مزيكا و اداء
ستار الليل بيداري ميلاد بعيد مجروح و طير الاغتراب يدور بلا مدلول رغم الهدوء الدافي و العزف على الاوتار و الورود و الالوان الاصل فى الاسرار ............ اسمعوها

اغنية الدنيا صغيرة و وداع حبيبته لانه مسافر بس بيقولها
و هنتقابل من غير معاد دى الدنيا صغيرة
افتكرينى خدى عنوانى يمكن نتقابل من تانى ممكن نتصاحب فى الجوابات و هنتقابل من غير معاد دى الدنيا صغيرة

و من البوم انياب
هى اغانى فيلم انياب و المفاجأة ان التعاون كان بين مودى وحسين الامام و على الحجار و احمد عدوية وكلمات كل الاغانى عصام عبد الله برضه الله يرحمه
اسمعوا جهرشة
الدنيا دى يا صاحبي يا بمبي يا اسودا لو حظك مش مصاحبك انا ذنبي ايه فى دااا

اسمعوا كل شئ يشبه لبعض
اداءهم كلهم كل واحد بيقول مقطع

لتحميل الالبومات التلاتة
http://www.mawaly.com/music/egypt/tibba_band/albums/wemalo/
http://www.mawaly.com/music/egypt/tibba_band/albums/eldonya_soghaera/
http://www.mawaly.com/music/egypt/tibba_band/albums/film_anyab/

فى الالبوم بقى رابع ليهم كان عامل صدى حلو وقتها برضه و كان اسمه فطومة اللى يجيبه يبقى جدع

تاج من تانى فى سؤال لاسراري

2008-09-02T04:20:00.000+02:00

التاج من صديقى العزيز فنان فقير
http://fannanfakir.blogspot.com/

السؤال بيقول
اذكر ستة أسرار قد لا يكتشفها من يحدثك لأول مرة

هو من الصعوبة مش عارف ارد

بس هحاول يعنى

ممكن اقول انه هيكتشف انى هادى اوى لكن مش هيعرف انى مجنون من اول مرة

انى اشول بكتب و باكل بشمالى و دى قليل اللى بياخد باله من اول مرة

بالتالى بلبس الساعة فى اليمين و محدش بياخد باله برضه كتير

من الحاجات اللى بكرهها فعلا الحلاقة عشان كده بسيب شعرى شهرين تلاتة لو اكتر ميهمنيش لحد ما الاقى البيت بيطالبنى احلق و
كذلك دقنى هى مرة واحدة فى الاسبوع بحلقها و مرضاش اكتر من مرة فى الاسبوع ابدا

انى على قناعات بحاجات و اراء ممكن تخالف العامة يعنى بكون مخالف فيها اهلى نفسهم

انى خجول بجد و عندى كده زى صعوبة اما اكلم ناس خاصة لاول مرة الا لو اتعودنا على بعض على طول و لو بنت اللى اتعرفت عليها ببقى فعلا اللى هو خجل على الاخر بقى بس بعد كده لو فى صداقة يبقى الكلام بينا عادى بقى

كان فى تاج تانى قديم مكملتوش محطوط درافت انزله بقى معاه هتلاقوه تحت

كعادتى امرر لمن يريده
فليعتبر الكل

تاج بالصور

2008-09-02T04:10:00.001+02:00

شفت التاج ده عند ناس كتير و عجبنى فقلت اعمله
شروطه http://photobucket.com/أولا: تدخل ثانيا : تكتب اجابتك فى الموقع ده ثالثا: تختار صورة من أول صفحة وبس رابعا: حط الصورة أجابة للسؤال

الحالة الأجتماعية ؟

تعديل تعتبر الحالة الاجتماعية اختلفت البوست قدييييم

الحالة المزاجية ... ؟

المطرب /الفرقة المفضلة ؟

الفيلم المفضل ؟

محل الأقامة ؟

مكان العمل ؟

احداث اليومين دول

2008-08-25T02:39:00.000+03:00

الفترة دى بعتبر حاجات كتير حصلتلى و مهمة و معظمها حلوة يعنى
التخرج طبعا مع انه يحمل بعض الالم حيث ان الواحد لازم يشتغل بقى مينفعش القعاد لكنى قاعد لسه بمزاجى لحد بعد رمضان ناوى اشتغل فى المجال هندسة العمارة
لكن دلوقتى لا
بحاول اعمل حاجات تانية
باخد 3 دى ماكس وشغال فيه كويس الحمد لله مش زى كل مرة
كلمنى صديق قديم بقاله 11 سنة صاحبى بس كان فى انقطاع فى النص المهم رجعنا و سعيد بده و الاكتر اسعدنى انه طلبنى اكتبله الشعر لمسرحيته الجديدة لانه مخرج و انى قادر الحمد لله لحد دلوقتى ادعولى
فرصة المسرحية دى عرفتنى على ناس جداد متأكد ان هيفضل منهم اصدقائى بعد كده دايما
حصل حاجة بس محزنة عن شعرى فى موضوع تانى لكن مش مشكلة ربك لما يريد
فى حاجة كمان لما يبقى ليها وقتها بقى تتقال

تاج عن النفس

2008-07-19T02:47:00.000+03:00

عشان خاطر العزيزة بنورة مدونةهمس القلوب
مقدرش ارد طلبها عن اجابتى للتاج مع انه صعب جدا يمكن اصعب تاج اعمله
و هو سؤال واحد أن أذكر 16 صفة في نفسي

الهدوء فأنا كسكون الكتاب لا يتحدث الا اذا فتحته لتقرأ

التردد فمعظم احوالى و قراراتى اتردد كثيرا في اخذها و عندما افعل افكر من جديد هل كان من الافضل قرار اخر

الطيبة فلا اقابل الشر بالشر ربما بالخير حتى

ازرق حيث صفاء السماء و عطاء البحر و اثور مثله عند الغضب

قليل الثقة ليس فى غيري لكن فى نفسى

منير حيث افيض حبا و تعبيرا عن نفسى من خلال اغانيه

اصرار و صبر لا بأس به لعمل شئ او تعلمه او حتى تحمله

صدوق فاصادق كل من يريد صداقتى و احب الجميع

يملكنى خوف من ردود الافعال عموما و من الدنيا

تائه احيانا حيث لا ادرى كيف استقر و اقرر ما اريد حتى لو لم يرض احد و لكن ما زلت حالم

مواجه بالحقيقة فقط ان وجدت من امامى يريدنى اواجهه صدقا

كثير التعلم حيث محبتى لتعلم كثير من الاشياء فى مجالات متعددة

مسامح زى نبع الحب صافى

نفس تحتاج زيادة الايمان بالفعل

بتمنى حد وانا وحيد... مستنى حد يكون عيونى احضنها جامد اوى بجفونى

عصفور متدلع ... ولان محدش كلمنى انا بمشى على شاطئ حزنى و كأن العالم مش ملكى

------------
و فى النهاية بقول

لو هقدر اغير راح اغير لو مش قادر انا لازم اغير و اتغير

و انتو طبعا كتير منكم عارفنى كويس ممكن يعدل فى اللى قولته و يقول هو شايفنى ازاى

و التاج ده لكل من يحب تدبيس نفسه

باب الشمس

2008-07-13T22:20:00.000+03:00

باب الشمس هى رواية الياس خورى و فيلم المخرج المصرى يسري نصر الله
اتمنيت اشوف الفيلم ده من ساعة ما نزل سينما و اتشال و مشفتوش و كنت عاوز اشوفه باى طريقة لحد ما اخيرا بقى عندى و شفته زى ما اتمنيت املك الرواية اللى تعدى ال500 صفحة وتمنها 50 جنيه ولانى مبشتريش كتاب باكتر من 20 جنيه لاسباب غير الفلوس ان امى كل ما اجيب كتاب تقولى كلام كتير كأن حرام ادفع فيه ما بالك 50 جنيه بقى
بس ان شاء الله لازم اجيبه بعد الفيلم اللى حمسنى اكتر لكده لان الرواية اكيد هيبقى فيها اكترو اجمل من كده بس يا رب اجيبها قريب بقى

الفيلم طبعا عن فلسطين و طبعا مش هقول اى قصة ولا حكاية عشان تشوفوه او تقروا الرواية بس التمثيل بجد خرافى خاصة الشيخ الاعمى ابو يونس و حبيت نهيلة زوجة يونس رائعة و حبيت الدكتور اللى كان قاعد مع يونس برضه
بجد فيلم مش عادى تخيل لما يبقى باسم سمرة اللى هو احسن واحد بيمثل فى مصر يبقى من اقل الممثلين تمثيلا و دور
و اخراج يسرى نصر الله مفيش كلام يتقال عليه
و موسيقى تامر كروان كانت مفاجأة انى الاقيه هو اللى عامل المزيكا و الاغنية يبكى و يضحك اللى غنتها فيروز العظيمة المرة دى لحن تانى مع مطرب تانى و لحن قوى جدا من تامر كروان

بجد شكرا للفيلم و اللى عملوه ... فيلم يبقى فى الذاكرة
و شكرا للصديق العزيز بشرى مش هنسى برضه ان هو اللى اهدانى الفيلم ده

مهندس معمارى

2008-07-07T03:27:00.000+03:00

اخيرا انتهى مشروع التخرج و عدت الخمس سنين على خير الحمد لله و اخيرا اصبحت مهندس معمارى
مشروع التخرج كان مجهد جدا الحقيقة و صحيح الدكتور اللى من برة الكلية اللى جه يناقشنى خنقنى
قال ايه واحد مسافر من المطار للكويت و معاه بلاص مش فى الشنطة هعرف منين ؟!! كل ده عشان عايزنى اقوله ان فى كلاب فى المطار و انا عامل ليهم اوضة .... اه يا راجل يا بلاص ده انا هسيب عليك انت الكلاب
يلا ما علينا اهو راح و الحمد لله كله خير و ربنا يسهل

و اعود اليكم من جديد كمدون ...و معمارى
تحياتى

2008-06-08T20:26:00.000+03:00

الفترة الجاية هغيب عن المدونة و ده اللى مكنتش عملته قبل كده تماما من ساعة ما بدأت تدوين لكن دلوقتى غصب عنى لان هتبدأ فترة تبييض (هشرحها كمان شوية) مشروع التخرج وده هيخلينى لا ادخل نت ولا اعمل اى حاجة فى الحياه غير المشروع حتى ان اشوف اهلى هيبقى صعب
و لانى فى قسم عمارة فمشروع التخرج مختلف عن اى اقسام هندسية تانية بتاخد مشروع التخرج و شغلنا فى جهد اكبر و كل طالب بيبقى ليه مشروع تخرجه لوحده مش زى الاقسام التانية بيبقوا مجموعات
و مشروع تخرجى هو مطار اقليمي
اما عن الفترة القادمة وهى فترة تبييض المشروع يعنى ان بعد ما قعدنا نسلم اسكتشات طول الوقت للدكاترة بالتصميم اللى كل واحد عامله لمطاره بنوصل لمعاد معين يبدأ فيه تبييض المشروع يعنى اعادة رسم المشروع كامل باظهار حلو حسب ما تعرف بقى رصاص حبر الوان براحتك و المشروع ده بيتم على من 4 الى 6 شاسيهات و الشاسيه الواحد معناه لوحة للرسم مقاسها 120سم *80 سم على كل دول بقى على كل دول بقى هعمل مشروعى مطارى
و المشروع هيتسلم 5/7 يعنى حوالى شهر او اقل هما اللى هغيبهم و ارجعلكوا تانى
اه و عشان تعرفوا برضه التبييض ده بيتم فى الكلية و بيتم بانك كل يوم تروح الكلية من الصبح الساعة 8 كده و تروح مش قبل 12 بليل يعنى طول اليوم شغال و يا دوب تروح تنام كام ساعة عشان تصحى ترجع للمشروع ده اذا مطبقتش فى معظم الايام اصلا و عشان كده بقى مفيش اى وقت لاى حاجة عرفتوا بقى
ادعولى بقى فى مشروعى
و اشوفكم على خير

صحوبية

2008-06-01T03:51:00.000+03:00

اكتر الحاجات اللى مبحبهاش لما يرتبط واحد بواحدة ان يسميها صاحبتى او اصحابه يسموها صاحبته ... افتكر انا ساعتها ان صاحبته دى يعنى صديقة مش اكتر عادى يعنى انما صاحبة يعنى حبيبة دى محبهاش ... حبيبة دى يعنى ارتباط يعنى خطوبة اى علاقة مش صحوبية ... و كمان بقى اما تلاقى بقى كل واحد و صاحبته يدوا بعض الباسورد للايميل و للفيس بوك كمان مثلا و قال ايه بقى عشان كل واحد يشوف مين بيبعتله ايه و عنده مين... ليه بقى يعنى ده ايه لازمته كل واحد بيعمل حاجة المفروض اصلا مراعى فيها التانى و بعدين فى ثقة مش اخد باسورد والكلام ده

خروج منتظر

2008-05-25T17:59:00.000+03:00

على الرغم من انى ابعدت النواحى الدراسية بنسبة كبيرة جدا فى هذه المدونة فلم اذكر الا نادرا جدا عن الدراسة و الكلية الا انى حاجتى هذه الايام جعلتنى اريد الكلام عنها و عن ما يتعلق بدراستى حتى لو كان هذا بوست شخصى جدا قد لا يعنى اى احد سواى

امضيت سنواتى الخمس فى الكلية بمشاعر مختلفة كثيرة لا تهم الان .. فالاهم مشاعرى الان و انا فى نهايتها فى مشروع التخرج اخر شئ سيربطنى بهذه الكلية و لا يعنينى او انظر كثيرا لان اكون افضل من غيرى فلا انظر لغيرى فقط انظر لمشروعى الذى اتمناه بقوة و توفيق يرضينى و هذا لا يكون بدرجات فلا اعنيها ايضا .. فقط اعنى ان يكون مشروع جيد و من يراه يرى به هذا المستوى و منذ بدأته و انا راضى عن فكرتى و مشروعى و كنت اشعر بتشجيع به هو شعور فقط و ربما كنت مخدوع او موهم انا به
المهم الان اشعر ان مشروعى ليس بفكرة جيدة ولا مشروع جيد و لا اى شئ و هذا انطباع يتكون لدى الان حتى لو انى لا ادرى
فقط اريد مشروع جيد جدا فقط اريد مشروع يرضينى و يكتمل رضاى هذا برضا الاخرين عنه حتى لو كانوا اشخاصا لا يفهمون ( مشكلتى انى انتظر رضا الناس لا رضاى انا فقط فلو لم يرضوا اهتزت ثقتى )
لا اعنى ان اكون من الاوائل ولا ان ابحث عن درجات ولا اعلى تقدير فانا اعرف تقديرات و تقييم سيأتى لاخرين لكنى كنت اتمنى لو ارى نفسى و اعرف اين اتجه و تقييمى فلا اشعر به .. هل فيما اتمنى ام تقييم اقل
كثيرا ما اشعر بتقديرات الغير و قليلا عندما اشعر بتقديراتى

مع هذا المشاعر تصاحبنى مشاعر اخرى لها ارتباط اخر و هو التخرج ذاته و هذا لا اراه سوى شئ واحد و هو المجهول لا ادرى من سيظل من اشخاص و لو انى اثق باشخاص واخاف ان تضيع ثقتى هذه عندما نصل لبعد التخرج فلا اجدهم كما يقلقنى العمل فلا اصدقه ولا استوعبه حتى الان
هل ساجد عملا متيسرا فعلا ؟؟ ان كان هذا السؤال فانا اتوقعه و لكن هناك ما يقلقنى اكثر و هو عندما اكون هذا المهندس فعلا هل ساكون كفء للعمل ؟ هل ساستطيع ان اؤدى مهنة العمارة هذه ببراعة ؟.. لا اعرف فانا اشعر انى كطفل لا افقه شيئا ولا اعرف و ساكون (محتاسا) فى العمل كمن لا يدرى و لم يتعلم العمارة ما كنت ارغب فيها و فى العمل بها منذ دخلت الهندسة و العمارة............

ستون عاما ما بكم خجل ...الشاعر تميم البرغوثي

2008-05-18T01:37:00.001+03:00

بم تفسر؟!!!

2008-05-08T21:07:00.000+03:00

انا حاسس انى فى الجنة !!!!!!!!

2008-05-04T21:00:00.000+03:00

بقلم ممتاز القط كتب اليوم

ليه بنحبك ياريس

'ياريس كل سنة وانت طيب وربنا يخليك لينا'..
كل سنة ومصر تعيش معك أغلي وأعز أيامها.. سنوات مرت وكأنها حلم جميل داعبنا، وجعلنا نبتسم لكل أيامنا.
في عيد ميلادك ياريس ندعو الله لك بالعمر المديد، لكي تحقق لنا المزيد والمزيد.. فنحن سيدي الرئيس قدرك، وانت قدرنا. لمن غيرك نشكو؟! من مين غيرك نطلب!! لمن غيرك نروي احلامنا وآمالنا في مستقبل نملك فيه القدرة علي ان نحقق طموحاتنا، ونترك لاولادنا وأحفادنا وطنا عزيزا وقادرا علي ان يحقق لنا كل ما نتمناه.
بصراحة.. إحنا بنحبك لأنك إنسان أصيل.. بتعرف تحافظ علي كرامة وكبرياء بلدك وشعبك.. بتعرف تقرأ المستقبل صح ياريس.. وفي كل حاجة.. بره وجوه.
بنحبك.. لأنك مابتعملش حاجة إلا بعد ماتحسبها صح.. ويكون قرارك في الصميم.. بنحبك لان تاريخك كله نظيف.
تاريخ بطل.. كان يكفيه من كل الدنيا وسام الانتصار في حرب أكتوبر. الوسام الذي وضعه شعب مصر كله علي صدرك داخل مجلس الشعب تقديرا لبطولاتك ودورك الذي فتح أبواب أعظم انتصاراتنا.
دايما ياريس، القرار الغلط في أي مجال يكون له تأثيرات سلبية، بتختلف من مكان لمكان.. ولكن في الطيران القرار الغلط يعني الموت.. من هنا دايما بيكون فيه تقدير وحسابات كاملة قبل أي قرار.
طول ما إحنا معاك ياريس حسينا بالحكاية دي.. مفيش انفعال ولاغضب.. أي حاجة دايما تسبقها دراسة كاملة.. كتير قوي ياريس مواقف مرت علينا وعلي بلدنا.. تحديات كتيرة لا لها أول ولا لها آخر.. لكنك ياريس عدتها كلها بسلام.. بحنكة ومهارة وتفكير.. كانت دايما ياريس مصر معاك.. في قلبك وعقلك والعدو والحبيب دايما بيحسب لبلدنا معاك ألف حساب.
بنحبك ياريس.. لأن سمعة مصر معاك أصبحت زي البرلنت.. وبيحسدونا عليك.. لأنك مننا.. دايما ياريس كنت معانا.
ساعات كتيرة كنا بنكلم نفسنا.. بنقول ياتري الريس حاسس بينا.. ياتري الريس حاسس بمشاكلنا وهمومنا.. وفي كل مرة ياريس نكتشف الحقيقة إنك معانا.. أنت جزء مننا وإحنا جزء منك.. بتتكلم زينا.. وحاسس بالظروف الصعبة اللي إحنا عشناها.
وبصراحة ياريس.. إحنا نسينا أيام زمان.. إحنا ادلعنا ياريس في عهدك.. ونسينا كل حاجة وحشة.. نسينا زمن الاشتراكية اللي ضحكوا بيها علينا لاننا اكتشفنا إننا بنعيش في وهم جميل صحينا منه يوم 5 يونيه.
نسينا زمن تليفون العمدة وبقينا دلوقتي محتارين.. نركب 012 ولا 010 ولا 011 ولا أرضي.
نسينا القطارات ماركة اللي يحب النبي يزق!! نسينا زمن كل حاجة بالبطاقة من قطن العرايس لحد قماش التيل والبفتة والدبلان.. نسينا زمن المجاري اللي طافحة وطلمبات الميه البحاري ووضع النواية جوه الزير.. نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر.
دلوقتي كله بيتكلم.. مفيش حد خايف.. شلت الخوف من قلوبنا يا ريس ودي نعمة إحنا مكناش حاسين بيها.. دلوقتي ممكن أي واحد ينتقد رئيس الجمهورية والحكومة وكل حاجة!! ساعات بنزودها حبتين!! لكن جوانا شعور إننا مش خايفين.. عارفين إن فيه كبير في البلد.. بيحبنا وبنحبه.. عايش في قلوبنا وقريب دايما مننا.
بنحبك ياريس لأنك مننا.. انت الرئيس الذي لا يتحدث بلغتين.. اللي بتقوله في الغرف المغلقة هو اللي بتقوله في العلن.. ودايما آراءك وأفكارك سباقة والعالم كله يا ريس آد أيه بيحترمك ويقدرك.. طولة بالك وسعة صدرك ياريس وحبك لينا.. خلانا نطمع أكتر واكتر ياريس.
في عيد ميلادك الناس.. اهلك... وشعبك... كل اللي بيحبوك المفروض يقدموا لك ورود الدنيا كلها.. لكنك ياريس كنت سباق بالخير.. طول عمرك سباق بالخير.. العلاوة ياريس كانت مفاجأة.. كانت عبور بالموظفين الغلابة من الدوامة اللي عايشينها ليل نهار.. الناس كلها دعت لك ياريس بالصحة والسعادة.. حسوا ساعتها انك جزء منهم وانت بتطالب الحكومة إنها تدبر الموارد عشان العلاوة لأن الناس مش ناقصه.!!
الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.. 'علاوة ريس'.. له في قلب كل مصري حب ما يتقدرش بأموال الدنيا كلها.
كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!
كل سنة وأنت بكل خير ياريس.

مش عارف

2008-04-27T20:14:00.000+03:00

الحمد لله خلصت امتحانات و مش همتحن تانى ان شاء الله قولوا يا رب و مش ناقص غير مشروع التخرج ادعولى
و بماان دى فترة فراغ فبحاول اعمل حاجة او عايز اعمل بس مش عارف
ليه مش عارف؟
مش عارف
عايز اقرا و نفسى فعلا بس اجى اقرا الاقينى مش عارف الكتاب بيمشى بطئ كده و مش عيب فيه اعتقد
عايز انشر ديوان فيه كتاباتى اللى فى مدونتى التانية و غيرها بس مش عارف
حتى لو حد هيقول انه مش شعر انه خواطر او اى حاجة مش مهم
المهم انى مؤمن بكتاباتى دى و عشان كده حاسس انها تستحق تتنشر بس مش عارف
عايز اعمل اى حاجة فى الوقت ده و حاجة تبسطنى بس مش عارف
عايز اخرج و اقابل ناس بس معرفش فين و مع مين
عايز احب و اتحب بس مش عارف لان مفيش حد

اعمل ايه بقى دلوقتى
مش عاااارف

بلاك تيما

2008-04-14T03:40:00.000+02:00

مضايق من همومك*

مضايق من هدومك

مضايق من حياتك

قول ااااااه

يا حبيبى تعالى الحقنى شوف اللى جرالى

لو مضايق من اى حاجة

عايز تفرح و تستمتع و تسمع مزيكا حلوة جدا مع كلام جميل

يبقى تروح وتسمع بلاك تيما

كون سعيد **

عيش كأنك فيها وليد

كون سعيد

لسه الحياة ياما فيها جديد

لسه القمر بيرمى ضوئه ع النجوم و ينوره

لسه الولد بيجيب حمام و يطيره

لسه الربيع بيضمنا

لسه الحبايب فى الليالى بيسهروا

بلاك تيما فرقة بتكون من عبده و امير و بحر3 شباب نوبيين بيغنوا عشان يعبروا عن الناس

أملك صورة انا فيها صغير ***

شكلى اتغير ما عرفتوش

كان فى جيوبى مكعب سكر

داب السكر ما لقيتهوش !

و اما اتقطعت منى الساعة

وقع الوقت لاقيتنى كبير !

بحب عبده اكتر واحد فيهم و بحسه هو اللى غنى الكوبليه اللى فات ده و غنى من عشر سنين

افلت زمام امالك****

هتلاقى الكون قبالك

ده الفرحة هى لحظة

يشبع فيها جنانك

مجنون و الحب غاية

بحلم من غير نهاية

امانة يا بحر طبطب

على شمس تكون مراية

الفرقة بقى

محمد محمود ( زتونة ) : بركيشن و دف

عادل ( ميخا ) : طبلة و دف

مصطفى جويدة : باص جيتار

مدحت على : إليكتريك جيتار

محمود عبد العزيز : درامز

عمرو الشيمى : كى بورد

محمد سامى : كمان اجمد واحد فيهم

كل مرة بدق باب*****

يفتحلى واحد قلبه داب

أصعب عليه فنصير صحاب

اسأله فين طيّب نروح

يقول لى دوّر ع الطموح

طموحه يملانى بجروح

تطلعلى روح من جوّا روح

مالقيتش حد يعزّنى و لا عمر حد حسّنى

مع إن بركان م الحنان بيهزّهم و يهزّني

حتى اللّي بين حب ظاهر

اقتنعت إنه طاهر

فجأة بان له الف ناب

ما أنا كل مرة بدق باب

لما تسمع بلاك تيما يبقى اكيد بتسمع حالة مختلفة جدا من الغنا مش الاغانى المنتشرة دى لا كلام مختلف بمزيكا مختلفة

حتى انى حطيت بلاك تيما فى قائمة احسن الفرق الموسيقية بعد اسكندريلا و نغم مصرى مع انخفاض وسط البلد و افتكاسات عنهم

من عشر سنين و أكتر ******

أبني الأكبر ..

شاب فارع لونه أسمر ..

كان جميل الصوت ..

صوت عنبر ..

حتى فوق مادنة بلدنا ..

لما كان يطلع يكبر ..

كل خلق الله ..تكبر ..

كنت ألف معاه كفور مصر و نجوعها ..

بالربابة ..

هو يغني سيرة الأبطال ..

أبو زيد و الزناتي و عنتر ..

حتى جه اليوم طلب الجيش ..

راح يوميها ويا شبان البلد عالجهادية ..

كلهم راحوا و عبروا ..

و بعدها رجعوا ..إلا هو ..راح مجاش !!

و أنتظرت كتير على شط القنال ..

قلت لازم يوم هيرجع ..

لحد يوم ما شفته من بعيد..

جاي مغبر ..

صحت أكبر ..

الله أكبر

------------------------------------

على الهامش اسماء الاغانى و التحميل لها

بلاك تيما*

كون سعيد**

مكعب سكر ***

افلت زمام****

كل مرة*****

من عشر سنين******

اسمعوا بقى

شيراتون

كل مرة

ايه يعنى لما سبتينى
من عشر سنين و كون سعيد
انسان

انطباعات

2008-04-06T05:23:00.000+02:00

دى صور ايه؟؟ قليل اللى يعرف و ناس معينة
دى صور ماكيت يعنى مجسم كده بيوضح كتلة و ده بيعمله طلبة عمارة عشان تجسد مبانيهم

مشكلة الماكيت عموما بالنسبة ليا هى مشكلة واحدة بس و هى انى انزل الشارع بيه ازاى و اروح الكلية هو مش حجمه كبير ده مثلا كان حجمه صغير 20 *30 سم تقريبا المشكلة انا لازم يتمسك كويس و ميتبهدلش عشان ميبوظش فمقدرش مثلا احطه فى شنطة لاحسن يقع منه حاجة فبكون مجبر انزل بيه كده مش متغطى وهنا تبدأ المغامرة
اللى بتتشابه كل مر مع اختلاف الماكيت فمثلا المرة دى

اول ما نزلت من البيت و شايله فى ايدى كده و محرص عليه اول ما خرجت من العمارة و لسه فى شارعنا لقيت شوية عيال بيقولوا ايه الصواريخ اللى معاك دىو انا عامل اطرش و ماشى و ولد تانى بيقولى هات واحدة طيب و اجيبلك بكرة نص جنيه
و كملت و قلت اركب تاكسى بدل المواصلات هتبقى بهدلة و كلام اكتر خاصة طول ما انا ماشى فى الشارع كل بيبص بعجب فلو معلقش هيبص بس و فى سره هيقول ايه ده
ركبت التاكسى و حاطط الماكيت على رجلى كده بعناية و قاعد جنب السواق اللى مقالش حاجة طول الطريق الا انه كان عمال يبص كده على الماكيت ومستغرب جدا و انا سبته ما دام مسألش
بس فى مرة كان فى سواق تانى قعد يسأل بقى و رغى

طبعا انا خلاص بقيت متعود انزل عامل اطرش عن كل الناس و عادى جدا هو الماكيت ده عيب مثلا؟؟

عن الثقافات و علاقاتها بالشعب (عن جنينة الاسماك)

2008-04-01T02:42:00.000+02:00

ملحوظة البوست منقسم لجزئين (موضوعين) ذات صلة ببعضهما

عن الفيلم من غير ما احرق احداث ولا اقول قصة ابدى تعليقى على الفيلم الذى احببته كثيرا -
الفيلم كله يدور حول فكرة واحدة تظهر فى الكثير جدا من الصور و هى فكرة الخوف -
ستجد كل مشاهد الفيلم تحدث لتكلمك عن الخوف و انه الشئ المسيطر على مصر حاليا خوف من كل شئ -
ستجد حرفية يسرى فى تقديم تفاصيل و افكار كثيرة و تصوير ممتاز كما انه جعل الممثل يحدث المشاهد مباشرة كان -موفقا جدا و معبر فى الفيلم اعتبره اضافة
لن اعرف التعبير عن الفيلم قدر ما يفضل مشاهدته و انصح بذلك
و اقرا حوار يسرى الرائع
http://www.elbadeel.net/index.php?option=com_content&task=view&id=15669&Itemid=98

اكثر ما يهم فى الموضوع هو قبول الفيلم من عدمه لدى الجمهور العام
دائما الافلام التى تحمل ثقافات مغايرة و اختلافات عن الافلام التقليدية ما تحمل عبئا على المشاهد فيجعله لا يحب الفيلم و لا يجد به شيئا جيدا مثلما رأيت فى عرض هذا الفيلم و من افلام سابقة
فلن يتحمل الجمهور العادى التفكير فى ما هى الفكرة الرئيسية للفيلم التى تبدو واضحة لكن لا تجد اى رغبة فى مجرد التفكير البسيط و لا حتى مجرد الاحساس بالفيلم و ما به فتراه يرى هذه الافلام باستخفاف و عدم اعطاء اى قيمة للفيلم و هنا المشكلة التى اراها ليست فى من يصنعوا هذه الافلام التى تدعو لتفكير او اختلاف و سينما جيدة فلا غبار عليهم ( حتى هذا الفيلم فهو مباشر يدعو للتدقيق و التركيز فقط)
لكن المشكلة تكمن فى الجمهور الذى لا ينتظر من الافلام سوى الكوميديا او الحب او اى تقليدية من اجل المرح و التسلية فقط ليس ان يروا فيلما واقعيا يتحدث عنهم او فيلم يحمل مضمونا ثقافيا
و هذا لسبب نقص الثقافة فى هذا الشعب فتجعله لا يقدر الافلام الحقيقية و لايريد سوى الافلام التجارية المكررة بلا اضافة و لا حتى ولو قدر من الاحترام للفكر فى الافلام
وهذا ايضا لا يلام عليه جمهور يريد اى شئ ينسى الدنيا بما فيها من كئابة و خوف فلا يريد اى تفكير اخر و لكن يلام على عدم انتشار الثقافة فى الشعب

ملحوظة اكيد بعد ما يوفرولهم العيش الاول عشان يعيشوا

ولعل فى يوم ما ينتهى الخوف فلا نصبح فراخا ولا اسماكا و يكون لنا خروج من جنينة الاسماك فكلنا داخل الجنينة المرعبة كل منا متقوقع فى حوضه او يخفى ما يفعله

تدخل للاهم

2008-03-06T00:03:00.000+02:00

عندما تموت بنت مصرية لمجرد انها خرجت من بيتها فوجدها عسكرى اسرائيلى و اطلق الرصاص فماتت..
عندما يموت اربعة اشخاص فى طابور للعيش مجرد طلب للعيش يصبح ازمة و مأساه بل و الموت فى سبيله ..

فلا تجد سوى تدخل للرئيس لحل مشكلة الحضرى !!!!!!!!!!!!!

عن قصيدة مفيش كوكو.. لعلي سلامة

2008-03-03T01:25:00.000+02:00

قريت انهاردة قصيدة شاعرى المفضل و صديقى العزيز الفخور به دائما على سلامة و القصيدة بتقول
أخر كلام يا عم..
طعام..
يعني مم..
يعني علي سبيل المثال..
سندويتشات..
وأرجوكو..
ماحدش يجيب سيرة الكوكو..
قدام العيال..
وكوكو للي مش عارف..
يعني دجاج..
يعني شوربة..
يعني ظفر..
معقول ده محتاج..
عقد عمل..
وغربة..
وسفر..
عارف..
لسه شوارعنا بتخاف من المطر..
ومطر للي مش عارف..
يعني خير..
إزاي ف بلدنا الخير..
أصبح خطر..

اكتر ما عجبنى فى القصيدة ان فكرةالمطر اللى اصبح خطر فى بلدنا و مهواش خير الفكرة دى كانت فى دماغى جدا من قبل ما اقرا القصيدة انهاردة خاصة فى ايام المطر اللى فاتت و كنت بقول ان الارض مبقتش عايزة المطر و ان السما اللى كلها خير و بتنزل المطر الارض بقت رفضاها
الجميل بقى انى الاقى علي كتب الكلام من غير ما اقوله و لا حاجة يعنى على بيكتب شعور الناس من غير ما يقولوا و بيحس بكل حاجة ممكن يحسوها

بالمناسبة دى تابعوا على سلامة كل يوم قصيدة فى جريدة المصرى اليوم

اسباب وجيهة للفرح

2008-02-11T01:57:00.000+02:00

مبروووووووك لمصر !!!
معقول مصر دى كلها مفيهاش اسباب وجيهة للفرح غير كرة القدم !!!

مطلوب من كل معلق انه يقول اسباب وجيهة للفرح فى البلد دى بتحصل

عنوان البوست متاخد من عنوان ديوان عمر مصطفى

احساس الاخرين

2008-01-28T15:22:00.000+02:00

فى هذا الوقت تتجمع الاحداث و المواقف لتجعلنى اشعر بما حولى و اعرف احساس الاخرين الذين فقدوا هذا الاحساس تماما او اصبح باردا جدا... كذلك هم مغيبين ..
فالكل يعيش هنا مع البطولة و غانا و فوز مصر العظيم على الكاميرون و بعدها السودان و الطريق للبطولة و قمة الفرحة و تشجيع و تجمهر فالوطن اصبح داخل ملعب لكرة القدم فقط ..غير ذلك لا وطن و لاحزن سوى لهزيمة.. ليست احتلال ارض او تعذيب او اى شئ سوى هزيمة دخول اهداف داخل شباك...
كم من يدروا بالبطولة و غانا و المنتخب ولا يدروا بغزة و ما يحدث بها ...
كل الاعلام الموجه الذى يغويك بفوز منتخبنا.. و لا يدريك بما يحدث فى غزة اللهم سوى بعض الاغانى التى لا تعبر عن شئ.. سوى انها لموضة الحديث عن فلسطين و العرب و لكنها لا تحرك احدا سوى ان تعلى من نجم المطرب...
كم يتمنون مساعدة المنتخب و مؤازرته ولو يستطيعوا لذهبوا لغانا للتشجيع ..اما غزة فلا تضامن بسيط حتى ولو بالكلام والاعتراضات او مد اى عون بسيط لهم من اى نوع ...

وفى نفس هذا الوقت مع الحدثين.. هناك حدث ثالث لا معنى له ولا يستحق ان يكون حدث لكنه كذلك للاسف و هو ستار اكاديمى عندما تجد تجمع مجموعة من شباب و بنات ليس سوى لفعل كل ما هو مسئ و ليس له علاقة بالغنى او الطرب فهذا قمة الاسفاف و للاسف كثيرون جدا متابعون لهم و تضامن مع كل متسابق و تشجيع المصريين للمصرى و اللبنانين للبنانى و هكذا رغم ان كلهم لا يستحقون و لا حتى سماعهم فهم مجرد عابثون ..

و الحدث الاخر من جهة اخرى هو معرض الكتاب الذى يهمله معظم الشعب المصرى ..كما يهمله الاعلام.. كما يهمله من اقاموا ومنظمين على المعرض .. لا احد يهتم بالقراءة فكأنها هى العبث ذاته و انها ليست ذات اهمية (فى ظنهم) ..انها اقل اهمية بكثير من البطولة الكروية و من ستار اكاديمى و كذلك لا يخفى ايضا دور الاعلام الذى لم يهتم ايضا كثيرا مثلما اهتم بالامرين الاخرين...

اخيرا اتمنى التوعية بان الكرة ليست سوى هواية و مجرد متعة ليست اهم ما بالوجود و اهم ما يحدث فى مصر الان فهناك امور كثيرة اهم فلو شخص يعمل فى وقت مباراة يترك عمله هذا من اجلها اما غزة مثلا فلا مساعدة لها و لو فى اوقات الفراغ التى تملأ معظم وقت الانسان المصرى او حتى القراءة (مع الفارق فى الموضوع فلا علاقة بالقراءة و غزة) ..
لا اميز نفسى ابدا ولا اقول انى افعل هذا و لست افعل ذاك فانا اشاهد المنتخب لكنى لست متعصبا و لا مهتما جدا و لن احزن عندما يخرج المنتخب لانها لا شئ سوى كرة ...و احس بغزة فى قلبى من اجل غزة الوطن المسلوب الذى نعجز و نصمت امامه و اخاف ان اموت صمتا و اشعر باهمية القراءة التى لا اوفيها حقها و لن اوفيها
فقط ادعى انى اعي اكثر و احاول فعل الافضل و الافيد ....و ربما انا لا اعي !!!

وحدى .. واوراقى القديمة ....

2008-01-17T05:39:00.000+02:00

الحب مش اتنين بيحبوا بعض و بس
الحب ممكن يبقى شغال فى واحد و هو ملوش حبيب
الحب احساس طبيعى دائم .. محتاج يتوجه لحد

يمكن عشان كده رغم انى لوحدى الا انى بحس بحب و مش لحد لا ده حب كده طبيعى شغال على طول فعلا ..محتاج بس حد يتوجه ليه الحب ده عشان يحس بيه و احس بيه انا اكتر و ده مش عيب انى احتاج احب و برضه مش هيكون اندفاع لانى ادور او اعيش اى حب و خلاص

بحظى الايام دى كده فتحت دولاب كتبى القديمة و ببص لقيت كشكول قديم مكتوب كاملا باشعار و خواطر زمان انا كنت بكتبها كنت نسيتها تماما و مكتوب فى اول الكشكول اسمى و الفصل 2/24 يعنى كان تانية ثانوى لانى مكنتش فاكر فعلا هى انهى سنة تحديدا و مسكته قعدت اقرا فيه و استعبطه كله تقريبا بس مش احساسيه لا انى فاكر انه شعر لانه كان كلام فعلا ممكن يتقال عليه كلام مراهق و ده مش وحش هو اكيد كان جميل فى وقته كل الكتابات تقريبا كانت عن الحب بمواضيعه و احيانا لفلسطين ايامها كنت متأثر برضه باحداثها و باندفاعى فى المرحلة العمرية دى ... فرحان ان كان فيها حاجات جميلة كده مع انى مش حابب اى حاجة كتبتها فى الايام دى لكن زى ما قلت ان ليها جمالها و افتكرت بقى كل كلامى ده كان على مين و جت فى بالى اغنية وجيه و هو بيقول انا اصلى كنت زمان حبيب و شعر ايه و غنى ومكاتيب ...ليه كل ما امسك هى تسيب فعلا كنت حبيب بس هى واحدة بس اللى كنت حبيتها الهمتنى فعلا كل الكلام و الحاجات اللى كنت كتبتها زمان دى بس راحت طبعا زى حاجات كتير بتروح فمتسألوش عنها مبقتش اعرف اى حاجة عنها تماما و متفتكروش برضه انى كنت قايلها انا كنت اعرفها طول فترة سنة تانية دى فعلا لكن ولا مرة قلتلها انى معجب ولا بحبها كان كل كلامنا عادى و عام و فى الدراسة بس كنت ببقى مبسوط جدا لما اشوفها و اكلمها و فضلت شوية فى تالتة الى ان تلاشت فى اخرها او قبل كده كمان
و بعد كده قفلت الكشكول و شيلته تانى بعد ما فكرنى بزمان و ايامه بحلوها و مرها
دلوقتى ادعى ان كتاباتى اختلفت و مبقتش عن الحب بس و نضجت و كمان بقت من غير اى شخص ملهم للاسف بس اتطورت و هى فى مدونتى خواطر نفس
-------------------------------------
بما انى حسيت الكلام ده اوى قلت لازم اكتبه

مطلوب منك .. انك
تهرب منك.. و انك
تبعد عنك .. و انك
ترمي حاجات جواك من سنك .. و انك
تدبح فنك .. و انك
تسرق دمع البوح من ننك .. وانك
تطرح عنك كل معانى الحلم لأنك
عايش وحدك وسط الناس
مشكلتك .. عندك احساس

الشاعر الجميل محمود رضوان من ديوانه نضارة نظر

--------------------------
ختاما ادعو بالرحمة للمدون محمد الكردي رحمه الله و غفر له و مدونته هى بقايا قلب و وطن زوروها كانت مدونة جميلة و لم اعرف بوفاته الا اليوم رغم انه توفى من عدة اشهر !!!

!!عام جديد فهل يحمل جديد ؟؟

2008-01-05T03:54:00.000+02:00

مرت سنة كانت صعبة جدا لحد اخرها و عشان اخرج منها فى حالة جديدة و افرح رحت حفلة منير عشان ابدأ سنة جديدة سعيدة و رغم ان قبل دخولى على طول عملت موقف غير ظريف تماما و لا ينسى لا داعى لذكره الا انى كنت استبشر بعام جديد و لكن اسمع اخبار تخلينى احس انه لا جديد ولا غيره و ان المسيرة العظيمة مستمرة فمثلا هيئة المصل واللقاح هتتباع والتطعيم هيغلى كلام غريب يعنى كمان هيصعبوا ابسط الحقوق و الحديد غلى باى حجة و محدش يقدر يقف ادام عز طبعا و اسعار عمالة تزيد و تضرب
و طبعا صديق ليا ناوى يهج من البلد بعد ما نتخرج من كتر اللى بيحصل فيها و مش مؤمن انه فى تغيير ولا غيره و شوفوا البوست بتاعه و بيسأل عن الناس بتاعة زمان و حبها للبلد و اما اقوله ما تبقى زيهم و تقعد و تعمل و هو معندوش اى امل او مستنى يحصل تغيير بس مش على ايده طب ليه ما نقعد و نحاول نعمل حاجة يعنى هنسيبها و نروح فين و ليه ولا اى مكان احسن من هنا و بالمناسبة للبلد و الغربة اسمعوا اغنية هيلا هوب من شريط وسط البلد الجديد
بتقولك هيلا هوب و هيلا هوبا يا ابن بلدى الغربة صعبة البلد دى ترابها اغلى مرها من الشهد احلى عذابها متشرب هريسة ... حط كتفك جنب كتفى لقمة ناشفة حاف تكفى

فى اكتر الاحيان الدموع بتبقى كتير فى عيونى تقريبا معظم الوقت عينى بتدمع ده لانى اولا املك حساسية فى العين لا علاج لها تجعلنى ادمع باستمرار كما انها تتأثر بالاضاءة الشديدة و الشمس و حاجات كتير ممكن تأثر فيها و كمان سهل انها تدمع لحزن او فرح و احيانا بتختلط المشاعر حزن و فرح و الحساسية برضه و الناتج بيبقى واحد هو الدموع طبعا لكن حقيقي ساعات بحس انه صعب التمييز الدموع دى ليه هى حساسية شغالة بتدمع عينى ولا من حزنى يمكن فرحى بيبان لكن الحزن اصعب انه يبان انا بجد مبفهمش مشاعرى حتى ساعات لما الناس تسألنى بتدمع ليه بقولهم انها حساسية وده لانه الاغلب فعلا انها الحساسية لكن ممكن يكون لسبب تصفية نفسى مثلا الدموع دى بحس انها بتصفينى فعلا عشان كده عمرى ما كرهتها او اتمنيت ان حساسية عينى تروح
ملحوظة انا مش عارف فقرة الدموع دى ايه علاقتها بعنوان البوست لكن كنت عايز اكتبها حاجة جوايا عايز اقولها و خلاص

اما عن مايحمله العام الجديد لى فهو يحمل اهم الاحداث الشخصية و هو التخرج من الكلية و الخروج للعمل ربنا يتمها على خير

كل سنة و انتم طيبين وكل سنة و احنا كلنا بنحاول نعمل اى حاجة تعمر خرابنا

و ان متعلموش فى الشوارع يتعلموا فى المدارس !!!!

2007-12-13T01:18:00.000+02:00

من حوالى 8 سنين كان عندى مدرس انجليزى كان بيجى فى الفصل يقولنا شوية شراميط و كان اللفظ جديد (عليا على الاقل لحد ما اتفهم لوحده كده فى حاجات كده بتتفهم معرفش ازاى ولا امتى ) المهم تفوت ال8 سنين ويبقى اخويا (تانية اعدادى )يديله نفس مدرس الانجليزى اللى كان بيديلى و المرة دى كان بيقولهم لفظ اخر و هو (احه) و اخويا من كتر ما سمعه منه و اخويا عارف طبعا بيبان انها شتيمة او حاجة ابيحة بس مش فاهمها فراح بمنتهى البراءة لبابا و انا سامع من بعيد كده وعامل مش معاهم و بيقوله بابا المدرس بتاعنا بيقولنا كلمة كده مش عارف يعنى ايه وقاله هى حروفها اح ا(طبعا مرضيش يقولها لفظا لانه عارف انها كلمة مش مظبوطة مينفعش يقولها لابوه ) فرد عليه قاله كلمة ابيحة فاخويا سأل طب يعنى ايه قاله كلمة ابيحة و خلص الموضوع من غير تعليق تانى

هى فوضى

2007-12-03T03:13:00.000+02:00

بداية كلامى عن الفيلم مش نقد هو مجرد كلام عايز اقوله عن الفيلم و اللى مشافوش و ناوى يشوفه يبقى ميقراش عشان كلامى ممكن يحرق اجزاء من الفيلم فشوفوه الاول بعدين اقروا

الفيلم من اكتر الافلام اللى مش هنساها فى حياتى و اللى اثروا فيا اكيد الفيلم فى عيوب زى ما فى المميزات لكنه يستحق كم كبير من التقدير الفيلم جرئ و لو الرقابة كانت سايباه كمان شوية كان هيطلع اجرأ كمان و فى خصوص جزء الجرأة دى سواء بمشاهد عري او شتايم فالفيلم مش سفالة و لا انحطاط الفيلم قيمة كبيرة جدا مفيش مشهد فيه كان معمول زيادة ولا ملوش لازمة كون ان فيه مشاهد جنسية كبير و الفاظ شوية و لو انها اتحكمت كذا مرة بسبب الرقابة لولا كده كان عادى هتسمعها بس زى ما قلت كل حاجة فى مطرحها و حقيقية يعنى اما ادخل الفيلم ده مع اختى ولا اى بنات و لا اهلى انا مش هكون محرج زى ما ناس كتير ممكن تشوف كده

كل واحد من حقه يشوف فيلم زى ده و مهواش معمول عشان الشباب اللى معظم اللى بيدخلوا الفيلم بيكونوا داخلين عشان يشوفوا كمية الستات اللى فى الفيلم قالعين

انت هتشوف الفيلم لو طلعت منه بالمناظر تبقى ولا حاجة لو طلعت بكمية الاحاسيس و القيم اللى عايز الفيلم يقولها تبقى كده شوفته بجد

هتلاقوا فى كل حتة قصة الفيلم والرموز اللى فى الفيلم بتشير لايه و حاجات كده فمش مستاهلة انى اقولها انا كمان ممكن تقروا هنا

http://egyfilm.com/Forums/viewtopic.php?p=2476823&sid=05f9cc5a67d37ee9908246386624c0b8#2476823

لكن هقول على بعض الحاجات بقى

الفيلم كنت متفاعل معاه من اوله لنهايته لكن فى النص التانى و من اول ما حاتم (خالد صالح) خطف منة شلبى و اغتصبها و باينلك الدم على فستانها و الفستان متقطع اللقطة دى تعبتنى جدا كنت قاعد باخد نفسى بالعافية وهرجع و هعيط و الغل بقى مالينى كأنى عايز اقتل حاتم 100 مرة و جنبى اصحابى خلاص هيعيطوا برضه ايه المشهد ده كان صعب جدا جدا و بعدين اما تروح لامها هالة فاخر اللى قامت بدورها بروعة و صدمة الام اما تشوف بنتها داخلة بحالها دى و هى بتغطى صدرها و الحتة اللى فيها الدم و انا قاعد على اعصابى عايز ابرد دمى من اللى حصل و يستمر الفيلم عشان يثبتوا على حاتم عملته لحد مشهد النهاية اللى كان موفق جدا هى دى النهاية اللى مكنتش تنفع غيرها و اللى هدتنى الى حد ما

عمرى ما حسيت بحاجة فى فيلم زى ما كنت حاسس فى الفيلم ده

الفيلم واضح فيه تأثيرات شاهين و تأثيرات خالد متحسش انه بتاع واحد لا هما الاتنين عاملينه فعلا و ده اللى يمكن خلى الفيلم اقرب للناس من افلام شاهين القديمة اللى مكنتش عليها جماهرية زى ده

الفيلم بيعبر جدا عن حالتنا دلوقتى انجح فيلم عبر و قال حالتنا دلوقتى وهى الفوضى و اللى حلها الوحيد هو الفوضى برضه زى نهاية الفيلم بس دى فوضى جماعية بقى هى اللى لمت الناس عشان تحلها و الفيلم بين برضه ان زى ما فى الخراب اللى فى البلد و الناس اللى مبوظينها قالك برضه ان فى اللى بيحبوها و ماشيين فيها صح

كل ممثلين الفيلم طلعوا كل اللى عندهم حلو جدا و تفوقوا على نفسهم

تحية للمخرجين العبقريين يوسف شاهين و خالد يوسف

احمدى نجاد و التعليق لكم !!!

2007-11-18T18:28:00.000+02:00

ده ايميل جالى انا قولت احطه هنا و اسيبكم بقى تشوفوه و تعلقوا

تقرير مصور عن لقاء حاخامات اليهود الامريكيان مع رئيس الجمهورية الإيرانية المجوسية

الرئيس الإيراني محمود أحمدي نجاد الذي خدع الكثير بشعاراته المزيفة فمنذ انتخابه رئيساً لإيران وهو يطالب في خطاباته بمسح دولة إسرائيل من الخريطة وأن زوال "إسرائيل" بات قريباً ، ولكن تفاجأ أولئك المخدوعين عندما عرفوا الحقيقة التي تؤكد كذب صاحب هذه الخطابات (نجاد) كما كذب من قبله (حسن نصر الله) ، وكما كذب مؤسس دولة ولاية الفقيه (الخميني) عندما أعلن العداء لأمريكا وإسرائيل في الظاهر وتحالف معهم في الباطن في شراء الأسلحة وغيرها من الأمور المثبتة تاريخياً ، فالعداء لليهود وترديد اسم إسرائيل إنما هو ذر للرماد في العيون لخداع الشعوب المغلوبة . وبعد تلك الخطابات الرنانة التي كان يطلقها ظنوا أن هذا الرافضي الصفوي (نجاد) سيعيد للمسلمين هيبتهم ، ونقول لهؤلاء على رسلكم فهذه صور الرئيس الإيراني مع اليهود في أمريكا ، فقد استقبل رئيس الجمهورية الإيرانية محمود احمدي نجاد الليلة الماضية في نيويورك عددا من حاخامات اليهود الأمريكان . هنا استقبال وتبادل للهدايا مع اليهود وتكريم لأعداء الإسلام !! ، وفي إيران قتل وتشريد وتصفية أهل السنة ومنعهم من ممارسة شعائرهم الدينية مع أنهم يشكلون ثلث الشعب الإيراني .

لا تساعدوهم

2007-11-05T01:58:00.000+02:00

فى احدى مينى باصات الجمعية راكب فيه فتلاقى واحدة ست طالعة الست ما شاء الله كده فيها صحة تضرب العربية كلها المهم طلعت بتوزع ورق اذكار و حاجات كده و تقولك ساعدونى عندى عيلين وعايزة اصرف عليهم و جوزى فى زنقة محبوس سنتين و انا بكلمكم بصراحة لا عاجز ولا فلوس مستشفى بس ساعدونى اربي العيلين !!

معرفش بقى ايه التعاطف اللى ممكن يكون مع واحدة زى دى يعنى جوزك و متنيل مسجون شوفى عمل انهى مصيبة و انتى شوفى صحتك ازاى و جاية تشحتى طب ما تشتغلى اي حاجة لكن ازاى مهو مش هتلم اللى بتلمه من شحاتتها دى و احنا شعبنا قلبه طيب و غلبان بس مش انا يعنى اللى قلبى حجر انما انا ضد المتسولين اساسا و اللى بيشحتوا عشان علاج حد اقوم الاقى كمان واحدة عشان جوزها مسجون بتشحت !! حتى لو عشان ولادها الكلام ده مينفعش

نصيحة لا تسااااااااااااعدوهم

تاج عليه القيمة

2007-10-07T12:38:00.000+02:00

تانى مرة اكتبه الله يخرب بيت النت
لو قالولك اختار عصر من عصور مصرعلشان تعيش فيه تختار اى ‏عصر و فى عهد اى حاكم .. واشمعنى؟
هختار من قريب مش بعيد الستينات والسبعينات كده
اعيش ايام الحروب النكسة والنصر و عبد الناصر وحليم
او ايام الفتح الاسلامى لمصر
اول ‏اولويه فى حياتك عيلتك ولا شغلك ولا اصحابك؟
الطبيعى يتقال عيلتى بس اصحابى يعتبروا عيلتى برضه
ايه اكتر ‏حاجه بتحبها فى رمضان؟
اكيد العبادة والقرب من ربنا دى احسن حاجة و اللى بنحاول نعملها يا رب نتوفق
بحب القطايف بستناها من رمضان لرمضان
اوصف ليا ‏اجمل فطار ممكن تفطره ؟
اجمل فطار مش فى الاكل فى الناس اللى بتفطر معاهم لما يبقوا حبايبك واصحابك اوى
اما لو الاكل فانا بعشق الملوخية
لو انت ‏حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم ‏عادل؟
مش ببالغ لكن هكون مبعرفش النوم طول ما فى واحد مظلوم
الحكم العادل على الناس ده اصعب حاجة و كل يوم هشك فى نفسى عدلت ولا لا و عشان اتأكد الناس كمان تحاكمى و تقومنى
اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
التلاتة
نفسهم اللى شيطان بيغويها و هما بيضعفوا ليه
و الشعب اللى بيسكت ويرضى باى حاجة فبيزود قوة الحكام كظلم
و الحاشية طبعا لمصلحتهم فبيسمع كل كلامهم و ينطرش عن الشعب اللى المفروض يسمعهم
مين ‏أكتر اعلامي مصري بتحترمه؟
منى الشاذلى و محمود سعد
قريت ديوان عمر مصطفى صاحب بلوج تجربه " اسباب وجيهه للفرح" ‏عن دار ملامح و لا لسه ؟؟
لا ليه؟!!
لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
كان بيجيلى احاسيس وتمنى ان اشتغل صحفى او كاتب وساعات محامى
بس انا سعيد اكتر انى معمارى الحمد لله
ايه تانى بلد تتمنى تعيش فيها بعد ‏مصر؟
الموضوع ده مبيجيش فى بالى لانى مبخططش انى اعيش برة بس ممكن اقول المانيا
اوصف ليا ‏ترتيبات اجمل فرح ممكن تحضره؟
اجمل فرح لما يكون بسيط اوى و يكون كده راقى فى كل شئ مش مليان باغانى العنب و اخواتها لا اغانى راقية و اما يكون مفيش اكل انا مش هجيب الناس تاكل و يحصل زروطة ده مش فرح و ميكونش فى تصوير برضه كتير وكل المعازيم عايزة تصور مع العرسان و تسلم عليهم لا يعنى يعتبر الفرح كده كأنه حفلة
بتراعي ‏كلام الناس والقيل والقال؟ لو اه او لو لا قول لى ‏ليه؟
بسمعهم بس لو مش معاهم يبقى طز فى كلامهم ما دام شايفنى صح او راضى
المشكلة ان لسه بنخاف كلام الناس و بنحاول منعملش حاجة تثير كلامهم حتى لو حاجة شايفينها مفيهاش مشاكل
صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
لا هتضايق جدا يعنى بعد كل التكنولوجيا دى ارجع كده مرة واحدة!!
السعاده ‏هى؟
الرضا والقناعة
القيمة للحياه
عندك أمل ‏؟؟ أسبابك ؟
اه عندى و ده لان مفيش حياه من غير امل
و ربك لما يريد احلامنا و امالنا هتتحقق ما دام عايشين
لما تحب ‏تهرب من كل شئ بتروح فين؟
السرير طبعا النوم احسن و اقوى هروب
رائع
امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
انا لحقت يا عم !
اول ما تميت ال21 من شهر خلاص بقى كبرنا
هييييييييه دنيا مسئوليات بقى
لما ‏بتعمل عمل خيرى بيكون ايه هو دافعك الاول؟
رضا ربى و راحة نفسية
بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
لا و متفرقش معايا ولد من بنت هى هياها باضرارها و كرهى ليها سواء فى ايد ولد ولا بنت
هى مجرد فعل احمق من كل انسان يفعله
بتعرف ‏ايدك اليمين من الشمال ازاي؟
الشمال باكل و بكتب بيها طبعا
ايه اكتر ‏اله موسيقيه بتحبها ؟ ؟
العود و الجيتار والدرامز
احتمال اقول كل الالات !!
فى رأيك ليه الذوق والنخوه ‏اتعدموا؟
لان الناس اتغيرت و مبقاش فيها صبر ولا تحمل لبعض كله فى نفسه و بس مبقيناش جماعة كل واحد عايز يبقى لوحده ولان مفيش تسامح
ايه ‏الحاجه اللى لو حصلتلك تبقى سعيد قوى؟؟
مش عارف طول عمرى بدور عليها !! يمكن لما احب مثلا اصلى معملتهاش قبل كده
او لما اتخرج و اعمل عمل يكون فخر ليا و اشوف رد فعل سعيد للناس فى ايه احسن من كده
تختار ‏يبقى عندك...ارض زراعيه ولا اجنس عربيات و لا كام عماره و لا فلوس فى ‏البنك؟؟؟
اختار فلوس فى البنك هعمل بيها احسن من ال3 اختيارات دول
البحر و ‏لا النيل؟؟
اللسان اللى بيجمعهم
مركب و ‏لا طياره؟؟
بما انى فى مشروع تخرجى وهو مطار يبقى اكيد الطيارة
مجنون و لا ‏عاقل؟؟
مجنون و جناني ده عين العقل
تقرأ ‏كتاب و لا تتفرج عليه فيلم؟
هقرا الكتاب فهيعملى احسن فيلم ليه و بعدين هشوف الفيلم اتعمل ازاى
بتمرر ‏التاج لمين؟؟؟
لكل الناس وكل واحد عايز يتفضله اكون سعيد

و فى النهاية اشكر محمد سمير غمض عنيك اللى خدت منه التاج ده

الموت ب50 جنيه

2007-09-24T03:32:00.000+02:00

من الحقائق العلمية فى بلدنا المصون ان لو حد راكب عربية وماشى بيها وخبط واحد ماشى فى الطريق لو اللى اتخبط ده مات يبقى يا دوب هيروح القسم يدفع 50 جنيه غرامة و تتكتب انها قتل غير متعمد و خلصت مات الراجل بقى فى داهية اما المشكلة بقى لو مامتش و اتصاب بس ساعتها يحصل بهدلة فى القسم و دفع فلوس لعلاج اللى اتخبط و دفع تعويض كمان لانه غالبا المصاب بيتنازل عن المحضر عشان ياخدله كام الف او يمكن طيبته خليته يعفو عنه !!
الاهم من كده بقى كمان ان اللى بيكون سايق وخبط ده مبيحسش بالذنب اوى يعنى الراجل جه ادامه فمات يعمل ايه يعنى نصيبه او انه مصاب و برضه مش هيهتم بيه اوى غير بس لانه عايز يفلت فيقوم مكلم كل وسايطه و يكلم المصاب عشان يتنازل و هو برضه لا يعانى من اى عذاب ضمير فى انه خبط واحد سواء مات ولا مصاب !!!
عشان كده بقى احب اقول فى النهاية لكل واحد جه خبط واحد بعربيته يا ريت يكمل عليه و يموت احسن ما يبقى مصاب لان ده طبعا اللى هيوفرله يا دوب هى 50 جنيه و تكتب قتل غير متعمد يا بلاش

حلم مش عايز يسيبنى

2007-09-16T13:56:00.000+02:00

من و انا صغير بحلم الحلم ده هو مش حلم ليا قد ما هو حلم للاخرين حلم لتحقيق حاجات لناس مبتحلمش دى عايزة اقل حاجات اساسية ليها و محرومين منها
من و انا صغير وانا كل ما اشوف حد فقير اوى وبيشحت محتاج فعلا ببقى عايز مش اديله فلوس لا ببقى عايز اخده اسكنه فى اوضة حتى و اشوفله اى شئ ممكن يكون مصدر رزق ليه بجد دايما كل ما اشوف واحد من دول فى الشوارع بيجيلى الحلم ده و اتخيله مجرد بس خيال او انى هيكون ليا دار رعاية للناس دى او مش دار ليا دار موجودة اقدر اخدهم فيها و خلاص
اكيد فى ناس بتشحت كأنها شغلانة يعنى مع انهم يقدروا ميشحتوش و انا اكيد مش بتكلم عن دول لانهم نصابين شايفين الشحاتة بتجيب فلوس من غير مجهود و لما بياخدوا فلوس مننا يبقى احنا بنساعدهم يستمروا و يعيشوا كده
نرجع تانى للمحتاجين اوى بجد و هما كتير برضه مما يؤسف عليه و خاصة نموذج موجود كتير جدا و بيكون واحد شعره و دقنه طولوا جدا جدا و ملابسه متقطعة و كله على بعض قذر جدا و تحس انه مجنون ان لم يكن كذلك و معظم الناس بتخاف منهم انا برضه بخاف منهم بس بيصعبوا عليا من اللى هما فيه ده وبشوف دول كتير اوى موجودين يعنى هى الدولة مش قادرة تلم الناس دى ولا توفرلها اى حاجة دول لا يملكوا اى شئ تماما حتى اقل الحقوق
و لحد انهاردة كل ما اشوف اى حد من اللى قلته يجيلى حلمى الخيالى بانى بعمل شئ لكن طبعا مبيحصلش ولا شئ و معرفش فى يوم هقدر اعمل حلمى ده ولا هيفضل مجرد حلم !!

حمادة .. شعار مش هنسافر مش هنسيب .. اراء عن السفر ولا البلد

2007-09-09T13:57:00.000+02:00

حمادة واحد مصرى معرفوش شاف فى مدونتى الشعار بتاع مش هنسافر و علق عليه فى الشات بوكس اللى على جنبك اليمين ده و كانت رسالته هى

فى شعار محطوت فى اخر ص الصفه فى الموقع يارت تشفه الى مكتبوب هوا (( بنحب مصر مش هنبطل مش هنسافر مش هنسيب ) يارت اعرف مين الى عتبه عشان اقله انت حمار عشان كلانا كد بنتمنا نسارف او نسيب
هو احنا لينا ايه هنا ممكن وحد بس مش شباب مصر يقلى هو ليه ايه هنا هنا بنخد على قفانه بس بنسرق ادم عنينا عوزين ايه تانى من هنا لزم نسيب هنا
يارت يكون فى حد يقرا الرساله دى يكلمنى على الاميل ويقلا احنا لينا ايه هنا

دى كانت رسالته و كان ممكن اقراها و مقولش اكتر من انهم حمير اللى بيسيبوا البلد مش اللى عايز يقعد زى ما بيقول عليا بما انى واحد من اللى حاطين الشعار ده
لكن اللى خلانى اكتب بقى انه طلب حد يرد عليه و يقوله لينا ايه هنا يعنى كويس اهو عايز يتعلم و يعرف و انا بقى هقوله و بما انه سايبها مفتوحة للرد و سايب ايميله فانا ادعو كل الناس انهم يردوا عليه هنا فى البوست او لو عايز يراسله ايميله اللى هو سابه
hmada1-love_2010@yahoo.com

ردى بقى
اولا انت جمعت و قلت كلنا بنتمنى نسافر وانا من حقى اقولك برضه ان فى كتييير مش عايزين يسافروا
ثانيا بقى سؤالك احنا لينا ايه هنا و احنا بنتسرق وبيتعمل فينا حاجات وحشة وكل الكلام ده ماشى يا عم بس قبل ما اقولك ردى فى لينا ايه احب اقولك اولا و اخيرا
اذا كنت انت مش محتاجها و ملكش حاجة فيها فهى كمان مش محتاجاك ولا مستنياك فاتفضل بالسلامة لاهى باظت ولا خربت لما انت تسيبها فى اللى عايزين يقعدوا يعملوا فيها حاجة حتى لو معرفوش يكفيهم محاولتهم شئ كبير قدموه
اما بقى ليك ايه فى البلد دى مش هقولك اهلك و ابوك و امك و المجتمع ماشى سيبهم بس شوف البلد اللى انت هتروحها دى لما تروح و يمسكوك فى اى حاجة ولا لما تحتاج حاجة هترجع هنا ولا لا هتلاقى مين هناك يساعدك و هما محدش يعرفك ولا مسئول عنك
شوف كمان الشغل اللى هتلاقيه برة والحياه اللى هتعيشها وسط مجتمع كله غريب عنك و هتربى ولادك معاهم اكيد هيكونوا اتربوا زيهم معرفش يمكن تكون راضى بحاجة زى دى
انت ليك هنا كل حاجة حتى لو بيتاخد من حقك كتير بس انت لسه ليك ولما حد يكلمك انت فى بلدك ليك مليون صرفة اما برة بقى قلى حاجة واحدة ليك هناك الحاجة الوحيدة يمكن يعنى الفلوس و مش بالساهل طبعا و لو انت شايفها كل حاجة يبقى موضوع تانى و مع ذلك انت هنا لو اتعينت فوظيفة محترمة هتعيش كويس والوظايف موجودة
و بعدين لما كله هيسيب البلد مين بقى اللى هيقعد فيها ولا هى تبقى باظت مننا و احنا سكتنا وسيبناها و فى الاخر نقول اصل لينا ايه

اكيد ده مش كل كلامى بس ده اللى فى بالى دلوقتى و كل واحد ليه تعليق انا مستنيه و هبعت لحمادة بكلامى و تعليقات اى حد و فى الاخر متنساش ان البلد مش مستنياك ولا واقفة عليك بس انت اللى هتكسب او تخسر

و احب اختم بالعبقرى منير وهو بيقول
قلب الوطن مجروح لا يحتمل اكتر نهرب و فين هنروح لما الهموم تكتر ...... لو قلبى عاد ضميه اديه حنان و داديه ده الصمت مش لينا فين الولد ما يروح لازم يعود اسمر................ اسمعوها بقى كلها

كل سنة وانا طيب

2007-09-03T17:34:00.000+03:00

كتبت البوست بتاريخ بكرة اللى هو عيد ميلادى
المفروض انه عيد ميلاد بقى وكله سعادة واحتفالات و بتاع بقى بس اللى بيحصل و حصل زودلى احساس اغنية على حسين حزين جدا سعيد و كم التناقض فى الاغنية و الاحساسيس المعكوسة اللى بنحسها مع بعض فعلا و بنعيشها مع بعض
ما احنا بنطلع نبكى على الاموات فى عز ما احنا فرحانين بالعيد ... والدم لونه زى لون الورد
يااه كتير بنشوف الورد والدم بس عمرى ما ربطت بينهم كده انهم لون واحد بجد الاغنية دى تستحق الكتير
اللى خلى الاحساس ده يجى بقى انى انهاردة راكب ميكروباص وابص على الطريق التانى الاقى ميكروباص واقف و ادامه ست كبيرة واقعة على الارض انتهت حياتها منظر لا ينسى و الناس بتردد عبارات الرحمة بس فى النهاية كله بينسى ويروح لحاله و مش بلومهم بس كان شاغل بالى نهاية الست دى و حياه السواق ده هيعيش متعذب ولا هينسى زى كل الناس و حاجات كده كتير مش قادر انسى فعلا

شوفتوا بقى ادينى دخلت فى مود حزن غصب عنى و بشيلكم انتو كمان الهم خلاص انسووووووووا

منا قلت بقى حزين جدا سعيد هى فعلا كده بس خلاص يلا نحتفل

خاصة كمان المفروض ان السن اللى وصلتله ده هو سن الرشد مما يجعله او يجعلنى باهمية ومسئولية اكبر اعتقد كده صح ولا ايه؟

يلا بقى حد هيحتفل معايا بعيد ميلادى ؟؟

كلام غريب

2007-08-24T01:57:00.000+03:00

الحياه لا تأتى بجديد
ادى الدنيا و ادينا عايشينها الاسبوع ده تقريبا كان كله فى البيت و هو ما يعطى لى احساس العذااااااااااااااب لا خروج ولا اصحاب اختفوا او اتلهوا فى الدنيا راحوا فين بقى الله اعلم ولا اماكن للخروج و مليت من الخروج وحدى و الاماكن مبقاش لها طعم ولا جديد

حاجتين هما كانوا الونس فى كل الملل ده اولا صوت منير السحرى لا يتسع اى كلام عليه و تانى شئ الروايات و قريت
روايات تلاتة كانوا كلهم حلوين اووى من حظى هما لحظات غرق جزيرة الحوت للمخزنجى و القرين لسليمان فياض و ترانيم فى ظل تمارا لمحمد عفيفي دول 3 عوالم مختلفة جدا و ده من حظى برضه

و مع ذلك شعور الملل مراحش طبعا لان ما زال اوقات كتير جدا فاضية و فرااااغ و مع انى كان جالى تدريب و كنت بروحه الا انى زهقت منه و محستش بيه فهجيت منه و محدش يقول انه احسن من فراغ دلوقتى لانه مش كده

احساس القيمة و السعادة ده شئ برضه شاغلنى جدااا و امتى حد بيحس بقيمة حاجة بجد يعنى الشغل بيحسس بقيمة بيطلع بحاجة يعنى غير انه بيتعمل عشان فلوس تتقبض وخلاص .. يعنى هل فى نتاج فعلا عن الشغل ؟
او الناس اللى برضه كل فكرها وهدفها انها تشتغل و تجوز وتخلف و بس كده تبقى عاشت احلى عيشة وعملت اللى عليها ... هو فعلا كده هى دى الدنيا؟؟ ... يعنى بنتعلم عشان نشتغل نجيب فلوس عشان نتجوز و نخلف و نربى و نشوف مستقبل الاولاد و خلاص هى دى المهمة؟؟

كلام كتير لسه جوايا بس دلوقتى ده اللى طلع يمكن يطلع كمان او غيره بعدين!!!!

ادعو بالرحمة

2007-08-13T01:20:00.000+03:00

اتأثرت جدا بالخبر ده مع انى مكنتش اعرفها ولا متابع لمدونتها لكن اول ما قريت عند اشرف اخف دم الخبر و دخلت المدونة و قعدت اقرا فيها شوية صابتنى حالة كده مش عارف اوصفها
هى شيماء شيكو اون لاين ادعو لها بالرحمة و اقروا لها الفاتحة

اللهم لا تحرمنا أجرها ولا تفتنا بعدها واغفر لنا ولها

سبب الجواز

2007-07-27T20:20:00.000+03:00

اكتر اللى بيتجوزوا فى مصر بيكون عشان بنت وحلوة وخلاص حاجة تقليدية كده
يعنى الاساس انه بيتجوز واحدة للجنس و حتى كتير من اللى بيحبوا بيحبوا الواحدة للجسم برضه مش لشخصية او البنت نفسها ازاى
حتى اصلا ممكن تلاقى الاهل بيقولوا لابنهم فى بنت زى القمر و من عائلة
ايه رأيك
طيب و فين شخصيتها بقى مش مهم يعرف هى دماغها ايه

يعنى معظم اللى بيتجوزوا بيكون للجنس مش للدماغ و خاصة كمان ان فى قول يردده الكتييير ان المثقفات ( اللى هما فى طريق الثقافة طبعا مش خلاص وصلوا) مش حلوات دى قاعدة كده معروفة للكتير

مما نتج ان من الناس اللى (بيحاولوا يبقوا مثقفين ) منهم اللى بيفكر انه لما يتجوز هيختارها عشان دماغها مش جسمها و فى غيرهم برضه اللى هما المثقفين دول بيفكروا انه لا عايز جسم للجنس و بس مش عايز دماغها فى حاجة و انه يبقى قاعد فى مكتبه بيشتغل مثلا و مراته ملهاش دعوة بيه غير لما يطلع و تبقى فى دور الزوجة الجنسية و شكرا لانه مكتفى بمعرفة المثقفات اللى بيشوفهم فى حياته كتير

اختيار واحدة عشان دماغها لا يمنع انها تكون جميلة كمان لكن الاساس الدماغ و ده طبعا مش كتير بيفكر فيه

حاسب من مترو الانفاق

2007-07-21T17:06:00.000+03:00

من وانت لسه داخل المترو قبل ما تنزل السلم او تطلع هتلاقى واحد واقفلك و لو معاك شنطة هيوقفك و يقولك الشنطة يا اخ لو سمحت و يفتشها و كأن معاك قنابل و داخل تفجر المكان و بعد ما تسيبه وتدخل تجيب التذكرة (اللى غالبا بتعمل مشاكل فى الدخول نظرا لان التذكرة فيها حاجة او المكنة اللى فيها ) و تروح عشان تعدى تلاقى واحد واقفلك تانى عشان يفتش... فى ايه يا عم مهو فى واحد فتش فوق... لا معلش بنشوف تانى

و تسأل وتسمع من الناس بقى كل واحد بيقول حكاية ان مش عارف ايه دخل مصر ومستهدف المترو
او ان المخابرات عاملة مش عارف ايه
او بن لادن عايز يضرب المترو عندنا
و غيرهم كتييييييير ولا احنا عارفين فى ايه!!!

دعوة لاحتفالية جلسة ثقافية

2007-07-18T04:56:00.000+03:00

اعزائى المدونين
ادعوكم لاحتفال الجماعة الادبية الجلسة الثقافية
الخميس 19/7 الساعة 7
المكان بيت السحيمى فى القاهرة الفاطمية ش المعزلدين الله

الاحتفالية بها العديد من المفاجأت الجميلة جدا
بجد اى حد حابب يجى لا يتردد
مش هتكون جلسة عادية ونقاش ادبى و كده لا هتلاقو حاجات تانية مبهجة

تحياتى

جواز السفر

2007-07-15T19:06:00.000+03:00

لم يعرفوني في الظلال التي
تمتصُّ لوني في جواز السفرْ
وكان جرحي عندهم معرضاً
لسائح يعشق جمع الصور
لم يعرفوني، آه... لا تتركي
كفي بلا شمسٍ،
لأن الشجر
يعرفني...
تعرفني كل أغاني المطر
لا تتركيني شاحباً كالقمر!
كلُّ العصافير التي لاحقتْ
كفى على باب المطار البعيد
كل حقول القمح،
كل السجونِ،
كل القبور البيض
كل الحدودِ،
كل المناديل التي لوَحتْ،
كل العيونِ
كانت معي لكنهم
قد أسقطوها من جواز السفر!

عارٍ من الاسم، من الانتماء ْ؟
في تربة ربَّيتها باليدينْ؟
أيوب صاح اليوم ملء السماء:
لا تجعلوني عبرة مرتين !

يا سادتي! يا سادتي الأنبياء
لا تسألوا الأشجار عن اسمها
لا تسألوا الوديان عن أُمها
من جبهتي ينشق سيف الضياء
ومن يدي ينبع ماء النهر

كل قلوب الناس... جنسيتي
فلتسقطوا عني جواز السفر!

--------------
صوت مارسيل خليفة صوت ملائكى جدا و رائع و كلماته التى يختارها غالبا لمحمود درويش تقتلنى بشدة مع عوده و صوته
اغانى مارسيل خليفة

دول مطربين مصر

2007-07-11T00:41:00.000+03:00

ده مطرب العصر وصاحب اكبر جمهور و مش المطرب بالصوت بس لا هو بالعضلات كمان شايفين بيجدد شبابه حتى المرة دى معرفش يعمل جديد فى خلقته راح قالع عشان تتفرجوا بقى على الجسم الجامد و كمان اغانيه بقى لا هايل عنده اختلاف وبيتكلم عن الناس ويعبر عنهم بشكل ده مطرب الرومانسية يا جدعان و الحانه كمان غربى معظمها اصل الغرب هو الاحسن طبعا منتو عارفين و كمان قدوة هايلة هو يطلع يعمل حاجة فى خلقته ولا يلبس حاجة و كل الشباب وراه ما شاء الله حاجة تفرح اهو ده القدوة !!!!!!!!

ده بقى خليفة الملاعب اللى مجنن البنات طبعا مش شايفينه قمر ازاى لا و حساس جدا بحس انه راجل راجل يعنى و طبعا معندناش اختلاف ان اغانيه متنوعة جدا زى عمرو كده

لا وايه بقى وطنيته القوية جدا خلت الناس تحبه اكتر اوى بعد ما عمل الدور الوطنى الكبير وهو الهرووووووووب اه و البنات بتموت عليه وبيرموا نفسهم على عربيته و بيطلعوا على المسرح نفسهم يتباسوا منه اصله بركة وقدوة اوى يعنى حتى الشباب كمان يعزه اوى و يغنيله عنده حق مش كده برضه ؟؟؟

طبعا ده هو و الجامد جدا التانى هيثم شاكر الجيش بقى واحلى خدمة منهم معلش تعبوكوا يا نجوم بس متقلقوش على النجومية اصل اللى بيدخل السجن يشتهر اكتر ويتحب اكتر مهو ده الجديد

طبعا فى غيرهم بس كفاية دول عشان بتعب

-----------------------

اما بقى اللى بعدهم دول بقى اللى جمهورهم مبيفهمش ولا هو دماغ ولا بيقدر او يعرف معنى الفن الحقيقي اه اصل دول مطربين هلس اوى بيقولوا اى كلام و مكررين

حاولت اقول بطريقة التريقة او باراء من اختلف معهم عليه لكن مينفعش

ده حبيبييييييييييييييييي ده ابويا و اخويا و صاحبى فى كل وقت وده اول الجيل الموجود و ده اللى يتقال عليه مطرب مصر و مطرب الرومانسية ومطرب الاحساس وكل حاجة

ده مدرسى فى الدنيا يا جدعان كمية الاغانى والمواضيع والكلام اللى قاله رهيييب و الالحان اللى من الشرق و من النوبة مننا مش من برة و ده النجاح اللى بجد هنا وفى الخارج

انت مفيش احسن منك على السااااااااااحة

اما ده فهو برضه جميل جدا صوت نادر و قوى جدا بس مين يقدر

و ده برضه ينطبق نفس الكلام من صوت و قوة و تعبير

امتى الحاجات دى بتتفهم؟؟

2007-07-07T00:06:00.000+03:00

من فترة كبيرة اخويا الصغير(13 سنة) بيتفرج على فيلم النوم فى العسل فكل شوية يسمع كلمة مبيعرفش طبعا مسكتش
راح سألنى مبيعرفش ايه
انا: مبيعرفش يتجوز
هو:ازاى يعنى مهو متجوز
انا :.............
وهربت فى حاجة تانى وهو مرجعش سألنى

امبارح بقى بيشوف فيلم the mexican
و كل شوية يقرا فى الترجمة لوطى
راح سأل :محمد يعنى ايه لوطى
انا: هاا
هو: يعنى ايه لوطى دى
انا: يعنى نسبة لقوم لوط
هو: و مالهم يعنى قوم لوط
انا: هاا كانوا علاقتهم رجالة برجالة مش بستات
هو: يعنى ايه؟؟؟
انا: بس عايز اشوف الفيلم بقى
و سكت و مسألش تانى

معرفش بقى فهم ايه ومفهمش ايه
بس ده خلانى افكر هو انا امتى مكنتش اعرف الحاجات دى ومعانيها وامتى عرفتها يمكن تالتة اعدادى مثلا او من اول ثانوى اذكر ان المرحلة الثانوية دى على الرغم من انها سيئة و بكرهها فى كل حاجة الا انها عرفتنى حاجات كتير و اكتشفت حاجات كتير

يا دى الختان و الجهل

2007-06-30T05:30:00.000+03:00

يعنى بنت ماتت بسببه و المفتى طلع عشان يحرمه و السيدة سوزان بتقول برضه انه عادة غلط و عايزة تطلع قانون يجرم الختان يا رب يطلع ويتنفذ على الناس عشان يبطلوا ختان عقولهم ده
لكن مفيش فايدة فى الناس هما هما و شفت بوست حد على ستات فى مترو وحوار حصل عن الختان كل الستات قامت عليه عشان خاطر ان الختان ده هو الصح وان الختان مش باضرار لا ده فوايد و عشان نحمى البنت و فكر صعيدى متخلف بان البنت لما تموت احسن من انها متتختنش شئ ينرفز
و اخيرا الاقى واحد عامل موضوع فى ايجى فيلم منتدى منير بيكلم الناس فى الختان و تلاقى ردود الناس بقى اللى مع الختان و اللى بيقول الدين قال وفى احاديث
إذا التقى الختانان فقد وجب الغسل
في حديث بيقول"قصري ولا تهتكي
مش فاهم بقى امتى ظهرت الاحاديث دى وفين صحتها؟؟

الموضوع بتاعهم اهو
http://egyfilm.com/Forums/viewtopic.php?t=190730&postdays=0&postorder=asc&start=0

يعنى الختان شئ قديم و منتشر وشئ سئ جدا جدا ازاى الاسلام قال يتعمل و حتى لو المفتى كان افتى بيه فين عقول الناس تميز يا جدعان والحمد لله انه افتى بتحريمه بس هل كله هيسمع كلامه بقى
الموضوع لا محتاج مفتى و لا رأى فى الدين لانه واضح اوى

عشان اكمل سلسلة التاجات

2007-06-29T04:26:00.000+03:00

لما بتشوف واحدة جميلة قوي بتشيل عينك بعد قد إيه؟
يعنى لو هى معدية كده يبقى خلاص مجرد ما عدت لكن لو قدامى برضه هشوفها وخلاص على طول مش هفضل يعنى عليها كده
لو لك 3 أمنيات هيتحققوا.. هيكونوا إيه؟ (بس حاجة خاصة بك أنت)
واانا اعرف منين هيتحققوا دى ده فى علم الله
والامنيات كتير منها القريب والبعيد و الصعب بس كله ممكن يتحقق بارادة الله ثم عزيمتى
انى اكون معمارى شهير عملت تصميمات ناجحة او مسابقة تفوقت فيها
انى اعمل ديوان شعر و ربنا يلهمنى و اكتب كتير و فى مستوى راقى
انى ارتبط ببنت حلال تحبنى
تلاتة اهم كفاية عليكم و قريبين مش مستحيل بس قولوا يا رب
آخر مرة بكيت؟
اممم بمعنى البكا اوى يبقى الترم الاول من السنة دى فى عزاء صديق و زميل دراسة الله يرحمه مع انه مكنش صديق اوى لكنى بكيت اوى يومها
هو ده اللى فاكره لكن احتمال يكون حصل بعده بس بنسى ومحصلش من قريب بكا
إيه أكتر حاجة بتحبها في نفسك؟
الطيبة والهدوء بس مش دايما بحبها و الاصرار على تعلم ما لا اعرفه
أكتر حاجة بقى بتكرهها في نفسك؟
الكسل شئ سئ جدا خاصة لو مع فراغ او احباط بيضيعنى
ساعات بحس انى مش مفيد ولا بعرف اقدم شئ فى الحياه ولا افكار
أسوأ حاجة عملتها !
المعاصى والاخطاء كتير لا داعى لذكرها و الاجهار بها
بس ممكن اقولكوا الكدب على الاهل نظرا لظروف عدم التفهم او تكبير الدماغ من حوارتهم
مبادئك.. ثابت عليها؟
فى ثوابت معروفة لكن المتغيرات كتير والمؤثرات على الانسان بتغير لكن المهم تكون فى اطار ما انا فيه وراضى عنه مش تقلب تماما
لو رجع الزمن بيك مين الشخص اللي تختاره أنك متقابلوش؟
لا مفيش كل واحد بقابله بطلع منه بحاجة حتى لو محبتوش او حصل حاجة
لأي مدى ممكن تضحي ؟
لا كتير بس المهم يكون لحد يستاهل و بحبه
بتبكي من غير سبب؟
اممم مش بمعنى البكا اوى برضه لكن كتير ممكن تلاقى بكا داخلى
أنت قوي؟ (في تصنيفك لنفسك)
داخليا عندى تردد و حالات بحس بقوتى وحالات ممكن احس بضعف و ده بينعكس خارجيا طبعا لكن محبش اظهر اى ضعف ابدا لو حصل يبقى غصب عنى

طبعا التمرير نفس موضوع البوست اللى قبله

و فى النهاية اشكر الصديق فنان فقير اللى مررلى التاج ده

تاجات بتدور و تلف بينا

2007-06-28T04:45:00.000+03:00

تاج من الاغلبية الصامتة اشكره عليه

انت مين؟
انسان مصرى مشروع معمارى بتمنى اكون بالمعنى لمعمارى فى الدنيا والحياه و البناء
و ده شئ صعب لكن بحاول جايز
مين اكتر 6 اشخاص بتحبهم؟
بما انى عايش معاهم و هم الاقرب يعنى ابويا وامى واخويا واختى
ناقص اتنين بس انا بحب ناس كتير و اصحابى اوى
انت سعيد؟
كحالة عامة صعب يعنى لكنى ساعات بكون سعيد و ساعات لا و حاجات بتحصل تسعدنى و حاجات لا
بس الاهم هو الرضا و ان كنت مش راضى عن نفسى كثيرا
لو اجتمعت انا وحسني مبارك في غرفة واحدة؟
اعتقد لو نفخت فيه هيموت و ابقى معملتلوش حاجة و الموضوع بتاع اجتمعت بيه ده فكرنى بكلام الشعراوى لمبارك قبل ما يموت الشعراوى و يظل مبارك فابقوا اترحموا عليا قبل ما اقوله خاف الله خاف
لو معاك مليون ونص جنيه......تعمل بيهم ايه؟
معرفش هما دول يكفوا اعمل ايه لكن هدرس عمل مكتب معمارى اديره و اعمل دار نشر او الاهم انى انشر القراءة و الكتابة بطريقة ناجحة معرفهاش ولا درستها لسه و طبعا شقة وعربية لزوم الحياه و العيشة بقى ها بقى لسه فاضل فلوس؟؟
بس هو يعنى الموضوع مش فلوس بس لازم زى ما قلت دراسة المشاريع اللى هتتعمل و مش بهدف ربحى فى المقام الاول قبل ما يكون الاهم عمل شئ مفيد
بتحب مصر؟
هو انا شفت غيرها؟؟ بس هقول اه بحبها للعشرة بينى و بينها و لان فيها ناس تتحب بس برضه فيها اللى يخلينى العنها لكن مسيبهاش و انساها
بتحب البنات؟
كرجل و ولد مفيش حد مبيحبش البنات لكن بحبهم بانهى طريقة
احب البنات اللى بعقولها و بتفهم
و اى بنت جميلة ممكن تشد بجمالها لكن لو هى جمال شكلى فقط يبقى ولا ليها لازمة
انت مسلم؟
اه الحمد لله اكبر نعمة من ربى
ليه؟
لن استطيع انكار انه لان ابويا وامى مسلمين والحمد لله لكنى برضه بكبر و عقلى بيعرف وبيشوف انه لا يوجد افضل و اكرم من الاسلام
مين اكتر شخصية ما تقدرش تستغنى عنها في حياتك؟وليه؟
سؤال صعب لا اجد له ردا سوى امى
ايه اكتر موقف محرج اتعرضت ليه في حياتك؟واتصرفت ازاي؟
لا هى كتيرة والحمد لله لا انكرها بس مفتكرش كتير بنسى اصلى
فاكر مرة كنت فى حفلة ولاقيت واحد جه وقف ادامى بشوية كده و حسيت انه واحد صاحبى من زمان فعملت بايدى على كتفه كده انبهه فقاللى ايه؟؟ بصيت له كده و سكت قال ايه تانى و انا ساكت بعدين رفعت ايدى وقولت سورى لانه مش هو طبعا!!
كفاية كده بلاش نفتح فى كل اللى فاكره من الاحراجات
ايه الأمنية اللي بتدعي ربنا دايما انه يحققها لك؟
كتير اوى ربنا معايا بقى
بس اولا رضاه عنى وانى اقرب منه دايما
و بعدين انى احقق ذاتى وما اريد ده فى العموم يعنى
تمرر التاج دة لمين؟
حكاية التمرير دى لا افضلها و لا انى اجبر حد و لو قلت اللى يردوا محدش هيرد فانا سايبه كده و كل واحد رد او مردش اى حد عايزه يعنى يتفضل يعمله و يعتبرنى مررته ليه

سينما ..عمر وسلمى ..احلام الفتى الطائش...و قريبا

2007-06-25T21:44:00.000+03:00

موسم صيفى (حاااااااااار جدااااااااااا) و هو ما يستغل دائما فى الافلام والايرادات و التنافس و بداية الموسم جاءت مع الامتحانات فكانت مبكرة و جاء فى مقدمة الافلام قص ولصق الذى ربما يكون من افضل الافلام الا ان موعد عرضه سئ للغاية بسبب الامتحانات كما أن كثرة الافلام لم تجعله يستمر طويلا و يقارب من رفعه تماما مع نزول عمر و سلمى و علاقات خاصة الذى يمثله مجموعة من الشباب كما حدث فى اوقات فراغ و 45 يوم بطولة احمد الفيشاوى الذى لم يكسب جمهورا كبيرا بعد و احلام الفتى الطائش و تيمور وشفيقة بطولة السقا ومنى زكى عودة للثنائى فى قصة حب لا تخلو من بعض الاكشن و صباحه كدب لاحمد ادم الذى لم يصل بعد لحالة نضج فنى ولا ان يكسب جمهورا عريضا و قريبا سنجد افلام اخرى كركر عودة لسعد و تكرار للسابق وما زال الجمهور يتهافت عليه!! و هذه المرة يقوم باربع شخصيات كعادته يكبر مساحات ادواره و يقلل من ادوار الاخرين معه و عندليب الدقى لهنيدى فى محاولاته لاستعادة جماهريته التى يفقدها بالتدريج و مرجان احمد مرجان لعادل امام فى محاولاته التى تعد ناجحة فى ان يمثل بشخصيات من سنه ولكنها قريبة من الشباب و يمثل معه مجموعات من الشباب
ربما لا زال هناك افلام اخرى ستظهر قريبا فى هذا الموسم

فى ظل هذه الافلام الموجودة حاليا والتى تعد افلاما فقيرة فنيا لا نجد بدا من دخول السينما سوى للترفيه اكثر من التشوق او الارادة لرؤية الفيلم و لكثرة الخلافات على فيلم واحد للدخول
احلام الفتى الطائش
فى اول بطولة لرامز جلال الذى يتمتع بكوميديا جيدة و كنت اظنه سيقدم شيئا جيدا لكن الفيلم ليس اكثر من بعض الاسكتشات المضحكة دون قصة فهى عن شاب سئ الحظ دائما فى العمل و يتصادف بنيللى كريم و يحبها وهى فنانة ليس سوى هذا ولا تحس بازمة ولا مشكلة قوية فى الفيلم فلا شئ تقريبا
عمر و سلمى
لا احب تماما المسمى بتامر حسنى هذا لذا ربما ترونى فى تحيز ضده و لكنى احاول الا اكون
الفيلم يدور فى قصة عادية مكررة دون اى ابتكار عن شاب مستهتر وله علاقات كثيرة بالبنات و رغم ذلك تجد هناك من يحبها وهى ميس حمدان و عندما يرى خيانتها يتركهها و هو مجروح من ذلك !! و يقوم عزت ابو عوف بدور ابيه فى سخف تام و يكون ايضا كابنه ينظر لجسد كل بنت و هو فى غنى فاحش و ابنه طالب فى جامعة ال
cic
و التى ترى تامر بها يمد يده على كل بنت هناك بغمز فى وسطها فتصرخ ليقول هو ده فى محاولة للاضحاك ربما تكون فى اول مرة لكنها تكررت كثيرا فى سخف تام و حتى عملها خارج الجامعة لمن يسير بالشارع ( تجد بعدها انها انتشرت فى الشوارع و الشباب بدأ يفعلها التأثيرات السلبية الرائعة التى يكسبها الفيلم لشباب لا يحتاج هذه التأثيرات فبه ما يكفى و اكثر )
ثم يقابل سلمى (مى عز الدين) التى تظهر بانها البنت الوحيدة التى تقف امامه فى الجامعة ولا تقبل سخفه لكنها تحبه داخلها و تدريجيا يحبها و تحبه مع استمرار علاقاته النسائية والمعاكسات اليدوية !! و تجده يضربها قلما على وجهها لمجرد معرفته بمقابلتها بخطيبها السابق دون ان يعلم ما حدث بينهما بينما هى لا تبدى اى اعتراض على تامر فى شئ ثم تجده فى شقة ميس حمدان عندما طلبته فى مساعدة فراح و خانها و عندها تتركه سلمى لخيانته و هو يظهر بانه الشاب المعانى من بعد الحبيبة و لكنها تظهر فى شرب الخمر و علاقاته بميس حمدان وهو يقول انه يحب سلمى !! ثم يحاول ابيه الصلح و تامر يذهب لها عند شارعها ويطلب الزواج فتوافق و يحدث الزواج مع النهاية

لقطات
- ظهور محمد السبكى (المنتج) فى دور دكتور جامعى و فى جامعة مثل هذه سئ للغاية فهو لا يصلح تماما ولو حتى لمشهد واحد كهذا
- مشهد المعايرة بين الاب والابن عمر على سبيل الضحك فى فضح كل منهما الاخر ويهدد احدهما بقوله ما يفعله فى الحمام فيقول الاخر وانا هقول على المجلات السكس سئ للغاية ولا داعى له فمن المعروف عنهم لمن يشاهد الفيلم ولمن يعرفهم انهم كذلك و اكثر
- مشهد عمر لابيه عندما قال له مقولتليش مرة تعالى نصلى ودايما بنعمل الغلط لا يوجد لهذا المشهد اى اساس لا قبله ولا بعده فلم يحدث تغيير ولم تكن هى كلمة واحدة فى الحياه بينهم تجعل وجود تغيير اصلا كما انه من المفترض لا ينتظر اباه ما دام قد فهم شيئا وعرفه
- المنازعات الجامعية التى حدثت بالفيلم كانت تمثل لحقيقة بين الشباب عن النزاعات الكبيرة التى تحدث وتجدها دون سبب مجدى غالبا او بسبب تدخل لبنت لا داعى له
- مشهد تقليد تامر حسنى فى حركات مماثلة لما يفعله عادل امام لا داعى له ايضا مع بعض الحركات الاخرى التى حاول عملها فى المكتبة
- مشهد عرض الاب لفيلم امام بعض المشاهدين لرقصه هو وابنه و هم بملابس داخلية وبطبل مما جعل المشاهدين يقومون لخلع ملابسهم و الرقص !! شئ سخيف جدا لا افهمه
- شخصية عمر فى الفيلم مع تمثيل تامر لم يجعلنى اشعر بان هذا رجل بالمفاهيم الصحيحة والمعروفة للرجل ....... و كان فى استظراف زائد دائما
- ملحوظة عامة الفيلم يعكس اشياء من المجتمع لكنه يكسبها ايضا تأثيرات سيئة وسخيفة فى حق الرجل والمرأة فلم يكن عرضا لمشكلة ولا تحليل ولا لحل

تامر حسنى ما زال ممثلا سيئا لا يصلح للتمثيل ولا يراهن نجاح اى فيلم له سوى باسمه فى نجاحه الزائد كمطرب و لجنون الشباب عليه و الاغانى التى توضع ربما بالصاق دون سبب محكم فى الفيلم ولكنها للجمهور المجنون

مى عزالدين وجه جميل لم يتقن التمثيل بعد و احيانا يكون دمها ثقيلا ايضا (تعديل بسيط لكنها كانت جيدة فى هذا الفيلم الى حد ما)

المخرج اكرم فريد لا تظهر شخصيته كمخرج ولا ترى فى التصوير ولا الاداء ولا اى شئ يجذبك !! متى سيظهر كمخرج؟؟

---------------------------
ملحوظة اخيرة لا تسألونى عن دخول الفيلم فليس حبا فيه ولكن تجمع لشباب العائلة ومحبين لهذا التامر فلا يسعنى ان اعكر عليهم خروجة ما دمت وحيدا

فكرة الكيان المستقل و تجميعه

2007-06-17T23:57:00.000+03:00

بداية قريت فى كام مدونة عن عرض افلام قصيرة فى معهد جوته فقلت اروح و كلمت صديقى العزيز عبد الهادى و اتفقنا على اننا نروح

بغض النظر عن اننا اتقابلنا فى الزمالك ظنا منا ان معهد جوته هناك وخدنا لفة لغاية ما عرفنا معهد جوته انه فى شارع البستان فى التحرير وصلنا هناك متأخرين 10 دقايق يعنى فاتنا اول فيلم اللى كان اسمه سبيل الصغار و كان اخراج عمر خالد
دخلنا مع تتر الفيلم التانى ازرق و احمر اخراج محمود سليمان والفيلم كان بطولة باسم سمرة و مدته 11 دقيقة والفيلم ده جميل احداثه تدور ببساطة فى غرفة واحدة هى غرفة نوم باسم سمرة و احداثه تتلخص فى علاقة باسم ببنت و ان حصل بينهم اللى مكنش المفروض يحصل و كل واحد يفكر فى الطرق لمعرفة هيحصل الحمل ده ولا لا وايه الحل

الفيلم التالت كان يوم الاثنين اخراج تامر السعيد و مدته 8 دقايق فيلم حلو برضه بس ازرق واحمر احلى يعنى و انا كنت شفت الفيلم ده قبل كده و احداثه بين زوجين كل منهم يحكى عن يوم الاتنين واحساس كل واحد واللى حصل من وجهة نظره

الفيلم الرابع مكسيم اخراج محمد رشاد مدته 30 دقيقة فيلم معجبنيش الصراحة ولا فهمت منه حاجة ولا عرفت هو عايز ايه و المخرج كان عايز ايه؟؟

بعدها بدأت مناقشة مع الاربع مخرجين على الافلام دى و كانت مناقشة كويسة و كان فى حد علق بانهم يعملوا افلام عن الجميل فى مصر زى ما يعملوا الوحش الاتنين يعنى واننا عندنا اكيد الجميل لكن استفزنى رد تامر السعيد المخرج قال انا مشفتش حاجة حلوة فى البلد دى وكل شئ وحش و قام ماشى
و رسالتى لاى حد يقول كده ان كانت كده فعلا سيبها روح شفلك حتة تانية و عبد الهادى قال او شايفها وحشة حاول تخليها جميلة انت او يشوف الدنيا بنضارة تانية حلوة دى برضه

عدنا وعرض فيلم اثاكى للمخرج ابراهيم البطوط للمرة التانية بشوفه و هو فيلم جميل جدا و صادق و حقيقي الفيلم من غير سيناريو ولا قصة لا هو شخصيات بس واللى بيحصل واقع و الشخصيات دى جمعها المخرج فى الفيلم و ربطها بالفيلم ده
الشخصيات كانت
احمد كمال اللى قام بدور ابراهيم البطوط المخرج اللى سافر وعاصر حروب فى اماكن وله تجربه معاها مختلفة
بطرس غالى وحنان يوسف الزوجان وكل منهم له اهتمامات خاصة و حياه مختلفة
عصام عاشق الموسيقى واللى بيشوفها فى حياته كلها و كان من الجيش و جت شظية فى عين فتقاعد و خد وسام المحاربين القدامى
كريمة نايت و فتحى سلامة الموسيقيان
عمرو فكرى المحب للصوفية
و اخرين لا اعرف من هم حقيقة

الفيلم ده روائى على تسجيلى و مدته 70 دقيقة

بعدها كان فى مناقشة مع ابراهيم البطوط و الراجل كان جميل جدا كمان فى كلامه بجد تحفة وانا شكرته على الفيلم

فى النهاية كلمت عايدة وهى مخرجة مستقبلية باذن الله و هى منظمة موضوع عرض الافلام للمدونين ( ومعاها حد تانى ) و كلمتها عن الفكرة عشان اعرف بقى الموضوع فكانت ان فى سينما مستقلة زى الافلام دى كده و فى اكيد موسيقى مستقلة و مسرح مستقل و فى مدونين وهما كتاب مستقلين فكانت عايزة تربط و تجمع بين المستقلين دول كلهم فى كيان واحد لان محدش عارف التانى و الفكرة جميلة فعلا و هتبقى ناجحة للكل لو حصلت ان شاء الله
و يمكن المرة دى محضرش جمهور غير قليل و مدونين قليلين لكن برضه متعملش دعاية فى المدونات كافية ولا فترة كافية للمعرفة بالموضوع بس تتعوض على الاقل المرة دى اتعرفت برضه واترصدت ولو قليل لكنها اكيد المرة اللى بعدها هتكون اكبر و افضل

زوج من هذا العصر

2007-06-10T18:23:00.000+03:00

فى البداية تقدم العريس لعروسته بعد قصة حب و اتفق مع اهلها على مهر محدد ثم بعدها بفترة قام بتخفيض هذا المهر و لم يفعل الاهل سوى الرضا بما اراده و لم يكن فقيرا او لا يعمل بل هو فى عمل ثابت و جيد و مؤهل عالى و له مستقبل يجعله اكبر بكثير مما فيه ثم تزوجها بعد ان دفع اهلها مقدم للشقة و اشتروا لهم اجهزة واشياء كثيرة اكثر مما يأتى به
و اثناء الزواج دائما يأتوا له باحدث اجهزة المحمول ( الموبايل) كل 6 اشهر تقريبا و اشتروا جهاز اللاب توب و جميع ملابسه يشترونها له و اى مستلزمات اخرى
و بعد عام من زواجهما رزقا حديثا باول طفل لهما و كالعادة اهل الزوجة هم من جاءوا بكل مستلزمات هذا الطفل من اصغرها لاكبرها و طلب الزوج منهم ان يكون له سبوعا كبيرا و يحضره العائلة كلها و يتكلف عملها اهل الزوجة طبعا ثم عمل عقيقة ايضا و اخيرا كان هذا الحديث بينه و بين ام الزوجة
الزوج: انا بعتب عليكى انك جبتى كل الحاجات دى و نسيتى الكرسى بتاع الاطفال اللى بيتحط فى العربية
ام الزوجة: و هى فين العربية دى؟؟!!
الزوج : ااه طب خلاص هاتو العربية

هذه حقائق لا يوجد بها اى هزار

من رباعيات عبد الرحيم منصور

2007-06-03T18:39:00.000+03:00

طعم البيوت فى الشوارع
طعم الشوارع بيوت
الخطو طالع و راجع
بيتولد ويموت

*******************
على الطريق وش غربة
و خطو مالوش صاحب
و الوقت ميت فى تربة
و التربة ما ليها صاحب

*******************
سيبونى امشى لوحدى
سيبونى اتوه عريان
الدنيا توب على قدى
و ما اطقش انا الغطيان

*******************
عرفت عتبات بيوت
لكن ما خطيتهاش
و دقت ياما الموت
و القلب برضك عاش

*******************
انا غنوة مش لاقيه قلب
مش عايزه فى الضل اموت
خدونى كسوة و درب
شبابيك تستر بيوت

******************
يا صرخة القلب كونى
كونى يا صرخة شموس
و اوعى يا صرخة تهونى
تهون معاكى النفوس

******************
فيه فكر عايش مهاجر
زى الطيور الجريحة
و فكر ميت و قادر
يجعل حياتنا مريحة

موقع عبد الرحيم منصور
http://www.egypoet.tk/

اشتغالات

2007-05-25T02:33:00.000+03:00

abdoelkarim_u2000 (24/05/2007 12:36:05 ص): ياجماعة الرقم اللى هو 0128295505 مش بتاع دكتور للسرطان ولا حاجة ولا شيكولاته كادبرى فيها سرطان ولا حاجة زى ماناس كتير قالت ولا حتى لبان التشكلس ولا حتى فيه دكتور اسمه امير ابو حجازى والموضوع من الاول كان كدبة ومقلب من اللى على النت .... ارجوا نشر هذه الرسالة لان فيه واحد هايروح فى داهية بسبب الكلام ده وهايروح السجن وانا والله مبهزر وارجوا من كل من رأى تلك الرسالة ارسالها الى كل من يعرفهم ولكم جزيل الشكر

بفتح الياهوو اللى قليلا ما بفتحه يعنى فلقيت الرسالة دى جيالى من واحد طبعا معرفوش اكيد بيبعت لاى حد كده
للدرجة دى كدبة و مقلب من نت يضيع انسان عشان تعرفو بقى مخادعين النت و الناس اللى عندها فراغ بتضيعه فى كلام فاضى و يسبب بلاوى بعد كده!!!

تاج جديد

2007-05-22T04:26:00.000+03:00

تاج جديد جالى من محمد مدونة هدوء
شكرا على التدبيسة يا محمد

أحب شخص لقلبك في الدنيا؟إنسان مستعد تضحي بحياتك - ركز فى كلمة حياتك - عشانه؟
السؤال صعب جدا من اولها بس هقول انها واحدة لسه مجتش فى حياتى

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
مفيش و مقدرش حتى يجيلى التمنى ده

ما هو:اسم أجمل كتاب كتبه بشر قرأته ومحتفظ به حتى الان؟
كل كتبى بحتفظ بيها بس اجمل كتاب ممكن رواية اصوات لسليمان غلاب اخر اللى حبيته اوى يعنى

اسم كتاب - كتبه بشر برضه - انت متعلق بيه وبتقرأه كل فترة؟
الاعمال الكاملةاحمد فؤاد نجم

أهم جهاز منزلى أنت متعلق بيه أو بتستخدمه كتير؟
الكمبيوتر

مكان تحس بالراحة عندما تدخله؟
ساقية الصاوى و الاوبرا المصرية

شيء تحس بالراحة النفسية عندما تنظر إليه؟
النيل و اى طفل صغير

مكان تحس فيه بالحنين الى شيء لا تدرى ماهو و ذكريات جارفة الى لاشيء؟
النيل و ساقية الصاوى

اجمل مدينة زرتها داخل مصر ؟
مزرتش مدن كتير للاسف بس ممكن اقول اسكندرية

أجمل مكان طبيعي رأيته داخل مصر ؟
النيل و لو انى لازم الاقى الناس بترمى اى حاجة فيه و خلاص برضه حاجة تغيظ

شخصية كارتونية بتحبها؟
تيمون و تويتى برضه

نوع هاتفك المحمول؟
نوكيا6020

سرعة بروسيسور جهازك؟
مش عارف بس هو حلو يعنى

حجم ذاكرة -هارد- جهازك؟
100 جيجا

المساحة التى تشغلها المواد الاسلامية على جهازك؟
1 جيجا

نفس المساحة السالف ذكرها فى قلبك -الإجابة لنفسك عشان الرياء يا اخواننا -؟
طب لنفسى بقى

أهم هدف انت واضعه لحياتك الآن؟
انى اخلص الكلية بقى ربنا يسهل اما هدف الحياه يعنى الحلم الاكبر تخطيط مدينة جديدة باذن الله بس مختلفة يعنى

مواصفات فتى \فتاة الأحلام بالنسبة لك؟
الاربع حاجات المال والجمال و الاهل و ذات الدين زى ما الحديث للرسول عليه الصلاه والسلام قال
و تكون مثقفة و واعية و بتحب الحركة والحياه

صف ما يأتى:شعورك لما بتسمع كلمة مصر ؟
بتخنق و اقول ليه تسكتى زمن اتكلمى

شعورك لما بتسمع كلام عن اليهود؟
بدعى عليهم قولوا امين

شعورك لما بتشوف ظابط شرطة؟
بتخنق جدا و اسأل ده انسان بمعنى انسان؟؟

شعورك لما بتشوف الكناس العجوز فى الطريق؟
ببقى نفسى اعمله حاجة اخليه سعيد

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
واحد ربنا يهديه و يهدينا

إحساس يراودك فى إشارة مرور مغلقة بسبب مسئول كبير؟
احساس الزهأ و الخنقة

همرر التاج دلوقتى
عايشة وخلاص

و اى حد تانى لان كتير عمله واللى معملوش يعمله

هو المستقبل فى البلد دى ولا برة ؟؟؟

2007-05-15T02:55:00.000+03:00

كنت بتكلم مع واحد صاحبى و زميلى فى الكلية و هو متمرد على انه يعيش هنا بعد ما يتخرج و انه لازم يسافر و يشتغل برة عشان يحقق نفسه و حياته و يجيب فلوس و بعدها هيجى و ان هنا مش هيلاقى الشغل و مش هيوصل لحاجة و انه هيقعد على الاقل لسن الاربعين عشان يوصل لحاجة لو قعد هنا ومش هيجوز غير فى السن ده كده و لما قلتله لا ممكن تتجوز فى الطريق و تكمل معاك قاللى مفيش بنات كده و لما قولتله لا فيه مقتنعش برضه ومقتنعش بانه ممكن يقعد هنا و يعمل حاجة و انا بكلمه و بلاقى نفسى برد عليه كده بأن لا البلد دى هنقدر نوصل فيها ونعمل حاجة وكأنى واثق اوى انى هعمل كده مع ان ده فى علم الله و بعدين انا اصلا كنت بفكر فى السفر لفترة و ارجع و انى عايز اشوف الدنيا و البلاد التانية بس انا بفكر فيها سياحة اكتر من شغل يعنى و حتى لو شغل برة يبقى حاجة كده اللى هو ليا مشروع هناك بروحله وارجع لان هنا شغلى الاساسى مش مقتنع انى اقعدلى يجى خمس سنين برة عشان اشتغل و اجيب فلوس و بعدين مشفتش حد راح يشتغل ورجع كله بيروح و يطمع و يقعد لحد ما يطلعوه هما من الشغل ولا حاجة و ساعتها يرجع معاه فلوس ااه ممكن بس مش هيلاقى شغل غير بقى خاص كده مشروع هو يعمله و يا عالم هينجح و لا لا
يبقى البلد دى احسن و لا برة؟؟

هو الحب بالمسافات ولا النظر ولا اييييييه؟؟؟

2007-05-09T03:14:00.000+03:00

هو المثل بتاع البعيد عن العين بعيد عن القلب
ده صحيح ؟؟؟
طيب هو لو حد من اسكندرية بيحب حد من القاهرة و بقاله 3 سنين يعرفه بس مكنش بيشوفوه غير اسبوعين فى السنة ممكن يبقى بيحبه فعلا ؟؟
طيب هو الحب ده امتى ممكن يتكشف انه مزيف او وهمى و مكنش حب ؟؟؟

ابداع وجيه عزيز (بالمرة حد يعرف التفكير الابداعى)فيدونا

2007-04-30T21:04:00.000+03:00

امبارح كان يوم جميييييييييل حفلة للفنان الرائع وجيه عزيز فى متحف احمد شوقى و المكان للحفلة على الرغم من جماله بانه برجولة حواليها من التلات جهات جنينة و شجر و خضرة الا ان المكان كان صغير اوى على حفلة و ان اللى كانوا قاعدين اكتر منهم بكتير كانوا واقفين فى الحفلة و البرجولة صغيرة انك تشوف وجيه بسهولة كمان و حتى امكانيات الهندسة الصوتية والحاجات اللى كان طلبها منهم وجيه مجتش فاعتمدوا على حاجات بسيطة و وجيه اعتذر عن الموضوع ده لكن بقى اما بدأ نسانى اى مشكلة ولو صغيرة حتى بجد وجيه ابدع ابدااااااااااااااع مش ممكن كان رااااااائع غير كل مرة يعنى قعد غنى كل حاجة و عزف حلو كالعادة جامد لكن صوت مكنش دقيق اوى عشان مكان مفتوح و مفيش المعدات القوية لكن وجيه كان معوض كل ده غنى يجى 29 او 30 اغنية يعنى كل حاجة و كل حد كان بيطلب منه اغنية كان بيغنيها و حتى الاغنية اللى كنت مستنيها انا وعبد الهادى غناها من غير ما نطلبها و هى اغنية (هو الفرح غالى) اغنية رائعة طبعا و اى اغنية كنت مستنيها منه قالها و اتطلبت و بجد تدخل الحفلة لو كنت حزين او عادى هتطلع منها فرحاااان
اللى افتقدته فى الحفلة على سلامة الشاعر الجميل طبعا يعنى لا اسمع شعره ولا اشوفه حتى
من الحاجات اللى محبتهاش فى الحفلة التعليقات خاصة واحد بالذات كان غلس بشكل بيعلق و بصوت عالى بعد كل اغنية و يقول الله يا وجيه برافو يا وجيه غنى كذا يا وجيه قله اغانى كتير و دايما صوته عالى جدا طبعا من قلبى بتطلع برافو وهايل و جميل كل حاجة لوجيه لكن مش كده يعنى و الصوت ده و لا التعليقات دى و يعنى لو مش طايق و عايز يقول كل ده وجيه الحمد لله موجود بعد الحفلة بيستقبل الناس و يسمعهم يقوله كل اللى عاوزه بقى براحته
-------------------------------
بعيدا عن ابداع وجيه تعرفوا الابداع الفكرى بقى؟؟؟؟؟؟؟
اى حد يعرف اى حاجة عن التفكير الابداعى يقول ولو امثلة بقى كده يبقى هايل
بجد عندى بحث عن التفكير الابداعى
و ليكو عندى لو طلعت بحاجات جميلة عن الموضوع هكتبها فى بوست لان الموضوع عاجبنى اصلا و ان شاء الله الاقى عنه كتير
------------------------------
اخر حاجة بقى حبايبنا و اصحابى فى منهم كذا واحد دخل عالم التدوين و عايزكم تزوروهم بقى وتشوفوهم شجعوا الجداد كده يعنى
مدونة البتاع
صبرى(حاسب على كل ضحكة)
عبد الهادى

مستر زفت ايجيبت

2007-04-22T02:36:00.000+02:00

اولا البوست ده انا بكتبه و وصلتله كده من غيرماوس لانه مش راضى يشتغل معرفش غضب عليا ولا ايه بس انا برضه شغال بالكيبورد لحد ما اجيب ماوس تانى مع ان الحياه صعبة من غيره لكن اقدر اعيشها برضه بالعند فيه ههههههههههه
للاسف بقلب كده فى التلفزيون جت قناه مزيكا او ميلودى تقريبا فلقيت مستر ايجيبت مسابقة متخلفة كعادة المسابقات دى و كل واحد من المتسابقين عامل جسمه بقى بدى بلدينج و عامل فيها الرياضى عشان يكون الشاب الجامد و معظمهم طلبة جامعات وشغل سياحة بس معظمهم فاشلين و عايدين بالسنين بقى وحاجات كده مع ان شكلهم بوابين او صنايعية ملبسينهم كويس بس، على الاقل البوابين والصنايعية رجالة عن دول، و المذيعة تخلى كل واحد ادامه بنت جامدة ياخد منها ورقة فيها سؤال من انواع الدافع انك تكون مستر ايجيبت او قول مثال للظلم حاليا او حدث اثر فى العالم قريب و هكذا و بتيجى الاجابات السطحية والعامة اللى متاخدش منها بحاجة ولا تحس ان واحد فيهم بيفكر هو هبل و خلاص
و فى الاخر فاز مش عارف مين و هو بقى مستر مصر ابو شعر طويل و هايف زيهم كلهم
يااا سلااااااام هو ده بقى مستر مصر و رجل مصر و نعم المثل و القدوة و اللى هيشرفنا اكيد معرفش بايه بس هيشرف مصر اكيد
اذا كان دول رجالة مصر فيا خسارة على الرجالة و اكيد اكيد انا متأكد ان مفيش راجل بمعنى راجل فعلا هيفكر انه يخش مسابقة زى دى

الحب ايه؟

2007-04-13T04:19:00.000+02:00

خلينا نتكلم جد شوية عن الحب و اذا كنت بتشوفه حواليك هو ده فعلا الحب ولا مش هو ؟ انا بتكلم عن حب حبيب لحبيبة مش لاصدقاء او وطن او غيره ،الحب ده بتعرفه ازاى وبيكون فعلا موجود ازاى و تصدقه ازاى ؟
انا اللى بشوفه هو مجرد تعلق بان الواحد يشوف (اللى المفروض) حبيبته دى كتير و يقابلها دايما و يقضوها خروجات و فى الاوقات اللى ميتقابلوش فيها يبقى فى تليفونات كتييير و مش عارف الكلام بيكون فى ايه عشان يفضلوا كتير كده فى الكلام
هل هو فعلا كده الحب انى اتعلق بواحدة وتتعلق بيا ونفضل كل يوم نكلم بعض و نتقابل و هل برضه الحب ان حياتنا تبقى واحدة بحيث ان كل طرف يعرف التانى راح فين وجاى منين وبيقابل مين و هكذا؟؟
ولا الحب حاجة تانية انا مش عارفها ؟
اللى عارف يفيد بقى اتكلموووووو

--------------
للاعلان حفلة وجيه عزيز يوم18\4 الاربعاء الساعة 8 ونص فى وكالة الغورى بالحسين شارع المعز لدين الله
http://www.wagihaziz.com/
للى ميعرفش وجيه يدخل موقعه و فى بعض الاغانى

ثلاث تاجات مرة واحدة

2007-04-05T16:39:00.000+02:00

عشان خاطر انجى سمراء النيل اللى وجبت عليا اعمل المعجزة دى فهاعملها و عشان خاطر محمد حسام وجهة نظر برضه طلب

الاول
هل كنت طالب شاطر فى المدرسة ؟
الحقيقة انا كنت كويس يعنى مجتهد لكن اللى كان مشطرنى اكتر بصراحة امى لانها كانت بتمسكنى فى المواد النظرى العربى و الدراسات مبتسبنيش بس ده مكنتش بحبه خالص اما الرياضة طول عمرى شاطر فيها

ايه كانت احب مادة و اكره مادة ليك فى المدرسة و الكلية؟
المدرسة احب مادة الرياضيات و اكرها الكيمياء
الكلية احب مادة التصميم المعمارى و اكره مادة تكون اللى كلها نظرى ايا كانت

كنت عايز تتطلع ايه وأنت صغير ؟
و انا صغير ولا افتكر كنت عايز ابقى ايه تقريبا مكنتش عايز و على اول ثانوى كده اتمنيت اكون واحد معمارى و وصلتلها الحمد لله

التاج الثانى
التاج ده للمرأة بس الاسئلة هتتقلب يعنى بما ان راجل اللى بيرد
دائما ما تطالب المرأة بالحصول على حريتها . فما مفهوم الحرية في قاموس المرأة؟
مش عارف قاموس المرأة ده لكن اعتقد ان كل واحدة ليها مفهوم خاص بالحرية و الحرية بالنسبة ليا ان كل واحد يعمل اللى يحبه من غير ما يكون فى تعدى على حريات الاخرين

متى احسست بنفسك "خائنة"؟
اكيد مش هاحس انى خائنة ممكن خائن و ده لو حد طلب منى حاجة مثلا مهمة وغدرت بيه او حد قاللى سر و انا فضحته

هل يمكن ان تحب المرأة رجلين في نفس الوقت؟ نقول الحب و ليس الاعجاب.؟
لا يمكن و انا بستصعب ان راجل يحب اتنين رغم انها بتحصل و حلاله يتجوز اتنين وتلاتة واربعة لكن بستصعبها جدا كمان المفروض المرأة مفيش غير واحد بس يملى عنيها لكن ممكن تعجب مجرد اعجاب بغيره

إذا خذلك لعديد من المرات، هل ستستمرين معه في علاقة مستقرة؟؟
لا مش هستمر معاها فى علاقة الا لو بطلت تخذلنى لان فى حدود و قدرة للتحمل برضه

ماذا ترتدين فى أول لقاء لكِ مع حبيبكِ بالوصف التفصيلى؟
هلبس عادى زى اى مرة لما بخرج فيها لانى بحب اكون بطبيعتى

ما هى أول فكرة ترد الى ذهنك فى اللحظات الأولى بعد دخولك "المحظور"...لا توجد خيارات للإجابة؟
الحق نفسى واهرب و الا هكون وقعت

سؤال بالعربية الفصحى الى العربية الفصحى، أيعقل أن تكون هيفا وهبي المرأة العربية
من المحيط إلى الخليج، ماذا يمكن أن تفعلن لتغيير هذه الصورة، و كيف بامكاننا أن نساعدكن؟
السؤال بالتأكيد ليس لى ولا استطيع فعل شئ لكن لا تنافسوا هيفاء وهبى بالتأكيد لكن وضحوا الصورة الصحيحة للمرأة العربية

إذا عجبك شاب، بتجربي تلفتيلو انتباهو، كيف؟
والله انا راجل و بخجل الفت انتباه واحدة اعجبت بيها فاللى بيقدر يعمل كده بعتبره بيعمل معجزات

إذا عجبك شاب وما بادلك الاعجاب، شو بتعملي؟
لو اعجبت و بادلتنى الاعجاب يا ريييييييت اكيد لازم اقول بحبك بقى حرام الفرص تضيع

في مرشد بيقول انو البنت بترغب الشاب طالما انو بشكّل تحدي لها، شو رأيك؟
مين مرشد ده بتاع فانتازيا ؟؟!! هو تقريبا كده فعلا البنات دى تجرى ورا اللى يغلبها بس انما المطيع ولا اللى يرضيهم يطنشوه ضمنوه فى جيبهم

هيفاء وهبي، شادية، وفاتن حمامة: مع من تتماهين أكثر؟ (بصراحة ومن دون مثاليات.
مش عارف ايه تتماهين دى يا جدعان لكن لو تحب مين يعنى او مين اقرب ليك فولا واحدة بحبها

انتقي شخصية رجالية معروفة تتمتع بالكاريزما (برأيك) وتكلمي عنها ؟
لو رجالية يبقى الرسول صلى الله عليه وسلم طبعا
اما لو مرأة و كاريزما جامدة يعنى فمش فاكر بصراحة دلوقتى يظهر ان مفيش مرأة حاليا لمعت و نفعت فى شئ ههههههههههه

ونصيحةأو تعليق أرجو نشره: لما تبلشي تحكي لصاحبك عن أسماء ولادك المفترضة
(لأنن بعد ما إجو وأصلاً بعد ما انفتحت سيرة زواج، إلا إذا حاطة براسك الأمومة العازبة)
تأكدي إنو صادر قدامك إيام صعبة قريبة جايي
ايه اللهجة الغير مصرية دى على العموم مش هتنسوا انى راجل طبعا وبالنسبة للاسماء انا احب اسم يحيى و ادم و منال و سلسبيل

لماذا تنفخ المرأة في كل الزبادي كلما لسعتها الشوربة؟
لانها مبتتعلمش بسرعة و بتغلط كتير تقريبا والله اعلم واكيد مش كله كده

هل صحيح أن المرأة تختار الشخص غير المناسب في فترة المراهقة والشباب ثم تندب حظها بعد ذلك؟
غالبا ااه

ما هو أسوأ موعد غرامي مر بك؟ وما هو أكثر جزء ضايقك في هذا الموعد؟
بس هو يجى الموعد اصلا لان مفيش حاجة بتكمل معايا ولا توصل لمواعيد ولا اى حاجة اصلا

لماذا تدعي اغلب النساء انهن لا يجدن الطبخ؟
لانهم بالفعل كذلك اغلبهم و اظاهر ان ده مبقاش زمن انهم يطبخوا بس ربنا يستر ومتجيش علينا
احنا اللى نطبخ

ذكرى وظروف اول قبلة؟
هههههههه ايه يا جدعان الكلام ده
لا لا لا محصلش

هل تقبلين بأستمرار العلاقة التي تربطك بشخص (زوج أو عشيق) في حال مات الحب بينكما؟؟
لا مقبلش لازم نحيي الحب دايما ولو مات او انتهى يبقى خلااااااص

هل يستحق الرجل التضحية بكل شيء من اجله والبدء معه بحياة جديدة تبدأين فيها من الصفر؟؟
اه يستاهل ما دام الحب حقيقى وموجود ولازم تكون كده عشان الحياه تبقى حلوة ومش بقول كده لانى راجل

التاج التالت والاخير اخيرا
هل تسعد عندما يمرر لك احدهم تاج؟
اه بكون سعيد بس بحس انه شئ تقيل و مفروض عليا زى الواجب المدرسى كده لكن حلو

هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟
لا مهو كل اللى بيبعتولى التاجات ناس جميلة يعنى و بحبهم

?هل تستمتع عند إجابتك عن أسئلة التاج
اااااااااه

هل ترى للتاج أهمية حقيقية؟
ايوه الناس بتعرفنى اكتر وساعات بتخرج حاجات كنت عايز اقولها و مقولتهاش

هل فكرت في عمل تاج خاص لك من قبل؟
لاااااا

هل تفضل قراءة اجوبة التج عند المدونين الاخرين؟ أم لا تهتم سوى بالتدوينات الأخرى فقط؟
لا بهتم بكله و احب اعرف كل الناس

عندما ترد على التاج ما الذي تراعيه اكثر؟
اكيد الصدق والصراحة

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟
اه بحرص لانى بحب اعرف اجابتهم و بتغير لو حد قال وجهة نظر عجبتنى وخلتنى اشوف السؤال بشكل جديد

هل تلتزم حرفيا بأسئلة التاج ؟
اه للاسف

ما هي نوعية التاجات التي تفضلها؟
تاج من دهب او فضة
اى تاج يناقش موضوع هام زى بتاع المرأة ده

إلى من تحرص على تمرير التاج؟
الى اعز الناس و اصحابى اللى من برة التدوين قبل ما يكونوا اصحاب تدوين

تمرر التاج ده لمين؟
ااه لازم ادبس حد زى اللى دبسونى هادبس
نانوش كلمتين
ساسو عايشة وخلاص
ياسر اتأمل
عادل سلامة
مملكة
سلمى متغيرة شوية
و اى حد تانى يحب يتفضل يعنى

مى نصر

2007-04-02T18:31:00.000+02:00

بما ان الكلام بقى اخرس بالنسبالى دلوقتى يعنى فى الفترة دى فحبيت اسمعكم حد تانى وهو حد جميل فعلا انا حبيته واتمنى يعجبكو زى ما عجبنى كده
وهى الفنانة مى نصر فنانة لبنانية بتغنى اغانى فيروز وجوليا بطرس وغيرهم اتمنى تعجبكم الحاجات اللى هختارها دى

اغنية اصبح عندى الان بندقية لام كلثوم بجد بحبها ليها اكتر من ام كلثوم يمكن عشان مبحبهاش
http://www.maynasr.com/MUSICS_REP/09_tu04.mp3

اغنية عيطت لجوليا بطرس
http://www.maynasr.com/MUSICS_REP/06_tu04.mp3

اغنية بينى وبينك هدى حداد
http://www.maynasr.com/MUSICS_REP/04_tu04.mp3

اغنية اهواك لفيروز
http://www.maynasr.com/MUSICS_REP/08_tu04.mp3

لو عجبكم بقى و انا متفائل بكده هتلاقو اغانى ل3 حفلات على موقعها هنا

http://www.maynasr.com/concerts.htm

اسمعو و قولو رأيكو

الان انا حزين

2007-03-23T23:09:00.000+02:00

خلاص الدستور هيتعدل و الحكاية هتبقى سايبة اكتر و الموتة هتبقى موتة اكبر (مهى مش عيشة اكيد) و مفيش فى ايدينا حاجات كتير بس لازم كله يصوت و نعمل اللى علينا مع ان النتيجة معروفة (و ده مش تشاؤم) و غير ده اللى حازنى اكتر انى عايز اصوت فعلا و اعمل حاجة لكن عندى ما يعجزنى لكنى هاحاول بالتأكيد و حاجات كتير وخدانى و قتلانى حاليا يمكن ابقى اتكلم عنها بعدين
مش قادر اتكلم فى حاجة

فى الميكروباص

2007-03-12T03:19:00.000+02:00

بركب مكروباص ومروح و لسه السواق بيحمل لحد ما اتملى الميكروباص و اتبقى بس مكان واحد فاضى قدام جنب السواق كانت واحدة ست بس المهم مشى شوية كده لقى واحدة بتوقفوا وشايلة عيلين وقف عشان تركب ادام جنب الست اللى جنبه
راحت هى فتحت الباب و نزلت اللى كان قاعد عند الباب ده و قالتله اركب انت ادام و انا هركب مكانك نزل الشاب ده عشان يركب ادام و الست ام عيلين ركبت مكانه جه يركب هو بقى ادام قالتله الست لا مبركبش رجالة جنبى و بعدين السواق مشى بالعربية وساب الشاب و هو فضل واقف مذهول انه بعد ما ركب و قعد ينزل فى مكان صعب يركب منه تانى غير انه كان راكب اصلا و ملوش ذنب
الست ام عيلين قالت للست اللى قدام مركبتيهوش ليه قالتلها لا انا قولت رجالة ميركبوش جنبى و هو السواق كان معرفة ليها يعنى قريبها ولا حاجة

الموقف ده كان غايظنى اوى
يعنى واحدة بعيلين واقفة ونفسها تركب و تروح و لما لقت فرصة ركبت و اما عرفت الشاب اللى نزلها مركبش مفكرتش تنزل ترجعه يركب فكرت فى نفسها بس

التانية اللى كانت قاعدة ادام عاملة فيها مبتركبش رجالة و هى حاجزة بقى المكان ما دام السواق قريبها او معرفة و ملهاش دعوة بالواد اللى نزل برضه ده مش موافقة تركبه عشان مبدأها العبقرى

السواق ملوش دعوة اهو الميكروباص فيه ناس وخلاص مين ركب مين نزل ملوش دعوة اهو هيلاقى حد ياخد منه اجرته وخلاص اما المكان اللى جنبه فمش مهم حد يركب عشان الهانم اللى معاه طبعا تأمر

الشاب ده المسكين فعلا بس معلش اصل كل واحد بيفكر فى نفسه ولو كنت فكرت فى نفسك مكنتش نزلت للست اللى نزلتك

احمد منيب الذكرى 17

2007-03-06T03:38:00.000+02:00

الراجل ده كان تحفة و لازم نفتكره فى ذكراه و نفتكر الحاجات الجميلة اللى عملها الراجل ده كان طيب و هو نوبى للى ميعرفوش هحاول اقول كل اللى اعرفه عنه هو كان الاب الروحى لمنير و حاجات كتير اوى لمنير لحنها ليه و بدايات حميد الشاعرى غناله و علاء عبد الخالق غنى الفرح ليه صاحب و فؤاد غناله صدقنى يا صاحبى وحميد رجع تانى فى الشريط الاخير ليه غناله يا وعدى على الايام

وقدم احمد منيب اكثر من 85 لحناً لكبار المطربين وغنى من هذه الحان اكثر من 53 لحناً

و لو تسمعوا اغانى الراجل تشوفوا اد ايه جميلة وانه حاول يغنى لكل حاجة و يمكن غنى لكل حاجة فعلا

اسمع مثلا عشرية شوف بيتكلم عن الزوجة ازاى و بيقول مين اللى يسهر جنبى الليل مين اللى باله معايا طويل

اسمع بنسهر الاوتار اللى غناها منير برضه اغنية تحفة

اسمعه بيغنى مع اطفال الدنيا برد و بيغنى بابا يا بابا وبيقول بابا يا بابا يا ضى عنينا قول بتحب مين اكتر فينا و كلامه ليهم تحس كلام بين اب و ولاده فعلا

اسمع الوعد والمكتوب و تعرف حال الدنيا و المكتوب علينا

و اسمع احسن فرحة باغنية فرحة قلبى و اه و اه و يا فرحة قلبى كنت طير وصبحت مراكبى يعنى ملكت فرحة الاتنين وكأنك عشت الحالتين و تسمعها تفرح فعلا

و اسمع مد الايام اللى تديك امل و تنسى الحزن و هى اللى انا حاططها على المدونة تسمعوهاا اهو جميلة اوى

و اسمع روق بالك و لو كان مشغول اكيد هيروق فعلا و تبقى سعيد

و اسمع صدقنى يا صاحبى وتحس بان واحد صاحبك فعلا بيكلمك

و اسمع مشتاقين وعيط بقى

و اسمع راح اغنى و ربك هو العالم و ابو الريش و مفيناش من الخوف و كان ماشى وكان وكان و مصرية وانا مصرى ومكتوبين لبعض و اتمايلى

و الحانه بقى مع منير كتييييير

الله يرحمك يا منيب يا راجل يا طيب

اغانيه هتلاقوها فى طرب توب وفى كذا حتة دور وهتلاقى و ان حد عايز حاجة يقولى ان شاء الله اساعده

مصر ونيجيريا

2007-03-04T00:01:00.000+02:00

كنت فى كليتى قاعد انا و شلتى لا بينا ولا علينا و شوية مننا كانوا بيلعبوا بكانز كأنها كورة (معلش بقى هيموتو على كورة فى الوقت ده) المهم لاقينا كمية ناس من الزنوج نازلين من مبنى و بعدين شوية منهم قرروا يقفوا معانا عشان عايزين يتصوروا معانا اتصوروا ومشيوا وبقى واحد منهم
بدأ كلامه معانا الاول عن الكورة و اسماء اللاعيبة النيجيرين واحنا نقوله اسامى برضه و قلنا كمان مصريين و بعدين خرجنا من موضوع الكورة ودخل فى الكلام التقيل بقى
كان بيسألنا و يحاول يعرف اكبر معلومات عن مصر وكان فاكر ان احنا عندنا الكهربا و الجاز و الانترنت و الخدمات دى كلها ببلاش و طبعا فهمناه انها بفلوس مش ببلاش حاجة عندنا فسأل سعر الجاز بتاع الاكل والكلام ده قلناله تقريبا 4 جنيه قالنا مهو رخيص اهو قلناه بس حسب الاستهلاك بقى
بعدين سأل عن الدكاترة فى مصر الاطباء بياخدوا كام مرتب قلناله لو حكومة كبيره 200 جنيه انما لو خاص هيبقى ازيد حسب و سألنا عن الحالة الاقتصادية للبلد و قلناله اننا بلد فقير الناس بتدور على اكلها بالعافية و دى النسبة الكبيرة وعندنا اغنيا اوى برضه اما الوسط فهما قليل و بعدين قالنا على كده انتو تسافرو احسن برة مصر عشان الفلوس وكده قالوله بلدنا ولا يمكن نسيبها و احنا االمصريين منسيبهاش ممكن بس نسافر و نرجع تانى ماشى قعد يكلمنا عن ان الواحد يبقى عنده حلم و ايمان قوى و قال كلام جامد كده اننا لازم نكون نفسنا و نعمل حاجة و قالنا انه عايش بين نيجريا ولندن عشان يكون حاجة كبيرة برضه
و سألنا السفر سهل ولا لا قلناله لا طبعا مش سهل و سألنا على الفيزا قالناله اه صعب تطلع و ان العرب كمان عموما بيحرصوا منهم
بعدين سألنا عن البنات و كان بيسأل ممكن واحد يمشى مع واحدة فى مصر قلناله اه ممكن بنعملها بس التقاليد و المعروف لا المفروض مينفعش قالنا عندهم عادى و قالنا انه متجوز بس بيكون ليه صديقة لكن بيخفى عن مراته لانها بتتضايق
بعدين شاف كام واحد مننا بيشرب سجاير قال ليه ومضرة و الكلام ده قالوله اه عارفين قال طيب ومش ممنوعة قلناله لا قال طيب البيرة قلناله لا دى منشربهاش والمسلمين ميشربوهاش قال ليه قلناله عشان بتفقد العقل و مينفعش مع صلاه المسلمين قال لو واحدة بس مش هتفقد وعى قلناله لا طبعا هو المبدأ من اوله مينفعش (طبعا مرضيناش نقول ان فى مسلمين كاسرين القاعدة و بيشربوا بيرة وكل حاجة)
بعدين سأل على الشيشة قالوله اه برضه بيشربوها قال دى بعلبتين سجاير لوحدها و مضرة جدا قالوله عارفين قال المفروض متشربوهاش و الصحة فواحد مننا قاله لا انا بشرب و بجرى ساعتين تلاتة والعب كورة الراجل مصدقش وقاله لا مش معقول
بعدين سألته هو فى نيجريا محدش بيشرب سجاير قال عندكو هنا فى اى مكان بتشربوا و بتتعزموا على بعض غريبة اوى انما عندنا محدش بيشرب واللى بيشرب بيكون مدارى ومخبى مش عادى كده و ان اللى بيشرب ده او يعزم على حد هناك بيقولوا عليه
bad boy
قلناله لا هنا عادى
و بعدين ودعناه ومشينا على اساس هنتقابل تانى بقى لانه عندنا بيدوهم كورسات وكده فى كليتنا

و بعدين فى الوقت ده

2007-02-21T00:01:00.000+02:00

حاجة وحشة اوى الوقت ده عمره ما خلانى مرتاح دايما عندى نظام الدراسة كله مشاريع وابحاث اطلع من واحد ادخل فى التانى ودايما لازم اتزنق فيهم او فى لوحة اسلمها واقعد اسهر عليها عشان الوقت و الحق اخلص
او يوم احب اخرج فيه و اقابل اصحابى والاقى المعاد ضارب مع حاجة تانية فمقدرش او احب اروح حفلة و الوقت برضه يطلع مش نافع
حتى و انا قاعد فى البيت كده عندى كتب كتييير من المعرض اللى فات واللى قبله و لسه متقرتش نفسى اقراهم اوى بس فين الوقت
كمان الكتابة ساعات بكون محتاج ابقى رايق كده و رامى كل حاجة ورا ضهرى لكن يفضل برضه الوقت و حاجات كتير تشغل
الاهل كمان ساعات ممكن يكلمونى فى معاد رجوعى صحيح كتير بقيت بعودهم بس لسه برضه لازم يتكلمو
حتى الصلاه بتفوت كتير منها و امتى مفوتهاش بقى حجج فاضية انا فيها يا رب سااامح و اهدي
الوقت دايما بيجرى و بيضيع مش عارف بلحق منه ايه وفاتنى اد ايه

الحل القتل ام العلاج؟؟

2007-02-12T21:23:00.000+02:00

فى حلقة لهالة سرحان شفتها بالصدفة اللى لفت انتباهى في الحلقة دى انها كانت جايبة بنات كانوا مدمنين و دلوقتى المفروض بطلوا لكن المشرفة بتاعتهم اللى من المصحة اللى هما فيها ولا معرفش فين قالت انهم طبعا مبيسيبوش حد و بيفضل طول العمر معاهم او متابعينه عشان ميرجعش
ساعتها بابا قاللى انهم اكيد بيرجعوا لانهم عمرهم ما هيقدرو يبطلوها
و انا قلتله ما هما متابعين قاللى لا برضه و بعدين قاللى انت عارف فى الصين بيعملوا فى المدمنين ايه؟
فى الصين بيعدموهم
و هو ده حل مناسب او عادل؟
قاللى اه لان مش هيبطلوا ولان باقى الناس هيشوفوا كده فمش هيفكروا يدمنوا
قلتله بس برضه مش حل عادل افرض واحد ظروفه اجبرتهاو اى حاجة وهو ندمان و نفسه يبطلها فعلا
قاللى مش هيبطلها
تفتكرو الحل العادل نموتهم ولا نفضل برضه نحاول نعالجهم برغم ان العلاج فعلا صعب اوى بس انا شايفه ارحم واحسن

بغض النظر عن برنامج هالة سرحان لانه دلوقتى فى تحقيقات عليها لانهم بيقولوا ان اللى جابتهم دول مأجراهم عشان يعملوا الحلقات ولا هما مدمنين ولا حاجة او حتى القضية اللى بيتكلموا فيها ان اللى بتجيبه ده اساءة لسمعة مصر الجملة اللى مش هنخلص منها دى او ان فى رقابة ومينفعش الكلام اللى اتقال يكون بيتقال فى برامج